قصيده في الباديه وبعض من امجاد القبيله لشاعر سهل الكسر المرشدي

[سلمان المرشدي]

ملحمه شعريه لشاعر الكبير سهل بن نايف الكسر المرشدي

يا جديع هات النجر ثم هات مهواه
وهات الحطب واسعر لي النار تسعير

هات الاواني كلها وهات مسحاه
وحفر لها ثم كسر السمر تكسير

اعرب لها ياجديع بقشاش ولحاه
حتى تسهرج في جلال الجثامير

واليا ولعت قامت تصالا مصالاه
شوي ثم جمر خشبها بتجمير

اجذب من الجمر المسهرج من ادناه
وحمس لنا بنً عل غير توفير

البن من خولان والمردمه ماه
وبهارها الهيل الحبش مامعه غير

والي راحة الحمسه تلالا ملالاه
بين الصفار وبين حمره وتشقير

اصفق مجلك بالمبرد على اقصاه
تبرد الي ناشة صخيف السحاحير

وستدن نجرك ومشحه يوم تجلاه
بالمنشفه ثم طهر الماو تطهير

ساقه نحيله والتجلل من اعلاه
متعصبً مثل الحرار المواكير

دقه بشاميً يهيضك بعواه
الى ناشه المهواء يجر المجارير

وللقم وبهر بالدلال المجذاه
تبرق حدايدها سوات القصادير

اعراض الكراسي والمثاعب محناه
ضياق الزغون وناحلات الخواصير

فيهن من خزنه جلوسً ومثناه
لى فرعت مابين شعو الغنادير

اسمر عليهن وارفع الشعر وغناه
ومنادم ٍ شعل ً صغارا مباهير

يوما بعض الناس نومه بمخباه
نومي علي كوعي سهاد وتفاكير

والا جهمت لمرقبً يوم نرقاه
براسه تناقرني هبوبه تناقير

في متن لولاح ٍ طول حجاياه
يشرف على روس الهضاب المزابير

ضلع ٍ مرب للعشاير وترباه
تحبه البل لو دياره مداهير

بين وواضح مايسمى بحلياه
في جاضع المشقوق شرق النهابير

لي وقت راسه يذكر القلب ذكراه
ويشرف ديار ٍ دونهنه مشاوير

يشرف على حليت واقصى قراياه
ويشرف على ودي الرشا والتسارير

وجبال دمخ النايفات المعلاه
شفت الحضني يوم يزمي وراء النير

من غرب شفنا كشب وادناه وحواه
وايضا مغيب الشمس شفت الدعيثير

شفت المضيح يومي تزمي حلاياه
هو حدنا المعروف من ديرة مطير

ومن الجنوب الصاقب الضلع شفناه
واليسري والنابيات الحمارير

يازين ديرتنا شفا نجد زيناه
مدهال سمحات الوجيه الخواوير

مدهال شول مايريع على اتلاه
سودا تقول حرار ولا مغاتير

نرعى بها نبت الوسوم المعذاه
اليا سقاه ربي من سحابصً شخاتير

مرباعها الصمان والصلب تاطاه
ومصيافها الصاقب جنوب اقهب الطير

الى جاهم العساس يمدح وزكاه
عساسً اخر صملو بالمحادير

وستضهرو شهب الجيوب المشراه
بعض المواتر حذفو فوقها شعير

حالو بشول يقطع البيد بخطاه
الى زما مثل النصوب المزابير

مالو على الجيان مابه مجاجاه
مرباعهم بول شهرم مخاضير

شفت العبس في البل يجي له معاطاه
والزود شفته بينً في المشاكير

والى عطف نبته وزانت سواياه
تعاقب الصفار هو النواوير

كلت الربيع وشالته يوم ترعاه
ثم قامت الفطر تسن الاباكير

تستن يمكن قاصر الحشو تاطاه
تلقى وبرها عقب سمنت مطايير

قام الجمل يضرس بنيبان ولهاه
وقام يعصبها كان فيها مجاسير

لي اوحت هديره صار فيها مهاداه
وقامت تكيفر بالعشار المعاشير

هرش يدك الارض من كبر ماطاه
من طول جنبه ماش طوله ولا بعير

من كبر راسه غاطن الخشم علباه
والوجه ضافي والاذاني صناقير

والى مشى تقول يشتل بيسراه
مصوره ربي بحسن التصاوير

جزة تبى المسناد والصيف تبغاه
وعيالها ماعاد فيها مصاغير

من النفود وحولت للموطاه
اما العكوك الدرب ولا المشاقير

كلن يبى المسناد والطرش جزاه
ثم راحت البدوان مع نجد امارير

ثمان شداتً على المت وسراه
تبي توصلها ديرها على خير

مالو على نجد ومساسه الى جاه
صيفا فعومه فجرة نجد تفجير

ماسند البكري على شعر وغثاه
واسند وتاصلبه لعبلة مجيرير

وضافن على عدن يبرهج ضماياه
تلقى النصي ضاون على طية البير

تراء الخضاره للمعاشير مشهاه
فقرن يفوح ولا يباله حدادير

عدن من الاجناب جينا ومشعناه
ايام سوقات العطف والمضاهير

سقنى العدو منها علي غير مرضاه
وعقب الهزيمه مانوا بالتكارير

خله يروح روحة مقيط ورشاه
وضحى النقى ماعاد فيها معاذير

ربع ٍ على الشده صناديد ودهاه
نطاحة الكايد رجال المعاسير

الاد مرشد محتمين المخلاه
ليا حذفاً بالسلابهن الغنادير

مراشده مثل الجبال المرساه
وساع الطعون ويكرمون الخطاطير

في الحرب نوصف بالجمال المثناه
ما ننتززع وقبلانا مناحير

واميرنا الي ترعب القوم شلفاه
راجح زبون معسكرات المسامير

خلى قليب معلق السعن بعراه
واستجنب القحص المهار المشاهير

سلب حلال القوم ثم جاك يزباه
عشرين اباعر جابها من ورا كير

وبجاد نذكر فعله الي حفضناه
كونن علي اجله دمر القوم تدمير

وعبيد ابو قرنين حنا ذبحناه
ثاراً لخو دعجه عشير المناعير

وبن شري في مدلج الخيل ذكاه
عشاه ابن مدوخ طوال الدناقير

ودليم يم القوم ينحي وتنحاه
رجال واحد ورتكى للطوابير

بالنيمس الى صامل العضم تفضاه
رد الدبش والقوم راحو مدابير

والكسر يوم الغزو كثرة رزاياه
شرق العراق ويم هاك النهابير

المنتفق ضيق على الغزو ويجزاه
حوله الي صاملن بالمحاضير

معطيه مخباطن فواده تمثناه
واخذ سلاحه ثم لحق قومه مغير

عليا شبيب وفكها مانسيناه
وضحاً تلاوح مثل لون الفنانير

شول مفلي وبشوبه بمفلاه
قفو به الاجناب غز القناطير

جتنى تصيح البنت مثل المعراه
تلفح جدايلها على الورك وتطير

هيما من الغزلان تلقا لها اشباه
في وجهها للخال حب ودواوير

ربعن مصليهم ترا الفرض صلهاه
على القليب وخلف هدف النواعير

وركبو على قبن تنازا منازاه
ماتسمع الا صرمها بالحوافير

كل ابلج لوح على سرج قباه
واستضهرو دهم السيوف البواتير

والقوم كسرو والوسيق استعدناه
ترا قصيدة سيف مثل التقارير

وسويد اخذنا زابنه فوق مركاه
يوم ادخل السميان جينا معايير

اخطى وحنا من بغانا لطمناه
واعدونا يصبر بذل ومحاقير

والوم في اباعر عويمر قضيناه
من الي عصو مايدفعون المعاذير

تسعه ذبحناهم مثل ذبحة الشاه
عاين نصايبهم جنوب المشاقير

والنا فعولن ثابته بالماراه
ولاندعي بالهذرمه والتزاوير

ولنا ديارا حدها مانسيناه
من كشب حدربه لكبشان تحدير

النا العيانه والشماس وركاياه
غير الرسوس الي بليا محاكير

حول من الريمه لريمان تلقاه
تمشي من الريمه حدورن مياسير

حول على الصهلوج بارضً مساواه
على مغارا والمريبيخ وتسير

عقلة دوي مقعد ركاين مطواه
ولنا البريكه بالجبال المقاطير

ودغيمه بيرن تنادي مناداه
الي ورثها من دغيم مسيمير

وشعيب زعب الى ضربنا شغاياه
جم البيار الي سوات النوافير

والمردمه عدن نحبه ونرباه
العقله الي بالجبال الشناضير

مدهال ملحاً يمكن الحوض تملاه
تروي ولدها ماتكلته على الضير

من طول قادمها تقل فيه توداه
وثفانها قامت تضك المواخير

خرجا تحاذي للحنابج محاذاه
يازينها في صيف ولا مخاضير

والنا العقيليه تجي عشرة افواه
رجايعن مابدعوها الحفافير

والصك من سبعين كيلو زواياه
صدق من التمييز ماهوب تزوير

صك الامير الي حميده سجاياه
مركي على كبد الخصيم الخوابير

شيخاً جزيلات المدايح تهاواه
بجاد نطاح الامور المعاسير

واشمل على ضفره ومخيط ملكناه
والنا بعكليه بيار ومخاشير

كبشان اخذنا كل حده مضماه
خمسين كيلو طولها عرض تمتير

فيها حفرنا بيار وعدود ومواه
بطرافها تلق الرعايا نواشير

فيها حديجه عدنا الي ركاياه
ياما عليه الناس ورد ومصادير

هاذي ديرنا ماعليها مغطاه
ولاجاتنا في سلم باع وتساعير

ولاجاتنا في حبت خشوم وجباه
الابربعاً في المداحم جزازير

القاف سقته لان بعدت مرساه
واصخر العوب الصعيبات تصخير

قرايحن فيها النوادر منقاه
مثل الذهب في جيد لطف الخواصير

عبيرها روضً تعجعج خزاماه
في حاجرن ماجاه حتى العصافير

وتم الكلام وزبدة العلم معناه
ورجا السماح ان كان في القول تقصير

صلاة ربي عد ماشي شفناه
عد البحور الى عليها البوابير

على رسولً بالرساله تبعناه
صلو عليه وسلمو صبح وعصير

[خالد@الدلبحي]

صح لسان الشاعر الكبير سهل الكسر

وشكرا لك على نقل القصيده الرائعة

سلمت يالغلا

[سلمان المرشدي]

الله يسلمك يالدلبحي وصح لسانك بالنيابه يالطيب

[عـقـــــــــــاب]

صح الله لسااااااااانه ولاهنت ع النقل يابو عدي

لكن ياليت يوضح المحدد ادناه

وجبال دمخ النايفات المعلاه
شفت الحضني يوم يزمي وراء النير

[سلمان المرشدي]

صح بدنك والله لايهينك

والحضني خطاء في الكتابه والشاعر يقول اسم جبل لاكن نسيته واخونا الكاتب اخطاء في الاسم

شكرا ياعقاب

[عـقـــــــــــاب]

مافيه الا الحذني يا سلمان تقبل مروري وشكراً

[محمد الذيابـــي]

صح لسان الشاعر الكبير سهل الكســــــــــــر


مشكور ياسلمان على النقل المميز لشاعر مميز مثل الكسر

التوقيع

التوقيع محمد الذيابـــي

[علي الدعجاني]

الاد مرشد محتمين المخلاه
ليا حذفاً بالسلابهن الغنادير

مراشده مثل الجبال المرساه
وساع الطعون ويكرمون الخطاطير


ونعم ونعم

صح لسان ابو نواف

ولاهنت يالذيب

[سلمان المرشدي]

ذكرتني الله يذكرك بالخير ياعقاب الحذني وليس بالحضني شكرا لك

محمد الذيابي الله يسلمك وصح بدنك يالطيب

والله لايهينك ياطويل العمر

[علي الدغيلبي]

صح آلله لسآن آلشآعر آلكبير سهل آلكسر .. ولا هنت يآ آلغآلي على نقلهآ .. لك خآلص شكري