العـفـار : نمشي بربعٍ كنهم دولة الــروم … ومركاضهم بالضيق يجلي اللوايم

[ابن نجد]

الشيخ ضيف الله بن تركي بن صنهات بن حميد العتيبي ، لقب واشتهر بين جميع القبائل بالعفار لانه يلحق الفارس ثم يطرحه ارضا من فوق صهوة جواده ثم ينزل له ويدوس رأسه بالتراب ويعفره بالتراب حتى يمتلى وجهه بالتراب ، ثم يقتله او يمن عليه ويطلق سبيله ، والفارس لا ينجب الا فارس وهو كأبيه الشيخ تركي قويا لايهاب الموت ، وهذه احدى قصائدة الشهيرة ، ومن يجد من الاعضاء الكرام قصائد له نرجو ان تجمع في مكان واحد.

يقول العفــــار :

يا الله يلي نطلبه دايـم الدوم
يا مخلف النيه بنقض العزايم

الكبد ما تقبل من الزاد مطعـوم
ومن شافني كني عن الزاد صايم

البارحه عيني قزت عن كرى النوم
يـوم الثـريا قابلـت للنعايـــم

تخالفت بالقلب قالات وهموم
يوم الشكاله ماتهم البهايـم

بالليل اهوجس لي بقالات وعزوم
للروح خلاقٍ وللعمـر سايـــم

ناسٍ نصالحهم وناسٍ لنا قوم
وأكوان يعبى غبها كل حايـم

يا ما سكنا نجد من غير تسلوم
بصولات تلقابه صفا الجو غايم

يا نجد والله ما نزلناك بسلـوم
ولا انته بورث جدودنا بالقدايم

ويا نجد اخذنا فيك حد ومعلوم
وصفا جنابك عقب نطل العمايم

اخذناك عقب مدارك العمر بالسوم
سومٍ يخسـر لابـسات اللـثايـم

كم خايعٍ بين الحريبين ماسوم
كلٍ يباه واصليــن الكظايـم

عاداتنا نرعى الخطر دايم الدوم
يرعى دبشنا فيه والحظ قايـم

نمشي بربعٍ كنهم دولة الــروم
ومركاضهم بالضيق يجلي اللوايم

لا صاح صياح الضحا جن حثلوم
الخيل بالفرسان عجـلٍ همايـم

يازين سجاتنا على الفطر الكوم
يومٍ بلاش يوم جبـنا الغنايـم


نرجو ان تحوز على اعجابكم ، ورحم الله العفار
-----------------------------------------------------------------
زماننا غير زمانهم وحتى نتذكر الاولين
اخوكم ابن نجد