ماهي قصة مقتل الفديع بن هدلان وكيف قتل ومن قتله؟

[مشعل المحياني]

ماهي قصة مقتل الفديع بن هدلان وكيف قتل ومن قتله؟
هذا سؤالي يا أخوان ومن عنده خبر يفيدنا وشكرأأأأأأأأأ لكم
تحياتي

[أبن مكرز]

قصة مقتل الفديع غازين المقطه على الخنافر من قحطان على الشيخ سلطان ابن هندي ابا الروس ولي قتل الفديع
سلطان ابن هندي ابن حميد وذكرها السديري في كتابه ابطال من الصحراء وذكر ان الفديع في عينه رمد وكلام
شيبانا والحمده ان الفديع سليم وهذا لا ينقص من الفديع لانه معروف انه شجاع ولا كن قابل الي اشجع منه وانا
قريت في مجلة المختلف العدد الاخير ذكرها واحد من الهدلان وذاكر ما ذكر السديري

[مشعل المحياني]

اشكرك جزيل الشكر ابن مكرز

[فتى وادي الرشا]

سؤال ممتاز ومهم اخوي مشعل
واجابه احلى من اخوي ابن مكرز
والنعم بالمقطه وبربعي كلهم

ومشكورين ونبغى مثل هذي المعلومات

[الفهري]

قصة مقتل الفديع مذكورة بالتفصيل في كتاب أبطال من الصحراء للسديري

قال السديري عن القصه( فأغار على ظعينتهم كوكبه من الخيل وتبين لهم أنها خيل الحمده زعماء قبيلة عتيبه المشهورين ,فأخذ شالح وحده يدافع عن الضعينه بكل بساله ,وكان الحرب بينه وبين المغيرين سجالا ,فمره يهزمهم ويبعدهم عن الظعينه ومره يكثرون عليه ويهزمونه إلى أن يصل إلى ظعينته)

وكان الفديع مصاب بالرمد لاكن أمه غسلت عينيه وفتحتهما بقوه فأصبح يرى قليلا

ولم يذكر السديري من قتل الفديع غير أنه قال (رشقوه بعدد كثير من الرماح دفاعا عن النفس ,فأصاب الفديع رمح أخترق رأسه) ولم يذكر أي أسم


القصه مذكوره في كتاب أبطال من الصحراء
من تأليف
محمد بن أحمد السديري
صفحة 163 164

وقال شالح في رثاءه
أمس الضحي عديت روس الطويلاتْ = وهيضت في راس الحَجَا ما طرا لِي
وتسابقت دمــوع عيني غزيرات = وصفقت بالكف اليمين الشمالي
وجريت من خافي المعاليق ونات = والقلب من بين الصناديق جَالي
واخــوي يم قَارَة خَفَا فَاتْ = من عاد عقبة بيستر خَمَالي؟!
ليته كِفاني سُوّ بقعا ولاَ مــات = وانا كفيته سُو قبرٍ هَيـــالي
وليته مع الحييّن راعي الجمالات = وانا فداً له من غِبُون الليالي
واخوي ياللي يوم الاخوان فلات = من خَلْقِتِه ما قال ذالك وذا لي
تبكيه هجن تالي الليل عجلات = ترقب وعدها يوم غاب الهلالي
وتبكي على شوفه بِنيّ عفيفاتْ = من عقب فقده حر من الدّلاَلِ
عَوْق العَدِيم إن جاء نهار المثيرات = والخيل من حسه يجيهن جفالِ


(وقد كانت المعارك بين عتيبة وقحطان كر وفر غالب ومغلوب وقبل أن يأتي دور ابنه ذيب كان شالحاً يترقب الفرصة بالحمّدة , رؤساء قبيلة عتيبة , لأخذ ثأر أخيه الفديع وقد حانت الفرصة فقتل مبارك بن غنيم بن هدلان عبيد ابن الأمير تركي بن حميد وأخذ أخوه ضيف الله بن تركي راثياً أخيه عبيد ومتوعداً قحطان ومحرضاً الأمير محمد بن هندي بن حميد على أخذ الثائر فقال هذه الأبيات :
ياونتي ونة كسير الجبارةْ = إلى وقف ما احتال وليا قعد ونّ
عليك يا شباب ضوّ المنارةْ = عليك ترفـــات الصبايا ينوحنْ
من عقب عبيد قلنا ودَاره = لاَ باكي عقبه ولا َ قايل منْ
تبكيك صفرٍ البسوها غَيَارهْ = تبكيك يوم ان السبايا يِعَـنّنْ
وتبكيك وضحٍ ربّعت بالزبارهْ = اليا قِزن من خــايع ما يردنْ
الخيل عقب عبيد ما به مناره = وش عاد لو راحن وش عاد لو جن
يا شيخ ما تامر عليهم بغاره = كود الجروح اللي على القلب يبرنّ
يقطع صِبِيّ ما ينادي بثاره = إلى أقبلن ذولي وذُوليك قـفـــنْ
ياهل الرمك كل يعسف مهاره = والمنع ما نطريه لاهُم ولاَ جــن

فرد عليه شالح
ضيف الله اشرب ما شربنا مرارهْ = اصبر وكنّك شالــحٍ يوم حَزّنْ
راح الفديع اللي علينا خســـاره = واخذ قضاه عبيد حامي ثقلهنْ
يمنى رَمَتْ به ما تجيها الجباره = اللي رمت بعبيد في معتلجهنْ
من نسل ابوي وضاري للشطاره = يصيب رمحه يوم الارماح يخطِن
وعبيد خِللّي طايحٍ بالمغـــاره = عليه عكفان المخالب يحومن
وعادتنا بالصيد ناخذ خياره = ثلاثة الجذعان غصبن بلا مَنّ
يا قاطع الحسنى ترى العلم شاره = لابد دورات الليالي يدورنْ
حريبِنا كنّه رقيد الخـــباره = خطرٍ عليه اليا توقظ من الجن
ماني بقصادٍ بليا نمــــارَه = أجدع نطيحي بالسهل وإن تلاقن
من حل دار الناس حلوا دياره = لابدّ ما تســكن دياره ويغبَنْ
ومن شق ستر الناس شقوا ستاره = ومن ضحك بالثرمان يضحك بلا سنْ
وان كان ضيف الله يعسف مهاره = فمهارنا من عصر نوح يطيعــن
تِدنَا لِصِبيانٍ ســُواةِ النمــاره = شهبٍ لماضين الفَعَايل يـعَـنّنْ

القصه مذكوره في كتاب أبطال من الصحراء
من تأليف
محمد بن أحمد السديري
صفحة 163 164