الرئيسية التسجيل التحكم


اختيار تصميم الجوال

العودة   الهيـــــــــــــلا *** منتدى قبيلة عتيبة > المنتديات الأدبية > قصائد الأعضاء > منتدى دواووين شعراء المنتدى

« آخـــر الـــمـــشـــاركــــات »
         :: كل عضو او شاعر يسجل بيتين غزل الفهاا من قصائده .. بشرط ان تكون غزليه فقط .. (آخر رد :الريشاوي)       :: ودي ولا ودي وابيهم ولا ابيه (آخر رد :الريشاوي)       :: واكتبي هذا أنا أنا ليلى العامرية (آخر رد :الريشاوي)       :: البيت لاعْجَبني اجاريه باحساس (آخر رد :الريشاوي)       :: أنـا لا تلوموني ولو ملـت كل الميل (آخر رد :الريشاوي)       :: اوافق .. واقول النفس صعبه مطالبها (آخر رد :الريشاوي)       :: الحب اقفى في ديانا ودودي (آخر رد :الريشاوي)       :: امير قبيلة المحاقنة قبل الدولة السعودية (آخر رد :متعب الوحيدب)       :: امير قبيلة المحاقنة قبل الدولة السعودية (آخر رد :متعب الوحيدب)       :: الشيخ عبدالله ابن جزعاء العازمي جمع غير الفروسيه الحكمه والفكر السياسي وبعد النظر (آخر رد :متعب الوحيدب)      

إضافة رد
أدوات الموضوع انواع عرض الموضوع
غير مقروء 10-May-2012, 09:17 PM رقم المشاركة : 1
معلومات العضو
أبو صقر

مشرف انساب وديار قبيلة عتيبه


الصورة الرمزية أبو صقر

إحصائية العضو





التوقيت


أبو صقر غير متواجد حالياً

افتراضي من ديوان الشاعر / نــــــجــــــم الســــــمــــــريـــــــن

بسم الله الرحمن الرحيم

اللهم صل على محمد وعلى آله وصحبه أجمعين.
يسعدني ان اقدم لكم ابن العم الشاعر نجم بن عبدالله بن حمدان السمرين من الراشد من الاساعده من الروقه من عتيبه .
وهو حفيد حمدان السمرين ذيب المراقيب احد اشهر الفرسان الذين سطروا تاريخ منطقة الجوف .

صورة ذيب المراقيب حمدان السمرين



اضغط على الصورة لرؤيتها بالحجم الطبيعي


وهذا هو شاعرنا / أبو اسامه نجم السمرين (ذيب المراقيب)


اضغط على الصورة لرؤيتها بالحجم الطبيعي


مشاركة ملتقى الاساعده بالجوف
هي قصيده ترحيبيه بالضيوف الكرام الذين حضروا ملتقى الاساعده بمنطقة الجوف:



ياهلا والفين مرحب كـل طـرق ومستمـده=من خيال ٍ ماوقف حـد الثريـا يـوم اديـره
ياهلا والفيـن مرحـب والقوافـي مستعـده=حولت لي يوم حـول بالفـرح يمـي بشيـره
ياهلا والفين مرحـب يابشيـر الحفـل وده=غرَّد المعنى وغرَّد في سمـاي اليـوم طيـره
ياهلا والفين مرحب باسم ربعي جيت أمـده=نفحها ريح البختري والخزامي مـع عبيـره
ياهلا والفين مرحب من بخـور العـود أرده=للحضور بْدون لاتفرق كبير ٍ عـن صغيـره
ياهلا والفين مرحـب لـو نظمناهـا مـوده=والله انـك ياهجوسـي وافيـه لكـن فقيـره
في حضور اللابه اللي لو نعـد اللـي نعـده=ماوفينا حقهم في ماضـي الوقـت وهجيـره
مكرمين الضيف مروين الحدب فوق الاشـده=يوم كل ٍ من هجيرالوقت يشعب فـي بعيـره
يومهـا مابـيـن رد العـلـم والا لاتــرده=من غفت عينه فلا يدري بْ باكر وش مصيره
كبـد يسقونـه زلال وكبـد لـه كـفٍ تقـده=كم هنوفٍ من ورا صوت الرمك تنعى عشيره
كل عايل دونهـم كانـه طغـى يلقـى مـرده=من سلم من نارهم لاماسلـم مـن زمهريـره
يستحقون الثنا حـق ٍ علـي لاجيـت اعـده=وش حداهم غير وقتٍ مارحمهم مـن سعيـره
يرحم الله ماخـذت ذيـك السنيـن المستبـده=عودت من رحمة الله كل علـم ٍ فـي جفيـره
مانفاخر والفخـر كانـه بـدا الـلازم يسـده=حاضرٍ يسبق محط اقدامنـا فـي كـل ديـره
حاضرٍ نفخـر بمثلـه ماجهلنـا ويـن حـده=هو ورا شبه الجزيره أو على شبه الجزيـره
في محطـات العلـوم وفـي مناراتـه ومـده=واقع ٍ ماجيت اغني به وانا عينـي ضريـره
ماخذينه في مـداره عقـب ماهـي مجرهـده=مارضينـا بالقليـل ولااكتفينـا مـن كثيـره
ماعرفنا مستحيل وكـل عـزم ولـه نشـده=نشرب الصافي من عقول الرجال المستنيـره
لين ماصرنا بعين الشاربـه فيضـه وسـده=مثـل ماحنـا بعيـن المقبلـه نبعـه وبيـره
من حسـب للمستحيلـه حالـفٍ مابـل يـده=ومن يخايل للطويله يخطـف الغيـم باثيـره
ان طلبنا مانبـي غيـر الثريـا هـي وخـده=وان عشقنا مانِعَشْق من السحاب الا هديـره
يانجي جيَّت هذاك اللي ينومـس فـي مهـده=اوعساها هالحياه بْ بـارد اليمنـى قصيـره
كف ماهي حزة الماقف تجـي وتكـون قـده=لاحرام ان الحدب اولى بها مـن دون غيـره





من باب الاحاطه




ياحمد ياحي هالهاجس تفلَّت من رباطه=كيف أرده والقصايد وسط صدري مستشيطه
كيف ارده يوم بيَّن في ثـرا القلـب إختلاطه=يوم رعاد البشاير فـل فـي عينـي شريطـه
لوبغيت اخفي طواريهـا فلاهي بالبساطه=حولت وسط السويدا تنهش الـشعر وتسيطـه
ماحبست الذيب في صدري قصور ولاعباطه=غير أبي اسمع لصوته لابدا اللازم عطيطـه
كنه اللي يوم اشيل الصوت من عالي مناطه=قنب سرحان الخلا يوم الحصيني له نغيطـه
ليه لا ودام انا أخو ال ثلاثه واحتياطه=طير ابوك ومن عِقِب ذيب المراقيب وسليطه
كل كف وله بْ بيدا الشعر جره وارتباطه=شاعر ٍ ليمن حضر ماحضَّر الجآن وْ وسيطـه
شاعر ٍ والعلم واضح كل حرف وله نقاطه=لاانفرى صدر القصايد حوَّلـت كفـي تخيطـه
تقدح المعنى عبير ونـار مايوجـس شياطه=غير من شاف الصدور الصافيه مثل الحطيطـه
مامدحنا بـه كبير ولا وقفنـا فـي بلاطـه=يوم رزقي كافله ربي علـى وجـه البسيطـه
كل راسٍ يرتوي حـد الثمالـه من قراطه=نغرف اسمان المعاني من نهر فكـر ومحيطـه
ماتعودنـا نفاخـر بالشعـر لكـن بْسـاطه=ساحبينه من تحت من قال له نصف الخريطـه
الشعر كانه طلبني مع بني عمي وساطه=في وسط صدري ياعله ياعسى يبطي ربيطـه
لن مفهوم العرب !! هذا ومن باب الاحاطه=غلطة الشاطر بعشره لا ولا تحسـب بسيطـه
لاعهد ماهـي بعشـره لا ولا تبـرا سياطـه=لو تمر الليله اللي وقفتي فيها غبيطـه




الذل الهليم



ليه تشكي غن ياسالـم سـلام!!=وانت صاحب فكر وادراك وفهيم!!
العرب لوميـزوا روس النعـام!!=إختلاف الراي من وقت ٍ قديـم!!
لو نجاهد بالشعـر عام ٍ بعـام=وسط ساحـات ٍ تـورِّدك النعيـم
اختلـف فيـه المـأذن والامـام=بين سين وجيم سين وسين جيـم
طبعهم من خلق آدام بانقسـام=وش ورى يوم انكروا رب رحيـم
والعـدو لامارجينـا لـه وئــام=واصغر احلام العدو حول الحطيـم
يمِّمَـو نيَّاتهـم قـبـل الفـطـام=مثل من ساقـه علـى أم الكليـم
الهَمَامْ الله علـى وقـت الهَمَـامْ=راح مع خالد وابن غنم الزعيـم
عقب بصرى غرب درعـا بالتمـام=بعد ذل الفرس من سيف العديـم
يوم جيش الروم روَّح به عدام=الشجاع اللي بقـا منهـم سقيـم
قبل ماهي عـزة المسلـم تسـام=بين روس الكفر وابليس الرجيـم
اربع حروف ولها وقـع الحسـام=ماحسبها حامـل الفكـر العقيـم
(ياء..ميم..وواو..تاء) ولايضـام=من سرى في داخل عروقه حميم
فـي زمـان ٍ راح كلَّـه بالكـلام=شاب منه راس الابلـه والفطيـم
إدفنـوا طيـر المحبـه والسـلام=دام موته صار بيديـن الخصيـم
ياحياة العـز لـو وسـط الخيـام=أو نموت أشرف من الذل الهليـم





دم الجلاوي



منهو رقص للطار يامحـرِّم الطـار=ضلع ٍ يصيح وضلع طاح امتهاوي
اهديتني نار الشـواوي وقيتـار=ورديت عنك داخلي كـل عـاوي
لين اشتعل منك على ثلجهـا نـار=تبغى تداوي وانـت ودِّك مـداوي
اسقيتني دم ابـرق الخلق قنطـار=وسط الضلوع وفوق راس الندواي
حتى التوى عم الشياطين بالـزار=فوق الذبايح واللجـج والغنـاوي
لاعادها ليله بها الشيـخ سمسـار=الطير روَّح دون فرخـه سمـاوي
منهو يحب النار يرقص على النـار=دم الدخيل بْ ثار دم الجـلاوي
باكر يدور الوقت واقول لك دار=يوم التويبع جاك وامرح خلاوي
ماقول انا لك ثار او رده بثار=ولاقول انا كم لي وانا لي رجاوي
احذف سواليف الحجاوي لعمار=اسمع ولاتكثر عليك الفتاوي
الطير كانه بار في يد صقار=يطويه في عين الصقاقير طاوي
لو كان شبره بينهم عشرة اشبار=راحت ورا الهقوه كثير الهقاوي
لايلتوى ظنك ولاتضرب اقطار=مافاد في طير الهويدي نخاوي
سمَّار قم والعب على مود سمَّار=عرق ٍ نمت روحه على قلب ذاوي
هذا هو اللي صار يوم الوحش طار=مافاد به قصر العلف والدعاوي
يموت في كبد السماء موتت احرار=يصبح على كفه ويمسي رهاوي
أخير له من قولت الجار للجار=قم عش طيرك وش بلا الطير ثاوي




وهذه المساجله الرائعه يظهر لنا فيها صَوت الشاعرة (شمالية) :



يامن عرف حبرالقلم بالجرَّه=ياليت يفتي وش لقى بسطوره
هو من مداد بنيةٍ مغترَّه=ماهمها تبغى تجي بالصوره
تفشل وإذا طاحت تعيد الكرَّه=يمكن تُخلد كنها أسطوره
والامدادٍ شامخٍ..بالمرَّه=تجيبه اللي دارها معموره
ترمي تصيب وصيدها تجترَّه=شلفا القصيد بكفها مأموره
والامداد الحزن لاجاء مرَّه=ينبش جروحٍ بالحشاء مثبوره
تجيبه اللي لوصلاها حرَّه=تصبر على ظلم الزمان وجوره
والامداد الامس واللي برَّه=لو الزمن طفى عليها نوره
الماضي اللي صبته في جرَّه=ترمي حجارة حرفها في زوره
والامدادٍ حطته في صره=من خوف تقلبها عليهم ثوره
وآوجد حالي وجد منهو ذرَّه=من فوق رجمٍ (وقفت به نوره)
يامن عرف حبرالقلم بالجرَّه=ياليت يفتي وش لقى بسطوره



صَـدَى /نجم السمرين





لِله درك يالسحاب ودرَّه=والاالشهاده من زمن منحوره
ماسر ضر / وماظهر وش سرَّه=نور ٍتهادى واعتلى ديجوره
بآفك له صدر الهدف وازتـرَّه=يوم المعاني الخافيهْ مسبـوره
حرايِرٍ مـن وقتهـا مِضمـرَّه=أَرداهن اللَّي سيـدة طابـوره
والا الهزال / النَّاشفه / المقفـرَّه=ماني بمن ناسه ولاجمهـوره
ماني بمن يلهث يبا المجترَّه=ولاني ببياع الشِّعِر وشعوره !!!
لو رفِّ كفي له طرب لو مرَّه!!=ياجعلها مـن متنهـا مبتـوره
يوم الوحش في طلعته ماضرَّه=صفق الهوا يالشَّاعره بْ حنجوره
من مدِّتَه بعض الجِمَا مفترَّه=بين المعاني الغافيه بسطوره
(الشِّعر وافي والحقايق مرَّه=وكل ٍ يدرِّجها على مقدوره)
ولولاالتِّباين بالعُمَـل يالحـرَّه!!=يمدي تساوي فلسها مع يوره
لِله درك يالسحاب ودرَّه=والاالشَّهاده من زمن منحوره



وشوشه



حي البيوت وحـي منهـو طرشـه=جن غايمات وهاك جنِّك حايمـات
وش لك بدولاب المحانـي تنبشـه=كانك تبي المكنون يامال الغنـاة ت
وشوش لي الله لايضرك وشوشـه=من شان ابين لك علـوم ٍ خافيـات
عن طب روحي عن حياتي ونعشه=عمر وقضيته في متـون العاديات
تسمع لهن مع جرهد البيد اقرشـه=نار تقادح مـن حوافرهـن فتـات
اغلاهن اللي يوم انا اجيها اغبشه=طلقا يمين ولـه ثـلاث محجـلات
كن الذهب في مفرعه ربي انقشـه=أجمل بنات الريح والوقفـه ثبـات
ولو خيروني قيل لك يـوم وعشـه=يعني امنيه ان كـان باقـي امنيـات
قلت اخبروا خالد يزهب مفرشـه=بين الضلوع اثقل من جبال السراة ت
من ضيقةٍ وسط السويدا تنهشه=امن الصباح الين ماعيني تبات
نبغى نسج الرجل يمكن ننعشه=الخاطر اللي بين ضيقات وشتات
عساي اهيجن للسنافي وادوشه=في وسط سيحان الحماد المعشبات




قال تعالى ( وقضى ربك ألا تعبدوا إلا إياه وبالوالدين إحسانا إما يبلغن عندك الكبر أحدهم
أو كلاهما فلا تقل لهما أف ولا تنهرهما وقل لهما قولا كريما واخفض لهما جناح الذل من
الرحمة وقل رب ارحمهما كما ربياني صغيرا )..
مشاركة كانت عن عقوق الوالدين عسى الله ان ينفع بها ، فاحببت أن تكون بلسان الأب .
نسأل الله أن يجعلنا من البارين بوالديهم وان يصلح الذرية لنا جميعَا


وآحر قلبـي عليـك وْمِنْـك وآحـرَّه=والعين نوم العرب ماصاحب أهدابـه
أسرح مع الوقت من خيرعلى شـرَّه=وارفع كفوف الدِعَاء من وسط محرابه
يالله ياللـي تعافـي العبـد واتضـرَّه=من عق في والـده لاترحـم ترابـه
ماكني اللـي لاهـي مـره ولا مـره=يوم انت توِّك ولاتدري وش اشقابـه
أمسي على بَحْرَها واصبح على بـرَّه=أدوِّر الرزق مـع ذيبـه ومـع دابـه
أتعب ورا المال واشقـى فيـه وآذرَّه=من فوق متنك ولاحسبـت لحسابـه
أبيك تخلـف تعـب وّالِـدْكْ وتبـرَّه=إن طاب وجه الزمان أو كشر بنابـه
ولا شفت غير الجفا والكبـد مجمـره=فتحت قبـري قبـل لاينفتـح بابـه
لاعاد تاتـي علـى قبـري ولاتمـره=تعال شف عقرتك بالصدر مضرابـه
لكنْ وانا ابوك أقضب علمي وصـرَّه=وصيتي لـك قبـل لاابـوك يسرابـه
من بر فـي والديـه الخالـق يبـرَّه=يرزقه من يعقبه وثيابـه ثيابـه
واللي عصى والده يِرزَقْ على الجرَّه=دينٍ تبـي تاخـذه مايقصـر نصابـه
لابـد ماتفهـم الـمـوال واتـجـرَّه=شيء ذكره الولي في محكم كتابه


ليا منا وقفنا




هلا باللي له الجزله توقف لاجل عينه لين=تلاعبني على المعنى تحييـه وتهلـي بـه
هلا باللي ليا غنى فلا غنوا لـه الساليـن=سمين العلم يخطونـه ولايخطـي جلاليبـه
قضينا دين ولاباقي بعاتق هالليالـي ديـن=عطتنا منها مالاعطت منهـو يمـاري بـه
ليامنا وقفنا ناقـف بوجـه الليالـي بيـن=نحد الوقت ماطاحت بنا سطوة مضاريبه
ولا نبغي من الدنيا ولانطلب سـوا ثنتيـن=حقوق الخلق والخالق فلا نقصر مواجيبه
فلا للمقبلـه معنـى اذا مانعـزل الداريـن=ولاهالعمر له قيمـه اذا كثـرت عذاريبـه
مطاليع ٍ تغيض الشر لكنـه تسـر العيـن=تبان بوسط حجان الزمن من قبل نحكيبه
على مثله شهرنـا كفنـا مادامنـا حييـن=وعلى مثله صقرنا ورعنا من قبل نغزي به
نبيه ان حانت الهده بعينه مايشوفه شيـن=يبان الفعل ماخيـب كريـم الجـد تدريبـه
عسى الله يبقي العايش كريم ويرحم الفانين=عسى الجنه لهم مثوى ويلحقنا مشاريبـه


صاع بصاع



ياصباح الشعر وارباب الجنـون=حركوا صبح المشاعر لين فاع
حلِّقوا بي فوق من فوق الطعـون=وحولوا بي بين ضلعين(ن) بقاع
واحدٍ لا من لفى ماهـوب دون=يقدح الرَّعاد فـي راس الرفـاع
ماعطاني غير سكـرات المنـون=ولاخذاني غيـر لافراحـه متـاع
بين كان وبيـن لايمكـن يكـون=في شموخ ٍ جاب صاع ٍ ند صاع
ايه الا (يَاَليتَ قَوْمِـي يَعْلَمُـونْ)=مابـرا حالـي فـراق وْلا وداع
غير دمعه ليتها طاحـت بهـون=من على متني وهي تهمس ضياع
لين قالت بين عبرات وشجون=ليه قلبك ليه قلي ليه باع ؟
لاافترقنا كيف قل همـي يهـون!!=وانت لي عن قسوة ايامي قنـاع!!
بلِّلت متني بدمعات العيون=ليت ماطاحن من السود الوساع
قلبي اللي كل ماحاول يخون=ردني له دمعه الطاهر وضاع
يرسم اطيافه على جرد الغصون=وسط عذبات المعاني بالتياع
ياصباح الشعر وارباب الجنـون=حركوا صبح المشاعر لين ضـاع



واطلب من شاعرنا ان يستمر عطائه معنا في المنتدى من خلال هذا الديوان وغيره



تحيتي .........















رد مع اقتباس
غير مقروء 10-May-2012, 11:47 PM رقم المشاركة : 2
معلومات العضو
نجم السمرين
شــــــاعــــر

الصورة الرمزية نجم السمرين

إحصائية العضو





التوقيت


نجم السمرين غير متواجد حالياً

افتراضي

حيَّاك ياابو صقر ترحيبة ٍ من وراه=نثني حروف القصايد لاجل عينك عبيد
الله يديم الخوي والله يحيي نباه=يمنى بوجه الليالي مثل يمناك حيد


جعلي مااعدمك ياابو صقر

وافي وبيض الله وجهك

يعلم الله كم فرحت بهذا المتصفح ،
ليس لشيء سوى انه من تقديمك يالذيب

وابشر طال عمرك ماطلبت عزيز..

احترامي ياقدير..















رد مع اقتباس
غير مقروء 10-May-2012, 11:50 PM رقم المشاركة : 3
معلومات العضو
نجم السمرين
شــــــاعــــر

الصورة الرمزية نجم السمرين

إحصائية العضو





التوقيت


نجم السمرين غير متواجد حالياً

افتراضي

هواجيس المساء



حلَّت هواجيس المسا حلَّت ولا عيَّنـت خيـر=ياللي تشوف ان الهجوس اكبر سبب تصديرتك
عزالله انك ماخذيت امن العتب واللـوم غيـر=جهم النوايا والمطايـا حـادره بْ تحديرتـك
والله لو ترسم على بطن الجدي فوق الاثيـر=اقسى ملامح حيرتك واعظم مشاعـر غيرتـك
ماحاشت اليمنى سوى قنطار نـار وزمهريـر=والديره اللي فاح منها العـود ماهـي ديرتـك
خلك على فالك وهوجـاس الامانـي يالغريـر=هو ماكفاك العام ركضك لين صارت سيرتـك
تحت الثرى تشكي من الفرقا بلا فرقـا تزيـر=تطرد ورى حلمك وتشكي يالرويبض حيرتـك
لاتيقض طْعون الزمان الهاجعه بالقلـب ميـر=أسمع وميِّز لايثـور ابليـس مـن تزميرتـك
البارحه راحت مراح العـام يالرجـم القصيـر=خل الطوال لْصاحبـه ياللـي تنـوح آميرتـك
حلم واماني والمعانـي لـو توقِّـع أو تطيـر=ماهزت عْروش الغرام ولاسعت فـي جيرتـك
اصدق معاني الود ياطالـب لتحديـد المصيـر=وانت الدروب الهافيه دون الظمـأ تصبيرتـك
درب المراجل يامغني بالشِّيم !!كـف وضميـر=عكس الهروج الحايكه دمعـك ورا تأشيرتـك
والا الخزامى لو عشق عن منبته نفـاخ كيـر=كان الزهر غنَّت عصافيره فرح مـع طيرتـك
لاهنت عز النفس تعرف قدرها والروح بيـر=(حفظًا لماء الوجه ) كانك جاهل ٍ في خيرتـك















رد مع اقتباس
غير مقروء 10-May-2012, 11:52 PM رقم المشاركة : 4
معلومات العضو
نجم السمرين
شــــــاعــــر

الصورة الرمزية نجم السمرين

إحصائية العضو





التوقيت


نجم السمرين غير متواجد حالياً

افتراضي

درب المسوخ



هالشموخ اللـي تسمينـه شمـوخ=عبرة ٍ في وسـط جوفـك حايمـه
والرضوخ اللي تظنينـه رضـوخ=غيمة احساس ولفت لـك غايمـه
والرسوخ ان كان تبغين الرسـوخ=حسرة الخافـق ونفـس ٍ شايمـه
يوم كنتي بـس يابنـت الشيـوخ=زهـرة ٍ فـي قلـب خلِّـك نايمـه
مهـدوا لـك أول دروب المسـوخ=وطيـروا باسـم النقـا حمايـمـه
وألبسوك مْن الغلا بالكـذب جـوخ=والنوايـا فـي رداهـا عايـمـه
لين حوَّل ساكـن الجـوزا بكـوخ=بيـن بيَّـاع الضميـر وسايـمـه
خطوة ٍ تاقف وعشره بـه تنـوخ=في وحل سـود الوجيـه الهايمـه
قلت اباانسى مامضى لكـن تفـوخ=دمعـة ٍ بيـن المحانـي دايـمـه
أدمت فتوق المواجـع والشـروخ=يوم روحك عـن وفاهـا صايمـه
قلب حبك والوفـا وسطه يسـوخ=لـو وفالـك والله انـي لايـمـه
من شرب من عزة النفس البزوخ!!=ماقرب حـول العـدود الضايمـه!!















رد مع اقتباس
غير مقروء 10-May-2012, 11:53 PM رقم المشاركة : 5
معلومات العضو
نجم السمرين
شــــــاعــــر

الصورة الرمزية نجم السمرين

إحصائية العضو





التوقيت


نجم السمرين غير متواجد حالياً

افتراضي

يكفيك شر الفاجعه



لاتطري الفرقا وانا دفـاق دمـي بالعـروق=لاتلمس الجرح النِّدِي والشُّوق في مضاجعـه
ياليت...يالِيت الهوى في خاطري مغنى وذوق=ماكان ترديد الفراق أَسـدل علـى مواجعـه
كيف اللقا دام الثَّرَى ياصاحبِي تحته وفـوق=لا لاح طيف موادعي ناح الخفـوق يساجعـه
أَصارع أمواج الحنِين بداخلِي وَآهيـم شـوق=وآخيل صفعات السِّنِين اللي مضت وآراجعـه
متعاظمـات أَحزاننـا وآلامنـا والله تفـوق=لاالشُّوق حي / وحي شوق آمانِتِك لاتاجعـه
ْلو وقفت خطواتنـا ماظنتِـي يرتـاح مـوق=من حَيَّر عيون السَّهر وادمى ثرى مهاجعـه؟
كم حشرجت عبراتنا ثم طوقَتْنِي طوق طـوق=لاواعنـى قلبـي بقلبـي يالهمـوم الناجعـه
ياصاحبي يكفي/عهد جف الحكي وسط الحلوق=مابين ويل وطيف ليل أَرواحنـا المتساجعـه
راحت وانا احيا طيفها واسامِرالذكرى وتوق=حتى عيوني لا ولاهي فـي غيابـه هاجعـه
راحت ولانملك مع المكتوب تبديـل الطـروق=من صاح صيَّاح الفنا (يكفيك شـر الفاجعـه)















رد مع اقتباس
غير مقروء 10-May-2012, 11:55 PM رقم المشاركة : 6
معلومات العضو
نجم السمرين
شــــــاعــــر

الصورة الرمزية نجم السمرين

إحصائية العضو





التوقيت


نجم السمرين غير متواجد حالياً

افتراضي

الشوق والطاروق



على زفرة التنهيت والشوق والطـاروق=طرقت المعاني قبـل لايطرقـه جوفـك
تلحفت عين اللِّيل بين السهر والشـوق=مَعَ نزعِة الخفاق مـن حالـت ظْروفـك
تغنيت بك بسمهْ وضحكه ودمعة مـوق=وتجرعت من كآس الوهن قبل مظروفك
أقلِّبْ سنين الفقـد ياجرحـي المفتـوق=واناظر بقايا الامس مع رعشة كْفوفـك
طلبتك تجي وترد صوت الغلا المريـوق=على صفحتي من عام لوماحصل شوفك
أوإِنك تعال وتل روحي مـن المعلـوق=وكمل مع الهجـران والصـد معروفـك
إذا البعد به راحه عسى مايجي له عوق=توكل علـى الله بـس لاتكثـر حلوفـك
توكل وخل الصدر في ضيقته محـروق=ويتم خفوق مات مـع خمسـة حْروفـك
فلا عاد به لكن وبـاب العتـب مغلـوق=ذبل منك خفاقٍ ترنَّـم علـى وصوفـك
عسى دمعةٍ سالت من الضيق يوم آسوق=تراتيل حبـك وارسـم الحلـم بطيوفـك
تعدا العيون اللي خذتني قبـل لا فـوق=واعاتب صروف الوقت والبعد وصروفك















رد مع اقتباس
غير مقروء 10-May-2012, 11:56 PM رقم المشاركة : 7
معلومات العضو
نجم السمرين
شــــــاعــــر

الصورة الرمزية نجم السمرين

إحصائية العضو





التوقيت


نجم السمرين غير متواجد حالياً

افتراضي

الرجم القصيِّر



يامضيِّر هالمعاني هات قلِّـي وش تضيِّـر=واللَّه إِنَّك لو تضيِّرها على بطن المعاصـر
ماتثير .. ولاتثور .. ولاتجير .. ولاتجيِّـر=غير هزلات الْقصايد يوم كفِّينِـك قواصـر
واضحه كل الْوضوح وحايِـره لوماتحيِّـر=بين شبري بالكفوف وبين شبرك بالخناصر
مادريت إِنَّ المعاني طايلـه والفكـر نيِّـر=ماخذ ٍ دور القوافي مثل دورك بالبواصـر
وش يجيب اللِّي توَجَّد في وليفـه ياصغيِّـر=يم بيَّاع الشعور اللي على النِّيَّـه يباصـر
ذاك لاهب الهوا غنى مع الغربـي مطيَّـر=من مشاعره الدفيَّه فوق مطوي الخواصـر
ياأميره .. يامنيره .. يامنايـر .. يانويِّـر=مايخاف مْن العقوبه من على سوره تحاصر
مثل فعلك بالخفا ساعة تحايل بـه مسيِّـر=ليت لوشابه وقوفك يالسوي يومك تناصـر
الهدير مْن الجمل والا الرغى لام الحويـر=تومي براسك وتلهث بين عجز وعند قاصر
أوزن أهداف المعاني طهِّـر النيـه وعيِّـر=واضبط أحكام المبادي قبل ضبطك للعناصر
من حمل سود النوايا حقه الرجم القصِّيـر=في عيون الناس لو قام وتغنى بالاواصـر
الشعر ماهـو بـوزن وقافيـه لا يالاميِّـر=شيء ٍ اكبر من شعورك ماتعيشه لو تعاصر















رد مع اقتباس
غير مقروء 10-May-2012, 11:59 PM رقم المشاركة : 8
معلومات العضو
نجم السمرين
شــــــاعــــر

الصورة الرمزية نجم السمرين

إحصائية العضو





التوقيت


نجم السمرين غير متواجد حالياً

افتراضي

نداف الحنين



دن ندَّاف الحنين وفـر مـن جوفـه طليـق=لاياعمر والشوق تل الـروح مـن معلوقهـا
زفوا التهاني وافرشوا له ورد والكادي طريق=وانا علي لعيونهـا تـاج القصيـد وطوقهـا
أجيه في عذب القصايد لاجل عينه واستريـق=أَجمل تعابير الغلا مـن مهجتـي وصندوقهـا
من شان لامن جيت أَقدمها / أقدمهـا رحيـق=من قدها لوتطلـب النجمـات جيـت آسوقهـا
تقول يفداك العمـر ياضـي عينـي لاتضيـق=واقول ياضي العمـر ليـت العيـون بْموقهـا
تفقد نظرها كان أشوفك بين زفرات وشهيـق=ولانذرت الـروح روح لبسمتـك وشروقهـا
تغيب وكني في غيابه ياعمـر فاقـد شقيـق=واغيب واسمع همهمات الوجد فـي منطوقهـا
اللي خذت طهر السحابه ورثة المجنى العريق=لا الشوق راحمها ولاهـو راحـم ٍ معشوقهـا
ماجيت أنا ابن ام عبد أو جيت في دورالعتيق=ولاتمثنيت العرب ثـم صحـت أنـا فاروقهـا
مسلم واصلي واعبد الرَّحمن سبحانه واريـق=عذب المعاني من مفيض الملهمـه وحقوقهـا
لكن عليك الله تعـال وقـرِّب شويَّـه وويـق=وناظر حنايا خافقي من غيبتـه وش ضوقهـا
بانت بقايا حسرتين ودمعتين ونشـف ريـق=يسري عليها خافقي ساعة سرى لي شوقهـا
تدري!!عساها هالعيون إِن ماوفت له ماتفيـق=أَو ليت جلاب السهـر يبـات داخـل موقهـا
ماتهت أَعايـن للنعايـم والثِّريـا واستفيـق=وإلا على سفو الشِّجر والشَّمس حين فْلوقهـا
نمشي على وضح النقا لوشلت هم وشال ضيق=دام الليالي لو قسـت نلعـب علـى طاروقهـا















رد مع اقتباس
غير مقروء 11-May-2012, 12:00 AM رقم المشاركة : 9
معلومات العضو
نجم السمرين
شــــــاعــــر

الصورة الرمزية نجم السمرين

إحصائية العضو





التوقيت


نجم السمرين غير متواجد حالياً

افتراضي

خطأ والدينك



الله علـى نظـرة عيونـك يعينـك=كم ذنب شاله عاتقك من محيَّـاك ؟
ترفقـي فـي صاحبـك لايديـنـك=من طاح في غبة بحرهن من احكاك
ياللي مواثيـق الغـلا فـي يدينـك=هو ماكفاك اني من العـام بحمـاك
اسقي هيامك واستقي منـك لينـك=عقب الظما ارويتي عروقي بْ ماك
الله يبيحـك عـن خطـأ والدينـك=غنوا على شوفك وانا حقي اشقاك
مدري من النرجس هلك قاطفينـك=والا نما عودك على شَجْرِةَ الـرَّاك
او هم من بطون النحـل جالبينـك=والا من الجادي او الغيـم مربـاك
حتى البنات اللـي تحلَّـن بزينـك=غصب ٍ عليهن بس في لحظة ادراك
تهامسن حسـره ونادنـك وينـك!!=ماالله عطانا ربع ماربك اعطـاك !!
تهت بغرامك قبـل شوفـي لعينـك=وشلون اجل كان القدر كاتب القـاك
بس الاكيـد انـي بكفـك رهينـك=من يوم ماقلبي على وردك اشتـاك
في ساعة ٍ فاح الزهر من حنينـك=تشكي من الفرقا وانا اقول لـولاك
ماابحرت بك وابهرت انا حاسدينك=وغنيت انا لك ياعسى الكون يفداك
ياحظ دار ٍ طـاح وسطـه جبينـك=تمسى على همسك وتصبح بلامـاك
هذي حياتـي كلهـا فـي يمينـك=الا اذا قصدك تبين اتبع اخطـاك !!
عهد علي لاقطع بروحـي وتينـك=حتى لو انك نبض قلبـي قطعنـاك















رد مع اقتباس
غير مقروء 11-May-2012, 12:01 AM رقم المشاركة : 10
معلومات العضو
نجم السمرين
شــــــاعــــر

الصورة الرمزية نجم السمرين

إحصائية العضو





التوقيت


نجم السمرين غير متواجد حالياً

افتراضي

صدر المغني



الله يبيح الشعر والعـذب تحديـد=اللي رمى صـدر المغنـي وفلَّـه
الين عـاف النـوم ذاك المقيريـد=طرق ٍ يشل الروح وطـرق ٍ يتلَّـه
غنى مع الهاجوس شوق اتلع الجيد=لاغمضت عينه طعونـه لفـن لـه
مايدري ان اربع من اربع مفاريـد=يوم الجمل يهدر لفن درهمـن لـه
لولا هجار الزمل والثانـي القيـد=في كف من ساقه عن الروض كلَّه
يمدي رعن نبت الحيا دون تفريـد=بس العقـل لاحـل منهـو يحلَّـه
ماودي اذكر ماخذا الوقت واعيـد=والحق كانـك جاهـل ٍ بـه ندلَّـه
اللي بسوق الشعر يبغى المعاويـد=نفاخ كيـر ومقعـده فـوق مَلَّـه
واللي يجاهد به يبي مِنْـه تمجيـد=مزنة خياله مـاروت غيـر ظلِّـه
واللي سرق من كفتين القواصيـد=عمر القصايد عمرهن ماعون لـه
واللي تغنى بالشعـر يومـه وْلِيـدْ=ماهو ابلا حاسـب الْ نقَّـال جلَّـه
ماحاد ياعوق المثايـل ولا يْحيـد=عن طبعه اللي قبل شوفَـكْ جِبِلَّـه
يلعب مع النسناس قبل الجويريـد=حتى الثريا من زمن عشقة(ن) له
ان غض طرفه عنْك لاجل الاجاويد=والاوله لمعزبـك حشمـة(ن) لـه















رد مع اقتباس
إضافة رد

العلامات المرجعية


يتصفح الموضوع حالياً : 1 (0 عضو و 1 ضيف)
 
أدوات الموضوع
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن »10:35 PM.


 Arabization iraq chooses life
Powered by vBulletin® Version 3.8.2
.Copyright ©2000 - 2024, Jelsoft Enterprises Ltd
اتصل بنا تسجيل خروج   تصميم: حمد المقاطي