عجاب الدغيلبي وزياد المزرمي في حفلة الدوادمي

[فهيد النفيعي]

هذا الطاروق من حفلة الدوادمي صيفية هذا العام عند قبيلة العصمة بحضور الشعراء الشباب :

محمد النخيش
زياد المزرمي المطيري
عجاب الدغيلبي
حمدان العضياني

اخترت لكم هذا الطاروق الذي جمع بين عجاب الدغيلبي و زياد المزرمي


عجاب الدغيلبي :
يامرحبا ترحيبة ٍ ياصل صداها كل دار ** من طيبها حتى ذعاذيع الهبوب تذيعها
يازياد بن صالح تفضل تحت فحص الإختبار ** مير النتيجة فالنهاية بقلمي توقيعها



زياد المزرمي :
دام البقاء يلي ترحب في محل أهل الوقار ** يوم العلوم الطيبة فالسوق ما أحد يبيعها
أنا بخير وعافية والمبتلى يرجع شهار ** نصف المهبل في شهار محصل ٍ تسنيعها


عجاب الدغيلبي:
صحيح من يصبح ضحية للشكوك اللي تثار ** يستاهل النكبة ليا صار الشكوك يطيعها
من القهر والله مدري عنك لو متّ انتحار ** وجنازتك مافيه أحد يحضر على تشييعها


زياد المزرمي:
أنتم تبون بنشرة الأخبار وألا الإختصار ** بعض السوالف ماتفيد اللي يبا تجميعها
ما أنته بباني لك جدار ولا أنته بهادم جدار ** الشركة اللي ببتسامات العرب توزيعها


عجاب الدغيلبي:
بانت عليك فتوق كبرى مايغطيها الستار ** لو تجتمع عزوتك ماتقدر على ترقيعها
أصل الذهب يبقى ذهب حتى لو إن الوقت بار ** وألا الحديدة لو تلمّع فاشل ٍ تلميعها


زياد المزرمي:
اللي لبس ثوب الهزيمة مايعرف الانتصار ** أهل القلوب الغافلة ماودي بترويعها

آخر تعديل فهيد النفيعي يوم 08-Jul-2012 في 08:15 AM.

[سقم المعادين]

آللـيـل يـ عجـّأب / ..
صحت ألسنتهم .. وتراهم كلهم من منتدانـآ

[سعيد مرزوق العبد]

ليست محاوره بل مشروع محاوره

صحة السنتهم

[ماجد العصيمي]

المعنى كما يظهر لي عن غياب تركي عن الحفلات فالصيفيه

[قاسي العتيبي]

ماجد العصيمي عز الله إنك جبت المعنى صح كما أنه ينطبق على تهرب تركي من سفر

تمنيت لو المحاورة أطول من كذا
مدري ايش السبب في قصرها

بانت عليك فتوق كبرى مايغطيها الستار
لو تجتمع عزوتك ماتقدر على ترقيعها

الله الله ياعجاب بيت قوي المعنى والمبنى

عزا الله إن فتوق تركي ماتنترقع ههههههه

[فهيد النفيعي]

المشاركة الأصلية كتبت بواسطة سقم المعادين

آللـيـل يـ عجـّأب / ..
صحت ألسنتهم .. وتراهم كلهم من منتدانـآ

سقم المعادين كلهم من منتدأنا هههههههه
ياخوي الأغلبية من عمالقة المحاورة لهم عضوية في هذا المنتدى
وعلى رأسهم حبيب العازمي