من سوالف شمر وعتيبة

[هايس القعيط]

هذي بعض السوالف اللي تعبر عن تقدير شمر لعتيبه
سمعتها من شيبانا الله يغفر للجميع

هذا واحد من المسعود من شمر من اهل سلمى رجل مهرج صاحب ديوان واذا تكلم بالديوان ما تمل
ودك انه ما يسكت
وهو عنده علم من العلوم الاوله وعنده قصيد وله تقدير كبير عند شمر وغيرهم

كان هو بالشمال معه خويا عتبان عزمهم رجل من حدى قبايل الشمال
وراحوا معوه للقهوه

يوم جلسوا بالديوان قام المسعودي يتكلم عن عتيبة ويمدحهم وذكر من عرض ما ذكر
ابن حميد شيخ عتيبة
المعزب قال منهو ابن حميد هذا الله يستر عليه
قال المسعودى هاه ما تعرف ابن حميد؟ قال والله ما عرفه الله يستر عليه

المسعودي زعل قال بوه احد ما يعرف ابن حميد
وكنه شاف به نقيصه على خوياوا العتبان
وقام جته الطنيه يقولون لهم الطنايا زعل قال انا عفت قهوتك وبيتك ما اطبه

وترك الديوان
العتبان يوم شافوه قالوا هذا شمري وزعل من شان عتيبة وهم لك يقومون
والحقوه وحبوا راسه
وهو توفى الله يرحمه
وهي بقت سالفة .

الاخرى
يقولون هذا ابن جبرين من شيوخ عبدة من شمر
دخلوا على مجلس امير من الاسرة المالكه
ويوم دش المجلس وهو لك يعمد هالرجل من عتيبه يقولون انه دعجاني
وهو يقوم لك يحبه ويتحفوا به وينشدة وشلونك ينشدة انت يالجبرين

قال واحد بالمجلس من حدى القبايل
والله غديت تحب العتيبي يالشمري منول قوم وهالحين ربع وتحبه وتنشدة عن اهله

تقل زعل الشمري قال اسمع
اما العتيبي فوالله نحبه محبة دم ولحم وحنا قوم وغيرها
منول نصبحهم وكل صباح نلقاهم اقرب من الصباح اللي قبله
والا انت نرسل لك عبد من عبيدنا وتعطينا زكاتك
وهو لك يزعل انت يالرجل قال الامير 0 ( بس يابن جبرين ماهو بمجلسي تهين الرجال)
قال هو اللي جابه والا انا ما قلت الا الصحيح

والشاهد الله انا نقدر عتيبه من دون الناس
وكل به حقه من الطيب
والسلام عليكم كل عام انتم بخير

[إستراحة محارب]

والله والنعم بالطنايا ربعنا وأحبابنا

عتيبة وشمر عينين براس واحد

والكل يشهد

مشكور يالغالي

[فيصل المسند]

سوالف جميله ورايعه ولاتحرمنا من جديدك

[نداوي هوازن]

ومليووون نعم بالسناعيس
سوالفهم وعلومهم بالطيب مشهوره .
وعتيبه يستاهلون .

[ابو ضيف الله]

الاخ هايس القعيط بيض الله وجهك

وشمر السناعيس هم نعم الخوي والرفيق
وبينهم وبين عتيبه حب واحترام عجيب
نسأل الله ان يجعلها دوم

التوقيع

قال الشافعي رحمه الله: أركان الرجولة أربع: الديانة والأمانة والصيانة والرزانة. قال الخليل ابن أحمد: التواني إضاعة, والحزم بضاعة, والإنصاف راحة, واللجاجة وقاحة. اللهم أنصر من نصر الدين وأخذل من خذل الدين

[محمد بن غازي]

الف نعم بك وبقبيلتك شمر يا هايس القعيط ... ونعم الرجال ونعم الأخوه والجيره ياشمر ونقولها عن تجربه ....

بيض الله وجهك على موضوعك الذي يدل على التقدير والأخوه والشيم العربيه الأصيله بين القبيلتان العظيمتان شمر وعتيبه ... التي يضرب بها المثل قديماً وحديثاً ....

[ابو ضيف الله]

يا الربع هذي قصة حصلت قبل كم سنة لناس من الربع
راحوا يتمشون في حايل وجا الليل وقاموا يتهبدون ما يدرون وين هم رايحين
ويقولون حنا نمشي مع هاك المحامة إلا وحنا طابين على مراح بدو

يقولون ما درين غير موترنا على بعد امتار عن خيامهم بسبة المحامة
مار يطلع هاك الشياب ويقوم يناديننا واستحينا منه روعناه في هالليل
ونزلنا عنده على اننا بنتعذر منه وننشده عن الدروب

يقول الرجال يهرج ولده مدري ويش قاله وقام الولد من عندنا
وحنا مانا بيمه ويوم الرجال اخذ واعطى معنا وسوالفنا معه
يوم وقف وقام يصيح على ولده اسمه عبيد او زيد الله اعلم

يقول: خل الجفار واذبح من الغنم
وهو يعاين فينا ويقول: المعذره يا الريجيل من اول احسبكم
من الفلاينه والفلاينه قبيتلين حول حائل جيران للشمامرة بدون ذكر اسماء
مار يوم طلعتوا عتبان والله ما نذبح لكم غير من اطيب حلالنا
وتراها قليلة في حقكم ..... علماً بانهم ما غير اثنين !!!

[الرومي]

معزة عتيبة لشمر ومعزة شمر لعتيبة هذي معروفة قبل والحين ..
والرجال مايعزون ويقدرون الا الرجال الي مثلهم ..
ونعم في شمر الطنايا.

التوقيع

migeed33@hotmail.com

[اخو صلفه]

كلام جميل

ودمت بود

[فهد الزهراني]

تسلم
وونعم مليون بشمر وعتيبة..
وعموما بشكل عام كما انتقدت مشاركة احد الاخوة في ذكر بعض القصص فأني اشيد بك واتمنى من كل الاعضاء يجيبون مثل هذه القصص والاخبار فهي تزيد الالفة بين ابناء القبائل العربية وتجعل التقدير والاحترام يزيد وتزيد اواصر المحبة عكس قصص القتل والثارات فهي تفرق بين الجميع
...
اشكرك مرة اخرى اخي الكريم