البارحه من فرحتي وقفت اصفّق بالكفوف=فرصة عمر ما اظنّها بتعود مرّه ثانيه
لحظاتها قلبي فتح بابه و رحّب بالضيوف=من حقّه الترحيب في أغلى و أعزّ إنسانيه
يا ناس والله ما يلام القلب في حبّ الهنوف=يجري غلاها فيه مجرى الدمّ فالشريانيه
انتي هواي و غايتي و لا على غيرك حسوف=أقسم بمن أجرى سفينة نوح فالطّوفانيه
شمس المحبّه ما حجبها لا غيوم و لا كسوف=ما حدّ يكذّب ما يشوفه شوف بالاعيانيه
حبيبتي ما تحدّني عنها المشاغل والظروف=إن شفتها راضي وإذا ما شفتها زعلانيه
إن جيت للتّوصيف ... بالتوصيف كاملت الوصوف=أوصافها تجلى الهموم و تبعد الاحزانيه
نظراتهآ أخطر على العشّاق من ضرب السيوف=صويب سهم عيونها تصبح حياته فانيه
ان كان ما جات أعلنت نبضات قلبي بالوقوف=توقف جميع أعمالها ما تشتغل لو ( ثانيه )
وإن جاتني نبضات قلبي كنّها ضرب الدفوف=مشاعري تعزف عليها أجمل الالحانيه
لا تتركيني يا حياتي بين امان و بين خوف=غلاك في صدري رسى بين الضلوع الحانيه
يا لايمي جعلك يقودونك بدربك ما تشوف=تفقد بصرك و تعتبر أعمى من العميانيه
مشاعري ترجمتها بالشعر في سبك الحروف=شاعر مشاعر منبع أبياته من الوجدانيه
التوقيع |
(( رأس الحكمه مخافة الله )) |