مطير تزبن على قبر الصييفي

[تالي الأولين]

السلام عليكم ورحمة الله وبركاته
::
::
::

هـــذي الـقــصــه الــمـشـهــوره لــمـطـيــر يــوم تــزبــن عــلــى قـبــر الأمـيــر ../ فـهـيـد الــصـيـيــفــي
::
::
::

وراعـي الـقـبـر اللـي زبـنـت عـلـيـه مـطـيـر هـو ..
الــشـيـخ و الـفـارس // فـهـيـد ابـن مـبـارك الـصـيـيـفي شـيـخ قـبـيـلة الـنبطة من الخضران من بني عمر من سبيع


والــشـيــخ فــهـيـد لــه مـكانــه عـاليــه عند سبيع وعند القبايل الثانيه

فــكـان يــغـزي فـي نــجــد مـع ربـعـه فـهـو قـائـد بـيـرق سبـيـع فـي مـنـاخ الـسبيـه الـمعـروف وقـد شارك ايـضـاً في مـنـاخ الـرضيمــه وفي وقعات واجـد لا يـتـيـح لـي الـوقـت ذكــرهــا

وايـضـاً كـان يــغـزي في العراق وكـان ابـن سعدون ( امير قبيلة المنتفق ) مـتحالف هوياه

أمّـا فـالكـرم فيعجز اللسـان عن وصـفـه ففـي مـجلــسه فيه 300 ميـة شــداد يوم العرب في فقر وجوع


وعندما هاجر إلى العراق في آآآخر حياته قـال قصيدتـه المشهوووره :ـ

سق الركايب واكره النفس بازعـال =واصبر على قطع الفجـوج الخليـه
المرجلـه قــد والاولاد مـحـال =قليل من يصبـر علـى المكرهيـه
طوال الخطى ماتقصر العمر وان طال =مـادام ربـي ماكتـب لـك منيـه
ان ساعفتلك قيل لي ماض الافعـال =وان عاضبت قالوا علومـه رديـه

وهــو صـاحـب قصيدتـه المشهووووره اللي فيها من الحكم الشي الكثير

لاوعنـاي وفاطـري واعنـاهـا =من لايلاوي العسر مايدرك اللين
كـل تظلـل فـي بيـوت بناهـا =وانا على حمرا سواة الشياهيـن
كم عقلة قـد وردن بـي جباهـا =وكم ليلة جينا على الجيش سارين
كم حرة في القيض نرقع حفاهـا =في لاهب الجوزاء وحنا مقفيـن
كم فاطر قامـت تدانـا خطاهـا=نـوب مقفيـات ونـوب مقبليـن
وردن بنا العوجا طويل رشاها= وغرافنا سالم صعوط المجانين
خليـة قـام ايتطايـر قطـاهـا=وزود عليه الجيش وحنا مدركين
وصلن بنـا ديـار بعيـد مداهـا=اخذنا الدبش منها وجينا مفلحيـن
جينـا بقطعـان توامـا ذراهـا=كسابنا يفـرح ونحـذ المفلسيـن
معنـا رجـال مالحقنـا مداهـا=بني عمر ربع على الراي صعبين
ومعنا رجال تعجب اللـي نخا=هـاعوامر دايم على الهوش ضارين
كم هجمة خليتهـا فـي خلاهـا=ما عند اهلها زاد ناس مجيعيـن
وخليـت رواي رويـة رواهــا=وخليت مـداد لاهلـه متحريـن
وباطلب الله عنـد ربـي جزاهـا=لاجاء الحساب وقربن الموازيـن

وسـالفـت مطير وزبـنـتـهم على قبره هي ان الشيخ والفارس // فـراج ابـن مـذكـر الـعـمـانـي ( بـعـيد المغـازي )

رايـحـن هــو و ربـعــه غـازيــن عـلـى احـدى القبايـل وعـنــد رجـعـتـهـم وكـسـبهـم للحلال وللغنايم ..!!!

الا الـمطران مخالـفـيـنـهم عـلـى ديارهم ، فـجـا اخوي موضي وربعه لاحقين مـطيـر وهم يعتزون ، ومن عـزوتهم درو الـمطران انـهـم العمانيه مـن سـبـيــع وهـم عـلـى علم في مدى وشجـاعتهـم وسـطوتهـم

ويـوم ظــاقـتـبـهـم الأرض زبـنـو على قبر الـصيـيـفـي وقـالو لـفـراج ترانا زابـنـيـن على قبر ميتكم

قال فــرّاج : فـهـيــد يـجـير حي وميت وعفى عنهم وفكهم الله


والــسـالــفــه ذي لـهــا شـواهـد وادلــه واجــد منهـا

قـصيـدة الـشاعـر ../ فالح بن حـثــلان بن سـمـيـّـر من المداريه من الصعبه من سبيع :

قومن لجوا بفهيد عفناهـم إجهـار=شيمة عرب و رجال و الكذب مرفوع
غدوا على قبره كما وصـف خطّـار=قلنا ترى ما عند هالقبـر ممنـوع

وقـصـيـدة الـشـاعـر ../ كـديميـــس الـعصيمـــي :ـ

و الشاهد ان مطير فيهم شطـاره =محدن لقاها غيرهم بالمحاظيـر
ليا عارضو جمعن وتم انتصـاره=يلجون لقبور الرجال المشاهيـر
قبر الصييفي قد طلبتـو جـواره=يوم ارهقوكم باللحوق المغاويـر
خطرتو لقبـر السبيعـي خطـاره=سمعتو انـه يعتنـي بالخطاطيـر
(يلزم عليكم يالمطيـري مـزاره=يوم احتماكم من سيوف المناعير)

وقال الشاعر / الأشــعــل بن فـيـصـل الـخـريـصـي الـشـمـّـري :

أهل البيوت اللي تعـز ّ العانـي=وسيوفهم سمّ (ن) على معاديها
إبن الصييفي صيتهم نسمع بـه=عيال النبيطـي زبّنـت عانيهـا
(اللي عقيد القـوم لاذ ببيته= قول وين فهيد ؟ يـا حاميهـا)
(أنا دخيل فهيد لو هـو ميّـت=و بعض العرب ما يدخلك حييها)

والـقـصايـد اللـي ذكـرتهـا هـي لـشعراء مـحـايديـــن


--------------------------------------------------------------------------------


الـمـصـدر : كـتـاب ابن فهيد ((من ادبنا الشعبيه في الجزيزة العربيه الجزء الثالث )) ص 99

ومـوجـوده ايـضـاً فـي المصادر عند ابن بليهد [/align][/size]

آخر تعديل تالي الأولين يوم 07-Aug-2007 في 08:42 AM.

[عبدالعزيز بن جودان الرويس]

بيض الله وجهك
ولا تحرمنا من العلوم الاوله والتاريخ
وعزاله ان السبيعي كفوو ومطير مابهم قصور بس يمكن ماساعدهم الحظ هاك اليوم

التوقيع

godan3@hotmail.com

[ابوبجاد الرويس]

لاهنت اخوي تالي الاولين

ولاهنت على القصة ,,,,, والرجال الطيب يموت وذكره مايموت

ونعم بسبيع أهل الغلباااااااااا

[عامر بن صعصعه]

لاهــنــت اخوي (تالي الأوليـن ) ومشكووور على إدراج الـقصـه مع الشواد والأدلـــه


وهذي السوالف اللي تنومـس الـريجيـل ..

دمـتـم ..

[الشرقي]

كذاب كل ألمصادر تقول قوم ماقالت مطير يالكذوب والدليل شاعر سبيع اللي أنت ذكرته والشاعر الشمري يقولون قوم ماقالو مطير لكن هالحلم طلعه لك كديميس اللي وجد هالقوم المبهمه وقال مطير خلاك تطير بالعجعه يامسكين وكديميس إنشد عنه الشيخ ماجد بن عبد الرحمن بن ربيعان وبعض من شعار الروقه ويعلمونك , إنت ضعيف ومسكين وحجتك مدموغه ولذلك ما يمديك تحرف شي وضحه التاريخ , ياخايب الاولين إمطير ماتزبن قبور موتاكم , إمطير إطقك علي خشمك كما حصلك بالقاعيه والدجاني , ومطير ماتذبح أسراها , كما فعلت أنت مع ركب الدواسر , عقب الامان والعهد تذبحونهم خمسه وعشرين رجل عزل بدون سلاح عقب مادخلو بوجيهكم , وبك ماعدت هاذي إلا عليكم والله لا في سلم العرب ولا سلم العجم ,

[عامر بن صعصعه]

الله وكبر عليكم يا مخليت الرديــف نهار عـرجــا ههههههههه


مطير ما تذبح اسراهـا ،،، لاكنّـهـا تـركـت قبيلـة ( حرب )) وجحدتهم وزبنت

بالله هالسواه تسويها العرب

ومناخ عرجا كان عنـه متغاضيـن
حنـا لتـاريـخ القبـايـل قـرانـا
قبيلتـيـن لحربـنـا مستـعـديـن
وحنا ليـا زلـزل رعدهـم رسانـا
وطبان وصنيتان(2) شفقوا شرهيـن
وحنـا قبـل يبـدون فينـا بـدانـا
وبعد منـاخٍ دام خمسـة وعشريـن
احدٍ سرى بالليـل واحـدٍ احترانـا
واللي قعد سوى سوات ام ظرفيـن
ويقـول لـو إنـا درانـا سـرانـا
يقـول خلونـا بعرجـا وحيـديـن
ياليـت هاديهـم كـذلـك هـدانـا

[تالي الأولين]

align=center][

]عزيزي الشرقي

لا تحاول تدس السم في العسل وتثير الفتنة في منتدى عتيبه الهيلا...


فهذه حيلة قذرة منك تحاول الايقاع بين برقا وروق عيال عتاب.. فهم اسمى من ان يتفرقوا او حتى يلتفتو لترهاتكم وحيلكم التي تحيكونها ليل نهار.

عتيبه الهيلا كلهم واحد [/align][/size]

برقا وروق الهم مواقـف فريـده =وفيهم على جمع الحريب اندفاعـه
مثل العضيد اللي يسانـد عضيـده =والجمع دايـم عزتـه باجتماعـه

العصيمي فخر للروقي والروقي فخر للعصيمي وعتيبه كلها تحت مسى واحد يالحصني...


اما سالفة سبيع معروفه وموثقه واذا عندك شي ينفي هذه الحقائق عطنا المصادر والحقايق الي عندك بالبراهين القاطعه ونصدقك...

اما انك تجلس تنبح على كل قافلة مجد تمشي هذا خطا

والقبايل كلن من دون حقه وعانية

وانا اشهد التاريخ ما يرحم

ما يرحم الا الله..

[طنيان]

المشاركة الأصلية كتبت بواسطة الشرقي

كذاب كل ألمصادر تقول قوم ماقالت مطير يالكذوب والدليل شاعر سبيع اللي أنت ذكرته والشاعر الشمري يقولون قوم ماقالو مطير لكن هالحلم طلعه لك كديميس اللي وجد هالقوم المبهمه وقال مطير خلاك تطير بالعجعه يامسكين وكديميس إنشد عنه الشيخ ماجد بن عبد الرحمن بن ربيعان وبعض من شعار الروقه ويعلمونك , إنت ضعيف ومسكين وحجتك مدموغه ولذلك ما يمديك تحرف شي وضحه التاريخ , ياخايب الاولين إمطير ماتزبن قبور موتاكم , إمطير إطقك علي خشمك كما حصلك بالقاعيه والدجاني , ومطير ماتذبح أسراها , كما فعلت أنت مع ركب الدواسر , عقب الامان والعهد تذبحونهم خمسه وعشرين رجل عزل بدون سلاح عقب مادخلو بوجيهكم , وبك ماعدت هاذي إلا عليكم والله لا في سلم العرب ولا سلم العجم ,

بسم الله الرحمن الرحيم

الاخ المطيري بعد السلام اشتهرت سبيع بن عامر الغلباء بمتيهة البكار معسفة المهار عز الجار والغدرة سلم غيرهم قال تعالى وان عاقبتم فعاقبوا بمثل ماعوقبتم به والدواسر غدروا بامير الركب من السبعان وقتلوه غدر وغيلة كما غدروا قبله بالشيخ علي المجدع بن جفران في يوم ضبع والقاعية الله يسلم جيوش الاخوان ابن سفران القحطاني وغيره اللي جابهم الدويش باسم الدين ولا تنسى ام رضمة وشعارها القاعية ياثاير واللي راح فيها سبع مية نقوة علوى والبرهان والله يسلم ابن سعود اللي خلاها سهود ومهود والافبعين العدو عود وما يمديك تجحد المطران اللي زبنوا قبر الشيخ فهيد الصييفي رحمه الله لانه خبر مستفيض عندنا وعندكم وعند جميع القبايل

تحاشدتوا على قبر الصييفي تقول اقباط
على معبد الاقباط في وسط غرناطة

بلاكم اللي جتكم مع النابي الحشاط
تنازى بسبعان على الموت قلاطه

0000000000000000000000000
بلاكم سيوف سبيع للروس مصاطه

ولعلمك ان العبيات والعفسه والوساما والعوارض وقبيلة اخرى من مطير حاليا كلهم سبعان لذلك لاناخذهم ولا يطمعون بنا وقد كتب الشيخ عبدالله بن خميس القصيدة وذكر طيب السبيعي مع المطيري بالاسم وتغاضى عن اسمكم بزبنة القبر اكراما لكم وعند ابن خميس الخبر اليقين وقد سالته واجابني انهم المطران وهاهو الشاعر فالح بن حثلان السبيعي يعدد مفاخر ربعه سبيع بن عامر الغلباء بقلم ابن خميس حيث قال لم يزل الشعر سجلا حافلا لتعداد مفاخر العرب وماثرها يفزعون اليه في المنافرة والمكاثرة ويتخذونه سلما لسرد مواقفهم المشرفه وافعالهم الكريمه منذ ان كانوا يقصدون سوق عكاظ بنوابغهم واعلام الشعر فيهم ليقفوا هناك امام الجمع الحاشد ويرفعوا عقائرهم بمدبج القصيد وفحول القول ولم تزل هذه سنتهم وتلك هجيراتهم هذا فالح بن حثلان السبيعي يعدد ماثر قومه ومفاخرهم في هذه القصيدة


لي عدت فعول القبايل والافخار
لنا من الناموس مثنى ومربوع


فعول عسرات على كل مختار
نهوم للعليا بشيمات وطبوع


قوم لجو بفهيد عفناهم جهار
شيمة عرب ورجال والكذب مرفوع


غدو على قبره كما وصف خطار
قلنا ترى ماعند هالقبر ممنوع


بني عمر بالله لهم حظ وانصار
شر على اللي يلبس الجوخ ودروع


ورشدان منا طيب الراس واخيار
لا يابعد من هو هذور وبالوع


عبد لعمه لين حول السنه دار
ما نكله طرد المعاشير وافزوع


كم مشعل في ساقته جاله انوار
فجاي غرتهم الى جاهم هجوع


ومنا السميحي حط له قيل واخبار
جايب خويه من خطر مظلم القوع


ذبح ذلوله خايف يلحقه عار
وجلده سريح وحط ثوبه له شموع


ومنا الصبي ذابح اخوه بلجى الغار
من وجهه عقب اللوم مجدوع


وسلطان جار الله متونه من النار
شايل خويه لين سرب على الكوع


ومنا علي مدي من الهجن مشكار
في ملحة ماهي تهجي عن الجوع


ورشيد منا جايبن حسك الاوبار
محذي خويه جل ذود له ارتوع


حنا هل الملحة وحنا هل الكار
من مثلنا يدي بها رجل جربوع


وفنجال بن شاربه واحد ثار
فنجال باسبابه حصل ذبح وفجوع


وشربة من الماء ادى بها جل وابكار
مثار ربع يابعد كل منزوع


حطوا بها ملح ولامثلها صار
والماء من كل المشاويه ممنوع


بني عمر يدون بكبار وصغار
ووجيههم ما تعطي البطن منفوع


قصيرهم لو وخذ معهم وهو جار
يعطى عراف الجار ماهو بممنوع


ايضا وحرمتهم لها سلم قد صار
تعني من الاجناب سلفان ونجوع


عدد في هذه القصيده جملة من الماثر التي عرفت عن قبيلة سبيع واشتهرت بها وهي بحق مجال فخر واعتزاز ولشاعرهم ابن حثلان ان يرفع راسه بهذه الفعال الجميله والمواقف المشرفه ذكر فيما ذكر انهم اجاروا الركب المنهزم الذي التجاء الى قبر الشيخ فهيد الصييفي وكان فارسا مغوارا وذا مكارم اخلاق فهو لاياخذ السقاة والرعاة ولا حملة الغذاء والكساء ويقول هذا فيه انقاذ للناس ويجب ان يتحاماه كل من لقيه لئلا تتعطل الدروب وتنقطع الحسنى بين الناس وذكر عن رجل اخر منهم يدعى السميحي سافر مع صاحب له من قبيلة مطير ففرغ ماؤهما وادركهما العطش فلجاءا الى دحل من دحول الصمان يختزن الماء وهو تجويف عميق يخترق قشرة الارض ويوغل في الانحدار متعرجا الى مئات الامتار وهنالك يفضي الى طبقه صخريه صلبه لايخترقها الماء فتكون محلا لتجمع المياه بصفة دائمة في الاغلب وعندما تشح الامطار ولا يوجد الماء الا في قعر هذه الدحول فتكون متاهات لما فيها من مغارات متعدده وتجاويف وسراديب يظل داخلها يلتمس الماء وكثيرا ما يهلك لانه يسير في ظلمه ولا يهتدي الى طريقه الذي سلكه اولا وهنا بعد ان ورد السبيعي والمطيري على هذا الدحل خيره السبيعي بين ان يبقى على فوهة الدحل لحفظ الركاب والمتاع او ان يلج لياتي بالماء فاختار ان يلج لياتي بالماء فانحدر وتاه وظل يومين وصاحبه السبيعي على احر من الجمر حرصا عليه مع مايقاسي من شدة الظماء وعندها التجى الى حيله ربما تكون منقذة للجميع فذبح راحلته وسير جلدها سيرا واحدا واخذ من شحمها فاذابه وقد قميصه فغمسه في الودك ليكون بمثابة الشمع ولما جمد اوقد في طرفه النار وانحدر بهذا السير الطويل وهذا الودك المشتعل وظل يتقفر مغاوره وسراديبه فترة طويله حتى سمع نامة بعيده جدا في عمق الدحل ادرك انها نامة صاحبه ولم يزل يتجه شطرها حتى وجده فاخرجه وركبا راحلة المطيري بنفسيهما وهكذا كل ما عدده ابن حثلان في قصيدته من هذا النوع مما يعتبر سجلا خالدا لهذه القبيلة وذكر حسن لها وانما المرء حديث بعده فكن حديثا حسنا لمن وعى الشيخ عبدالله بن خميس مجالس السمر اما اسماء الاشخاص المذكورين في القصيدة
1 فهيد : فهيد الصيفي
2 رشدان : رشدان العدولة من النبطة
3 السحيمي : من العرينات
4 سلطان : سلطان بن حباب من ال علي
5 علي : علي بن مروان من الصملة
6 رشيد هو : رشيد بن فرحان من القراوين العزة وهذا جزء من تاريخ سبيع بن عامر الغلباء والذي لايجوز لك ولا لغيرك التحريف فيه والتعدي عليه من دون مستند الا الهوى الذي يعمي ويصم صاحبه عن الحق فاتق الله في نفسك اولا وفي اخوانك من القبائل العزيزة ثانيا ومطير عندها من المفاخر مايكفيها وليست بحاجة مزورة التاريخ كي يرفعوها ومطير قبيلة عزيزة عريقة من مدحها ما سرها ومن قدحها ما ضرها حمران النواظر تعطي الحق ولا تعيل وانت سالم وغانم والسلام

آخر تعديل طنيان يوم 07-Aug-2007 في 04:53 PM.

[عامر بن صعصعه]

الجاهـل الـشرقـي الـدواسـر هـم اللي غـدر واللي يغدر جـزاه كـذا واكثـر ..

بس دامـك بـديـت بالغلط بذكّرك بعض من تـاريخـكـم اللي انت جاهله ..

*مطير تركو نيرانهم مشتعله وكلابهم مربوطه وسرو مع الليل وتركـو "الحروب" ولم يبلغوهم لأن خبرتهم أبلغتهم بالهرب والغدر بمن جاء يستفزعهم لأنهم ليسز كفواً بأن يستفزع فيهم احـد

* مطير تختلف عن بقية القبائل صح لأنهم يأخذون بثأرهم من الموتى بقبورهم

* مطير تتلوا على القبور ( قبر الصييفي السبيعي ) ويدخلون عليه ويفكهم من ربعه وهو ميت

*قبيلة مطير التي تدّعي بالمعجزات -والمعجزات عند الله- لم يستطيعوا مواجهة قبيلة العوازم .


هذا فقط شيء بسيط من تاريخ مطير التي تختلف عن بقية القبائل

هههههههههه ههههههههههه

[الرأي الآخر]

تالي الأولين ،، لاهنت على إيراد هذه القصة والقصائد المؤيدة لها ونعم وألف نعم بسبيع الغلباء ماحد ينكر أويجحد طيب هالقبيلة إلا رجال مافيه خير ... وكل قبيلة فيها حقها من رجالها ...

أما قصة الصييفي وقبره ومزبان مطير لقبره فهذي ماحد يجحدها واقعة في زمانها مثل فلق الصبح .. بس آخر الزمان تشوف فيه العجايب الله لايبلانا !!... والشي ؟إذا كان ماهو موثوق وصحيح مايتطرقونه الشعار في أشعارهم عند المخاصم .. لأنه بلاشك سيكون مأخذ عليهم .. وبخاصة إذا كان يسجل لأمجاد قبيلة أخرى محايدة ...

ثم كذلك اللي غير موثق ماتطرقه الكتب التاريخية والوثائق ولايعلقون عليه . هذا إن كان غير صحيح أما إن وجد مافي هذه الوقعه أنه صحيح فستجد وبلاشك التعليق عليه والكتابة فيه ولو تقرأ في الكتب اللي تهتم بالتاريخ وبأشعار العرب فستجدها تطرقت لمثل هذه الوقائع وحكت فيها ..

وبالمناسبة الله يحفظ الجميع من (سبيعيكم لامطاريكم) .. أنتم عيال قبايل وأبناء حموله وكلن فيه حقه سواء من طيب أو غيره ويحتم عليه قانون ومنهج قبيلته اللي ينتمي لها مبدأ الصدق ـ وإن انعدم عند أغلبية الناس ـ فالصدق في مثل هالأمور وهالأمجاد هو ثمرة هذه الأفعال ومؤكدها وبالمقابل قبولها عند الناس بكل أريحية ..

أما ياخوان الكذب ـ أعاذنا الله منه ـ والجحد والنكران فهذا كلن سيترفع عنه لأنه وسيلة العاجز من الناس ... وسأترفع عن الحديث حوله...

ويا الشرقي الله يهديك كلامك هذا وينه رايح إذا صرت تكذب الرياجيل جب برهانك على شان ونا خوك إنقولك صدقت ولا نعطيك الثانيه بعد...
إذا صار عندك شي بدليل وبرهان وبحجة قاطعة ونا خوك فخاصم بها الرجال (وهذا لايكون على سبيل النقيض منك لما قاله..) بل اجعله على سبيل المقابل ... لأن ماذكره السبيعي ماحد يجحده ولاحد ينكره من زمان بعيد لاتحسب الأمور وليدة الانترنت والفضائيات !!

وكل شي مخبور (الزين والسين) الله يبعدنا ويبعدك عن الشين وذكره..
((لاتحسبني سبيعي )) والله والنعم في السبيعي ونعم في المطيري ..
بس الحق يقال علاك ولاعليه .. هذا أول وثاني شي (عيب أنك تحوس الأمور بكل يسر وسهوله معنا وتحط (فيها ومافيها) فالموضوع واضح وبين ولايحتاج (لف ودوران) وتحويصه.. عندك شي قابل به الرجل على سبيل (المقابلة) يعني شي يقابل شي .. واجعل مبدأ المصداقية .. مبدأك
ماعندك شي غير الطرق الملتويه ... هذي كلن يترفع عنها .. حتى أنت شخصياً لاترضاها ....

تقبلوا تحية أخوكم / أبوحمدان المقاطي العتيبي