( يُمّه )

[جمال منير]

السلام عليكم ،،


يُمّه *لو انّ المحبّه بين هالنّاسي
تقسم ، جمعت القسوم ولااسمع امشيرك


أنصاف واثلاثها واخماس واسداسي
ولاحدٍ خذاها على وجه الثرى غيرك


لو ان حبّ العذارى يحبس انفاسي
تأثيرهن يبعده حبّك وتأثيرك


لايغرّك ان القلم نزفه بقرطاسي*
والله وبالله مايسوَون اظافيرك


يا اغلى من اللؤلؤ والفضّه والألماسي
والكون كلّه مايسوى ربع تقديرك


غنّيت موّال حبّك فوق مرواسي
وغنّا بلحن السعاده والهنا طيرك


وحنيت راسي وقدرك من على راسي
وليا انحنى مانحنت رجلي على سيرك


اجيك امامي رجاي وخلفي اليأسي
وعينٍ تشيلك وعينٍ تسهر اديرك


مابين حرب المنام ولذة انعاسي
اشوف حلمي يعانق صدق تفسيرك


أليا ابتسمتي تبسّم وقتي القاسي
ويكشّر الوجه لامن شاف تكشيرك


لرضاك وقفّت تعبيري وهوجاسي
ابستمع في هواجيسك وتعبيرك


غصوني من الظمأ والقيض يبّاسي
وتحيا ويخضر ورقها من نهل بيرك


لاهب معصير وقتك هاكٍ نسناسي
لك النسانيس وانا لي معصيرك


ارفع كفوفي لربٍ يذهب البأسي
عسى يحفظك من اللوعات ويجيرك*


الخير من تحت رجلينك وينداسي
ونزّلت راسي تحتهن راجيٍ خيرك !


وسلامتكم ،،

[سهيل 1]

سالم وغانم يا جمال منير

وصح لسانك ..

وتستاهل الأم كل خير ..

أبدعت الله يعطيك العافية .

[حمود بن خيشوم العصيمي]

صح لسانك جمال

قصيده ذات هدف نبيل نبراسا لبر الوالدين

لاهنت يامنير وحضورك مشرف


تحياتي