الرئيسية التسجيل التحكم


اختيار تصميم الجوال

العودة   الهيـــــــــــــلا *** منتدى قبيلة عتيبة > منتديات قبيلة عتيبة - الهيلا > شعراء قبيلة عتيبة

« آخـــر الـــمـــشـــاركــــات »
         :: كل عضو او شاعر يسجل بيتين غزل الفهاا من قصائده .. بشرط ان تكون غزليه فقط .. (آخر رد :الريشاوي)       :: ودي ولا ودي وابيهم ولا ابيه (آخر رد :الريشاوي)       :: واكتبي هذا أنا أنا ليلى العامرية (آخر رد :الريشاوي)       :: البيت لاعْجَبني اجاريه باحساس (آخر رد :الريشاوي)       :: أنـا لا تلوموني ولو ملـت كل الميل (آخر رد :الريشاوي)       :: اوافق .. واقول النفس صعبه مطالبها (آخر رد :الريشاوي)       :: الحب اقفى في ديانا ودودي (آخر رد :الريشاوي)       :: امير قبيلة المحاقنة قبل الدولة السعودية (آخر رد :متعب الوحيدب)       :: امير قبيلة المحاقنة قبل الدولة السعودية (آخر رد :متعب الوحيدب)       :: الشيخ عبدالله ابن جزعاء العازمي جمع غير الفروسيه الحكمه والفكر السياسي وبعد النظر (آخر رد :متعب الوحيدب)      

إضافة رد
أدوات الموضوع انواع عرض الموضوع
غير مقروء 18-May-2003, 12:38 AM رقم المشاركة : 1
معلومات العضو
فهد
عضو
إحصائية العضو





التوقيت


فهد غير متواجد حالياً

إرسال رسالة عبر مراسل AIM إلى فهد إرسال رسالة عبر مراسل Yahoo إلى فهد
افتراضي مجموعة قصائد

بسم الله الرحمن الرحيم
قصايد بعض الأعلام من عتيبة وغيرها

مشاري بن ربيعان

قم سو فنجالٍ على خمسة اجناس احـذر تـجي حرقه وبالك نياها
خلك لها عن كل عذروب حساس قيـّس لـها الطبخة على قد ماها
حتى يجي فنجالها يجلي الاعمـاس عقب الصلف والسهر ما اكبر غلاها
بدوا به اللـي للمعادين نطـاس مـودع سمـان الهجـن يثلع حفاها
والثاني اللي يثني العصب بالراس فـي ربعـةٍ يشبع بـها من نصاها
والثالث اللي يحتمـي دن الافراس لا روحـت خيـلٍ بـخيلٍ حماها
وباقي الملا لو ما تقهويه لا بـاس هـذّارة المجلـس قليـل ٍ حلاها
لا نـافع ٍ ربعه ولا حاش نوماس ضبّاط مال ولا يـذرّي ذراهـا
@@@@@@@@@@@@@@@@@@@@@@

بديوي الوقداني

أيـامنـا والليالـي كم نعاتبها شبنا وشابت وعفنا بعض الاحوال ِ
تاعد مواعيد والجاهـل مكذبها واللي عرف حدّها من همها سال ِ
إن اقبلت يوم ما تصفي مشاربـها تقفي وتقبـل وما دامت على حال ِ
فـي كـل يوم ٍ تورينا عجايبها واليوم الاول تراه أحسن من التالي
أيـام فـي غلبها وايـام نغلبها وايـام فيها سـوا والدهـر ميّال ِ
جربت الايام ،مثلي مـن يجربـها تـجريب عاقـل وذاق المر والحالي
نضحك مع الناس والدنيا نلاعبها نمشي مع الفي طوع ٍ حيث ما مال ِ
كم من علوم ٍ وكم آداب نكسبها والشعـر مـازون مثقـال ٍ بمثقال ِ
أعرف حروف الهجا بالرمز واكتبها عـاقل ومجنون حاوي كل الاشكال ِ
لكنّ حظي ردي والـروح متعبها ما فادنـي حسن تأديـبي مع امثالي
إن جيت أبي حاجة ٍ عزت مطالبها العفـو ما واحد ٍ في الناس يا والي
قوم ٍ إلى جيتهم رفـّت شواربـها بالضحـك وقلوبها فيها الردا كالِ
وقوم ٍ إلـى جيتها صكّت حواجبها وابدت لي البغض في مقفاي واقبالي
ما كنـّي إلا مسوي حال مغضبها والكل فـي عشرتـه ماكر ودجّالِ
يا حيف ! تخفي أمورٍ كنت حاسبها واللي علـى بالهم كلـه على بالـي
الجـار جافي وكم قـومٍ محاربـها والأهل واصحابنا والدون والعالـي
والروح وش عذرها في تـرك واجبها راح الحسب والنسب في جمع الاموالِ
نفسي تـبي العز والحاجات تغصبها ترمي بـها بـين أجاويـد وانـذالِ
المال يحيي عظام ٍ لا حيـاة ابـها كالسيل يـحيي الهشيم الدمدم البالي
عفت المنازل وروحي يـوم اجنـّبها منها غنيمـة وعنها البعد أولى لـي
لا خير في ديرة ٍ يشقى العزيز ابـها يـمشي مع الناس فـي همٍ وإذلالِ
دارٍ بـها الخوف دومٍ ما يغايـبها والجوع فيها ومعها بـعض الاحوالِ
جـوعى سراحينها شبعـى ثعاليها الكلـب والـهر يقدم كل ريبالِ
عز الفتى راس مالـه من مكاسبها يا مرتضي الهون لا عـزٍ ولا مـالِ
ذللت بالروح ليـن ارخصت جانبها وانا عتيـبي عريب الجد والخـالِ
قومٍ تدوس الأفاعـي مع عقاربـها ولها عزايـم تـهدّ الشامـخ العالي
خـل المنازل وقـل للبـين يندبها يـبكي عليها بدمع العين هطـالِ
لا تعمر الدار والقـالات تخربـها بـيع الردي بالخسارة واشـتر الغالي
ما ضاقت الأرض وانسدت مذاهبها فيها السعـة والمراجـل والتفّـتالِ
دارٍ بـدار وجـيـرانٍ نقاربـهـا وأرضٍ بـأرض وأطـلال ٍ بأطـلال ِ
والناس اجانيب لين انك تصاحبـها تكـون منهـم كمـا قالوا بالامثالِ
الأرض لله نـمشي فـي مناكبهـا والله قـدّر لـنـا أرزاق وآجـالِ
حث المطايا وشـرّقهـا وغرّبـها واقطع بـها كـل فج ٍ دارس ٍ خالِ
واطعـن نـحور الفيافي فـي ترايبها وابعـد عن الهم تـمسي خالي البالِ
فـي كـل عمليـّةٍ تقطـع براكبها فـدافد البـيد درهـام ٍ وزرفـالِ
تبعدك عن دار قـوم ودارٍ تقـرّبـها واختـر لنفسك للمنـزال منـزالِ
لـو مت فـي ديرةٍ يجفاك صاحبها كم ذا الـجفا والتجافـي والتـّعلالي
دوس المخاطـر ولا تـخشى عواقبها الموت واحـد وبعـد العـز يـجلالي
إن المنـايـا إذا مـدّت مـخالبها تـدركّ لـو كنت في جو السما العالي
مـا قـرّت الأسد فـي عالي مراقبها تسعى على الرزق ما حنـّت للاشبالِ
والشمس في برجها والغيـم يحجبها تـقفي وتقبـل لها فـي الفلك مجدالِ
@@@@@@@@@@@@@@@@@@@@@@@@@@@@@@@@


قصيدة ضيف الله العفار


يالله ياللي نطلبه دايم الدوم
...................................يامخلف النيه ينقض العزايم

الكبد ماتقبل من الزاد مطعوم
...................................من شافني كني عن الزاد صايم

البارحة عيني قزت عن كرى النوم
...................................يوم الثريا قابلت للنعايم

تخالفت بالقلب قلات واهموم
...................................يوم الشكاله ماتهم البهايم

بالليل اهوجس لي ابقالات وعزوم
...................................للروح خلاق وللعمر سايم

ذولا نصالحهم وناس لنا قوم
...................................واكوان يشبع غبها كل حايم

لما سكنا نجد من غير معلوم
...................................بصولات تلقا به صفا الجو عايم

يانجد والله مانزلناك بسلوم
...................................ولا انت بورث جدودنا والقدايم

يانجد خذنا فيك حق ومرسوم
...................................وصفا جنابك عقب نطل العمايم

خذناك عقب امدارك العمر والسوم
...................................سوم يخسر لابسات اللثايم

كم خايع بين الحفيفين ماسوم
...................................كل يبيه واصلين الكضايم

عاداتنا نرعا الخطر دايم الدوم
...................................يرعى دبشنا فيه والحظ قايم

نرعى بربع كنهم دولة الروم
...................................مركاضهم بالضيق يجلا اللوايم

لاصاح صياح الضحى جن حثلوم
...................................الخيل بالفرسان عجل همايم

يازين سجتنا على الفطر الكوم
...................................يوم بلاش ويوم جبنا الغنايم

نو الخيال مسرح من ضحا اليوم
...................................امطر وسيله دم روس العدايم

@@@@@@@@@@@@@@@@@@@@@@@@@@@@@@@
قصيدة ضيف الله العفار بعد مقتل اخية عبيد


ياونتي ونة كسير الجبارةْ إلى وقف ما احتال وليا قعد ونّ
عليك يا شباب ضوّ المنارةْ عليك ترفـــات الصبايا ينوحنْ
من عقب عبيد قلنا ودَاره لاَ باكي عقبه ولا َ قايل منْ
تبكيك صفرٍ البسوها غَيَارهْ تبكيك يوم ان السبايا يِعَـنّنْ
وتبكيك وضحٍ ربّعت بالزبارهْ اليا قِزن من خــايع ما يردنْ
الخيل عقب عبيد ما به مناره وش عاد لو راحن وش عاد لو جن
يا شيخ ما تامر عليهم بغاره كود الجروح اللي على القلب يبرنّ
يقطع صِبِيّ ما ينادي بثاره إلى أقبلن ذولي وذُوليك قـفـــنْ
ياهل الرمك كل يعسف مهاره والمنع ما نطريه لاهُم ولاَ حــن

فأجابه شــالح بقوله
ضيف الله اشرب ما شربنا مرارهْ اصبر وكنّك شالــحٍ يوم حَزّنْ
راح الفديع اللي علينا خســـاره واخذ قضاه عبيد حامي ثقلهنْ
يمنى رَمَتْ به ما تجيها الجباره اللي رمت بعبيد في معتلجهنْ
من نسل ابوي وضاري للشطاره يصيب رمحه يوم الارماح يخطِن
وعبيد خِللّي طايحٍ بالمغـــاره عليه عكفان المخالب يحومن
وعادتنا بالصيد ناخذ خياره ثلاثة الجذعان غصبن بلا مَنّ
يا قاطع الحسنى ترى العلم شاره لابد دورات الليالي يدورنْ
حريبِنا كنّه رقيد الخـــباره خطرٍ عليه اليا توقظ من الجن
ماني بقصادٍ بليا نمــــارَه أجدع نطيحي بالسهل وإن تلاقن
من حل دار الناس حلوا دياره لابدّ ما تســكن دياره ويغبَنْ
ومن شق ستر الناس شقوا ستاره ومن ضحك بالثرمان يضحك بلا سنْ
وان كان ضيف الله يعسف مهاره فمهارنا من عصر نوح يطيعــن
تِدنَا لِصِبيانٍ ســُواةِ النمــاره شهبٍ لماضين الفَعَايل يـعَـنّنْ
@@@@@@@@@@@@@@@@@@@@@@



الشريف بركات
الشريف بركات بن عبد المطلب من أعلام أواخر القرن العاشر الهجري ، قصيدة يوصي بها ابنه مالك :

يالله ياللي كل الأمـّات ترجيـك يا واحـد ٍ ما خاب حي ٍ ترجاك
يا رب عبد ٍ ما مشى في معاصيك مـا يمشي الا فـي محبتك ورضاك
يا مـرقب ٍ بالصبح نطيت راقيك مـا واحـد ٍ قبلـي خبرته تعلاك
وليّت يا ذا الدهـر مكثر بلاويـك الله يـزودنا السلامـة من اتلاك
ياللي على العربان عمت شكـاويك وليت يا دهـر الشقا ول مقواك
واليوم ها الكانون غـاد ٍ شبابـيك تلعب بـه الارياح من كـل شباك
يا مالك اسمع جابتـي يوم أوصيّك وافطـن ترى يابوك بآمرك وانـهاك
وصيّـة ٍ من والد ٍ طـامـع ٍ فيك تسبـق علـى الساقة لسانه لعلياك
أوصيك بالتقـوى عسى الله يهديك لـهـا وتـدركهـا بتوفيق مولاك
الله برب اجـدادك الغـر يعطيـك رضـاه مـع مـا تـمنـّى من مناك
إحفظ دبشك اللي عن الناس مغنيك أللـي لـيـا بـان الخلل فيك يرفاك
واعرف ترى مـكـة حكمها بناخيك لـو تشحذه خمسة ملاليم ما اعطاك
إجعـل دروب المرجلـة مـن معانيك واحـذر تـميّل عـن درجها بمرقاك
لا تـنسدح عنها وتبغانـي اعطيـك جـميع مـا يكفيك ما حاصل ٍ ذاك
أدّب ولـدك إن كـان تبغيـه يشفيك واستسعفـه مـن بعـد مرباه بالاك
إما سـمج واستسمجك عند شانـيك ويفـرّ من فعلـه صديقـك وشرواك
والاّ بعـد جهلـه تـرى هو بـياذيك لـو زعلـت امـه لا تـخليه يالاك
واحـذر تضيّع كـل من هـو ذخر فيك معروف لا تـنساه واوفـه بعـرفاك
تـرى الصنايـع بـين الاجـواد تشريك الـيـا طمعـت بغـرسها لا تعدّاك
واحـذر سـرور بغبـّة البحـر يرميك ولا عنـده افـلس من تشكّيك وابكاك
واوف الـرجال حقوقهـا قبـل تعنيك لا تعتمـد بالقـول فالـحق يقفـاك
وهـرج النميمـة والقفا لا يـجي فيك واياك عـرض الغافـل ايـاك إيـاك
تـبدي حديـث ٍ للملا فيـه تشكيك وتـهيم عند الناس بالكـذب واشـراك
والـيـا نـويت احـذر تعلم بطاريك كـم واحـد ٍ تبغـي به العرف واغواك
واحـذر شـماتة صاحب ٍ لك مصافيك واليا جـرى لك جـاري ٍ قـال لولاك
ولا تـحسب إن الله قطـوع ٍ يـخليك ولا تفـرح إن الله علـى الناس بـدّاك
الضيـف قـدّم لـه هلا حين يلفيك ومـما تطولـه يا فتـى الـجود يمناك
إحـذر تلقـّي الضيف مقـرن علابيك خلـه مـحب ٍ لك صديق ٍ إذا جاك
واوصيك زلات الصديـق إن عثـا فيك مـا زال يغطاها الشعر فاحتمـل ذاك
راعـه ولـو مـا شفت إنه يراعيـك عسـاك تكسـر نـيـته عن معاداك
واحـذر عـدوك لـو ظهر بي يصافيك خـلك نبـيـه وراقـبه وين ما جاك
لا تـأمنـه واطلـب مـن الله ينجيّك ويـكفيـك ربـك شـر ذولا وذولاك
شفنـي أنـا يابـوك بآمـرك وانـهيك عـن التعـرض بـين الاثنين حذراك
إذا حضـرت طلابـة ٍ مـع شرابـيك إسـع لـهم بالصلـح واللاش يفـداك
إبـذل لـهم بالطيـب ربك يـنجّيك ولا تـجضع الميـزان مـع ذا ولا ذاك
أمـا الشهـادة فادّهـا إن دعوا فيـك بـيـّن عمـود الدين لا عميت ارياك
بالك تـماشي واحـد ٍ لك يـردّيـك طالـع بنـي جنسـك وفكّر بممشاك
رابـع أصيـل ٍ فـي زمانـك يشاكيك لا شـاف خـملاتك عن الناس غطاك
واحـذرك عـن طـرد المقفيّ حذاريك عليـك بالمقبـل وخـل مـن تعـداك
ثـم العـن الشيطـان ليـاه يغويـك تـرى ان تـبعتـه للشـرابـيك وداك
واوصيـك لا تـشكـي عليـنا بلاويك أنـت السبـب طرفك عيونك بيمناك
واعـرف ترى اللي من وطا (الفعر)واطيك ولا انـته أعـز مـن الجماعـة هذولاك
ألـمسـك يا راسي من الذل واخطيـك واحـذر تكلـم يـا لسانـي حـذاراك
والطـف بـجارك ثـم قـم دون عانيك وافطـن لما يعنـيك عـن ربعـة اخواك
يا ذيـب وان جـتك الغـنم فـي مفاليك فـاكمـن إليـن ان الـرعايا تعدّاك
فـيما مضـى يا ذيـب تفـرس بياديك واليـوم جـا ذيـب ٍ عـن الفرس عدّاك
يا ذيـب عاهـدنـي واعاهـدك ما ارميك مـا ارمـيـك أنا ياذيب لو زان مرماك
والنفـس خالـف رايها قبـل ترمـيـك تـرى لـهـا الشيطان يرمـي بالاهلاك
ومـن بعـد ذا لا تصحب النـذل يعديك وعـن صحبـة الأنـذال حاشاك حاشاك
تـرى العشيـر النـذل يـخلف طواريك وانـا ارجـي انـك ما تـجي دون آباك
والهقـوة انـك مـا تـجي دون اهاليك ولا اظـن عـود الـورد يثمـر يتنـباك
والحـر مثـلك يستحـي يصحب الديك وان صاحبـه عـاعـا معـاعـات الادياك
لا تستمـع قـول الطـرف يـوم يلفيك بالكـذب يقضـي حاجتـه كـل ما جاك
ومـن نـم لك ،نـم بك ولا فيه تشكيك وإلـيـاه قـد أزرى رفيـقـك وأزراك
عنـدك حكـى فـيـنا وعندي حكى فيك وأصبحـت مبغضـنا وحـنا كرهنـاك
مـا اخطـاك مـا صابـك ولو كان راميك واللـي يصيـبك لـو تتقيت ما اخطاك
مـار استمـع منـي عسـى الله يهديـك والنـصـح يـا مـالك لك الله لمـولاك
عنـدي مظـنـّة مـا تـمثلتهـا فـيـك واطـلب لك التـوفيـق مـن عند مولاك















رد مع اقتباس
غير مقروء 18-May-2003, 03:52 PM رقم المشاركة : 2
معلومات العضو
ابو وعيل
مراقب سابق
إحصائية العضو





التوقيت


ابو وعيل غير متواجد حالياً

افتراضي

بيض الله وجهك


ولاهنت اخوي فهد .

تحياتي
ابو وعيل الرويس















رد مع اقتباس
غير مقروء 18-May-2003, 11:16 PM رقم المشاركة : 3
معلومات العضو
geath
عضو فضي

الصورة الرمزية geath

إحصائية العضو






التوقيت


geath غير متواجد حالياً

افتراضي مشكور وماقصرت

مشكور على الجهد الطيب















رد مع اقتباس
غير مقروء 19-May-2003, 02:47 AM رقم المشاركة : 4
معلومات العضو
الصنهاتي
عضو فعال
إحصائية العضو






التوقيت


الصنهاتي غير متواجد حالياً

افتراضي

مشكور اخي فهد على جهدك الطيب

ولكن اسمح لي بتعليق بسيط :
أولا : هذا القسم خاص بشعراء قبيلة عتيبة وأنت أوردت قصيدة للشريف بركاتي وهو غير عتيبي ويمكن تكتبها في قسم الشعر الشعبي والمحاورة .
ثانيا : قصيدة بديوى الوقداني وقصيدتي العفار موجودة وسبقها طرحها في المنتدى ونحن دائمآ نبحث عن الجديد وليس هناك حاجة للتكرار .
وعلى كل حال شكرآ لك وبارك الله فيك



مع تحيات / الصنهاتي















رد مع اقتباس
إضافة رد

العلامات المرجعية


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن »02:32 PM.


 Arabization iraq chooses life
Powered by vBulletin® Version 3.8.2
.Copyright ©2000 - 2024, Jelsoft Enterprises Ltd
اتصل بنا تسجيل خروج   تصميم: حمد المقاطي