الناشـده

[ابن شامان]

السلام عليكم ورحمة الله وبركاته



يا ناشـده بلاش نشـده وأقاويـل
=============== عابر سبيـل وباكـر الصبـح ماشي

ماجيت سايح يالرمـوش المظاليـل
============== ولا جيـت أدوّر في بلدكـم معاشي

لو انـها معكـم تطيـب التعاليـل
============= يا أهْل الطـرب والفرفشـه والتماشي

ولا جيت في راسي ضرم للفناجيـل
============= يا أهْل الدلال اللـي تجيـب المغـاشي

انـا إقهـوتي مكرمـات المعاميـل
============= يوم إقهوتكـم فـي قـزاز الغـراشي

والبن لامنّـه نجض وإرتهـى الهيـل
============= هذيـك والله نشـوتي وانتعـاشـي

في مجلسٍ ما ضم رعديـد وإخبيـل
============= ولا ضم لاش ولا احتفـى فيه واشـي

ولا تمـركابـه خطـاة المهابيـل
============= اللـي تشابـه فالحيـاه المـواشـي

تاكل وتشرب من حساب الازاويـل
============= ولا تهـوش ولا تـرد الهـواشـي

أوادمٍ في ضـف أوادم معاويـل
============= تسـرح وتضـوي للعلف والعراشـي

لا والله الاّ مجلـسٍ يعـدل الميـل
============= ويضـم حلويـن النبـا والنقاشـي

حديثهـم كنّـه عبيـر الاكاليـل
============= وعن الكـرم ما يعرفـون التحاشـي

والقل لاصار الثـرى مدّهـم سيـل
============= والسيـل مخـزون المـزون النواشـي

والذل لا ضـام القلـوب المعاليـل
============= فزعاتـهم مـن كبريـاء النجاشـي

فالصـامله فيهـم قسـاوة مغاليـل
============= وللمـزح يا بنيّـه وجيـهٍ بشاشـي

للصاحب احلى من حليـب المباهيـل
============= وأمرْ مـن طعـم الشـري للغشاشـي

ويا ناشـده ماني خـواجه وموديـل
============= ولا أفنـدي وآتصنـع وآخاشـي

لبست بدله واسكـن بوسـط هوتيـل
============= غريـب وألبـس لبسكم يالرياشـي

جيـت بلـزوم وللـزوم الرياجيـل
============= وان سهّـل الله وانقضـى ما بقاشـي

حجزت للعـوده علـى اول تساهيـل
============= في ليـل والاّ مـع طلـوع الغباشـي

ولاني علـى الفـرقا نديـم المواويـل
============= فرقاكم اعيـادي وتنهيـض جاشـي

did you get it , ok يا فاتنه حيـل
============= قالـت : نعـم وانا لبسـت إندهاشـي

يا يعربيـه ليـه ؟ من غيـر تمثيـل
============== علـى السطـر مالك ومال الحواشـي

لسانك افصـح ما يكـون وشهاليـل
============== والغيـم ثغـرك والكـلام الرشاشـي

وثمـانك الذبّـل رحيـق المناحيـل
============== واشفاهك الجمر ( إش بنا ما بنا شـي )

والنور وجهك كـن فالوجـه قنديـل
============== يا نور صـار الزين حـولك فراشـي

والليـل مجـدولك وانا غربتـي ليـل
============== والريـح يتمنـى حريـرك وطاشـي

مالـه شبيـه الاّ الكحيلـه من الخيـل
============== حـزة اطراد وفوقهـا القـرم شاشـي

والجيـد ما يحتـاج عقـد وسلاسيـل
============== يحتـاج ماشـالله عليـه وبواشـي

بوشيـةٍ تحماه مـن نظـرة الويـل
============== ومن فزّة القلـب الحسـود الدفاشـي

والردف ذكّـرني نفـود وغراميـل
============== والخصـر نسّـاني تقـول امتلاشـي

يا منتعش ليـه الهـدب فاتـر الحيـل
============== يا امرتب اربكت الخفوق الهشاشـي

وش جابـك لدار انحـلال وبهاذيـل
============== ماهيـب لك يالخيـزران النشاشـي

وانا هنا لـي كـم مع كـم ما ميـل
============== وميّلتـني غصـبٍ عليّـه بلاشـي

وقالت : وحضن الدمع كف ومناديـل
============== والكحل سـال وطالع الحـزن غاشـي

تصـور انـي كنـت في اول ابريـل
============== بليلـة زفافـي وازدهـر في قماشـي

الصاله / الورد / الصبـايا / الهلاهيـل
============== ناسـي / عريسـي والحيـا وارتعاشـي

واحـلامي البيضـاء وبغداد وأربيـل
============== ونسيـم دجلـه والهـوى وانكماشـي

ونظـرات عينـه والليـال المقابيـل
============== واحسـاس صعب آعبّـره يا مداشـي

وفجأه تغيّر لـون مجـرى التفاصيـل
============== ولمحت وجه المـوت والمـوت عاشـي

صوت الرصاص يبعثـر الناس تقتيـل
============== مـا كنّـه الاّ شرهـةٍ فـي بقاشـي

يا ليتهـا كذبه من أبريـل ف أبريـل
=============== لكنهـا كانت حقيقـه يـا ماشـي



وتسلمــــــــــــــــون


مرزوق العتيبي

[مطلق الشيباني]

سلمت ولا هنت يابن العم على هالقصيده الجزله

وصح لسان قايلها ومن جابها لمنتدى الهيلااااااااااااااااااا

مع تحيات :- مطلق الشيباني ..........................

[ابو غازي]

ومن قال سالم وغانم ...

وياليت تبين لنا مناسبة القصيدة ...

وبيض الله وجهك يابن شامان

[ابن شامان]

اخوي مطلق الشيباني شكرا لمرورك
وصح لسان من يقول
تحياتي

[ابن شامان]

اخوي ابو غازي سعيد بمرورك وعلى مااظن
ان فيه وحده كانت تنشد الشاعر وردعليها
تحياتي

[محمد العتيبي]

صح لسان الشاعر / مرزوق العتيبي

قصيده رائعه جدا ..

تسلم يداك يالغالي على النقل الرائع

تحيتي
...

التوقيع

للتواصل عبر twitter تويتر al_bargawy@