بوح الحرف ونزف القلم { وصيه لـ الشاعر عبيد بن بريكان اللاصوم الدغيلبي

[الـلاصـوم]

هذه القصيدة هي بوح يتجلى به الحنين الى الماضي والى الايام الخاليه ومن عاصره شاعرنا من رجال لم يتبقى منهم الا اقل من اصابع اليد الواحده .

اما مناسبة هذه القصيدة فهي مرور الشاعر بالابرق الاوسط الواقع بالجلة وتذكره للمنازل ومن جاورهم بها من رجال يبكي الزمان امثالهم وتنقل الشاعر من معلم الى اخر فكان كل معلم كـ كتاب تاريخ يخرج مابه من شخصيات واحداث ، لم يملك شاعرنا نفسه حتى أتم قصيدتة بأعلى الضلع متوجداً على الزمان والمكان ومن قبل ذلك الرجال .

عزي لقلبي من خطاء الوقت عزاه= من غير وقتي ما قبلت الخطيه
وقتي بلاني جعل الأيام تبلاه=نويت أسجل للأحفاد الوصيه
صديق جدك حط كفك بيمناه=وصافه ليا صافاك من حسن نيه
وعدو جدك لا تقبل خطاياه=رد الجزاء في الليله الخرمسيه
مادام وقت عبيد حده على أقصاه=وضواء هموم كبر قار الطميه
عديت رجماً يتعب الرجل مرقاه=وأخذت في راس الطويل ضحويه
راجع سجل هموم حزنه وذكراه=وهمٍ وضع في القلب كيه وكيه
ومضيت يومي في مشارف حجاياه=وقزرتها مابين شمس وفيه
والعين هلت دمعها وأرخصت ماه=في جال مزموم الحجاء والبنيه
ذكرني المرقاب حي عرفناه=جداي عبراتي وأفرك يديه
كم أبلج وقتي سعالي بفرقاه=ربعاً لهم في الطيب روحه وجيه
جمل محامل لو عضوده مثناه=لو جار حمله ما يعرف الشكيه
لو عضت الضلفه فلا تسمع رغاه=يشيل حمل ما تشيله مطيه
وجدي عليهم وجد من ضاعت آرياه=ولوه قومٍ يّتمون الصبيه
وجدي عليهم وجد من ماتو أبناه=شاف الوزاء والذل والمحقريه
أو وجد من شاف الجفاء من دناياه=يصبر ولو طعون كبده خفيه
عليه كبدي واردات ضماياه=من فوق بير خلخل الوقت طيه
بعد سقط ناعورها وأفرد رشاه=صدرت منها والمشاعر ضميه
لولا الفؤاد محاصراته حناياه=أمسيت أربط بالحبال القويه
وأرمي هدومي والظلام أتلقاه=كني كفيف واطي راس حيه
وأقنب قنيب الذيب لاحل طرياه=ومثلت صوته في الصباح وعشيه
وعليه قلبي بالغات كواياه=أربع نجيض وست في القلب نيه
والله لآواراء في الثراء ما نسيناه=بعيد الهقاوي مارضى بالرديه
أبكي على شليويح مثله وشرواه=وأبكي على نايف زبون الونيه
صدقان عمري ودعوه واحلآلآه=راحو وأنا عيني عليهم شقيه
وجدي على اللي تفعل الطيب يمناه=راع الجمايل والكفوف النديه
من راس عودٍ كايد العلم ينصاه=زبونها لاجات قاله عصيه
عودٍ ينومس في نهار المثاراه=يفداء بنفسه في المواقف خويه
أموت وأحياء مثلهم ما لقيناه=من خلقتي ماشفت في الناس زيه
لو البكاء بيعيد ميت بكيناه=وقدمت روحي دون روحه هديه
ياليتني عند الأجل من فداياه=وأكون في الدنيا ربحت القضيه
روحي فداء روحه زبون المجناه=وأنا محله يوم وقت المنيه
والله ثم والله ماهي محاباه=وأقولها والرب يشهد عليه
وأنا أحمد الله ماقفه مافقدناه=خلف عيال في المواقف وفيه
أخر لنا مشعان والطيب مبداه=وأيضاً أخوانه ندر صيرميه
شليويح جاء بعده رجال مسماه=رجالهم عندي يلاقي سريه
الزول زوله والحلايا حلاياه=في الطيب عندي زايدين شويه
يابعد نوهاته ويا مطول خطاه=والحمل فادح يارجال الحميه
وأظن لو طال الطريق يتحداه=أبوه أخو حصه وجده سميه
مدام أبوبندر ليا جيت نلقاه=وهلآ ورحب قبل رد التحيه
لادق ناقوس المخاطر نصيناه=وفرج عنى قلبٍ تسارج ضويه
راس سواة طويق تحمد سجاياه=ويمنى على لطم المعادي جريه
يضحك حجاجه ويتبسم محياه=مع العود الأزرق دلةٍ شاذليه
فوق القعود يحط كبش ولد شاه=والبن بالرسلان لا زمزميه
بجوٍ عسى غر السحايب توطاه=نوٍ حقوق ومقتفيه برديه
قام يتكاشف بارقه صوب منشأه=وتردم قنوف المزنه العقربيه
تمسي وتصبح والخبايا مملاه=وكل الملازم والخباري مليه
سيله تعدى عن حدوده ومجراه=مع درب رفضات المزون البطيه
ودور الأسبوع إنقال شبعت رعاياه=وفياضها صارت تقول محميه
ويعم مدهال العشاير ومرباه=وطرف النفود مع الرياض المريه
ديرة بني عمي نمور مضراه=حصون عن لوعات بقعاء ذريه
قطعانهم لابدر الوسم ترعاه=بسيوف هند للرقاب محنيه
والكل منهم موردٍ حد شلفاه=ربعاً تحيّل للطراد الثنيه
إن ماغزانا الجار ولا غزيناه=تحكم علينا العاده الجاهليه
طيب إحدداهم لأحتماء الهوش طيباه=أهل الرمك والجيش وبوارديه
وحنا ليارد البراء مانترجاه=نجزاه من بعد الغزيه غزيه
قدام حكم اللي عسى الخلد ماوآه=يحكم بشرع الله وسنة نبيه
عبدالعزيز اللي طروقه مخلاه=همه صلاح المجتمع والرعيه
وشامان من خان الوطن قص علباه=وصعابها صارت ذلول هديه
والأمن سايد والمصارف معباه=والشعب عايش في حياةٍ هنيه
تعاقبوه أبناه في خط ممشاه=لاعل أبومتعب حياته مديه