سلطان الجـذع
مرحبا مليون في مليون قابل للزيادة = كان مايكفي ياابن جوباح علمني وازيدة
ياحمد حرب المعاني حرب مافيها هواده = الله الله ياخوي الجنب والطرقة بعيدة
حمد بن جوباح
البقى بأصحابنا اصحاب المعالي والسعاده = ابرك الساعات يا سلطان والفرصه سعيده
الجذع سلطان ماندري وش اللي في مراده ؟!! = القوافي من لسانه والمعاني في وريده
سلطان الجـذع
البعير اللي تسوقة ماتوفر لك شدادة !!= توعد الجماّل من شأنه وتخلف فالوعيده !!
والزمن هذاه مال العدل موطاء فوق ماده = لاتغارب لو تجيك ببيرق المليون عيدة !!
حمد بن جوباح
البعير اللي نسوقه من بلاده في بلاده = ما يوقف في طريقه غير غلطتك الوحيده
العميمي شغّل الرادار والرادار صاده = علم الجذعان ترسل له رسايل في بريده
سلطان الجـذع
واقفٍ في دربة اللي حط في يدينه قياده = أحرمه يأكل من المرعى ويشرب من زبيدة
شفت انا الموضوع فالبث المباشر والاعادة = والدعاجين كتبوا وجهة نظرهم فالجريدة
حمد بن جوباح
اعترفت بغلطتك وانا احسب ان الصدق عاده = لين شفتك يا الجذع سلطان تعمل له مكيده
الدعاجين اطلبو منك وبني عمك شهاده = مير يا الجذعان عيّا ابليس يا الله لا تعيده
سلطان الجـذع
لاتحاول .. غلطة المقرود تبّاع القرادة = الجذع عنكم بعيد ...مع .السبورة والقعيدة
قد عطيناكم شهادة حق في حرب الابادة = عندنا العلم اليقين وعندنا بيت القصيدة
حمد بن جوباح
من كلامه يا جماعة خير وثقنا استناده = من يحضّر في عنيزه ما يغيّب في بريده
لا تزور الصيدليه قبل دكتور العياده = وصفة الدكتور عنده مير حوّل في رصيده
سلطان الجـذع
لو بلغت اللي بلغت ..البحر ماتبلغ مداده = وانت مدري من كلامك وشهو اللي تستفيدة
خلها تسري وجنح الليل يسترها سواده = مادورا عنها الحباب ولادروا عنها عبيدة
حمد بن جوباح
والله انك لو دريت ان القبول من العماده = ما بلغت اللي بلغته بالقوانين الجديده
الجذع سلطان يسري والنوايا في فؤاده = يحسب ان العلم ميده مير انا ماني بميده
صحة السنتكم يامبدعين