رائعة ماجد الحثربي الشمري(ما ضالني غير السويطات ضايل..دغيم ثنى بالسيف دوني وسله)

[ابن نجد]

هذة قصة ماجد الحثربي الشمري عندما كان مع قبيلتة شمر ومعها عدة قبايل على خبراء ماء متجمعين وكلهم اهل حلال ، واتفق شيوخ القبايل الثلاثة ان تفرش البيوت اي بمعنى ان الدخالة ممنوعه ، اي اذا انسان عمل جرما لايمكن بامكان احد من هذة القبايل الثلاث ان يصبح دخيل عندهم لكي لا تعم الفوضى والفتنة وخصوصا هم مجتمعين على مصلحة للجميع.

فكان عند مفوز التجغيف( من شمر) اسير وهرب منة الى ان وصل الى مراح ابل ماجد الحثربي الشمري ، وكان ماجد غير موجود حيث كان في المقناص وكانت ام ماجد تشاهد ماذا حصل للاسير فأخذتها الشيمة كيف يقضبونة عند مراح الابل وقامت وهدت الواسط اللي هو عمود البيت وجلست امام البيت ، وحين حضر ماجد الحثربي من المقناص انصدم عندما راى البيت طايح ، وركض الى أمة قال يمة عسى ما شر لية رميتي البيت قالت البيت اللي مايفك دخيله مهو بيت واخبرته بالسالفة.

ذهب الى الشيخ الجربا وطلب حقة من مفوز وانه لايحق لهم ان يمسكوا دخيله في مراح ابله وهذه اهانه له ، فقال الشيخ الجربا : لاحق لك ياالشمري وانت تعرف الاتفاق بأن مايحمى الدخيل وابن عمك على حق واخذ اسيرة ، فزعل ماجد الحثربي الشمري وشد على ذلولة واخذ اغراضة وأخذ أمه وذهب الى ديرة خوالة عمر وزيد المدلاة ونزل عندهم وبالة مشغول يبي يأخذ حقة اللي سلب منه في وضح النهار حيث لايريد ان يعيش مهانا وبيته لم يحمي دخيله ورغم علمه بأتفاقية الدخالة اللي اتفقت القبائل الثلاثة عليها ، لكنها صعبة عند العرب في ذلك الوقت بأن لايحمى الدخيل رغم الاتفاقيات.

وجلس فترة عند خوالة ولكنة مشتت الفكر ضايق الصدر ، وكل صباح يخرج من عندهم الى جبل غريب ومعه طيرة اللي مبرقعة ولا يصيد شي رغم وفرة الصيد عندهم ، قال خالة(عمر) : ماجد يخرج كل يوم ومايجيب صيد اكيد انه عاشق وكان ماجد على قدر من الجمال ، وكان خالة يسالة دائما عما به ولكنة يقول ما فيه شي ، وذات مرة ارسل ابنتة التي كانت على قدر كبير من الجمال لتقوم بامتحانة وذهبت له وحاورتة حوار العشاق لكي تعرف مابه لكنه اكتفى بقوله (ماني اللي ببالك سلم الله رجالك) بدون ادنى اهتمام بها فرجعت البنت الى والدها وقالت : يباه ماجد مشكلتة ما هي مشكلة عشق ماجد مشكلتة مشكلة رجال ولما عاد المغرب (ماجد) اصر خالة ان يخبره بكل شي ، فأجابه ماجد بهذة القصيدة :

ياعمر يالمدلاة يانازل الخوف
اذهبتني وانت تنشد لك ايام

ياخو فهيد اللي بك الطيب ماصوف
والكل منكم يشبع الطير لا حام

لو عرضوا لي لابس الخصر وشنوف
بارض الخلا عن دار كفرن والاسلام

لو صوتت بالله وامانة عن الخوف
مابية لو انه على الروح عزام

ولو جيب لي تمرة شثاثا مع الجوف
ولو حنطة البلقا مع حنطة الشام

ولو تمن المشهد على مي حجروف
وحطو فقار وسيح الزاد بإيـدام

مابيه لو زينلي الاكل بالحوف
ما تقبله نفس عليها الطنا زام

شفي مفوز شمعة القوش منقوف
يازبنهن وان جن بعيثا ورضام

حمايهن لا جمع الدو صفصوف
مثل الحباري عن سنا الطير خرام

اللي كساني ثوب اسود وانا اشوف
خله يقع في سهر عيني وانا انام

ماتشوف حالي كنها حال ابا العوف
او حال مسكين عن الزاد صوام

من عقب ماني قنب صرت انا صوف
اجود للحضر المقيمين فحام

اتيه لو النزل طوف ورى طوف
وأسطي علية بربعة البيت قدام

في كردة حدة شطير ومنحوف
ولا لحمت عند الصواويغ بلحام

حنا على حرب المعادي بنا نوف
أمرَ من عود الشرى عند الالزام

وبعد ذلك سرى ماجد من ليله الى ديرة مفوز التجغييف الذي كان فارسا شجاعا(اللي مسك الدخيل في مراح ابله) ، ودخل ديارهم بالليل وجاء عند عمته ، وقال انا اريد اخذ حقي بيدي فقالت عمته: ياماجد ترى التجاغفة ماخذين حذرهم وينطرون بالليل ارجع لخوالك ، قال انا ما جيت وأبي ارجع ، لكنه لم يستطع بالليل ان يعمل شي ، وفي الصباح قال لعمته: عطيني عباة وغطاء وكان على ماجد قصايب(شعر رأسه) حيث كان اغلب اهل البادية يتركون قصايب وكانت قصايبه طويلة حتى ظهره ، وفعلا تغطى بالعباه وحط قدر ماء على راسه ، وجاء وإذا مفوز واخوانه اثنين فايز وفواز والراعي يصبون ماء للابل ، وعند اقترابه لمفوز كان معه سيف قصير يسمى بلغة البادية سيف الغدر فضرب به مفوز تحت الركبه فقطع رجله وهرب الى بيت الشيخ الي معهم من قبيلة ثانية ودخل على محرم البيت ، فجاء يركضون كلهم ومعهم الشيخ الجربا ، وقال الجربا : يا أبن فلان البيوت مفروشه(ممنوع الدخاله) ونبي الرجال اللي عندكم ، فصوت الشيخ لحريمه ان يطلعن الرجل (ماجد) ، فقالت بنت الشيخ لماجد: ترى أبوي راعي حظ وبخت وماينقض اتفاقه مع القوم وراح يسلمك لهم لكن ابي افكك ، خذ الفرس واهرب لأبن سويط (شيخ الظفير) ، وفعلا هرب لابن سويط اللي ادخله لبويت دغيم السويط توه جايـه من الحج ، فجاءوا لابن سويط وقالو عطنا الدخيل(ماجد) ، قال الشيخ ابن سويط : الرجال دخل على البويت والبويت ما حضر المقعديه (الاتفاق) ، فقالوا المقعديه على راسك ، فقالوا : لازم تسلمه ، فقال: ما اعطيه ، قالوا: عليك مردود النقا (اشارة للتحدي) ، فقال الشيخ بن سويط : ظهورهن مابرين (أي ظهور الخيل ) ، وحصل المتوقع وتقاتل القوم بينهم ، ولكن السويط تحاموا على دخيلهم وفكوة منهم ، ومن ذلك الحين صار البويت مفخره للظفير ، وطلب ماجد من السويط ان يوصلونه الى فنيخ ابا الميخ من شمر اللي كان يوصف بالحق ولايرضى بالباطل وذلك من قوتة وكان فنيخ ابا الميخ نازلا عند زرود بقرب حايل وفعلا وصل ماجد الحثربي الشمري وجلس بمجلسه وقال:

ياراكب حمراء من الهجن حايل
مبرية الذرعان حمراء سجلة

حمراء تشادي ممرسات المحايل
وان سل مخطرها مع البير والا

ما ضالني غير السويطات ضايل
دغيم ثنى بالسيف دوني وسلة

سويطات ماهم من هزال الحمايل
لباسة لدروع ماجوخ ملة

سويطات ماهم من هزال الحمايل
من ماكر يفرس من الصيد جلة

واخو دغيما القرم وافي الخصايل
دخيلهم ما يمشي الحق لله

واليوم احمد اللة بهاك المسايل
بأيمن زرود ونازل عثعثلة

وأرعى بضل عصيل ولاني مسايل
عند المزيني مطلع شذرتلة

ومانش ما لمت علية القبايل
ياكود رب الملا صافطلة

ولاسلت عن راس بة الزوم طايل
ياكود سعدون وانا مقني إله

عصيل هو سيف فنيخ ابا الميخ ، وسعدون ابن عريعر سمع بقصيدتة وارسل عليه مراسيل يستأذنون معزبه لكي يذهب معهم لابن عريعر لاعجابه به وفعلا ذهب معهم تكريما له ولمراسيله.

نرجوا ان تكون قد حازت على الاعجاب ……والمزيد قادم انشالله تعالى
----------------------------------------------------------------
زماننا غير زمانهم وحتى نتذكرالاولين
اخوكم ابن نجد

[ابن فرحان]

مشكور يا ابن نجد

الله يعطيك العافيه يا الذيب

[نهيان الحمادي]

مشكور يا ابن نجد مشاركتك مميزة جدا الله يعطيك العافية
اخوك نهيان الحمادي

[ساري ليل]

مشكور يا ابن نجــــــد .

فكم نحن بحاجة الى هذا المخزون التراثي .

[الخريصي]

السلام عليكم ورحمه الله وبركاته

هناك شغله شيئان ناقصان في هذه القصه وارجو ان تسع صدوركم لسرد القصه من جديد


القصة هو قصة حماية الظفير لماجد الحثربي الشمري ...في احدى السنين كان الوقت دهر على العرب
والامطار قليلة جدا وكان الظـفير تحت قيادة الامير / دغيم بن ســويـط وكانت هناك خبرا او فيضة في الشمال
تقع الان غربي مدينة رفحا وكانت هذه الفيضة هي الوحيدة اللي بها ماء كثير فارادت قبايل الشمال
الثلاث ( الظـفير وشمر وعنزة ) انهم ينزلون على هالفيضة ويسمى قطين وكما هو معروف وكعادة العرب
كان بين هذه القبايل الثلاث العديد من المعارك والحروب والمغازي وكل قبيلة سالبتن من القبيلة الاخرى
العديد من الابل والحلال وكان بينهم دم وثارات قديمة ولكي ينزلوا جميعا على هالفيضة يجب ان يعقدوا
صلحا مؤقتا بينهم او عهدا خلال فترة نزولهم على الفيضة وبعد ذلك يرجعون الى ماكانوا عليه فاجتمع
رؤساء وزعماء القبايل الثلاث دغيم بن سـويط شيخ قبيلة الظـفير وجديع بن هذال راعي الحصان شيخ قبيلة
عنزة ومطلق الجربا شيخ قبيلة شمر اجتمعوا فيما بينهم وعقدوا صلح بينهم وبنود هذا الصلح انه تمنع
المعارك والمغازي بين القبايل الثلاث طول مدة بقائهم في هذا المكان (جدع السلاح وربط الخيل ) وكذلك انه
اذا حدث خلاف بين شخصين واعتدى احدهما على الاخر فان المعتدي لا يجيره اي شخص منهم ولكن يتم
ارجاعه الى شيخ قبيلته وهو يتصرف بامره . وافق الزعماء الثلاث على هذا الصلح وحلفوا (دين علينا اننا
مانخون هذا الصلح والخاين عليه الله) وسميت هذه الفيضة من ذلك اليوم ( ام الاديان) المهم كان هناك
رجلا اسمه ماجد الحثربي من العليان من الخرصه من شمر وكان مولعا بالقنص فكان يذهب كل صباح ولايرجع
الا اذا اظلم الليل ومعه صيده ماجد ماله الا امه ابوه متوفي وماعنده اخوان وكان مفوز التجغيف من
التجاغفى من كبار العمود من الخرصه من شمر (اي انهما يجمعهما فخذ الخرصه) كان عنده اسير ببيته وفي يوم من الايان انحاش هالاسير
وزبن بيت ماجد بغيابه وماكان باليت الا ام ماجد قام مفوز ودخل البيت وقام يجر الاسير معه جته ام ماجد وحاولت ان تثنيه وترده لكنه ماش عيا يطيع وقالت له خاف الله يامفوز هذا دخيل قال اليوم الحقوق
مرفوعه بين العرب ومامن دخيل دام حنا على هالفيضة المهم مفوز مارد على الحرمة وخذا معه اسيره اللي
زين على بيت ماجد قامت ام ماجد و كفت الدلال على النار واهدمت مقاديم البيت ويوم رجع ماجد واليا هو
يشوف شين يروع العقل الدلال منكفية والنار طافية والبيت مقاديمه مهدمة وجاك يركض واليا امه قدامه
باليت وتصيح وتطيح قال العلم وش اللي صار قالت العلم كذا وكذا والبيت اللي مايفك دخيله الواجب ان تطفى
ناره ةيهدم بيته لانه ماعاد له قدر بين الناس وكان هذي سواة العجز الاوله تحث عياله على الطيب والمرجلة
والعلوم اللي تبي تبيض الوجه المهم ماجد انغبن وخصوصا انه مهو قادر يسوي شوي وهو عارف ان الصلح
بين القبايل الثلاث مكتفه ولايقدر يحترك المهم من الغبن يقوم ماجد ويطوي بيته وياخذ امه ويرحلون يم خواله
الفوارية عمر وفهيد عيال عبيد الفواري وخواله كانوا اهل فروسية وشجاعة المهم رحبوبه خواله يوم جاهم
وماجد كان موصين امه انه ماتعلم احد باللي جرى مايبي يكدر خواله ويضايقهم المهم كان ماجد على عادته
الاولة كل صباح ياخذ طيره ويقنص لكن هالمرة لاحظوا خواله ان ماجد كل ماعود الا مامعه لون من الصيد
والديرة معروفه انها مليانه صيد ليه . ماجد كان يطلع الصباح وينحر ضلعن حول ديرة خواله ويرقاه ويقعد
يفكر بامره وش الحيلة وش الدبرة وش السواة يارب عاوني على مصيبتي هذي . استمر ماجد على هالامر واجهة ايام فارد خواله ان يستطلعوا وش الامر قالوا اكيد انه عاشق وكان ماجد ولد مزيون ووسيم فارادوا
ان يختبروه فارسلوا بنتا عندهم وكانت على قدر كبير من الجمال وقالوله عرضي عليه وكانوا راعي عشق
فهو بيكلمك ويقصد بك المهم يوم جته البنت وقامت تعرض امامه قاله ماجد ( يابنت ماني من اللي بالك سلم الله ارجالك) البنت يوم سمعت هالكلام وهي ترجع لاهله وقالتلهم ماجد موضوعه مهو موضوع عشق
الموضوع حاجة ثانية الله اعلم بها.المهم يوم جا الليل ويجيه خاله عمر وينشد ماجد عن حالته وعن قصته
ويوم كثر النشدة عليه وقام يقصد:



يا عمر ياالمدلاة يـا نـازل الخـوف===اذهبتنـي وانـت تنشـد لـك أيــام

يا خو فهيد اللي بك الطيب ما صـوف===والكل منكـم يشبـع الطيـر لا حـام

يا اللي على كل الجماعة بكـم نـوف===عذبتنـي وانـت تنشـد لـك أيــام

ما تشوف حالي كنهـا حـال ملهـوف===والا العليل اللي علـى الـزاد صـوام

ولو قربوا عندي من الـزاد بصنـوف===وفوقـه فقـار وسيـح الـزاد بيـدام

ولو حنطة البلقا مـع تمـرة الجـوف===مـا تقبلـه نفـسٍ عليهـا الطنـا زام

ولو عرضولي لابس الخصر وشنوف===بارض الخلا عن دار كفر(ن) والاسلام

لو صوتو باللة وامانة عـن الخـوف===مابيه لو انـه علـى الـروح عـزام

شفي مفوز شمعـة الغـوش منقـوف===خيالهـن وان جـن بعثعـث ورضـام

خيالهن وان جن مع الحـزم زفـزوف===مثل الحباري عن شفا الطيـر خـرام

اللي كساني ثوب اسود وانـا اشـوف===خله يقع في سهر عينـي وانـا انـام

ومن عقب ماني قنب صرت انا صوف===اجـود للحضـر المقيمـيـن فـحـام

وان جيت لمجلس لابتي تقل ما شوف===اقلـط الغتـره علـى الوجـه قــدام

وحنا على حرب المعادي بنـا نـوف===امر من طعم الشـري عنـد الالـزام

شفي زبون اللي من الحصن مجلـوف===قرمٍ ويروي شـذرة السيـف لا هـام

اقطع عليه النزل طوف ورى طـوف===واقلـط عليـة بربعـة البيـت قـدام

ثـم الهبـه بمصقـلٍ يبـرد الجـوف===مـا صوغـه عنـد الصنانيـع بلحـام

اما عليـه البيـض يصفقـن بكفـوف===والا فلا يمشـي علـى كـل الاقـدام

وان ما سويـت فـي حـد مرهـوف===وجهي مـع الخفـرات دقـوه بوشـام


ويوم اصبح ماجد وهو يركب ذلوله ويرجع يم فيضة الاديان عند ربعه الاولين يبي يطلب مفوز التجغيف ويوم وصلهم اليا الليل يوم اظلم عليهم وقام ماجد يتسحب تسحب حتى مايشوفه احد الين وصل بيت عمته ويم شافته قالته وش اللي جابك ياماجد قال جابني حقي اللي خذاه مفوز وقص وجهي به قالت والله ان التجاغفى ربع
مفوز معتلمين انك بترجع ومتحرصين ولاانت بقاويهم لحالك قال الله يهون الامر ومن اصبح افلح ويوم جا
الصبح ويقوم ماجد ويقول لعمته لبسيني لبس حرمه ابي لي عباة وبرقع وغطوة وعقب مالبس ماجد لبس
الحرمة وهو ينحر الفيضة لان خابرن ان مفوز بهالحزة عند الخبرا يبي يسقي فرس له هناك المهم يوم وصل
ماجد اليا الاخوان الثلاثة كلهم متلايميينن حول الفرس واليا هذا فايز ومفوز وفواز المهم مفوز يوم شاف
لمره ( اللي هو ماجد ) قال عدي يامرة واملي قربتك مدرى انه ماجد واليا ساق مفوز رافعن الثوب عنه
وماجد داسن سيفه تحت الثياب ويقوم ماجد ويسحب السيف ويضرب مفوز واليا هو كاسر ساقه وقاطعه
وينهزم ماجد وينحاش ويوم هو بحر اليا هكا المضيف . مضيف شيخ ووجه عليه المضيف هذا هو مضيف
جديع بن هذال شيخ عنزة راعي الحصان ويم طاح مفوز وقامت الناس اللي حول الفيضة تصيح وثارت العالم
واعتلمت شمر وخبروا الجربا مطلق وهي تقوم فرسان شمر ويقوم يطردون ماجد المهم زبن ماجد على بيت بن هذال وهو يدخل على المحرم ( قسم النساء ) حريم الهذال ويربط نفسه بواسط البيت ( العمود الكبير اللي وسط البيت ) وهذا دلالة عند العرب على انه دخيل فزع بن هذال وفزعت عنزة يوم شافوا خيل شمر جايتهم
ويوم اوصلوا واليا مطلق الجربا يقول سلمنا اللي عندك يابن هذال قال من تعوني يامطلق الجربا قال الدخيل
اللي زبن على محرمك ويوم ابتحل جديع بن هذال لكن وش يسوي مابيده حيله فيه صلح بينهم والبيوت
مفروشه يعني محد يدخل احد والجاني محد يزبنه واستخار جديع بن هذال وقام بيسلم ماجد لشمر وكانت بنت
جديع بن هذال بالمحرم وتسمع بالحكي اللي يدور بين ابوه بين شمر ويوم ايقنت ان ابوه يبي يسلم ماجد وهي
تقوم وتقرب اطيب خيل ابن هذال وقالت ياماجد ترا ابوي شيخ وراعي حظ وبخت وهو يبي يسلمك لشمر
مير قم واركب بنت الحصان اطيب خيل عنزة وانهزم عليه وانحر ابن سـويط والله ان مايفكك بعد الله الا هو
كان الله كاتبلك نجاة من الموت المهم ويقوم ماجد ويركب بنت الحصان ووجه على بيت الامير/ دغيم بن سـويط
ويوم شافوه الجربا وفرسان شمر وهم يلحقون باثره ولكن الفرس اللي راكبه ماجد من اطيب الاصايل
وماتنلحق المهم وهو ياصل لبيوت ال ســويط بيوت العز والكرم وحماية الدخيل واكرام الجار وماجد ماكان
يشوف قدامه الا الله ثم ابن سـويط والا ان شمر ليا مسكوه ذبحوه ويوم شاف مضيف ابن ســويط وهو يزبنه
ويفز الامير/ دغيم بن سـويط وكبار رجالات ال ســويط يوم شافوا الدخيل اللي زبن محرم البيت وهو يصيح
دخيلكم دخيلكم وصاحوا ال ســويط كلهم دخل الدخيل وسلم دخل الدخيل وسلم ..وبالحزة هذي كانت
ام الامير/ دغيم بن سويط وهي عجوز طاعنة بالسن كانت توه جايتن من الحج والعبيد يبنون بيته وهو بيت
صغير قطبة عمود واحد يسمونه البدو بويت تصغيرا لبيت والعبيد بنوه جنب المضيف حول ولده اللي كان يغليه
اشد الغلا المهم مافطنوا ال ســويط الا وعجة الخيل جايتن يمه وناصيتن المضيف ويفزعون ال ســويط
ويتسلحون العلم العلم ويوم وصلوا فرسان شمر ويتقدمهم مطلق الجربا قال له ابن سـويط يالله حيهم اقلطوا
ياشمر الله محييكم . قال مطلق ياابن ســويط حنا جيناك نبيك تسلم الدخيل اللي زبن عليك ويوم صار ابن سـويط
في حيرة من امره وش السواة ويوم الله الهمه الفكرة اللي سهلت الامر قال ابن سويط : اسمعوا ياشمر
والله ماجد زبن البويت والبويت هذا ماحضر العهد اللي بيننا ولايمشي عليه شروط العهد وهم يلجون شمر
مايصير مايصير وتقوم فرسان ال سويط والظـفير وهم يصكون على المضيف ويقول ابن سويط ياشمر تعوذوا
من بليس واقصروا الشر ويرد عليه الجربا وقاله يابن سويط حنا ماجينا ندور الشر جينا نبي الحق ونبي دخيلنا
ابن هذال مازبنه حسب العهد وانت الواجب انك تسلمه لنا قال ابن سويط مالك رجالن عندي الدخيل دخيل
البويت ودخل وسلم وهذا الحكي اللي عندي ويزعل الجربا ويقول وهو يتهدد ابن ســويط قال مطلق الجربا اجل
يابن ســويط ( عليك مردود النقا) يعني استعد للحرب والمعركة ورد عليه الامير/ دغيم بن ســويط وقاله ( على ظهور الخيل مبارين ) يعني حنا مستعدين للمناوخ والحرب كله لعيون الدخيل اللي زبنا ... الله اكبر قمة
العزة والشهامة والشجاعة والاباء والطيب والكرم والله ان الفخر ليقطر ويتصبب عرقا حياء من ابن ســويط
الذي قام بفعلن عجزت عنه امراء القبايل الاخرى اتي بمكرمة اصبحت مثلا يحتذى عند باقي القبايل الى يوم
الدين المهم يوم سمع ماجد الحثربي باللي حصل وهو يرتاح ويستبشر ويجيه ابن سويط قاله ياماجد ابشر
بالعز والله انك عندنا عزيز ومحدن يجيك وانا نحميك بارواحنا ولايقربك جميع واحد ... المهم يوم سمعت العالم
بالعلوم اللي صارت وهو يثورون وكل قبيلة ثارت من مكانه ودروا ان العلم فيه دم ومعارك وحروب وقامت
عنزة وتشد من مكانه وانتقض العهد وقامت شمر برجاله وفرسانه وشيوخه تجهز للمعركة وقامت الظــفير
بكل شيوخها وفرسانها وابطالها اللي مايرضون الضيم والذل لدخيلهم قاموا كلهم على قلب رجل واحد تلبية
لنداء ابن ســويط زعيمهم وشيخهم وقائدهم وصارت المعركة من صباح اليوم التالي الين الضحى وماتشوف
الا لمع السيوف وصهيل الخيل ورجف المعركة وسالت الكرام على الكرام واشتبكت فريس الظـفير مع فريس
شمر وصكت فرسان السـويط على ماجد وقام تذبح كل فارس شمري حاول انه يقرب على حول ماجد واشتغل
الذبح على شمر وسالت الدماء من الطرفين وكثرت الجنايز لدرجة انه اختلط الدم بمياه الفيضة حتى اصبح
لون الفيضة احمر وامتلت من الجثث وجنايز الرجال وصارت الهية على شمر وينصر الله الظـفير وتنكسر شمر وهذي حال العرب منول يومن لك ويومن عليك
المهم وتنتصر الظــفير ويفكون دخيلهم ويحمون ماجد الحثربي من عيال عمه بفعل طيب محدن سبقهم عليه
انهم منعوا جماعته وعيال عمه وقبيلته ان يسمونه بضر او شر ويوم انتهت المعركة وانكسرت شمر
وانسحبت من المعركة وهي مهزومة ورجع ابن سويط للمضيف وفرسان الظـفير يعرضون قدام ابن سـويط
والظفير بالمضيف طاف ورا طاف قال الحثربي اسمحلي يابن ســويط ابقصد .. قال ابن ســويط اقصد ياماجد
ولكن انتبه لاتظلم ولاتسب احد بقصيدك ياشمري .. ابن سويط دارين ان ماجد يبي يذكر الهذال بقصيدته لان
الاولين عندهم سرعة بديهة .. ويقوم يقصد ماجد قصيدته المشهورة الى الان واللي غالبية الناس تحفظها
وترددها واللي اصبحت من اكبر مفاخر الظــفير اللي خذوها بحد الشيوف المصقلات وحدوا عدوانهم على
اقصاهم اللين طاعوا عقب ماهم معيين طاعوا غصب ماهو طيب .. والان اترككم مع القصيدة ...
يقول ماجد الحثربي بعد المعركة وانتصار الظـفير على شمر وحماية السـويط له:




ياراكب حمرا من الهجـن حايـل===مبرية الذرعـان حمـرا سجلـه

حمرا تشادي مبرمـات المحايـل===وان سل مخطرها مع البير ولـه

تلفي على الحبلان هـل النقايـل===عيون التيوس مرضعين الاسلـه

بالعون مـا فكونـي اولاد وايـل===ابشـر دخيـل بيوتهـم بالمذلـه

ما ظل لي غير السويطات ظايـل===دغيم ثنى بالسيف دونـي وسلـه

السويطات ماهم من هزال الحمايل===من ماكر يفرس من الصيد جلـه

السويطات يعطون المهار الاصايل===المعرقـه وعنانهـا تبعتـن لـه

واخو دغيما القرم ماضي الفعايل===دخيلهـم مـا يمشـي الحـق لله

ومانش ما لمـت عليـه القبايـل===ياكود ما رب المـلا كاتبـن لـه

واليوم احمد اللة بهـاك المسايـل===بايمن زرود ونازل عثعـثٍ لـه

وارعى بظل عصيل ولاني مسايل===عنـد المزينـي مطلـعٍ شذرتلـه

ولاسلت عن راس بة الزوم طايل===ياكود سعدون وانـا شاهـدن لـه



والقصيدة واضحة وابياتها تحكي عن مضمونها ..اخو دغيما هودغيم بن سـويط ...
وقاموا ال ســويط وحطوا في البويت شقة بيضاء(خرقة) واصبحت شعارن لهم من هكاليوم الى اليوم وهي دلالة على حماية الدخيل ...
وهذي قصة الحثربي اللي اصبحت ملحمة سطر فيها الظـفير اروع الامثلة بالحمية والشجاعة والاقدام والبطولة وبحماية الجار والدخيل..
وقد ذكر احد الشعراء الظـفير هذي القصة وقال:




والحثربي فكوه والجمع يردم===بمصقلات طلعت من خباهـا
عيوبه المرشد على كل من زم===ياسعد والله من لجا في حماها







والعلوم هذي ماهي بغريبة على قبيلة الظــفير ولا على شيوخهم اسرة ال ســويط الكرام ..
اسف على الاطالة وخصوصا المقدمة ولكن لكي نعطي الموضوع حقه
اسمحلو يالربع اذا طولت عليكم بالكلام


اخوكم عواد الخريصي

[((الدلبحي))]

تسلمون يالربع ويعطيكم العافيه

[@العــــصيمي@]

اول شي السلام عليكم ورحمه الله وبركاته انا اخوكم عضو جديد وحاب اسلم عليكم واتعرف عليكم اخواني وحبايبي

والله القصه حلوه وجميله وفيها من الشجاعه والشهامه وهذي طبايع البدو الشجعان وشكرن على هذه القصه ولكم تحياتي

اخوووووووووووووكم @العــــصيمي@