يا لطيف الروح من فرقاك ضايق بالي - الهيـــــــــــــلا *** منتدى قبيلة عتيبة

نايف بن ملحق الثعلي · 22-Oct-2007, 12:24 AM

يا لطيف الروح من فرقاك ضايق بالي=لا تخلّ القلب يالغالي تزيد همومه
فيك حسن وفيك ذوق وكل وصفك غالي=شوفتك تجلى هموم اصحابك المهمومه
الليالي همّها يا زين غيّر حالي=والسبايب كلبوها اوصافك المعدومه
احسب انك بالجفا والصدّ ما ترضالي=لا ذكرتك جفن عيني ما اهتنا في نومه
الله اعلم في زمان الحب وش يبقالي=والله اعلم وش مصير العالم المظلومه
يمكن اتلى الوقت اضيّع غترتي وعقالي=من يشوفك يالغضي ضاعت جميع علومه
والزمن ما جا على كيفي ولا يصفالي= من تولّع بك ترى والله ما احد يلومه
اشهد انك طول وقتك فالمكان العالي=يا قمر خمسة عشر فوق السما ونجومه
لا تعذبني ترى كثر الهوى قتّالي=كل مخلوقٍ من الدنيا لقى مقسومه
انت كنك ما تفرق بين مر وحالي=مادريت ان المحبّه بيننا ملزومه
ما عشقت الاّ انت تكفى لا تعشق بدالي=المحبه موت كل دروبها مسمومه
والله اللي ياحبيبي عالمٍ باحوالي=لو بغيت ابدي عليك اسراري المكتومه
لا تفارقني تقول ان الفراق اشوالي=والمحبه لا تصير اركانها مهدومه
يوم انا اسعى لك علامك ما تبا تسعالي=لا تعذّبني وتشغل نفسي المحرومه
شلت همّ مثل ضلع طويق ما ينشالي=ما اهتني بالنوم تزعجني كثير حلومه
انت داله يالحبيّب طول عمرك سالي=والوعد مثل العهد ياللي نسيت قدومه
مار يا ليتك تجازيني بحسن اعمالي=يشهد الله يا حبيبي ما تجيك اللومه
لا تعاندني وتكفى لا تعقد حبالي=كلمتي يانور عيني واضحه مفهومه
طال صبري لي سنه واشهر وعشر ليالي=واخرتها صاحبك يمكن يطش هدومه
مارعوّد لا تخليني وحيد لحالي=كل واحد يالطيف الروح يلقى يومه
جعل دارك للسحاب و وبله الهمالي=وجعل ستر الله عليكم يالحبيب يدومه

التوقيع

ما هوب لازم توقيع00

خالد المقاطي · 22-Oct-2007, 01:13 AM

واللــــــه يانايف ( شامخه )

ابداع منقطع النظر

عزالله انهــا تستحق المرور الكثير

صح السانك والشهاده مجروحه يابن العم

وسنظل نتابع الجديد بشغف

اخوكــــ ::

مرزوق حمدان العتيبي · 22-Oct-2007, 07:44 PM

اشهد انك طول وقتـك فالمكـان العالـي
يا قمر خمسة عشر فوق السما ونجومه
لا تعذبني تـرى كثـر الهـوى قتّالـي
كل مخلوقٍ من الدنيـا لقـى مقسومـه
انت كنك ما تفـرق بيـن مـر وحالـي
مادريـت ان المحبّـه بيننـا ملـزومـه
ما عشقت الاّ انت تكفى لا تعشق بدالـي
المحبه مـوت كـل دروبهـا مسمومـه
..
لله درك ايها المبدع
صح لسانك تو ماتش

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني
حط حبه في كياني ماتغيّره السنيني = وانثني من دون عرضه بالذراع وباللساني

@Marzouq_MHD

السميــــــري · 22-Oct-2007, 08:03 PM

شلت همّ مثل ضلع طويق مـا ينشالـي
ما اهتني بالنوم تزعجني كثيـر حلومـه
انت داله يالحبيّب طول عمـرك سالـي
والوعد مثل العهد ياللي نسيـت قدومـه

صح لسانك يانايف ,,
وقصيدتك هذي نايفه .. الله يعطيك العافية ..

فيصل الدرباس · 22-Oct-2007, 09:28 PM

لا تعاندنـي وتكفـى لا تعقـد حبالـي
كلمتي يانور عيني واضحـه مفهومـه
طال صبري لي سنه واشهر وعشر ليالي
واخرتها صاحبك يمكن يطـش هدومـه
مارعـوّد لا تخلينـي وحيـد لحـالـي
كل واحد يالطيف الـروح يلقـى يومـه
جعل دارك للسحـاب و وبلـه الهمالـي
وجعل ستر الله عليكم يالحبيـب يدومـه

صح لسانك

على هالرائعه

ودمت بهاذا التميز