الرئيسية التسجيل التحكم


اختيار تصميم الجوال

العودة   الهيـــــــــــــلا *** منتدى قبيلة عتيبة > المنتديات الأدبية > قصائد الأعضاء > منتدى دواووين شعراء المنتدى

« آخـــر الـــمـــشـــاركــــات »
         :: عبيدة والحباب ورفيدة رعيان عند الجحدري (آخر رد :عيد صبي نجد)       :: نمير المنبع الرائق وارواء ظماء الذوائق (آخر رد :امير الصفوى)       :: الخياريين حلفاء بني هاجر اصولهم من قبيلة المشاعله (آخر رد :عيد صبي نجد)       :: ال ربيعة البرامكة الهوازنيين (آخر رد :أبو مروان)       :: يقول من يحرص على فاخر القول (آخر رد :امير الصفوى)       :: هوازن (آخر رد :أبو مروان)       :: خاطرة هوازن (آخر رد :أبو مروان)       :: طلب تغير نك (آخر رد :أبو مروان)       :: قحطان من ولد عاد بن سام وليست من إرفخشد (آخر رد :أبو مروان)       :: نسب بعض الاسر من شتى القبائل العربيه (آخر رد :أبو مروان)      

إضافة رد
 
أدوات الموضوع انواع عرض الموضوع
قديم 04-May-2008, 01:30 AM رقم المشاركة : 1
معلومات العضو
عمر الدغيلبي
مشرف سابق

الصورة الرمزية عمر الدغيلبي

إحصائية العضو






التوقيت


عمر الدغيلبي غير متواجد حالياً

Arrow ديوان الشاعر / مرزوق بن حمدان العتيبي

السلام عليكم

مسا الخير

أقدم لكم ديوان للشاعر الكبير / مرزوق بن حمدان العتيبي

شاعر من كبار شعراء وكتاب منتدى الهيلا أول منتدى لقبيلة عتيبه على الإنترنت

ولن أطيل الكلام والمدح لإن قصائد هذا الرجل الشامخ تفي وتزيد ..


1




فدوة ٍ للمصطفى روحـي وماتملـك يمينـي
كيف لا .. واللي خلقني حط حبه في كيانـي
حط حبـه فـي كيانـي ماتغيـره السنينـي
وانثني من دون عرضه بالـذراع وباللسانـي
باللسان ادفع عنه واصـد كيـد المغرضيتـي
والذراع اضرب على من مس عرضه بالسناني
حبه اغلى مـن حياتـي والولـد والوالدينـي
واجب ٍ هـذا علينـا فـي قسـا ولا ليانـي
النبـي اللـي جعلـه الله خيـر المرسلينـي
جل من خصّه بفضـل ٍ ماعطـاه لمودمانـي
خير من يمشي على وجه الثـرى فالعالمينـي
الشفيع الهاشمي يوم الحشـر فضلـه يبانـي
في نهار ٍ تذهل المرضع وترمـي بالجنينـي
يمنحه ربي شفاعـه لامتـه قاصـي ودانـي
صاحب الوجه المنير وصاحب اللب الفطينـي
الامانه مـن صفاتـه والتواضـع والحنانـي
دعوته خير الدعاوى كلهـا.. حكمـه ولينـي
ابتداها باهل بيتـه..... ثـم بينهـا بيانـي
كلفه ربي وقال اصدع بها فـي كـل حينـي
من يطيعك طاعني واللي عصى لامرك عصاني
صدقـوه المؤمنيـن االصادقيـن لمخلصينـي
مثل ابو بكر وعلي في سر.... ولا في علاني
بعد ماشاف الاذيه من يسـار ومـن يمينـي
اعلن الهجره وحان امفارق الاوطـان حانـي
انطلق من وسط مكه داخلـه قلـب ٍ حزينـي
ماعليه افراقهـا رغـم الـذي لاقـاه هانـي
متجه صوب المدينه يدفعه شـوق وحنينـي
لهلها اللـي بايعـوه وقدمـوا كـل الامانـي
معه ابو بكر الصديق الصادق الرجل الامينـي
صحبة ٍ ياطيبها ما ادرك شرفها شخص ثاني
حين ماوصل المدينه اظهروا لـه منشدينـي
مرحبا باللي لفانا مـن بعيـد الـدار عانـي
كل يقول انت عندي مسكنك في وسط عينـي
يارسول الله تعـال فـداك روحـي والمكانـي
كرموه وناصروه وصار لـه حـبّ ٍ مكينـي
في قلوب اللي لهم في صفحة التاريخ شانـي
انصره ربي واعـز الديـن بالفتـح المبينـي
وارتفع صوت الاذان وكبـرت كـل المبانـي
من تمسك سنته ماخـاب فـي دنيـا ودينـي
منهجه نور ٍ يدخلنـا مـع ابـواب الجنانـي
كيف يجرأ واحد ٍيرسمـه بالرسـم المشينـي
قبحه ربي وجعله من هـوان ٍ فـي هوانـي
اتهبـا يالدينمركـي ياللعيـن ابـن اللعينـي
والله انـك ماتحقـق غايتـك ياهالجبـانـي
الشلل جعلـه يصيبـك فالرجـول وفاليدينـي
ماتهنا في حياتك مـن كثـر منـت بتعانـي
من اجل تكـون عبـره للعلـوج الحاقدينـي
لـو حنـا نعرفـك يـوم المواجـه ماتدانـي
انكشف حقد النصارى المشركين المجرمينـي
والهدف تشويه هذا الدين مع طـول الزمانـي
قاله الله في كتابه كل...... الامـه عارفينـي
العـداوه ماتغيـر لـو نفـى كوفـي عنانـي
وابك حنـا ماخلقنـا.... غيـر لله عابدينـي
والشهاده في سبيله نعتبرها اغلـى الامانـي
ان دعـا داع الجهـاد نقـوم لله مسرعينـي
مع ولي الامر مانخلـف عنـه حتـى ثوانـي
والسـلام اختـام يالله ياولـي الصالحيـنـي
نسالك لطفك وعفوك والمزيد مـن الحسانـي
فدوة ٍ للمصطفى روحـي وماتملـك يمينـي
كيف لا .. واللي خلقني حط حبه في كيانـي
حط حبـه فـي كيانـي ماتغيـره السنينـي
وانثني من دون عرضه بالـذراع وباللسانـي
باللسان ادفع عنه واصـد كيـد المغرضيتـي
والذراع اضرب على من مس عرضه بالسناني
حبه اغلى مـن حياتـي والولـد والوالدينـي
واجب ٍ هـذا علينـا فـي قسـا ولا ليانـي
النبـي اللـي جعلـه الله خيـر المرسلينـي
جل من خصّه بفضـل ٍ ماعطـاه لمودمانـي
خير من يمشي على وجه الثـرى فالعالمينـي
الشفيع الهاشمي يوم الحشـر فضلـه يبانـي
في نهار ٍ تذهل المرضع وترمـي بالجنينـي
يمنحه ربي شفاعـه لامتـه قاصـي ودانـي
صاحب الوجه المنير وصاحب اللب الفطينـي
الامانه مـن صفاتـه والتواضـع والحنانـي
دعوته خير الدعاوى كلهـا.. حكمـه ولينـي
ابتداها باهل بيتـه..... ثـم بينهـا بيانـي
كلفه ربي وقال اصدع بها فـي كـل حينـي
من يطيعك طاعني واللي عصى لامرك عصاني
صدقـوه المؤمنيـن االصادقيـن لمخلصينـي
مثل ابو بكر وعلي في سر.... ولا في علاني
بعد ماشاف الاذيه من يسـار ومـن يمينـي
اعلن الهجره وحان امفارق الاوطـان حانـي
انطلق من وسط مكه داخلـه قلـب ٍ حزينـي
ماعليه افراقهـا رغـم الـذي لاقـاه هانـي
متجه صوب المدينه يدفعه شـوق وحنينـي
لهلها اللـي بايعـوه وقدمـوا كـل الامانـي
معه ابو بكر الصديق الصادق الرجل الامينـي
صحبة ٍ ياطيبها ما ادرك شرفها شخص ثاني
حين ماوصل المدينه اظهروا لـه منشدينـي
مرحبا باللي لفانا مـن بعيـد الـدار عانـي
كل يقول انت عندي مسكنك في وسط عينـي
يارسول الله تعـال فـداك روحـي والمكانـي
كرموه وناصروه وصار لـه حـبّ ٍ مكينـي
في قلوب اللي لهم في صفحة التاريخ شانـي
انصره ربي واعـز الديـن بالفتـح المبينـي
وارتفع صوت الاذان وكبـرت كـل المبانـي
من تمسك سنته ماخـاب فـي دنيـا ودينـي
منهجه نور ٍ يدخلنـا مـع ابـواب الجنانـي
كيف يجرأ واحد ٍيرسمـه بالرسـم المشينـي
قبحه ربي وجعله من هـوان ٍ فـي هوانـي
اتهبـا يالدينمركـي ياللعيـن ابـن اللعينـي
والله انـك ماتحقـق غايتـك ياهالجبـانـي
الشلل جعلـه يصيبـك فالرجـول وفاليدينـي
ماتهنا في حياتك مـن كثـر منـت بتعانـي
من اجل تكـون عبـره للعلـوج الحاقدينـي
لـو حنـا نعرفـك يـوم المواجـه ماتدانـي
انكشف حقد النصارى المشركين المجرمينـي
والهدف تشويه هذا الدين مع طـول الزمانـي
قاله الله في كتابه كل...... الامـه عارفينـي
العـداوه ماتغيـر لـو نفـى كوفـي عنانـي
وابك حنـا ماخلقنـا.... غيـر لله عابدينـي
والشهاده في سبيله نعتبرها اغلـى الامانـي
ان دعـا داع الجهـاد نقـوم لله مسرعينـي
مع ولي الامر مانخلـف عنـه حتـى ثوانـي
والسـلام اختـام يالله ياولـي الصالحيـنـي
نسالك لطفك وعفوك والمزيد مـن الحسانـي


[size=4]..

الفرق بين الناس فرق المبادي= ماهوب فرق اشكالهم والجرومي
خلقهم اللي للمخاليق هـادي =وفرقهم اللي في عـباده رحومي
كم واحد ٍ لاشفت شكله ريادي = وهو عيوبه مااسترتها الهدومي
وكم واحد ٍلاشفت منْظره عادي =لكن طيبه وصّله للنجومي
اختر قرينك واعتنه باجتهادي= تلقاه لاكثرت عليك الهمومي
رفيقي اللي يلتزم في معادي= وانجا لزومي ما انتحى عن لزومي
رايه ليامني طلبته سدادي = ماهوب خمعٍ (مايعرف اليومومي)
الصاحب الطيب عليه اعتمادي= بعد الذي بامره تســـير الغيومي
ترفع له البيضاءعلى كل بادي=والمدح كفوه بالخصوص وعمومي
شرواه مجلاسه بوسق الشدادي= رجل وسلمه من خيار السلومي
واهل الردى مالي وراهم مرادي = صحبة ردي المعرفه ماتدومي
هذا المجرب والكــلام الوكادي = اموثقينه حافظـــــين العلومي[/poem]




2


وش تبا يكتب لك التاريخ يالقذافي =ياعدو شعبك ويارمز التخلف كله
انتهجت المنهج اللي ماش فيه انصافي = والمصيبه مع عماك الطين زدته بلّه
في كلام الله عبثت وزدت بالاسفافي = وعن طريق الحق ملت ووش تبا تاصله؟
شي ماتامر به الاديان والاعرافي = دون حق السيف من فوق الرقاب اتسله
كيف تهدم مابنيت وتقصف الاشرافي = الوكاد انه حصلك وسط عقلك خله
ماكسبت الا الردى ياهابي الميقافي = ولانكبك الا نتاج افكارك المنحله
شعبك المسكين صاير للهجوم اهدافي = كل مبنى فوق سكانه تقوم اتهله
لين عاداك الجميع وجاتِك الاحلافي = حاصروك بوسط سردابك وجتك الذله
دارت الدنيا علاك وبان كل الخافي = وانسحب من كان حولك من رموز الشله
ما بقالك من ردا حظك رفيق ٍ وافي = لكن اخرج قبل موتك والمكابر خله
اخذ من حسني مبارك معتبر يالهافي = يوم كابر وطردوه اهل الشرف والمله


..
3

انا يوم اتفكر فالقبايل واذكر الافعال = فعايل لابتي فوق النجوم اللي تشاهدها
لنا في قمة العليا مكانه دايمه واجلال = على وجه الحقيقه كل مانحظر نجددها
نترجم قولنا بافعالنا ونحقق الامال = طموحات الرجال اللي تترجم من سواعدها
حظرنا للمزاين بالعزوم اللي تهد جبال= بسمحات الوجيه اللي لها الاموال نرصدها
اخذنا المركز الاول مع النخبه بدون جدال = ونصف اغلى الجوايز باسمنا سجل تعددها
جوايز ماينافسنا على تعدادها رجال = وتحطيم الرقوم النا صفه محد ٍ يقلدها
اخذناها من ايدين الامير وعادة الابطال = لياجت بالتحدي واصعب الاوقات تاجدها
عتابه في وفاها والتميز تضرب الامثال= حقيقه مثبته فيها اكثر العربان تحسدها


4

.
السلام عليكم ورحمة الله وبركاته
قصيده كنت ناوي المشاركه بها في احد اجتماعات القبيله
ولكن ماسمحت الضروف ... حبيت ان اضعها بين ايديكم ...
امل ان تنال ولو القليل من استحسانكمــ
....



صدق الفعايل ماتعددها الأقلام =مهما نعــــدد مجدنا ماانتهـــــــــانا
ألاد منعر لادعا اللا زم الهـــــام= رجــــالنا عن ماقفــه ماتـــــــوانا
والى احتما الميقاف قدام الاخصام= تطحن رحانا من وقف في نحانا
يشهد لنا التاريخ الاول وهالعــام= حنا هل الطاله عـــــــــليها نشانا
منها كتبنا مجدنا بين الأعــــــلام= مجداً مخلد وشهــــــــدواله عدانا
بقيادة اللي يرهب القـــــوم لاقام= راع الجواد اللي عليها نخـــــــانا
خزام خزاّم العدا يعرف خزام= اليا ومرنا للخصــــــوم ارتكــانا
انضيم في وقت الشدايد للاقوام = واللي يحاول ضيمنا ماقوانا
دغالبه يوم اللقاء ضــــــربنا سام =فرسان مافينا ضعيف وجـــــبانا
واللابه عتابه لنا درع وحــــزام= احنا لهــــوازن نفتخر بنتمانا
قبيلة ٍ فينا الشهامه والاقدام = الله من طيب المـــزايا عطـــانا
حنا خوال المصطفى خير الانام= ميزه بها رب العباد اصطفانا
هذي حقيقه مابها زيف ووهـــام = البيــّـــــنه في غيرها ما ادعانا
وان جات للقسمه لنا خير الاقسام = في عالية نجد العظيم استوانا
عشنا على حسن التواصل بالارحام=واكـــــبر دليل لوصلنا ملتقا نا
وكل القبايل فيهم ابطال واكرام = نذكر فعول اهل الوفا من وفانا
وصلاة ربي عد دورات الايــــــــام = على النبي اللي بهـــديه هدانا



من خاطري سويت عذب المثايل= والقصد كله مدح ذرب الفعايل
لوكان. ماهو قدها. مامدحته= كفوٍ لها راع الكرم والجمايل
له وقفة ٍ يشهد لها كل عاقل = ولاقلت هذا ..غير.. عندي دلايل
نعم الصداقه.. مع رجال المعرفه= اللي يشيلون الحمول الثقايل
الطيب ف اهل الطيب يولد جبلّه= ولايفعله ياكود ولد الحمايل
اسمك حسام اتجيد حسم المواقف= والشهم مثلك مانبيله بدايل
ياحسام يا رمز الوفاء والرجوله= الف ٍ نعم بك ياوفي الخصايل
من لا بة ٍ تدعى بحمر النواظر = تاريخها معروف عند القبايل
سقم الحريب اللي طمع في ديرها= لجا نهارٍ فيه عايل ومايل
وعز الصديق وفرحته وابتهاجه =في قربهم يلقى العلوم الجزايل
يالصاحب اللي لا نصيته لقيته = مثلك لهامات المواجيب طايل
ترفع لك البيضاء على كل نايف= والفضل لله ثم (منك الفضايل)
حبيت اترجم لك صدوق المشاعر=وانا مقصر ياعريب السلايل
تبقى. الاخوّه ثابته ماتغيّّر = وافتح لها في داخل القلب file



6

على غبّة محيط الشعر حرّك مركب القيفان = مشى مع موجه العالي ولا يدري عن اسراره
تحرك بالمثايل من هجوس الخاطر االطربان = ويبحث داخل اعماقه عن اللولو ومحّـــاره
عسى ربي يصبرني جمعت من الهموم اطنان = ليامنّي بنيت الساس عيّا يثبـــــت اجداره
ليا مني صدقت الود تظهر خلة الخــلان = عجايب يالغرام اللي عجزنا نقطف اثماره
اغمّض و اجحد الواقع وعدّي كن ماشي كان = واقول الوقت يتغير وخلي بقبل اعذاره
واقول ان الهوى قاسي ولايسلم من الاحزان = ولا نستعجل الاحداث والايام دواره
ولكن كل شي ٍ له حدود وطوّل الهجران = واشوف ان الخطا يزداد في حجمه و معياره
وبعد نزف الدموع اللي شكت من سيلها الوديان = وزفرات الضمير اللي توهج ماطفت ناره
تذكرت الصديق اللي يخفف لوعة الحرمان= صدوق ٍ في شعوره واعتلى بالقلب مقداره
صديق ٍ مثل طيبه ما لقينا في هالوجود انسان = تميز بالوفاء ماعاتبه ضيفه ولاجاره
اخصّه بالكلام وقدم عينه واضح البرهان = سهر واحزان والحر القطامي يفهم الشّاره
ياوافي كل مامديت كف الطيب ( جا) نكران = وش الحيله ترى مثلك حكيم ونقبل اشواره



7


..
.
هاصلوا على النبي
(اللهم صلي وسلم على عبدك ورسولك محمد)
..
ياخوان من مالاشك فيه ... ان كل شاعر في مثل هذه المسابقه
مسابقة شاعر المليون ....
يجتهد ويستنفر كل قواه الشعريه .. في سبيل اظهاره نص فاخر
يصل به الى الهدف المنشود ...
وعندما يشاد به ويحصل على ماسعى اليه ..
فمن حقه ان يبتهج ويفتخر وهو حق مشروع له ..
لكن.. الظلم كل الظلم ...والقهر كل القهر ..ان يجتهد الشاعر..
ويقدم نص من اروع النصوص وانفسها ..
معنى ومغنى ... وتفرد .. تفاعل معه الجميع فالمسرح..
وخلف الشاشات ....
ثم يبخس حقه وينسف مجهوده جهاراً نهارا ..
بأنتقاد اعتبره افساد... يدل على جهل وحمق
عضو اللجنه العميمي وتغطرس وحقد غسان ...
هذا ماحصل بالتحديد ..
في الحلقه الماضيه للشاعر الفذ المتمكن سعود الحافي..
فعلى الظالم من الله مايستحق..
...
على العميمي قامت ابروق ورعود= والناس كلّ ٍ له يسب ويهبي
هبيت ياوجه ٍ عن الحق مصدود = بالله يالمعتوه وين امتربّي؟
عارضت شرع الله ولا نته ابمحدود = من معتقدك ادخل على وجه ربّي!
ايدك ابو لغبوب وقلوبكم سود = على الشجاع اللي عن العرض ذبّي
انشهد انك طيّب الشعرياسعود = من طيب شعرك ظهّرالمستخبّي
شعرك جميل ولا يجي فيه منقود = تبت يدين اللي بينقدك تبّي
مثل النمر وقفت في ليل مشهود = وجبت الكلام اللي للاسقام طبّي
ماقلت غير الصدق والعالم اشهود = لو الحسد بقلوب الاثنين دبي
هذا كلام الحق والحق معدود = قدم العرب بيّن ماهوب امتغبي
يالله يامعبود ياخير معبود = ياللي لك اعبادك تطوف وتلبي
يافارج الضيقات عن كل مضهود = وياللي على امرك وابل الغيث صبي
انصر هل التوحيد واخذل هل الزود = اللي على دروب الجهاله تطبي
واحفظ بلدنا اللي على الخير محسود= والامن يالله تجعله مستتبي




8


مرحبا فاابيات شعرٍ تحمل امزوح وعتايب=من صديق ٍ لو يطول الوقت ماادوّر بداله
مرحبا فيها عدد ماحنت ارعود السحايب= اوعدد مالاح براق الحياء وامـــطر خياله
ابشر اني حي في وقت الغرايب و العجايب = يغفل الرجال فيه ويبعده زودانشغاله
كل رجلٍ له ضروفه كل شيٍ له سبايب=قبل ماتعتب على الرجال طالع وش حواله
يوم عبدالله يعاتب ما اجمل اعتاب الصحايب=يتهمني بالقصور وين ماشفنا وصاله!!!!
ليه ماسيّر وانا وياه بالحاره قرايب؟= ماتكلفه الزياره كان يطمع فالجماله
والله انه من رجالٍ فعلهم يوم الحرايب=يزعل العدوان .. لكن مايحبون العياله
الكلام اللي بعث به والتشره والطلايب =ناتج ٍعن حبه لشخصي ومن طيّب خصاله
والصداقه ماتغيّر مع رياجيل الصلايب=والصديق المحترم يبقى السعد والخير فاله
والوفا من طبع اهلناوالكرم فينا وهايب=حافظين المرجله ونقوم بحقوق الزمــــااله


9

قبل مابدأ شي اسوي له دراسه = وانتبه لاجيت اسلم واستلم به
والطريق افتح عيوني لا مشيته= ما مشيت الا على درب الشكاله
احتزمت بمحزم ٍ من طيب ساسه = سعد منهو بالشدايد يحتزم به
فزعته تشفي غليلي لانخيته = والمراجل سلّم ابوه وسلم خاله
ابو ماجد لو يشوف الموت داسه = لا ذكر طاريه قلنا والنعم به
صاحبٍ عالي مقامه واشتريته = لو يطول الوقت مانبغى بداله
وافي ٍّ كل الشجاعه وسط راسه = في ظلام الوقت كنّه نور لمبّه
كل ماجيته على الهقوه لقيته = شال حمله بالمراجل وارتكاله
يرتكي للكايده من قو باسه = والمروّه والشهامه والكرم به
لو ماهو قد هذي مانصيته = الردي محد ٍ من البعد ايعناله
الامور الكايده تبغي فراسه = والرجل لاقال قوله يلتزم به
يابو ماجد يوم جينا وسط بيته = ليه ماكمّل مواجيب الجماله
من لبس له ثوب ماهوب بمقاسه = مامعه عقل على الشي يحكم به
وانت ماقصرت في شي بديته = جعل مثلك بالحياه يطيب فاله
الشدايد حلها يبغى سياسه = والردي محد ٍ من الناس يحلم به
من تجاهلني جهلته وازدريته = والبخيل ابخيل لو يكثر حلاله
الله اكبر صار بالعقل انتكاسه = والمغيّب ماسوى الله يعلم به
والنصيب يجيك لوّك ماهقيته = ماكتبه الله ترى سهل ٍ مناله
الهدف يحتاج تخطيط وحماسه = تعرف الوقت المناسب وتهجم به
ابذل المجهود في درب ٍ نويته = بالعزيمه ماش حاجه مستحاله
والحظوظ ان كان جا فيها نحا سه = كل ماتدخل تحدي تنهزم به
اتجه للي يعزك لارجيته = مايضيع اللي على الله اتكاله

10


...
كيف حالكم كلكم ؟
ماهيب جديده ... ولكن اعتقد انها لم تنشر هنا ...


انتهت حلو الليالي والغلا ولاّ ربيعه = طاح قدرك من عيوني مستحيل اترجعينه
الحقيقه ما عملتي صار لي اكبر فجيعه= ليه كل اللي بنيته.. في دقايق تهدمينه
صادق ٍ لك في غرامي واشتري حبتس ما ابيعه =ماتوقعت ان هذا بالسهوله تجحدينه !!
وش خطاي اللي عملته لجل احصل هالقطيعه =هل جزاء من كان حبك بالخداع اتعاملينه؟
كنت احسب انك صدوقه نظرتك يم الطليعه =كنت احسب ان العلاقه بيننا تبقى متينه
كنت احسب انك وفيّه نظرتك نظره بديعه = لين بالوقت اكتشفتك وظهرت منك الغبينه
التطبع في الحقيقه مايقاوم للطبيعه = وانتي طبعك بالتلاعب يغلبك ماتغلبينه
ودك بتقطيع قلبي مير ماانتي مستطيعه = يوم غيري قدم عيني في كلامك تمدحينه
حطي نفسك في مكاني وانظري نظره وسيعه = العقل واجب عليك بهالامور اتحكمينه
جيتي لقلبي سريعه واخرجي وانتي سريعه = الله اعلم من طرالك في هواك اتغربلينه
احمد الله واشكره نفسي ترى نفس ٍ رفيعه = من نقض عهد العلاقه يبتعد ديني ودينه
دام من دونك جعلتي لي متاريس ٍمنيعه = دربك اللي تعشقينه واصلي لاتقطعينه
والله ان الغش مايرضاه عقل ولا شريعه = ودام هذا هو شعورك فالهدف ماتاصلينه
من خدع غيره ترى لازم يسوّاله خديعه = الكلام اللي ذكرته واجب انك تفهمينه
انتهى عهد الموده والغلا ولاّ ربيعه = طاح قدرك من عيوني مستحيل اترجعينه

11

نور القمر غطى جميع الفيافي= نوره سطع بالكون مـاحد ٍبيخفيه
بامـر الذى بامره تعيــش الضعافى = رب التقى الى من النـار ينجيــه
بعض العـرب كا لنور با لطيب وافى = ترفعله البيضاء اليا جيب طاريه
مثل النهـرنبـعه قراحٍٍ وصــافى = نشمي ويم الطيب يتعب خطاويه
لاجـاه نقـال العلـوم السخافــى= مايستمع فاللـى قصيره هــقا ويه
ولا جـاه محتـاجٍ من البعـد لافـى = من كثر جوده ماتعدد حسانيه
مثل الطبيب اللى عـلا جه يشافـى = باذن الولى لازم مريضه يشافيـه
وفى طـاعة الله ما دخله ا نحرافى = عقله كـبير وللهــدايه موديــه
وعلى عــدوه كـالسيوف الرهافى= سيف ٍ عدوّه عن حدوده ايعديه
هذاك خـله عزوتك يالســـنافي = اليا حداك الوقت جنبك اتلاقيه
وبعض العرب مثل السنين العجافي = لامـاضين يشفــع ولا خير ترجيه
همـاز لمـازٍٍ ولاله ا مصافي= مطلق لسـان وينحرج بـه مخاويه
شـره بدا للناس ماهوب خـافـى = في كل مجلس مابه احد ٍ يدانيه
اشـكال هـذا ماعليـهم حـسافى = جعله يروح ولا تبيّن تواليه
جعـله بعيد ولا يجــيله قـوافـى = ون ماهــداه الله عن الشوف يعميه
يا باغـى العليا ترى القـول كافـى= ماقـل دل وزبـدته فــــى معانيه
هذى حـقيقه ما عليها اختـلا فـى = وكلٍ علــى مـا قيل عقـله يقـديه



12

font=simplified arabic]..
.
الحمدلله على قضاءه وقدره ...
30-3-2011
قصيدة رثاء في اخي عبد الرحمن حمدان( ابو مشعل) ... بعنوان
(( البقاء لله ))


البقاء للبنادم في حياته محال =كل نفس ٍ تموت ويختم كتابها
والقضاء والقدر نافذ ولابه جدال = قدرة الله على المخلوق يرضابها
مالنا الاّ الرضى والصبر والابتهال= دعوة ٍ من صميم القلب يدعابها
يابو مشعل عسى رحمة عزيز الجلال= معك فالحفره اللي هلّوا ترابها
اسأل الله لك التثبيت عند السؤال= حين روحك تعود ويبدي حسابها
ماحصلك جعل تكفير والذنب زال = الشهاده من المعبود تحضابها
فوق قبرك عسى يمطر صدوق الخيال = من مزون ٍ يشوق العين صبابها
ينبت الشيح واليشموم في كل جال= عطرها مع نسيم الصبح يزهابها
من فراقك حزنت ودمع الاعيان سال= آه ياصعب فرقا العين لاحبابها
لو الاعمار تشرى كان سقت الحلال = كان روحي وماملك عنك نفدابها
كنت للطيب والمعروف مضرب مثال = ماتهمك ضروف الوقت واتعابها
الكرم من خصالك حيها من خصال =ماتعب فالمراجل غير طلابها
ابن عباد يشهد من خيار الرجال= وقفتك معه وقفت طيب يحكابها
وامّك اللي دعت لك في ظلام الليال = دعوة الام تقبل وانته اولابها
ابشر ابشر وعفو الله وسيع المجال = رحمة الله عسى تفتح لك ابوابها


13

اتعب الرجل كان الله كتب لك وفاق = ماتنال المطالب غير باتعابها
ماعلى باب رزقك يالبنادم غلاق = الله اللي كتبها واوجد اسبابها
يستمر الصحيح ولا يدوم النفاق =و يظهر الوقت صادقها وكذابها
كل ماقلت قلبي من عنى الوقت راق = جتني الفاجعه لاعاد من جابها
مايصير اجتماع الا وراه افتراق = والمفارق عيوني ويش سوابها؟
صدق فرقا الحبايب علة ٍ ماتطاق = علة ٍ حاروا العراف با اطبابها
طعمها في كبود الناس مر المذاق = من لقى له سعاده ماتهنى بها
يبست اعروق كبدي من لظى الاشتياق = نارها تصطلي ماغاب شبابها
حظي اللي بغيبوبه ولا عــــــاد فاق = لا رميته على الاهداف ماصابها
والله انه يبي له فوق خده طراق = لين كل المناوي يحسب احسابها
ينهض وياخذ الاول بخط السباق = والمطاليب يجلبها لطـــــلابها

14


ِ..
ان عدوا اهل الطيب عد ابو سلطان..
...
رد على قصيدة بندر المرشدي على هذا الرابط
http://www.otaibah.net/m/showthread.php?t=106180

امل ان تحوز على رضاه ورضاكم ..
وترد ولو الشي اليسير من التقدير لمنتدى الهيلا ومؤسسه ابو خالد
ومن ينتمي اليه
.



بعض البيوت تمر مآجآلهـآ احسآس = اتمر عـآدي كن ماكاينن كان
وبيوت بندر حركت كل هوجاس =ثم افتحت بالصدر للشعر بيبان
يخفق لها قلبي مثل خفق قرناس=واحس في وسط الحشى تقل بركان
يازين شيلتها ليا هب نسناس=تطرد هموم الي شكى كثر الاحزان
اكتب له التقدير من فوق قرطاس= وارفع له البيضاء على كل مابان
كله طموح وعزم مايعرف اليآس = وان عدو اهل الطيب عدّ ابو سلطآن
لنا الشرف في معرفة عطر الانفاس =في خدمة الهيلآ ترى كلنا اعوان
المنتدى الي فيه من كل الاجناس = كل القبايل ماهم ابس عتبان
اشهر من الي يعلنونه على واس= تدريبه العربان في كل الاوطان
مثل الربيع الي جلب كل عساس = تجيه ضايق بال وتروح طربآن
تصفّحه يجلي عن الخاطراعماس = مثل البحر مليان لولو ومرجان
مافيه من دون المناعير ترباس = الطيّب العاقل مكانه بالاعيان
مجمع نشاما ماهو بمجمع انجاس = مكملينه بالوفا طوال الايمان
مابه مكان لكل مغرض وهلآس = الي يسبب للمشاكل والاضغان
والفضل لله ثم لمعرّب الساس = الله يجازي هايف الطيب بأحسآن





15


(((الرساله)))

البندق اللي ثوّرت في خباها = واكلت يدين اللي محافظ علاها
ازنادها خربان واصبح خطرها = ايهدد اللي للمغازي قناها
رغم العيوب ومقنعات الخطايا = بندق عسى كل البنادق افداها
هل تعتقد لوبعتها يابو نايف = اني خسرت ورابح اللي شراها
او تعتقد لو صنتها باهتمامي = حاولت اعدلها واقلل خطاها
اني ربحت ولافقدت احترامي = الناس ماتكسب بشقرت عصاها
جتك الرساله وانتظر وش مردك = البير تعرفها وتعرف غطاها
لاخير في قول ٍ بليا دلايل = وابيات شعري واضح ٍ محتواها
خصيتك ابها ياوسيع البنايد = حيث ان نظراتك بعيد ٍ مداها


هذا هو مردها للشاعر العذب ...
تركي عبدالله الدغيلبي (ابو نايف) والحقيقه انه اجاد وافاد ....

حي البيوت وحي منهو بناها=أبيوت شعرن عالين مستواها
عبر الأثير أرسل علينا رساله=يشكي من الدنيا وزايد عناها
فكر بهالدنيا وشاف العجايب=وهذي هي الدنيا وهذا غثاها
والبندق اللي قلت ياسعد عينه=اللي لساعات اللوازم حساها
أن بعتها فنته بلا شك خاسر=خسارتن محدن يحسدك علاها
وأن صنتها وأخذت منها المحاسن=يبا يعوضك طيبها عن رداها
ترى الحرايق تبتدي من شراره=وأحسن طريقه للتعامل معاها
أنك تكافحها وهي في مهدها=تقضي علاها قبل يكبر بلاها
جتك الردود معطره بالتحايا=والمعذره كان القصور أعتراها


16


انعدم فيك الضمير ويش باقي مافعلته = بعد ما ضحيت بي تبغي الضحيه شخص ثاني
منته بمجبور تدخل هالطريق اللي دخلته = التلاعب بالمشاعر جنبه يامودماني
لاتحاول تدعي بالصدق طبعك ماجهلته = من تلاعب يكشفه ربي ولو طال الزماني
من تسمّع في كلامك قال هالمخلوق فلته = مادرى انك تختلف بين الدقايق والثواني!!
والله اني عارف ٍلعبك وكل اللي عملته = ماخفاني كل ماسويت بعدي ماخفاني
ياخساره حبك الي في سويداء القلب شلته =معتبرك اغلى حبيب وكنت عايش في كياني
حافظك حفظ العيون وعنك كلش مابخلته = وان ذكرتك في منامي صحت ياكل الاماني
راسم لك في خيالي حلم مات ولا وصلته = صدق من قال المغيّب تطلع الشمس ويباني
ارحل ارحل لن قلبي عن هوى مثلك قفلته = ابك انا نفسي عزيزه ما اتذكّر من نساني
عاشقك شاف القهر في ساعة الشده خذلته = ماعلى مثلك حسوفه يامضيّع للحساني
والله اني ماظلمتك فالكلام اللي اللي نقلته = غير شي قدم عيني للشعر هذا دعاني
بكره يصدقني اللي في محابيلك حبلته = ينكوي من نار غدرك مثل ما غدرك كواني




17


...
كل عام وانتم بخير
قبل لحظات قرأت قصيده الشاعر نايف عنيزان الشمري
والتي خص بها هذا المنتدى وقبيلة عتيبه
وقد ارتجلت هذه الابيات المتواضعه
وليعذرنا على القصور ...
و هذا هو رابط قصيدته



http://otaibah.net/m/showthread.php?t=82674




هلا يامرحبابك عد ماهل المطر وبال = عدد مالاح برق الوسم ولاّ ..دن رعاده
هلا يالشمري في منتدى الهيلا وخذ فنجال = فناجيل الكرامه تحمل إلك البن وقناده
كرامتك الشحم والعود الازرق ياعريب الخال = سلوم عتيبه الهيلا وصاة العود لحفاده
فعايلنا على وضح النقا تحكي بها الاجيال = لاواعدنا نجي قبل العدو في يوم ميعاده
رياجيل النهار المعتبر وزحول ماننحال = ولدنا ينتخي بالمرجله في داخل امهاده
لنا وقت اللوازم وقفة ٍتضربها الامثال = ومن لايثبت اقواله يخل السيف بغماده
نبادلكم شعور الطيب والتقدير والاجلال = لنا ميقاف واحد في سنام المجد وشداده
ياشمر طيبكم شاهر وظاهر والصحيح ايقال = مداغيش الرجال اللي لكسب النعم معتاده
اهل مجد ٍ تليد وسطوة ٍ منها العدا تهتال =سناعيس ٍ نهار الهوش للاخصام ضداده
وفي كل القبايل خير فالمنزال والترحال= هل الطالات والقالات كلٍ تبهر امجاده
يقوله شاعر ٍ جارى بيوتك في بيوت جزال = قبل يختم يقول الله يعز الشعب وبلاده
عسى الله يحفظ العاهل ملكنا طيّب الاعمال = وابو خالد ولي عهده عضيد الليث وسناده
صلاة الله على الهادي محمد مايهل اهلال = رسول ٍ خصه الله بالرساله وارشد عباده






18

انا ما احب من كان يتغلاّ = ولا امشي فالطريق اللي مشابه
ليا منّه وقف قدمي وهلاّ = اجنّب عنه ما احسّب حسابه
اعرفه لو ضحك لي واسفهلاّ = يصيبه عجب ويكثر عتابه
ضحوك وضحكته فيها ايتسلاّ = يحسبني غشيم ٍ مادرابه
ولكن من فضل ربي تجلاّ = غروره هو سبب قل الحلابه
احب اللي صفالي ماتخلاّ= صدوق وهرجته فيها حبابه
فؤادي من كثر حبّه تملاّ = وعن غيره ترى مقفول بابه
حبيب ٍ صوب غيري ماتحلاّ= صدوق ومخلص ٍ وافي جنابه
معاه الحب سكر مايملاّ= وروحي في غرامه مستصابه
صحيح انه غزاني واستحلا = سكن فالقلب وودع له مهابه
سيوف الموت من عينه تسلاّ = وكل الزين مخفيته ثيابه
عطيته كل ما املك ثم ولاّ = وغاب ولاعرف سبّة غيابه



19

عجائب الدنيا ماهــيب اشـــويّه =ياكثرها بأعلامنــــــا المقـريّه
شد انتبـــــاهي قصـــّة ٍ مكتوبه = ومــوثـــقه بالصـــوره المرئيـه
قصّه غريبه واصبحت مشهوره = باللي عطوها هـــاله اعلامــيّه
ناس ٍ تدوّر للكـــــلام الفاضي = واعــــداء نا تـــــفرح على هذيّه
خذ ياعزيزي مختصــر هالقصّه = اســــباب هالقصــّه وجــود ابنيّه
جت تشتغل من حاجه حدّتهــــــا = وتقول ابا اكسب عيـــشتي بيديّه
توظـــفت في مطــعم ٍ طـــــــباخه = وتــــقدم الوجــبات فالــــصيــنيّه
واللي يبي يطلب تضيع اعلومه = يقعد يطـالع عيـــــنها الكــحليّه
وانقسموا اهل المعرفه قـسميني = كل ٍ بها لموضوع ادلى ادليّـــــه
احد زعل من فعلها ويعارض = ويقول لاهنتي تـــــــــرى مكــفيّه
مثل العمل هذا لايمكن يحصــل = المسلمه ماهــي كمـــا الغــربيـــه
عند الحمـــايل عيب واكبر منكر = فيها (قبايــــل) ماهي بعــــاديّــــه
بنت الحمايل سترها و عزّتهـــــــا = في بيتها كالجوهره محميّـــــــه
واحد ٍ يؤيد فـــعلهـــا وبقــــــوّه = يقول هالموضـــــوع مابه شــــيّه
من حقها تعمل وهـــي مستوره = اخير من بعــض الدروب السيّه
موضوع عادي واضح ٍ تفسيره = حنا بوقت العدل و الحريّـــــــــه
كثر الكـــــلام ولا طلع نتيــــجه = والمشكله يبغى لها حسميّــــــــه
ياليت به عالم يصـــــدّر فتوى = يفتــــي لنا بالنظـــــــره الشرعيّه
من اجل كل ٍ للحقيقه يرجــــع = ان كان في قصده صلاح النيّـــــه



20


غريبه حال هالدنيا عجزت القى لها عنوان = تقول ان الغدر من طبعها والطيب عادتها
جميله لكن الخالق وصفها با اقبح الالوان = ولابه شخص في هالمجتمع ماذا ق لوعتها
جميله كنها العذرى .. خطيره كنّها الثعبان = تجمل لك , ولكن ماتدوم الك بسعادتها
تغرك في تبسمها وتعشق ثغرها الفتان = وتحسبها صدوقه لين تستكشف حقيقتها
حقيقتها خفيّه مايمزها سوى الفهمان = على نهج النبي ماهوب واقع في متاهتها
تدور ابنا لياليها وهي من عمرنا نقصان = ولا يمضي نها ر الا نقرب من منيتها
سريعه في تقلبها تجي لك كل يوم بشان = تمسيك بحلاوتها وتصبحك بمرارتها
وهذي حكمة الخالق خلقها واوجد الانسان = لجل يخلص له الطاعه ولاتغريه زينتها
تراها جنة الكافر ربح فيها وهو خسران= ولو الله جعلها خير مايسقيه شربتها
ترك منهج نبيه واستمر بمنهج الشيطان = مشى في سكة ٍ بالنار ترمي به نهايتها
سعيد اللي بها وفق لفعل البر والاحسان = ولو زانت بعينه ممتلي قلبه حقارتها
وشقي اللي جعلها غايته وابعد عن الرحمن = تولع في هواها واعتبر همه ملذتها
عليه انه يتوب من الذنوب ويطلب الغفران = عسى الله يلطف بحاله ويمحا كل سيتها



21


اول بعرش القلب ما حدٍ يساويك=واليوم لاتزعل بعد طاح قدرك
مادام هـذا منهجك وش نبي فيك =ضيقت صدري ضيق الله صدرك
اترك غرورك وانتبه في مماشيك=انصحك لاتعجل على حفر قبرك
كنت امدحك وافرح بشوفك وطاريك= واليا طلبت اقول لك تحت امرك
وكنت احسب انه مابه احد ٍ يحاليك=حتّى كشف لي غيب الايام غدرك
كم مرة ٍ تغلط واسامح واداريك=حتّى كشف لي غيب الايام غدرك
ارخصتني وانا الذي كنت شاريك=والان انا بعتك ورخّصت سعرك
ابا انخلع من كل شي ٍ يطرّيك= ولا بذكرك بالخير لا حل ذكـــــرك
تزعل بليّا شي مانيب مرضــيك=لاتحسب اني حاسب حساب هجرك
ضيعت معروفي وضاعت هقاويك= ولاني ملحقها الندم يوم اخسرك
واصل طريقك جعل ربي يهنيك =و شف واحد ٍ غيري تحطــــه بأسرك



22


يطيب الكيف في بدع النشيده = واقــدم كل شـــــيٍ نستــفيده
ولا قـــــدم رديــــات المــعاني = عداوه بيني وبين الكســيده
كسيد الشعرما اسمع من يقوله = ولحظة يبتدي ماصير حيده
على الشاعر يمـــيّز في بيوته = ويبنيها على الساس الجويده
وميدان الشعر مفـــــتوح بابه = مجال الشعر واسع وتـعديده
ومن يتعب على الطيــّب يناله = يناله لابــذل جهـــــدٍ جهـــيده
ليامنه بذل جهـــده يوصــــــّل= يصل للمـــــجد بعزوم ٍ شديده
ترى الرجال في وقــت الشدايد = يطقــــك يالحــديده بالحـديده
وهذا شــي مايـــبغي شواهد = مشاهد يا هل الراي السديده
يابو ماجد يابيطار القـــوافي = اعـــدك فارس الشعر وعميده
بيوتك لامعــه مثل الكواكـــب = تلامـع بالمـــــدارات البعــــيده
تلامـــــع بالفـصاحه والجزاله = جمعت الطيب ياعـــمّه وسيده
ومنك الشعرمانسأم سماعه = ومن يســمع لمنظـــومك يفــيده
تقول ان الشعر عـاش بظليمه = تبهذل ما عرف من صار بيده
تبهذل من جهول ٍ بالقصــايد = ماهــمّه غير قافه وتغــــريده
مقاله خالي ٍ من كل مــــعنى = وفيده مايجـــــــمل من يفيــــده
حقيقه مشكله ماهي بسيطه = عواقــــبها ترى ماهــــي حميده
مصيبه لو تبي تنقد وتشرح = تعــــــرض لك شياطين ٍ مريده
وكل ٍ يدعي في وصل ليلى = وليلى قيس غـــيره ماتـــــــريده
جهل بالشعر من يجهل فنونه = سواليــــف ٍ يعصـــّدها عصيده
يحسب انه وحيدا ً في زمانه = وأطـــلق شاعر ٍ ماهو ضديــده
وانا اقول انت صادق في كلامك = قديمه من زمن ماهي وليـده
ولكن للشعر ناس ٍ تصـــــونه = يبثّون الجواهر في صعــــــيده
مدارس من جلس معهم تعلّم = ويصبح فالشعر ما احـــد ٍ نديده
مثل بدر الحويفــي والزلامي = واحدهم لابــدع يطرب قصيده
وعبدالله وغازي والعطاوي = وشعار ٍ لهـم ذكـــــــرى خليده
وبن جدلان والسامر وغيره = وبن ريفه ليا عـــــــدوا عبيده
ومستور العصيمي والرياحي = وملفي يا عسى ايامه مديده
هل الاشعار ما نحصي عددهم = لهم بالشعـــر صفحات ٍ وكيده
وصلى الله على الهادي محمد = عدد ماغــــــرد القمري نشيده


23


ياهجوسي لارهجتي وردي عذب البيوت = طمعتي جزل المعاني ياضــميري هاتــها
الكلام اللي يفيد الناس اخير من السكوت = يوم بعض الناس اخير من الكلام اسكاتها
القصيده لو يموت اللي كتبــــها ماتمـوت=اثبت الواقـــع قصـــايد خلــــدت لامواتها
طاعة الله في حياتي معتبرها خير قــوت=والحقـــيقه قوت يغني عن جميــع اقواتها
مطلبي فعل الشــكاله وان بدالي مايـــفوت=تنقهر روحي على فعــــل الوفا لا فـاتها
والمراجل سلم ابوي وسلم عالين السموت=الرجال اللــي على الطاله علت هامـاتها
والنميمه ماعشقــــها كرهها عـندي ثبوت=اكره اللي يقــــولها واكــره بعد جلساتها
مجلس ٍ فيه النميمه ينبت الحسره نبوت=قبح الله وجــه ناس ٍ هالردى غاياتها
راعي النمه مريض وكـــم في قوله بهوت=البشر كنّه تخصص في كشـــف نياتها
لاسمع له هرجة ٍ عنون لها فاجمل كروت=ثم نشرها والمكر والخــــبث في طياتها
كم يفــرق من جموع ولا يلملم من شتـوت=مهنته شذب المقــــفي في جميع اوقاتها
مذهب ٍ ربي حلاه ودايـم السانه فلـــــوت=نفسه القـشراعلى ضر البشر مشهاتها
مايحط النفس في موقف ردا رجلٍ صموت=الرجال اهـــــل الحمــــيّه تنعرف وقفاتها
الرجوله والشهــــامه طبع زاكين البخوت=والرديّه للــــردي والنــاس من عاداتها



24


هجس المعاني ثار واطلق عنانه = مع ثورته كل المشاعر تظامن
الشعر له عندي مقام ومكانه = عن الهزيل اشوم واختار الاحسن
اترك هزيل الشعر واخذ سمانه = الشعر رفعت راس ومارسه فن
مشعل يقول وقلت صحت لسانه = شاعر نظم جزل البيوت وعسفهن
علاقته بالطيب فيها متانه = ادروب ذربين اليماني مشاهن
اخو ويزهم واحد ٍ من اخوانه = والطيب بين الناس عادات ومهن
يامسندي كانك طرحت الميانه = فأنا لحسن الظن شاكر وممتن
اقف معك في عسر ولا ليانه = وقفاتنا عند اللوازم يبينن
وسط الهوى مال الهواوي ضمانه = يمكن يعيش افراح ولا يحزن
وقلبك من المحبوب بين جنانه = ومعذور يوم انه بحبه تجنن
غرو ٍ تميز بالدلع والشطانه = فيه الحلا فاق البني في حلاهن
اطلب من الله في هواه الاعانه = يفرج هموم ٍ وزنها اثقل من الطن
ويعود لك شخص ٍ ترقب حنانه = لحظة لقا زين النبا ماتثمن
وانا ترى قلبي يزيداخفقانه = اليا ذكرت اللي غرامه تمكن
اليا ذكره القلب زاد احتقانه = عانيت من فرقاه وش لون ماحن !!
مدري متى يرجع وتكي وزانه =تشتاق له جو البلد و(الاماكن)



25



عصارة فكر اهداء لكل من احببته فالله

الجـو بارد والـسماء كلها غـــــيم = ونور القمر محجوب واللــــــيل حالك
صارن مغاتــــير الليالي مجـــــاهيم = رحـــماك يالمعبــــود جـلاّ جلالك
قامت تلاشـــــا بالزحول المـــلازيم = كـــــم واحـد ٍ في كلمــته ماوفـــالك
الهم ياكــــثره ويا ما اكثر الضــيم = والمـــشتحن ضاقت عليه المـــسالك
كم واحـــد ٍ صـــارن اهمومـــه مراديم = ويقول انا من بدت الناس هـالك
ياللي تقـــــول الــهم في قلبك امقيم= اقــــــول ما انت بهالمـــشاكل لحالك
غيرك ترى به فالخلايق مهامـــيم = معـــروف هـــــــذا شي حطّه ابالك
الغيــب يــــبدي فالليــــال المــقاديـــم = واللي كتب لك في جبيـــنك ينالك
اصبر على ماجاك واعمــل بتصميم = وعن الطــــويله لاتقصــــّر احبالك
ان كنت نايم يكفي النــوم يانــــــيم = صحصح عسى واليك يلطف بحالك
معروف هـالدنيا حظــوظ ومقاسـيم = واللي كتب لك بالمــقاسيم جـــــالك
تاخذ نصيبك والعــــمل بالخــواتيم = واللي يحسدك ما نقـــص من حلالك
امع الـــعزايم يحصــــلن المغانــــيم = وعلى ســــوى الله لا تحـــــط اتكالك
تبغى النجاح اتبـــع صحــــيح التعالــيم = واتعب وساعد مع يمينك شمالك
حل الصعايب با اتفـــــــاق المفاهــيم = ماهوب شـــــي اتقدره من خيالك
هذا كلام الصـــــدق من غيــر تعتـــــيم = وعليك تطبيقه على مـــاطرالك






26

سر ياقلم واكتب من الشعر طاروق = من هيض بالي ماني بمستعيره
طاروق قدره مع هل الشعر مرموق =شانه كبير ولا تجي به حقيره
ردّ ٍ على اللي ساق عذب الشعر سوق = راع الجز اله والبيوت الغزيره
من زين بدعه للشعر هزني شوق = وانا من اللي كل طيّب يثيره
عن ماقفي لاقمت ماعاقني عوق =اكبر كبيره في عيوني صغيره
عبد العزيز ينوح والدمع مدفوق = دمع ٍ على خدّه تزايد نثيره
لو جا يخفّي دمعه اللي من الموق = عينه تبيّن مايكنّه ضميره
قلبه من اللي شافت العين محروق = وخطر ٍ عليه يبيح كل السريره
فيها الجمال وخدها كنّه ابروق = مامثلها موجود وسط الجزيره
تفرق عن اللي مثلها عدة افروق = بنت الشجاع اللي يقود الجريره
منها شكالي حال والبال مقلوق = والله من اشرور الليالي يجيره
يبشر بعزّه ماتمناه ملحوق = وربّي يقدر بالمقادير خيره
ياراكب اللي للمهمات مسيوق = توّه جديد ولا تخيرت غيره
اليا عطى له خط ماهوب مسبوق = ماتسمع الا خلف بديه صفيره
امصممٍ لجبال واسهول وعروق = شاص مجهز للدروب العسيره
اليا نتلته حاق كل الثرى حوق =ماكنّه الاّ الحر لحظة مطيره
يمشي بساعة تبدي الشمس بشروق= فوقه ارجالٍ ينطحون المغيره
نلفي هل المزيون والوجه مطلوق = وكل الصعايب باذن ربي يسيره
بالجاه نبدي وان بغوا مال بنسوق = مايطلبونه كافلين اتحضيره
اليا تحقق مانبي غيره احقوق = هذا المراد وتنتهي كل سيره
عبد العزيز يفارق الهم ويروق = وينشر خبرها فالصحف والجزيره

27

قالوا تزوّج واكثر الهم ينزاح = وتصير بعد العرس رايق ومسرور
تلقى السعاده والوناسه والارباح = بنت الحلال الها على راحتك دور
صدقت هالمفهوم والقلب مرتاح = اهم شي (البنت) والمهر مقدور
وقعدت اخطط كيف تحقيق الاطماح = والعبد باذن الله منهي ومأ مور
عند الشويّب قمت المّح تلمّاح = واقول يابويه ترى العرس مذكور
القصد واضح مايبي مني ايضاح = وانته خبير وعارف ٍ كل مستور
قال انتبه فالعرس ماتصلح امزاح = ان كنت صادق فــ اجعل الهرج مقصور
زوجتك عندي جاهزه والنكد راح = ابو سعد رجال بالطيب مشهور
عنده ابنيّه خدها بارق ٍ لاح = كن القمر من نورها ياخذ النور
فيها الجمال وكل مايعني اصلاح = ماكنّها الا في حلاها من الحور
اخذت رايه وانطلقنا بمسراح = و سمعت منه الشور ياحي هالشور
جينا لبيته مع تباشير الاصباح = بيت ٍ على فعل المواجيب معمور
نبي نخطب اللي لها سدنا باح = ونبغا الاجابه من ابوها على الفور
جتنا الاجابه تم واعلنت الافراح = وانا من اول من عنا الوقت مقهور
والحظ عزّه قام من بعد ماطاح = وانا احسب انه يقضي العمر معثور
هذي حقيقه مابها كذب وامزاح= اثر الزواج يخلي الرجل مسرور!!



28
هذي حقايق وارتجي فضل مولاي= فأبيات شعر ٍ قلتها بالرويّه
لولا المواهب ماتنقيت معناي=ولازان لعبي بالبيوت النقيه
ولولاالهنا فأجمل محبه بدنياي = كان اشتمك يالحب صبح وعشيه
ولولا العطش ماجيت مسرع على الماي = ولو لا الروى ماقلت شربه هنيه
ولولا الوفا والجود ما سرت بخطاي = ولاقلت فعل الطيب واجب عليه
ولولا يقيني ما تحملت بلواي = وابغى الاجر من عند رب البريه
ولولا الصبر مع عز نفسي وتقواي= كان ارتكب في حق غيري جنيّه
ولولا التواضع ماتسمـــعت للراي= ولولا التفاهم ماحسمت القضيّه!!
ولولا القناعه منتهايه ومبداي= كان الطماعه علة ٍداخليه!!
ولولا الجلاده ماتصديت لعداي= ولوفيت بالميقاف في كل هيّه
ولولا التعلم كان عايش بعمياي= العلم يرفع والجهاله دنيه
كلش مقدر من إلاهي وملجاي =يسر لي الاسباب روحه وجيّه
خيره كثير ونعمته مالها احصاي = الشكر له والحمد في كل شيّه


29
يعيش الشاعر اللي بالجزاله شعره افخم نوع = قليل اللي ليا قال الشعر يجلب مثل نوعه
بعد مابان بالساحه نبا قدمه نشب اشموع =وكل المنتدى فرحان به وتنوّر اشموعه
يابو (نجوى) ترى مثلك مشى درب الوفا بطلوع =ولاظن الوفا يسهل على الرجال بطلوعه
ترى درب المراجل ياوسيع المعرفه متبوع = وسكّه ماتوديك الفخر ماهيب مطموعه
صحيح ان الزمن قاسي شكاه الخافق المفجوع = تبسم له ولكن بالنهايه زاد بفجوعه
صبرناوالامل باللي خلقنا ماهو بمقطوع = ثقتنا فيه دايم ثابته ماهيب مقطوعه
بعد كثر الحزن من رحمته يفتح لنا ينبوع = ولو جفت ينابيع البشر ماجف ينبوعه
ومن لايا صل الهقوه يسمونه قصير البوع= ويغشاه الملام الياقصر عن ماقفه بوعه




30

العمر مثل البرق يمضي و الايام = والناس تفنا ..ما انتهت من غرضها
تمضي ليال وتمضي اشهور واعوام= واللي فـــتل حبل المناوي نقضها
تركــض بنا الايام قـدام قـدام = والموت... حق وكم نفس ٍ.. نفضها
واتلا حياة العـبد قطعه ..من الخـام = واعمـاله الله قدم عينه عرضها
الرابح اللي قسمته... خير الاقسام = وروحه تحت لطف الولي لاقبضها
من فضل ربّه مقتدي.. بامر الاسلام =ونفسه عن ادروب المعاصي وعضها
حفظ جميع اركان دينه... والاحكام = وفروضــه اللي ..ربنا قد فرضـها
والخاسر اللي. مايصلي... ولاصام = وامـــور دينـه.. كلها ما حفظها
ضيّع حياته .. بالتسوّف والاوهام = واليا... دعيتــه للهـدايه .. رفضها
مشغول في صنع المشاكل والاجرام = المشـكله لو جنّـبته .. اعترضها
ياكل وشرب .. عيشته مثل الانعام = نفسه مريضه هو سبايب مرضـها
كم باع في سوق المعاصي وكم سام = روحه بدل نيل المعالي .. خفضها
نصيحتي له يغــنم العمــر قدام = يخسر خساره ما يرجع .. عوضها
الدين والحكمه تراها اكــبر اوسام = والهينه لاعـــاش قلب ٍ نبضها
خطوى الفتى لاجـاك عزام.. جزام = وصـدره على فعل المراجل نهضها
ترى المراجل.... ماتحقق بالاحلام = المجــتهد يمكن .. يحقـق بعضها



31

فدوة ٍ للمصطفى روحـــي وماتملك يميني = كيف لا .. واللي خلقني حط حــــــبه في كياني
حط حـــبه في كياني ماتغيـــــــره السنـيني= وانثني من دون عرضــــه بالذراع وباللـــــساني
باللسان ادفع عنه واصد كيد المغرضيتي = والذراع اضرب على من مس عرضه بالسناني
حبه اغلى من حياتي والولد والوالديني = واجـــــب ٍ هــــذا عليـــنا في قــــسا ولا لــــياني
النبي اللي جعـــله الله خــــير المرسلــــيني = جل من خصّه بفضـــــــل ٍ ماعـــطاه لمودمــاني
خير من يمشي على وجه الثرى فالعالميني = الشفيــع الهاشـــمي يوم الحـــشر فضــله يباني
في نهار ٍ تذهل المرضــع وترمي بالجنيني = يمنــــــــحه ربي شــفاعه لامـــته قاصـــي وداني
صاحب الوجه المنير وصاحب اللب الفطيني = الامانه من صــــــفاته والتواضــــــع والحناني
دعوته خير الدعاوى كلها.. حكـــمه ولـــيني = ابتـــــــــداها باهـــل بيته..... ثم بينــــها بياني
كلفه ربي وقال اصــــــدع بها في كل حيني = من يطيعك طاعني واللي عصى لامرك عــصاني
صدقوه المؤمـــنين االصادقين لمخلــصيني = مثل ابو بكر وعلي في سر.... ولا فـــــي علاني
بعد ماشاف الاذيــه من يسار ومـــن يميني = اعلـــن الهجره وحان امفارق الاوطان حاني
انطلق من وســط مكه داخله قلب ٍ حزيني = ماعليه افراقها رغم الذي لاقـــــاه هـــــــاني
متجه صوب المدينه يدفعه شوق وحنيني = لهلها اللي بايعــــــوه وقدمـــــــــوا كل الاماني
معه ابو بكر الصديق الصادق الرجل الاميني = صحبة ٍ ياطيبها ما ادرك شرفها شخص ثاني
حين ماوصل المدينه اظــــهروا له منشديني = مرحبا باللي لفانا من بعـــــــــــيد الدار عاني
كل يقول انت عندي مسـكنك في وسط عيني = يارسول الله تعـــــال فداك روحي والمـــكاني
كرموه وناصروه وصار له حبّ ٍ مكيــــني = في قلوب اللي لهم في صفحة التاريخ شاني
انصره ربي واعز الدين بالفتـــــح المبــيني =وارتفع صوت الاذان وكبـــــــــــرت كل المباني
من تمسك سنته ماخـاب في دنيا وديــني = منهجه نور ٍ يدخـــــــــــــلنا مع ابواب الجناني
كيف يجرأ واحد ٍيرسمــــه بالرسم المشيني = قبحه ربي وجـــعله من هوان ٍ في هواني
اتهبا يالدينـــــمركي ياللعـــين ابن اللعـــــــيني = والله انك ماتحقـــق غايتــــك ياهالجباني
الشلل جــــعله يصيبك فالرجـــــول وفاليديني = ماتهنا في حـــــــياتك من كثر منت بتعاني
من اجل تكون عبره للــــــعلوج الحاقديني = لو حنا نعرفك يوم المـــــــــواجه ماتداني
انكشف حقد النصارى المشركين المجرميني = والهدف تشويه هذا الدين مع طول الزماني
قاله الله في كـــتابه كل...... الامه عارفينـــي = العداوه ماتغــــــــــير لو نفى كوفي عناني
وابك حنا ماخلقـــنا.... غيـــر لله عابدينـــــي = والشهـاده في سبيله نعتبرها اغلى الاماني
ان دعا داع الجهاد نقــــوم لله مسرعيني = مع ولي الامر مانخلف عنه حتى ثواني
والسلام اختــــام يالله ياولي الصالـــــحيني = نسالك لطفك وعفوك والمزيد من الحساني









32

[/font]
يطربني الممشا بدار ٍ خليه = البر ولعه للرجال الطحاطيح
ياعلها بالسيل صبح وعشيه = من وبل همال المزون المراويح
نوٍّه حقوق ومزنته عقربيه = من قو سيله يبرح الارض تبريح
تغدي صحاري نجد خضراً عذيه = مثل الزوالي عشبها فالصحاصيح
ماكنها الا فالشكل مزهريه = ريح النفل مخلوط مع ريحة الشيح
وسط الفياض اللي لها قابليه = مشي ٍ بها طب القلوب المجاريح
ارض ٍ قفر ماداج فيها رعيه = غير ام سالم ترتفع فوق وتطيح
نمشي لها في ليل ولا ضحويه = فوق الجيوب امبعدات المساريح
وليا وصلنا باذن رب البريه = يطيب كيف اهل الوجيه المفاليح
الجو بارد والمساكن دفيه = والبن الاشقر من بعده المفاطيح
في ليلة ٍ غدرا بها النار حيه = يجذب سناها مثل نور المصابيح
احلى الليالي ليلة ٍ شاعريه = فيها السوالف تبتدي و التمازيح
أمع الرجال اللي لهم مقدريه = خوّة نقا ماهيب خوة مصاليح
كل ٍ يقدم فزعته عن خويه = أمعود ٍ نفسه على هبة الريح
تسوى السكن في عالي الفيصليه = ولاّالتسوّح في ديار المماليح
وصلاة ربي عد وبل النشيه = على نبيّ ٍ وضح الحق توضيح

33

بعض الغلا ياخذ له ايام ويزول = وبعض الغلا نفنا وهو لايزالي
وانت غلاك بوسط قلبي على طول = ماينمحي لو طولن الليالي
ماينمحي حبك ولا هوب معقول = انسا هواك وصورتك في خيالي
اصبحت من حبك عن الناس معزول = ماكنّي الا في جزيره لحالي
عليك قلبي بين الاضلاع متلول = تل الرشا من بير مابه محالي
الموت من عينك على القلب مرسول = لاشفت عينك صار في اختلالي
اصير من كثر الحلا فيك مذهول= ومن القهر تصفق يميني شمالي
يابو ثمان ٍ صف عقد ٍ من اللول = والخد مثل البرق وسط الخيالي
والعنق عنق الريم والطرف مكحول = والعين عين اللي على الوكر عالي
ضامر حشاء والساق مدمج ومفتول = والورك ضامنّه احمول ٍ اثقالي
زين القوام اللي تناسق مع الطول = وشيب عيني منك وبري حالي
فيك الجمال اللي غلب كل مجمول = الله عطاك من الجمال الكمالي
جمالك اللي مانوفيه بالقول = يعجز كلامي ياحسين الدلالي
الشاهد انّي من محبتك معلول = والحق حق وواجب انّه يقالي
ان مت كم قبلي من الحب مقتول = سجل له التاريخ عاشق مثالي

34

عز الرياض وعز وادي حنيفه =وعز الامــــــــاره والامور العظايم
عدل الحكم سلمان بالعــز ريفه =خمـــسين عـــــام كلبــــوها غنايم
تبصر بعدله عيـــــن حي كفيفه =والمجد له والطيب والعـــــز دايم
العز دايــــم والمـبادي شريفه = ريف الضعيف اللي له الحمل ضايم
هداج تيما ما نقص من غريفه = قسمه من الطولات خــير القسايم
مثل الخيال اللي تزايـــــد قنيفه = للطيب في وجـــهه تشوف العلايم
حلحيل حلال الامــــور الكليفه = له هـــــــــيبة ٍ يثبت لها كل قايم
بالعقل والحكمه قليل ٍ وصيفه = ارس العدل واوقف جميع الظلايم
ارخا على ارقاب المعادين سيفه= وزاح الظلام وماحصل من جرايم
مثل الاسد لهل العقول السخيفه = اللـــــي سعو للتفرقه بالنمايم
سلطان نجد وقمة المجد كيفه = حقــــق جميع اللي رسم بالعزايم
سجل له التاريخ صفحه نظيفه =صفحة بطوله ماتعرف الهزايم
خلا صحاري نجد خضرا مريفه = وظل ٍ يظلك عن شموس وسمايم
عان الرياض امست عروساً عفيفه=عروس نجد وغيرها مايلايم
فيها تســـــاوى مع ربيعه خـــريفه = قمة جمال وذعـذعي يانسايم

في الختام

تقبلو خالص تحياتي

عمر العتيبي















التوقيع
في منتدى الهيلا زحول الرياجيل = بيت القبيله و النشاما إرواقه
يزينه حرصه لزين التماثيل = ويجمله نبذ العلوم الدقاقه
رد مع اقتباس
قديم 04-May-2008, 01:33 AM رقم المشاركة : 2
معلومات العضو
سعيد الزهراني
عضو ماسي
إحصائية العضو






التوقيت


سعيد الزهراني غير متواجد حالياً

افتراضي

يعطيك العافيه ولك مني اجمل تحيه















رد مع اقتباس
قديم 04-May-2008, 01:51 AM رقم المشاركة : 3
معلومات العضو
محمد العتيبي

مشرف منتدى شعراء قبيلة عتيبه


الصورة الرمزية محمد العتيبي

إحصائية العضو






التوقيت


محمد العتيبي غير متواجد حالياً

إرسال رسالة عبر مراسل MSN إلى محمد العتيبي
افتراضي

بيض الله وجهك ياعمر
ولك الشكر الجزيل على اتحافنا بديوان استاذنا
الرائع مرزوق بن حمدان العتيبي ..

وصح لسان ابومحمد على القصائد الوافيه ..
ولي عودات اخرى .
...















التوقيع
اضغط على الصورة لرؤيتها بالحجم الطبيعي









للتواصل عبر twitter تويتر


al_bargawy@
رد مع اقتباس
قديم 04-May-2008, 01:52 AM رقم المشاركة : 4
معلومات العضو
عمر الدغيلبي
مشرف سابق

الصورة الرمزية عمر الدغيلبي

إحصائية العضو






التوقيت


عمر الدغيلبي غير متواجد حالياً

افتراضي

اقتباس:
المشاركة الأصلية كتبت بواسطة سعيد الزهراني مشاهدة المشاركة
يعطيك العافيه ولك مني اجمل تحيه
الله يعافيك

ولاهنت على مرورك















رد مع اقتباس
قديم 04-May-2008, 01:55 AM رقم المشاركة : 5
معلومات العضو
عمر الدغيلبي
مشرف سابق

الصورة الرمزية عمر الدغيلبي

إحصائية العضو






التوقيت


عمر الدغيلبي غير متواجد حالياً

افتراضي

اقتباس:
المشاركة الأصلية كتبت بواسطة ابومشعاب مشاهدة المشاركة
بيض الله وجهك ياعمر
ولك الشكر الجزيل على اتحافنا بديوان استاذنا
الرائع مرزوق بن حمدان العتيبي ..

وصح لسان ابومحمد على القصائد الوافيه ..
ولي عودات اخرى .
...
ووجهك ابيض يا ابو مشعاب

العفو طال عمرك وابومحمد يستاهل كل خير

ولاهنت على المرور يا الذيب















رد مع اقتباس
قديم 04-May-2008, 03:34 AM رقم المشاركة : 6
معلومات العضو
محب الهيلا
عضو ممـــيز

الصورة الرمزية محب الهيلا

إحصائية العضو






التوقيت


محب الهيلا غير متواجد حالياً

افتراضي

عمر العتيبي

يعطيك العافية على هذا الديوان الرائع للأخ مرزوق حمدان العتيبي

وصح لسان شاعر منتدى الهيلا وفاله التوفيق















رد مع اقتباس
قديم 04-May-2008, 12:13 PM رقم المشاركة : 7
معلومات العضو
فيصل المسعودي
مشرف عام
إحصائية العضو





التوقيت


فيصل المسعودي غير متواجد حالياً

افتراضي

أستاذنا وشاعرنا الرائع / مرزوق بن حمدان العتيبي


يجمع جزالة اللفظ والمعنى

قصااائد وووااافية بلا شك

نتمنى له دوام التوفيق

ومشكور يالغالي

على جمع هذا الديوان وتزويدنا به

بيض الله وجهك ياعمر ولا هنت ياغالي

تحياتي















رد مع اقتباس
قديم 04-May-2008, 02:52 PM رقم المشاركة : 8
معلومات العضو
محمد بن غازي
مشرف عــام

الصورة الرمزية محمد بن غازي

إحصائية العضو






التوقيت


محمد بن غازي غير متواجد حالياً

إرسال رسالة عبر مراسل MSN إلى محمد بن غازي
افتراضي

بيض الله وجهك ياعمر على عمل الطيب وأظهار بعض من أبداع أستاذنا وأخونا الكبير/ مرزوق بن حمدان والله يوفقه ويجعل السعد فاله وننتظر طباعة الديوان ....















رد مع اقتباس
قديم 04-May-2008, 03:24 PM رقم المشاركة : 9
معلومات العضو
ابن محماس العصيمي
عضو ماسي
إحصائية العضو





التوقيت


ابن محماس العصيمي غير متواجد حالياً

افتراضي

بيض الله وجهك ياعمر على عمل الطيب















رد مع اقتباس
قديم 04-May-2008, 04:32 PM رقم المشاركة : 10
معلومات العضو
سعود الجعفري العنزي
عضو فضي
إحصائية العضو





التوقيت


سعود الجعفري العنزي غير متواجد حالياً

افتراضي

بيض الله وجهك ياعمر على اتحافنا هالدرر
اختيار موفق ونعم الاختيار لشاعر معروف له قدره

الشاعر الاستاذ مرزوق بن حمدان العتيبي




تقبل مروري المتواضع

ودمت بخير وعافية
















رد مع اقتباس
إضافة رد

العلامات المرجعية


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن »07:42 PM.


 Arabization iraq chooses life
Powered by vBulletin® Version 3.8.2
.Copyright ©2000 - 2022, Jelsoft Enterprises Ltd
اتصل بنا تسجيل خروج   تصميم: حمد المقاطي