سلطان الجذع
مرحبا بالثعلي اللي غيبته تشبـه حضـورة=لو يغيب سنين ماكنه تغيّـب غيـر ساعـه
مجلس الشورى يقولون العرب ماغير صوره=لو يعقد كل يـوم اثنيـن ياعلـي اجتماعـه
علي فلاح العضياني
البقا من شاعر(ن) لو غاب ما تنسـون دوره=و ان حضر فالصفّ الاول ما يشذّ عن الجماعه
الله اللي عـزّ دولتنـا بحكـم أخـوان نـوره=كل ما تصدر حكومتك أمر قل سمعاً و طاعـه
سلطان الجذع
والله ااني مافقدتك غير في وقت الضـرورة=ولالقيتك غير في سرد العلوم تقول اذاعه !!
الجهل والفقر ماولت يابن ثعلـي عصـورة=البشير مخـلٍ السـودان بأفكـارة مجاعـه
علي فلاح العضياني
الجذع دايم ليا غنّـا معـي يفقـد شعـوره=و ان رجعنا للصحيح لسانه أطول من ذراعه
انت في تال الليالي صايرٍ(ن) زعيم ثـوره=والوداعه في يدين اللي يحفظون الوداعـه
سلطان الجذع
لاتذم اللي شبورك قاصراتٍ عن شبـورة=فالمثايل والفعايل والمراجل واللكاعـه !!
انت راع البيت وان قفيت ماصلحت أموره=الوصل ماهو بحاصل معه ياقرب القطاعه
علي فلاح العضياني
يالجذع ما تقصر شبور الذيابه و النموره=والله إنا زارعين الخوف في قلبك زراعه
بيتنا مثل البيوت اللي على العزّ معموره=و التنومس بالعلوم الطيبات من الشجاعه