بسم الله الرحمن الرحيم
السلام عليكم ورحمة الله وبركاته /وكل عام وأنتم بخير
أضع بين أيديكم قصيدتي في حفل زواج الاستاذ/ فهد بن معدي بن صايل الغبيوي اتمنى أن ترقا لذائقتكم
من على وسق الشداد اللي على ظهر الأصيله= درهمت بي من علاوي نجد مردومة سنام
كن خبط خففوها فالأرض رعاد المخيله= يوم يدوي عقب ضوح البرق في عرض الغمام
والرسن في راسها مثني وراعيها دليله =لا نوى المسرى عن السكة عيونه ما تنام
مستجيب لدعوة من مدركين المستحيله = لابةٍ من طيبها تفرض على الناس احترام
يافهد لا تحسب حضوري لحفلتكم جميله=يدفع النفس الكريمة واجب الربع الكرام
جيتك أشارك وأبارك وأنت مثلك ينعنيله= مستحقٍ سبعة الأنعام ما فيها كلام
ياحفيد إبوارد إعتيبة وقلاع الكحيله =من تحت شيخٍ توارث شيخته 200 عام
سِجل اسمه فالكتاب من أشهر رماة القبيله =وسيرته تزخر بمجدٍ يستحق الاهتمام
تبتدي منه البطولة في زمنه وتنتهيله =وتنتسب له شوبة البارود ونصاب الحسام
وأشهر أمثالٍ تعلق بالرماية تنتميله=العرب قالت (رصاصة صايل) ترد الجهام
كم حريب طامعٍ فيها وعود بالفشيله =وان تراجع قبل لا يِقدم بعذره ما يلام
من يعلمني الموارت عقب صايل ويشهيله =ما تليق إلا لمن سوى سواته بالتمام
الخبير اللي صنعها عارفٍ مطلب عمليه =مشتهٍ صيد الرجال وعايفٍ صيد الحمام
ينعرف دوره ليا جانا من العدوان ميله =وانتهض بالمارتين اللي يفت أبها العظام
حاميٍ حد الشمال لديرة الهيلا المهيله=من تعدى حدها شكره على صِفر الحزام
اخو جوزاء كل فعل قدمه ما ينتسيله =نذكره واقل حاجه يوم ندعي بالرحام
ماتوا أبطال البسوس وعاشت دموع الجليله =واستدار الوقت واستنهض خفافيش الظلام
لو ضحك وجه الزمان لوجه نزال المسيله = يستغره والضعيف يحسب أن الحظ قام
فالزمان اللي منول كل قرمٍ فوق خيله=ينعرف به منسب الرجال من خال و عمام
كل رجال نبا ننشد ونعرف وش حصيله =وان طلع عدٍ هماج إيفطر كبود الحيام
لا يسوي له علومٍ في الأصل ماتستويله =ما يحصل من ورى ترديدها كبر الجرام
حت لو نفذ عن كمومه وقرط في شليله =واشتراله مشلحٍ حطه على صدره وسام
لاوقف لجل المواقيف العظيمة ياحليله= لايتعب عضلة الساقين من طول المقام
الطويلة مارقا في راسها إلا أهل الطويله=من قبل عصر الإمام ومن بعد عصر الإمام
وسلامتكم 
« آخـــر الـــمـــشـــاركــــات »
12-Nov-2012, 11:55 PM
قصيدتي ..في زواج فهد بن صايل
العرض العادي
