شعراء من عتيبه الهم بصمه في حياتهم وبعد مماتهم

[الصويت الثبيتي العتيبي]

بسم الله الرحمن الرحيم



السلام عليكم ورحمة الله وبركاته ,,,, وبعد



اضع بين ايديكم بعض قصائد للشاعر العملاق مطلق الثبيتي رحمه الله والشاعر الكبير محمد بن تويم الثبيي رحمه الله واتمنى ان تنال إعجابكم.


مطلق الثبيتي

أختار سمحـات الـدروب النظيفـة
أللي غسلها رايـح المـزن برشـاش

يمشونهـا قـوم النفـوس الشريفـة
أللي ضمايرهم نقيـة كمـا الشـاش

بيوتهـم مثـل القـصـور المنيـفـة
ماهي لطير البوم غيـران وأعشـاش

وإحلالهـم للضيـف دايـم مريـفـة
لو رجلهم يسرح ويضوي على مـاش

والرجـل منهـم مايخلـي رديـفـة
إن مات غيره مات وإن عاش له عاش

وإن مات منهم رجـل عقـب خليفـة
يطعن نحور القـوم ويـرد الأدبـاش

يعرف هدف روحه ويعـرف وليفـه
مايعـرف الخونـه ولاهـو بغشـاش

وإليـا رزقـه الله بعـذراُ عفيـفـة
يحطهـا مابيـن نونـه والأرمــاش

ماهو على الخفـراات يستـل سيفـه
ولاطالعوفيـه الرياجيـل ينـحـاش

حلـو النبـا سمـح المحيـا لضيفـه
ويصير له خـادم مسخـر وفـراُش

وإن مـد مامديـة يمينـه قصيـفـة
مدة يمينـه تبهـر الخبـل والـلآش

وليا هـرج تلقـى علومـه طريفـه
ماهـو لهفـوات المناعيـر منقـاش

وإن شبـت النيـران ماهـو بليـفـه
في ساعة الكربة سـواري ورشـاش

سـدة بعيـد ولاحـد يلحـق غريفـة
ماهو لعرض مكرم العـرض نهـاش

الشوك فـي جنبـه سـواة القطيفـه
إن كان مله بيـت مامـون وفـراش

مايرتكـي فـوق الخبـول الضعيفـه
اللـي ليـا حركتهـا قدرهـا طـاش

وصحيفتـه ياطيبهـا مـن صحيفـة
إلهـا مـع العقـال كاتـب ونقـاش

حـاز المراجـل والمراجـل كليفـة
ألا على إللي كـل مارامهـا هـاش

وإن شاف له في جانب القـوم خيفـة
تلقـاه للخيفـه مهـاجـم وبـطـاش

الصدق والمعـروف والطيـب كيفـه
يغبش لها مع طلعة الفجـر مغبـاش

للحمـل ماتلقـى جنوبـه ضعيـفـة
حوله بروق تبهـر العيـن وإفـلاش

يصبر على جرحـه ويمسـح نزيفـه
طبه بشبه خير مـن طـب الأحبـاش

ولاهو كمـا سبـع سنونـه ضعيفـه
دايـم يلحسهـا وللعظـم عــراش

وإن شاف له في غيبة النـاس شيفـه
ماهو بخبل لأخضـر العـود قـراش

دنيـاه لـن صـارت ذلـول عسيفـه
طوع عليهـا كـل عاصـي ونفـاش

وإن كـان قفـت ماعليهـا حسيـفـة
ماهو ورا هوج المعاصيـر قشـاش

وإن جاع ماوقـع كمـا طيـر جيفـه
وإن عري مايلبس سماليـل وإخيـاش

وإن جـا نهـار كـل قـرم يعيـفـه
ماهو ليا ثارت علـى القـوم رمـاش

الكذب يعروف بيـن الأجـواد زيفـه
والصدق مثل السيف صاطي وحشاش


القصيدة هذي قالها رحمه الله في صاحب السمو الملكي الأمير / نايف بن عبدالعزيز آل سعود وزير الداخلية


ماكل نايف يلبس البشت نايـف :: نايف ولد عبدالعزيـز المجـرب
خاض الجزيرة وامنت كل خايف :: حث القدم فيها وشـرق وغـرب
وخلا كل اهل المشاكل ولايـف :: والكل منهم من رفيقـة تقـرب
اللي نفاهـم ماعليهـم حسايـف :: واللي تقرب مثل سيفـاً مـذرب


محمد ابن تويم الثبيتي


سر يا نديبي
سر يا نديبي فوق مهر مضرا
ماركبوا فيه بنزين فاح

مضواك دار خديد ربع تسرا
في قنة تلقى الصقور الملاح

دار عسى المغرق عليها يدرا
تصبح ربيع ودهرها مايلاح

تسقي ثراها لين تغدي مهرا
وبلادها تصبح من الخير ساح

تضوي على عواض بيته مطرا
بين البيوت وماعنه من مراح

رفيق عز وما يجيله مضرا
نحتاج له عقله كثير الرجاح

يابن عمرو تسلم سلام مورا
من حادث الجمعة عساكم صحاح

ياشين ذا الحادث علاكم تجرا
والعفو من ربي شديد السماح

يابن عمرو زادت حوادثك شرا
والصقر ماينفر بغير ا لجناح

خذ لك من الهندوس واحد مكرا
يمشي بك القبلة وليلك صباح

:::::::::::::::::::::::::::::::::::::::


يــا راكــب


يــا راكــب اللــي نـارها فـــالجنـــاح
يــقدح ســنـاهـا مثـــل قدح زنــــود

نفـــاثــــة تسـبق نسيـــم الـــريـــــاح
مــن وارد امريــكـا على ابن سعــود

انهــض مــن الطـايف صلاة الصباح
نهــاض بــــــــرق يقتفيـــه ارعــــــود

واللـه يعيــنـك فــالـمجي والــمـراح
نبيــك تـــــــصل القنــــفذة و تعـــــود

لـنــا رفيــق مـــن رجــال فــلاح
خديـدي عتيبـــي من رجال فهـــــود

حظـــه رمــابــه فـي هذيك النواح
مــع لابــة مثـله عـــــراب الــجــدود

يخيــلـون البرق مـن حيث لاح
بـــرق الــمعيـــشـة غـاية المقصـــــود

والـمرجـله مـاصـانها غير صــاح
مـــاصـانهـا غــافـــــل و لا رقـــــــــود

يــا مـرسلـي برسـالـة الانشـــــراح
اســلـم وســلـم عــد ســـلـم نـقـــود

ســلام يــشـادي لعذب قــــراح
والــذ واحلــــى من حليب القـــود

علـــى رفيــق حــل ذيـك المشـاح
عـواض سيـف مرهف محـــــــدود

عســـاه فــي خير وعــــز وربــــاح
رغــم الــردى واللاش والحســــــود

تمـت تـمـاثيـــل لـــهــا ريــــح فـــــاح
ســوات ريــــح المســك والا العــود

وايضا لـهـا وزن كثــيـــر الرجاح
واخـتامهـا ذكــر الله المعبــــــــــــود

آخر تعديل الصويت الثبيتي العتيبي يوم 12-Nov-2010 في 03:51 AM.

[سعد حميد الثبيتي]

تسلم على النقل الموفق والاختيار الهادف

[نايف المغيبي]

اشكرك على هذا النقل الموفق

[د.هـاوي]

تسلم ومشكور على النقل

والله يرحمهم

[تركي الصفياني]

الله يرحمهم جميع

شكرا لك على النقل الراااااائع

[محمد العتيبي]

الله يرحمهم ويرحم اموات المسلمين ..



شعراء لن يتكرروا في تاريخ الأدب والشعر ..



بيض الله وجهك يالغاالي ما قصرت ..



تحيتي
..

التوقيع

للتواصل عبر twitter تويتر al_bargawy@

[ابو قلبً عطيب]

كم نحن بحاجه الى نتذوق شعر جزل ونقي

كشعر هولاء الذين لم يكررهم التاريخ

الله يرحمهم رحمة واسعه ويغفر لهم

كل الشكر لك يالثبيتي على الايراد الجميل

[عبدالله العضياني]

هؤلاء شعراء لهم بصمه خالده

وقد سطروا التاريخ فأبدعوا تسطيره

ولا ننسى شعراء كثر وأحب أن أذكر ضمن ما ذكرت

شاعري المفضل والذي لا يكاد يمر يومي إلا ويمر طيف شعره

أو يمر إسمه على لساني



الشاعر / بندر بن سرور العتيبي ( متنبي عتيبه )


رحمه الله تعالى رحمة واسعه