علموني الذرابة

[للغايب عذر]

السلام عليكم ورحمة الله وبركاته

كيف حالكم يا قبيلة عتيبه

انا اتمنى انكم تعلموني الذرابة واسلوب التعامل مع الناس زي لاهنت وامثالها

وفي العزايم واذا قابلت اخوياك ابيكم تعلموني كل شئ من المصطلحات البدوية

تكفوووووووون يالربع

[للغايب عذر]

افااا ولا واحد رد

ما هقيتها منكم ياعيال عمي

[تركي ابن مكه]

والله يبن الحلال انكان معلموك امك وابوك الله يحفضهم
محد معلمك
لكن تسمع لمحاورات الجلاوي في اليو توب وانت تتعلم المرجلة وعزة النفس

[مشعل العطاوي]

حياك الله في محلك الثاني وقبيلة عتيبه ترحب باللي يجيها

وعتيبه الها قسمها من الطيب وكل قبيله فيها حقها

وانت ياخوي مافيك عذروب والذرابه فيك ان شاء الله

والواحد فالحياة هذي اهم شي دينه اول شي والامور اللي عقبها تهون وانا اخوك

منها الصلاه عمود الدين

ويقول فيها الشاعر بندر بن سرور العطاوي رحمه الله

يابنت كبي واحد(ن)مايصلي,,,,,,تارك عمود الدين مالك وماله

والذرابه هي طيب التعامل مع الناس

الوالدين الهم حقوق واهم شي الواحد يرضيهم لو يزعل الناس كلها

ويقول الشاعر بندر بن سرور العطاوي رحمه الله

يرقد ويحلق والدينه تخاليف,,,,,,,دايم ومرقد ميت النار دافي


الصديق تعامله على انه اخوك وتحمل منه اي زله وبيت للفارس شليويح العطاوي رحمه الله

القرم يدمحلي ثمانين زله,,,,,,,,والاش ماني عن زرياه داري

وانت ان شاء الله قرم

الجار احترام الجار وعدم مضايقته حتى لو كان يضايق تجيه بالعلم الطيب والتفاهم ولا شفته دام تعزمه على فنجال قهوه او اي مناسبه تكون في بيتك العامر

وفيه بيت للامير تركي بن حميد رحمه الله

ترا النبي وصى على الجار لو جار,,,,,,اخذ الحذر ياعبيد عقب النذاره

الضيف لاجاك ترحبه في اقباله على بيتك اول محلك المتواجد فيه

وتخيله يرتاح كانه في بيته ولا تحسسه انه مثقل عليك

والضيفه بشكل عام لاجيت تضيف اما انك تعزم رجال جاي من سفر سواء جار او صديق او بن عم

او ناس الهم حاجه في في مدينتك او قريتك اللي عايش فيها ويسمون طراقي او طرقيه

او انسان اخطيت في حقه تعزمه ويسما هذا حق

والعشاء بشكل عام تقهوي ضيوفك وتطيبهم من العود قبل ضيفتك وبعدها

تقبل مروري وانا اخوك واتمتى اني افدتك

وحياك الله في منتدى عتيبه وعساك تواصل معنا على هبة ريح

التوقيع

مـاعـاش مـن يـرضـى لـنـفـسـه هـضـيـمـه mashail-alatawe@hotmail.com

آخر تعديل مشعل العطاوي يوم 07-Jun-2011 في 06:36 AM.

[محمد ابن رووق]

نعم كلام العطاوي يفيدك كثير


ودور لك صديق صادق نصوح وحاول تحتك مع شيبانك فهم يعلمونك شف كيف تعاملهم مع بعض


وان اخطيت موب عيب قبلك العالم تخطي المهم لا تستمر على الغلط وان وقدرت تعدل الخطا خير وبركه


وسؤالك هذا يدل على جهدك وحبك في التعلم وصدقني انك انت ذرب ولا بناقصك شي

[خلف القثامي]

تابع قناة بدايـــــــــــــــــة


فيها برنامج ع شكل حلقات بوجود كبار السن وكانهم في مجلس يتناولون القهوه ويسولفون

عن علوم الرجال وممكن تستفيد


خلك ع بدايه