راكب اللي مركبه كله فخامه قصيدين متبدلتين - الهيـــــــــــــلا *** منتدى قبيلة عتيبة

ابن بريم المقاطي · 20-Nov-2008, 11:16 PM

السلام عليكم ورحمة الله وبركاته

اعضاء الهيلا اسعد الله اوقاتكم بكل المسرات

اخواني حبيت انزل لكم قصيدتين متبدلتين من الشاعرين

الشاعر/مطلق بن عمر بن بريم المقاطي و الشاعر/هضيبان بن براهيم بن حدوى المقاطي

قصيده بعنوان /راكب اللي مركبه كله فخامه

بدابها الشاعر مطلق

راكب اللي مركبه كله فخامه=ليا مشى كنه يقول الدرب وينه
ليا انتهض ثم قيل عز الله مقامه=مايشوف الناس غير بطرف عينه
شبه شيخن محتون كل الزعامه=لا حضر ثم وقفو مستقبلينه
لااشتغل كنه يترجم لك كلامه= هرجه اليابان في وسط المكينه
وان سرى والليل مدنلك ظلامه=يعجب السواق واللي راكبينه
جيب لكزس صح حطوها علامه=فارقن عن صنع تايوتا بزينه
مايجيبه كود من حقق مرامه=في رضاء ربه ودعوه والدينه
كم شنب يبغاه مير الوقت ضامه=من فلوسه كاش فارغتن يدينه
نصه اللي تجتمع فيه الشهامه=صاحبن با ابطي وأنا ما وافيت دينه
صاحبن غالي ويلزمنا احترامه=جعل رب البيت يمهل في سنينه
من رجال الطيب حامين الجهامه=يوم ضرب الشلف يبرون الغبينه
قسمهم بالطيب من ذروة سنامه=يوم بالفريس شلعت السفينه
ذكرهم باقي ليا يوم القيامه=ابن حدوى والقبايل عارفينه
من نواه بشر تبردبه عظامه=قد طرح شيخن وربعه كانفينه
وهاهو هضيبان صارت با ستلامه=ديدنه ديدن ربوعن سابقينه
يا أبونايف صار بالوقت انقسامه=وخربت العالم بتأثير المدينه
جاك ناسن يستبيحون الكرامه=والحقيقه صفحه اعماله تدينه
بالمجالس حاضرن حرب الرغامه=خدش وبصفه خدوشن ميدينه
وهو عن الطولات تثنيه الرخامه=لو بغى العليا معه صارت قرينه
ماعرف يا دوب عارفته مدامه=وهكذا طبعه وورث مورثينه
عالمن ماهمب يخشون الملامه=مايعرفون الهزيل من السمينه
وبالختام اقول يا رب السلامه= واحمنا من شر شينين الضغينه

ورد الشاعر هضيبان بن براهيم على القصيده

يوم شفت الجيب طشيت العمامه=مرحبا با الجيب واللي مرسلينه
نذبح الواجب قبل ينطق سلامه=واجبا لازم وحنا قادرينه
قدرمن جانا خروف مع ولامه=وقدر راع الجيب فوقه محتسينه
لو اقدم مايقدم فاليمامه=ماعتبر قدمت له حاجه ثمينه
ومطلق ابن عمر واسمه في تمامه=بن بريم اهل المواقف خابرينه
شاعر للمرجله يكرب حزامه=من صواريمأ مواقفهم رزينه
جده اللي لاطنا فيه احتدامه=يوم ذاك اليوم في وقته وحينه
يم ضلعٍ بارزأ لاهل الفهامه=هو وربعه والكلام امثبتينه
العدو من فعلهم جاه انهزامه=والحمى با جوه وعده واردينه
فعلهم من ماضي الوقت وعوامه=مفخره لأحفادهم يـا سـامعينه
ومطلق من الساس حتى في طمامه=عز مبنى اجداده اللي جاذبينه
شاعرأ والشعر شاده عن هدامه=ياسم الشرد وتبقى له خدينه
عقب جاني علمه اللي في ختامه=واضحا قصده عسى الله مايهينه
عن رخومأ لا شداد ولا مسامه=مالهم في صفحه التاريخ عينه
عالة فيهم عن الطيب انحطامه=وقتهم ما ميزوا زينه وشينه
يوم ماض الوقت صايبهم بلامه=في زمانا قاسيا مافيه لينه
وفي زمان اليوم نعمه للنعامه=ياعوين الحر معها يا عوينه
امنيات الحر في ساعه منامه=وذيك كل اللي تمنى فالخزينه
صايرأ فالوقت ميله وابترامه= الله يعين الذي يندى جبينه
وانت تعرف وش حلاله من حرامه=بس اقول اللي صبر ربك يعينه
واطلب اللي لاومر وانشا غمامه=يبهج نفوسا من الدنيا حزينه
ويا عسى قبل العمر يبدا صرامه=فوقنا ينزل من المولى سكينه

آخر تعديل ابن بريم المقاطي يوم 20-Nov-2008 في 11:29 PM.

][][الهراني][][ · 20-Nov-2008, 11:44 PM

وعليكم السلام ورحمة الله وبركاته................... ومساء الخير يا اخوي( ابن بريم المقاطي)

وصح لسان الشاعرين وقصيدتين جميلتين.

والله يعطيك العافيه.

خالد بن الحميدي البراق · 21-Nov-2008, 01:53 AM

يعطيك العافيه اخوي
وصح لسان الشاعرين

تقبلوا خالص تحياتي
أخوكم/البراق

اسد الهيلا · 21-Nov-2008, 05:21 AM

صح السنتهم وبيض الله وجهك امتعتنا بالقصايد الجزله

أبو مصلح 511 · 21-Nov-2008, 12:34 PM

صح لسان الشاعرين

وبيض الله وجهك على المجهود الكبير

ولكم تحياتي

الســيف الحــدب · 21-Nov-2008, 05:30 PM

صح لسان ابو عبدالله شاعر جزل وكذالك الشاعر هضيبان بن براهيم شعراء من نجوم ولكن الاعلام ظالمهم
بن بريم دائم مبدع بنقل القصائد الطيبه وكل علمك غانم يا بن بريم تحيتي لك