ابو زيد الهلالى

[الغربي]

عن فارس وشاعر معروف لا يجهله البعض والكثير صراحة يحب يسمع عنه وهو مشهور بالمغامرات وهو الشاعر: ابو زيد الهلالي

السالفه تقول ( الله يسلمكم ) ان ابو زيد يومنه سافر يبي يدور ديار(ن) خصبة لربعه وكان معه يحيى ولد اخته الوكاد انهم في اثناء الرحلة خلص الماء اللي معهم وياولد يمين يسار ... اييييييييه عاد مالهم الا يدورون (الله يطول باعماركم ) بئر يردون منه ... المهم انهم لقولهم بير مهجور ولا فيه اثر ورد فقال يحيى : خال هالبئر مهجور وانا خايف يكون فيه دواب ولى هوام وقال ابو زيد: اسمع وانا خالك اللي كاتبه الله لك يبي يصير (ونعم بالله ) قال يحيى : اجل اتكلنا على الله ابنزل اعبي مويه ( يالله لك الحمد والله انا حنا بنعمة قسمن بالله الشباب اذا بغوا يطلون البر اكلف ما عليهم يعبون التوانك مويه ولى خوف ولاهم يحزنون)

المهم ان يحيى نزل بهالبير وبدا يغرف بالدلو وخاله ابو زيد يسحب الدلو الى عنده ومن ثم يرجم الدلو على يحيى مرة ثانيه ويعبيه يحيى مويه وابو زيد يسحب الدلو مرة ثانية وعلى هلحال (يالله لك الحمد والله انا حنا فيه نعمة قسمن بالله اذا بغينا مويه فتحنا بزبوز التانكي واذا خلصنا سكرنه ) .... المهم ان البئر فيه داب ... وش فيه ؟ فيه داب ولا انتبه يحيى لداب(افااا يا ذا العلم ) وانقزي يالداب هاك النقزه اللي كنها لاعب يبي يضرب الكورة براسه في هجمة مرتدة لفريقه واقرصي يحيى وصرخ صراخ(ن) يروع وقال لخاله ابو زيد يا خاااااااااالي : الحذر ما يفك من القدر وقام يون يحيى بالبير خلاص ما عاد باليد حيلة ماله الا الموت الله يدفع البلا :

فقال ابو زيد بعد ما سمع ونين وصراخ يحيى :




سمعت منك يا فتى الجود ونه = عساك منها يا فتى الجود سالم



قال يحيى :



انا سالم منها ولانيب سالم = والراس ما تطوي عليه الغمايم
انا سالم لو ما ازرق الناب صابني = ضربني بنابه واتقى بالردايم
وانا خايف يا خال هذي منيتي = ومن رافقك يا خال ما رد سالم
وحلفت انا لاارويك واروي ركايبك = واخلي الماء من على الحوض عايم


فقال ابو زيد :



يا وليد قم خم الرشا واحتزم به = خل اظهرك عن بير فيه الصمايم


وحس يحيى بالموت وقام يوصي خاله على ابنه الصغير وعلى اخته وزوجته يوم يقول :



يا خال خل الدوح والنوح خله = واعمل بقبري يا عطيب الضرايب
خل القبر في راس عيطا طويلة = وسيفي ورمحي حطهن لي نصايب
غدي بنات الهلاليه يجنني = يجذن على قبري بروس الذوايب
ودعتك يا خال ورع صغير = يلعب مع الصبيان وابوه غايب
احذرك انا يا خال عن ضربة العصا = او نزرة(ن) تودع قليبه حطايب
وقولوا لبنت امي تغطي وتستحي = لاجو لها الورث فوق النجايب
وقولوا لبنت العم ترحل لهلها = حرم عليه اليوم شوف الحبايب



وبعد هذا توفى يحيى وهو وسط البئر وقام خاله ابو زيد وطلعه من البئر وحفر له هاك القبر ودفنه
وقال ابو زيد وهو بجنب قبر يحيى هذه الابيات :



دفقت على قبر الهلالي قربته = وخليتها تسقي الرياض المجادب
وحطيب على قبر الهلالي جوخته = وتركتها تذري عليها الهبايب
وحطيب على قبر الهلالي فتخته = في ماقع(ن) يشوفها كل صاحب
وعلقت على قبر الهلالي بكرته = وخليتها تعتب حوال النصايب

[ابن مشيب]

مشكور اخوي الغربي , ابو زيد الهلالي اشهر من نار على علم , فهو مشهور في جميع الاقطار العربية , وسطر لة في صفحة التاريخ بطولات باقيه الى مشاء الله , وها نحن نستمتع بقصصة البطولية.

ولتوضيح فبني هلال من هوازن , اي يلحقون عتيبة بلحمة.

تقبل تحياتي.

[هنيدس الروقي]

الاخ الفاضل الغربي

عظيم ان نكتب عن ابطال هوازن (عتيبه) وان انتقلو الى اماكن اخرى الا ان ابو زيد نشاء بالملعب وكلاخ وغيرها من قرى وبلاد جنوب شرق الطائف ، ومران هي عقر دار بقايا هوازن ، والعاليه (عالية نجد) هي بلاد بني هلال وغيرهم من هوازن ، وهذا هو تاريخ عتيبه وهؤلا هم ابطالها .
الى الامام
اخوك هنيدس

التوقيع

أ‡أ،أٹأ¦أ‍أ*أڑ أ¥أڈأ*أ¥ أ£أ¤ أ‌أ‘أ¥أ¦أڈأ*

[سحيم العتيبي]

صدقت ياهنيدس فأبوزيد وبنوهلال ثابتين النسب في هوازن ( عتيبة) والمشكلة أن الكثيرين تصيبهم (هستيريا عتيبة) عندما يذكر هذا النسب الواضح بالحجة والبرهان الناصع .

[فارس الهيلا]

والله يعطيك العافيه ونطمع في كثير من سوالف بن هلال وابو زيد خصوصا
ولك تحياتي ايها المبدع
اخوك فارس الهيلا

[العين الحمرا]

يعطيك العافيه اخوي الغربي على هالقصه الرائعه ، ولا غرابه ان يكون هذا البطل من هوازن 0


اخوك
العـــــــين الحــــــــمرا

[ابوعتب]

هل بني هلال رحلو في العصر الاموي ولا العباسي ولا بالجاهليه وليش ماعاصرناهم افيدوننا ؟وهل انهم الخ ياخذ اخته لاني سمعت عنهم قصص غريبه مثل ابن خاله؟ووين مناطقهم وهل هم اهل مدن ولا اهل بر؟

[هنيدس الروقي]

ابو عتب
مساك الله بالخير

وش بلاك ياخوك الله يهديك !!!!!!! وش الاخ ياخذ اخته !!!!!!!
لا تقرا الخرابيط اللي تنشر في مصر وسوريا ولبنان عن بني هلال
قصدي كتب الاساطير .... لانها خرطي ...اجل ابو زيد يقول :

لو تيجي تزورنا في مساكن اهلنا .....نذبح لك بطه وديك سمين ...!!!!!!!!!!!!!!!
وبعدين يعقر على قبر ...واحد 1000 ناقه !!!!!!!!!!!!!
وش هالخرابيط !!!!!!!!!!!!!
بني هلال قوم كرام ... من هوازن الهيلا... من عامر بن صعصعه ... كانت مساكنهم حول بيشه .. ثم انتقلو الى كلاخ وما حولها... وفي سنة 446هـ تقريبا ..سنة القحط العظيم ... تجمعو في مران... وهاجر منهم اقوام كثير...مع غيرهم من هوازن وسليم ..الخ ..الى شمال افريقيا ...وكان يقودهم شيخهم ... سرحان ..وابو زيد الهلالي وذياب بن غانم ...لهم صولات وجولات .... هناك... وبقي منهم بقيه ...انضمت مع البقية المتبقيه مع هوازن .... في العاليه ..... وهناك ناس ما عندهم سالفه يقولون ان بني هلال كانو في الهلاليه بالقصيم وثادق ..وهذي تخاريف مالها سنع رد عليها العبودي علامة القصيم في عدد قديم من مجلة العرب .
هذا وضعهم باختصار

اخوك هنيدس

[ابو وعيل]

اخوي هنيدس الروقي

رائع في كتباتك ... وجميل في المتابعه وحوارتك

ابو عتب
وينك من زمان مالك اي طاري .. لاتكوون قاطع .... فانت غالي بيننا


الغربي

يعطيك العافيه على ماكتبت من ابطال هوازن .

اخوكم
ابو وعيل الرويس

[سحيم العتيبي]

أبو عتب !!!!!!!!!!
الله يهديك بس !!!!!!!!!!!! وشو ذا " وهل عاصرناهم " وش شايفنا الله يرحم والديك ؟؟؟ أصحاب الكهف !!!!!!!!!!!
أما " هل هم اهل مدن ولا اهل بر؟ " والله مدري ... ولكن الوكاد لو دروا ان الدعوة تاليتها نفط كان ماتحركوا !!!!!!!!!!!!!!