بــــدر البـــــدور

[ذياب منير العصيمي]

بسم الله الرحمن الرحيم

إليكم هذه المتواضعة من جديدي بعنوان

بـــــدر البـــــدور

يانور بـدرٍ تجلـى واكتمـل نـوره=في ليلةٍ تعجـب العاشـق مساريهـا
ذكرتنـي جـادلٍ بالزيـن مشهـوره=من راسها فاتنـه لاسفـل مواطيهـا
صورة تمام البدر مامثلهـا صـوره=وخمسة عشر ليلته باحلـى لياليهـا
رعبوبةٍ بالدلـع والملـح مغمـوره=سبحان ربٍ ملاك الحسـن معطيهـا
ريميةٍ من رجـال الصيـد مذعـوره=على الفيافـي تسابقهـا خطاويهـا
صغيرة السن بين النـاس مكبـوره=كلماتهـا كـل شاعـر مايجاريهـا
أبحرت في حبها والـروح مخطـوره=و رسيت كلي على شاطـي موانيهـا
في قلبي إلها قصور الحب معمـوره=على عروش الغـلا تثبـت مبانيهـا
لو عذبتني عـذاب البيـن معـذوره=الغالـيـه مايعذبـنـي تغلـيـهـا
ولاقلت ليلـى ولاسلمـى ولانـوره=أقول بـدر البدورأعشـق معانيهـا
وإليا نهاني عذولي ما أستمع شـوره=عذالـة الحـب ماتتـرك مساعيهـا
عاداتها التفرقـه بافكـار محظـوره=زورٍ و بهتـان واعلـومٍ تسويـهـا
وعلى طريق الخطا ماهيب مجبـوره=واعلومٍ اتجيبهـا وأخـرى توديهـا
الله واكبـر عليهـم قوّمَـو ثــوره=بيـن المواليـف ماحـيٍ يطفيـهـا
والحب وش فايدة شرعه ودستـوره=لاصـار كـل القضايـا مايقاضيهـا
حملني الوقت من همه ومن جـوره=ودنيـاي قامـت تبلانـي بلاويهـا
ولعبي الوقت الأقشر لعبـة الكـوره=وأبعدت عنها وأنا عينـي تراعيهـا
ولاهو غريب المولع يفقـد اشعـوره=من بعد فرقا هنـوفٍ مولـعٍ فيهـا
مقسوم والنفـس منهيـه ومامـوره=وعشرة ربيع العمر مانـي بناسيهـا
واحروفها الاربعه فالقلـب محفـوره=وعهدٍ علي لاحتفظ فيهـا وأداريهـا
وأنا دموعي على الخديـن منثـوره=لاشفت نور القمر واوحيت طاريهـا
يالله عسى دارها بالغيـث ممطـوره=من صادق الوسـم همـالٍ يساقيهـا
وقاعٍ وطت به عسى ينجّـر ديـوره=ويسقي مرابيعهـا ويسيـل واديهـا
وروض النفل والخزامى تكمل ازهوره=ويفوح عطر البختري فـي مغانيهـا
والواد الاخضر عليه اتغرد اطيـوره=يمكن تحن وتذكّر عشـق ماضيهـا
باسباب بدرٍ تجلـى واكتمـل نـوره=في ليلةٍ يعجـب العاشـق مساريهـا

أخوكم ذياب العصيمي