الله من قلبٍ به الهم يزتاد - الهيـــــــــــــلا *** منتدى قبيلة عتيبة

علي فلاح العضياني · 21-Oct-2007, 11:43 PM

السلام عليكم

بعد الغياب الطويل اضع بين ايديكم هذه القصيده ارجو ان تحوز على رضاكم

الله من قلبٍ به الهم يزتاد=همّه مع الايام من زود في زود
هموم قلبي بين صادر و ورّاد=والقلب لهموم الشقا عدّ مارود
الليل كله ما اتهنّا بمرقاد=يوم العرب فالليل هجّاع و رقود
والنفس صايمةٍ عن الشرب والزاد=مالي هوى بالزاد لو كان موجود
انا هوايه شوف مركوز الانهاد=اللي مضاله وقت غايب و مفقود
القلب دايم في نحى الزين ينقاد=سبحان من كمل حلا ناعم العود
بعض الصدف خيرٍ من الفين ميعاد=صادفتها فالسوق من غير موعود
يوم الخميس وخامس ايام الاعياد=ما انسى هذاك اليوم والرب معبود
اوصافها يا زينها بالتّعدّاد=مالي بغيره في هوى البيض مقصود
الخدّ نوره فوق نور القمر زاد=يشدي لبراقٍ سرى نوّه يقود
وحجاجها بالوصف مبري ومنقاد=وأهدابها نعّاس وعيونها سود
وفالمبسم الله جامعٍ بين الاضداد=والخشم سلّة سيف مرهف ومحدود
والطيب والريحان والورد والكاد=فوق الجديل اللي على المتن مرجود
ابيات شعري فيه تقصر عن الماد=حتى و لو ابذل معه كل مجهود
اخذت انا وايّاه جلسه ومقعاد=على النقا وبعيد عن كل منقود
جلسة شرف على قوانين الاجداد=النا مع الشيمه مواثيق وعهود
واقفى ورجواني بجيّه ومعواد=وهذي ثلاث سنين ما اظنه يعود
يا عزّتي لن طوّل الوقت ما عاد=وقلبي تلاوعه الهواجيس يا سعود
صبرت لين الصبر طوّل ولا فاد=صبرت صبرٍ ماله قياس و حدود
المسعد اللي ما شكى هجر و ابعاد=يقضي حياته كلها سهود ومهود
وغير الهموم الحب فعله فالاكباد=ايداوي كبودٍ ويجرح له كبود

وسلامتكم

التوقيع

(( رأس الحكمه مخافة الله ))

خالد المقاطي · 22-Oct-2007, 12:14 AM

الله الله الله

(( شامخــــه ))

يالفالح .. ولايستغرب منك الابداع

ماقول الا .. صح السانكــ

وياحبي للقاف هذاه

سجل مروري الاول بشرف

نايف بن ملحق الثعلي · 22-Oct-2007, 12:26 AM

صح لسانك يالفالح

ولا هو بغريب منك هذا الابداع

ولا تحرمنا من جديدك

وتقبل تحياتي

التوقيع

ما هوب لازم توقيع00

مرزوق حمدان العتيبي · 22-Oct-2007, 07:47 PM

...
.

الاكيد انها نادره في تميزها..
صح لسانك ..

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني
حط حبه في كياني ماتغيّره السنيني = وانثني من دون عرضه بالذراع وباللساني

@Marzouq_MHD

السميــــــري · 22-Oct-2007, 08:10 PM

المسعد اللي ما شكى هجر و ابعـاد
يقضي حياته كلها سهـود ومهـود
وغير الهموم الحب فعلـه فالاكبـاد
ايداوي كبودٍ ويجـرح لـه كبـود

صح لسانك يالفالح ..

فيصل الدرباس · 22-Oct-2007, 09:00 PM

الله عليك

وش هالزين

صح لسانك

ولا هنت تكنت فابدعت اخي الكريم

دمت بود

سلطان الجـذع · 22-Oct-2007, 09:52 PM

اخذت انا وايّـاه جلسـه ومقعـاد
على النقا وبعيد عـن كـل منقـود
جلسة شرف على قوانين الاجـداد
النا مع الشيمه مواثيـق وعهـود
واقفى ورجوانـي بجيّـه ومعـواد
وهذي ثلاث سنين ما اظنـه يعـود

الله الله الله ,,,ابو فلاح هكذا النفوذ الحقيقي

للقصائد .

صح لسانك ملايين ..وأبـــــــداع

غير مستغرب