أولاً نشكر الشيخ عبدالله بن عمر بن ربيعان على زيارته الكريمه
....
كما أود أن أعرض عليكم قصائد والدي الشاعر غالب أبو كتيفه
التي أشار إليها في هذا الموضوع أخي حمود بن خيشوم العصيمي
الذي يستحق منا الشكر الجزيل ..
( 1 )
لا اله الا الله اللي لا اله نده=جل شانه يمهل العالم ولا يهملها
الكريم اللي يمد ليا طلبنا مده=وامرنا في دبرته وارزاقنا كافلها
يا ضميري حد سيفك للمواقف حده=والحبال اللي توردك القراح افتلها
والكلام اللي يجمل يا ضميري بده=والعلوم الثانية بيبانها قفلها
الدرر من دونها جزر المحيط ومده=والصعاب اللي تهوشك دونها ذللها
واترك اللي عن لزوم الربع فيهم صده=والوجيه اللي تبشر بالسعد قابلها
احتزم للماقف الغصاب وانته قده=المواقف دين وانته ما خلقت الا الها
خابر طيرك يصيد الجزل يوم تهده=كل ما حول على الشرد يجيب اجزلها
والجبل والعالم اللي تتقي في سده=ورنيها لين اشوف وجيهها وازهلها
كل رجل من ثيابه يلبس اللي قده=لا يقصرها عن السنه ولا يسبلها
كان قصرها يجي للناس فيها لده=وكان طولها رثع فيها ولا جملها
والرجل ما ينفعه ما سوا ابوه وجده=كان ما تفعل يمينه فعل يعدّ الها
ذعذع الغربي وطيب العود ذعذع نده=والتحيه كل طلق حجاج يستاهلها
باسم قيف نعتزي به كل ما جا ضده=مرحبا ترحيبة ما ينطفي مشعلها
باسم قطمان المحازم طيبين المده=ربعي اللي تنطح القالات وتكملها
عزوتي يوم ان كلٍ يفتخر في بده=تفتخر بي وافتخر يوم اني امثلها
افتخر ويشوش راسي لين ياصل حده=كل ما اشوف القبيلة قايم محفلها
هذي جسور التواصل بيننا ممتده=يا عسى الرحمن ياصل كل من ياصلها
يا ركون عتيبه اللي بالفخر مشتده=يا عناوين المكارم كلها باكملها
يا ركون عتيبه اللي كل ريع تسده=فأول الدنيا وحاضرها وفي مقبلها
يا عتيبه ياهل الوقفات واهل الرده=يوم ساحات المعارك يشتغل معولها
ندحم الجمع الكبير ليا وقفنا ضده=والكبار من الهقاوي عزمنا ياصلها
عزمنا يوم السنين وجيهها مسوده=يضرب وجيه السنين العوج ويعدلها
كم عقيدٍ بالجموع يحدنا ونحده=لين قررها معزي واعتدل مايلها
يوم كل في هذاك الوقت شده شده=وقفة عتيبه مع ابن سعود من يجهلها
ايه ناصرناه نصرٍ كل رجل يعده=من بداية رحلته لين اكتمل جدولها
يا ابو متعب يا ملكنا فالرخا والشده=لك ولانا والسمع وكفوفك نقبلها
كلنا دون الوطن نار وعتاد وعده=دارنا تخسى يدين الغدر ما تاصلها
وابو خالد جعل ربي للبلاد يرده=من ثياب العافية ضافيٍ عليه اجملها
ابو خالد جعل عين ما تفيض بوده=ما يفارقها سهرها والرمد يكحلها
( 2 )
الا يالله ياللي لك عبادك راكعين سجود= وألسنهم بالدعاء تلهج طمع والخوف يخنقها
عسانا من قبلت صيامهم يارب يامعبود= وغفرت ذنوبهم ورقابهم برضاك معتقها
نجاهد فالحياه وكل يوم جهادنا في زود= ولا يمكن توفق نفس عبد ما توفقها
نخاف نموت جوع ونجتهد ونكرس المجهود= وناسين انك اللي تخلق الانفس وترزقها
وناسين ان هذاك المكان ويومنا الموعود= تقربنا له الساعه ليادارت دقايقها
بعدها ياقصيدي حان وقتك ماعليك قيود= لعلك ترضي الاذواق والغايه تحققها
تفضل ياقصيدي جود في حضرة وجيه الجود= تراها فرصة يا شين حظ ما يوافقها
هلا في محفل اللي يذبحون الحق والمفرود= رجال كل ماتبدي لها قاله تغلقها
ارحب باسم قطمان المحازم محتمين القود= ليا صاح النذير وركبوا من الخيل سبقها
هذولا عزوتي والنصر في غاراتها معقود= يثور النصر معها كل ماثارت بنادقها
فروسيه . شهاميه . كرم . من عهد آباء وجدود= فعول ثابته تبت يد اللي ما يصدقها
واظني يوم اعد فعول ربعي مابها منقود= أكيد الناس لولا الفعل ما بانت فوارقها
هلا عد المخايل يوم يجهز نوها ويقود= ليا منه زهم رعادها واشتب بارقها
هلا عد النسايم كل ماهبت بطيب العود= ليا ذعذع لها الغربي وطيب العود عانقها
هلا يامروية حد الحسام الصارم المجرود= هلا ياروس قوم ماتلين الا لخالقها
شيوخ فعلهم بين الفعول الغانمه معدود= تزين المفرده بفعولهم يوم اتطرقها
اهل سبلا و اهل لظيا مصابيح الليال السود= شيوخ من شيوخ عتيبه الله لا يفرقها
عتيبه كل ما طال النهار ودندن البارود= وقام مولع الفتنه مشاهيبه يلاحقها
نبيع اعمارنا دون الوطن وملوكنا آل سعود= لهم برقابنا بيعه وحنا اللي نوثقها
ملكنا يا ملكنا ياسندنا فالنهار الكود= ليا من المشاكل والفتن شبت حرايقها
ملكنا يا ملكنا جعل عيد الله عليك يعود= تهنيك القبيله كلها بلسان ناطقها
عتيبه والزمن يعرف عتيبه والرجال شهود= على وقفاتنا في حاضر الهجره وسابقها
عتيبه يوم كان الناس احد طارد واحد مطرود= على نجد وطوارف نجد رافعة بيارقها
نزلنا نجد بالسيف الصقيل وباشقر العبرود= ومن دونه وعنه القوم نحداها ونفهقها
وناصرنا معزي لين خلاها سهود مهود= يمنها . شامها . من حدها الغربي لمشرقها
بنا له صرح يبقى صرح في وجه الزمن مشيود= ودستوره كتاب الله والسنه يطبقها
واظني يوم اعد فعول ربعي مابها منقود= أكيد الناس لولا الفعل مابانت فوارقها
( 3 )
مع ميبسات الريق لي سابق علاقه واتفاق= علاقةٍ ما يجهلون الطيبين أسبابها
ياالله تجنّبنا الرياء والعلم الاقشر والنفاق= والكلمه اللي ما تجمّلنا ليا جينابها
وإنّك ليامنّ المكان بحضرة أهل العرف ضاق= تهدي لساني للكلام اللي يثير إعجابها
والنيه اللي ثوبها أبيض ما يخالطها زراق=الله يوفقها ويرزق بالنجاح أصحابها
حب الوطن بقلوبنا وارقابنا دونه تساق= والعيشه اللي ما وراها عزّ ما عشنابها
اليا دعى داع الوطن جيناه وخطانا سباق= نرد المنايا عمد يوم إن الرخوم تهابها
ونرد بالصوت الجهوري ياهل الصوت الدقاق= ونطفي الفتنه ليا منّه قدح مشهابها
واللي نسينا في سنة تسعين مع جيش العراق= والطايرات اللي تزلزل بالجبال اسرابها
خله يذوق من الغبن ويشوف ماشافه وذاق= هو ليه ما يحسب لعاقبة الامور حسابها
نشت مخايلنا وصبت وبلها وبل ٍ حقاق= واللي تحتها ما يعين خير من صبّابها
قمنا مقام ٍ يرفع الهامه وضيّقنا الخناق= لين الحيايا الرقط ردّت روسها لاذنابها
عهدٍ علينا ما نبوق ولو ردي الحظ باق= عهد الرجال اللي تموت وعهدها برقابها
دون أمّنا اللي مالها من ذمة الشايب طلاق= ابشر لك بحربه تسد العين يا خطابها
لعيونها في كل يوم نقدم أشلانا صداق= من الجماجم مهرها ومن القلوب خضابها
الله يا ماحلى درها ولغيرنا مرّ المذاق= وابعد من المريخ عن بعض اللحى واشنابها
هذي وطنا مالنا عنها ليا اشتدّ الوثاق= نعطي الرصاص نحورنا ونموت دون ترابها
ارضٍ عليها يامن ابن ادم ودمه مايراق=واكثر من المليار مسلم يتجه لرحابها
ديرة هل العوجا عريبين المناسب والعماق= عيال من ساق النجايب لين طق أبوابها
عيال من لم الشمل وانهى التناحر والفراق= وانهى العصبيّه بكل اشباحها واحزابها
يوم انها موتٍ حمر والعيش فيها ما يطاق=جاها معزي واصبحت واحه تفوح اطيابها
عساه في صحبة هل الاعناب والكاس الدهاق=في جنة الفردوس زاده كاسها واعنابها
والسلام عليكم
آخر تعديل زيد ابو كتيفه يوم 06-Jun-2010 في 10:40 PM.
« آخـــر الـــمـــشـــاركــــات »
04-Jun-2010, 10:57 PM
زيارة الشيخ عبدالله بن عمر بن ربيعان للعقايله
العرض العادي
