حملة السعوده

[سامي المرشدي]

السلام عليكم ورحمة الله وبركاته

الموضوع كما وصلني بالايميل

يا شباب ابي غازي القصيبي ماينام من كثر ما يتداول الأيميل تكفون انشروها

انت اليوم بخير ونعمه بس فكّر بغيرك ومستقبل الجيل القادم


يكفينا مسخره وتلاعب

انشروها نبي نسمع عنها بالصحف والإذاعات


المنتدى الرسمي لحملة السعودية للسعوديين فقط
http://www.ksaforsaudi.com



مااصعب ان يعيش الانسان كالغريب في وطنه
وتهضم حقوقه كمواطن
حيث اصبح للاجنبي امتيازات لايحلم بها حتى في وطنه !

8 مليون عامل اجنبي بالسعودية

عدد ضخم ومخيف
في بلد تزيد نسبة الشباب فيه عن 70%
شباب من الجنسين يطمح لان يعمل في وطنه ويساعد في بناء هذا الوطن
لكن يصدم بجدار البطاله واللوبي الاجنبي
حيث اصبح للاجانب شوكة وقوة
في بلد يفترض ان تكون الاولويه لابناء الوطن

للسعوديين فقط

لانريد شعارات القصيبي

سعودة محلات الخضروات و سعودة الشغالات و سعودة الطباخين و سعودة محلات الذهب و حراس الامن

نريد الوصول للقمه


نريد حق المواطن بالعمل واعمار وطنه
سعودة المناصب القيادية بتلك الاماكن



" عشان تعرف ان الدعوه مسخره في هالبلد

اقتباس
الرسالة الأصلية كتبت بواسطة آبو 99 فلقه »

اشتغلت في شركه وكان فيها شخص لبناني مسيحي خلال شهر احظر اخوه وولد عمه
ووظفهم معنا واحد مدير مشروع والثاني بوظيفه مهندس جودهـ
وراتب كل واحد 12 الف ريال وسياره وجوال وسكن خاص !!
الوضع عادي الى الحين تدرون وش المصيبه اقسسم بالله ان اخوه
جاي من لبنان شغال في بار يفتح للزبائن شراب !!
وولد عمه كان شغال بورشه سيارات !!
بتقولون كيف كل الدعوه تلحوس وتئبرني وكرمالي عند المدير السعودي
وهات ربعك كلهم "
_____________________________________

اقتباس
الرسالة الأصلية كتبت بواسطة آبو 99 فلقه »

سأتكلم عن اللي عشته خلال سنتين عمل في شركه احتفظ بأسمها خوفاً على نفسي

لان صاحبها امير احد المناطق الكبيره بالسعوديه وشخصيه معروفه ..

هالشركه اول ماتوظفت فيها استغربت ان كل المدراء والمسئولين زلمات من لبنان

وسوريا وفلسطين حسيت الوضع غريب ولا يطمن بخير ..

قسسم بالله حسيت اني متوظف خارج السعوديه .. لبنانيين كل واحد حاط له قرن وبكله وسلسال

فيه صليب وسواره وسوالفهم كلها بنات وسهرات وحشيش قلت مالي شغل فيهم المهم خلال هالفتره

لاحظت ان عدد السعوديين قليل جداً لا يتجاوز العشرين موظف وكلهم شهادات كويسه ووظائف

مش حالك اللي معقب واللي استقبال واللي سواق وطايحين فيهم اللبنانين كرف مو طبيعي قسسم

بالله حتى اوقات خارج الدوام يكلمون الموظف يوديهم مشاويرهم الخاصه

واي واحد يناقشهم يا فصل ولا نقل لمكان اخر يلقى نفس المصير حتى يقدم استقالته

وينحاش من اللي يشوفه .. خلال هالفترهـ

احد المدراء فلسطيني ومستعد اذكر اسمه اختلس 20 مليون ريال وهرب عن طريق البحرين

الى احد الدول الاوربيه ولا حس ولا خبر وبسبب هالسرقه كل الضرر صار على روسنا يالسعوديين

قسسم بالله وقفوا الزيادات نهائياً + سحبوا السياراات وصرنا نشتغل على سياراتنا الخاصه +

والبنزين على حسابنا + فصلوا مجموعه كبيرهـ من الموظفين بحكم ان الشركه تعيش وضع

مالي سيئ + تطفيش واستقعاد على الصغيره والكبيره ولو تقول كلمه انذار على طول ...

وربي معبي نموذج زياده الف ريال قطعوه قدام عيني وقالوا مافيه زيادهـ انسى ..

اللي قهرني ان مندوب مكتب العمل اللي نسمع انه يسوي زيارات مفاجئه للشركات عشان

يكتشف السعوده اقسسم بالله انهم يعرفون متى بيجي والساعه وخلال هاللحظه كل الاجانب

يصرفونهم برى ويحطون كم سواق ومعقب سعودي بمكاتبهم عشان يقول المندوب ماشاء الله

السعوديين ماسكين وظائف عندكم ... اتكلم عن ايش ولا ايش .. اتكلم عن الشراب والكحول

اللي يجيبونها للشركه بعد الدوام ويشربونها في المكاتب .. اتكلم عن السفريات والسهر في

البحرين على حساب الشركه لها الزلمات اتكلم عن العذاب والضغط اللي نشوفهم بسببهم

اتكلم عن رواتبنا اللي تأخر من خمس الى عشر ايام وهالزلمات يستلمون في التاريخ بالتمام

اتكلم يا ناس يمسكونا اشغال ماهي بمسئوليتنا عشان يكرفونا ولا اخطينا

فيها حملونا المسئوليه ... اتكلم عن ربعهم وجماعتهم

طوني والياس وعصام وعماد اللي كل يوم موظفين شله منهم بالشركه وبرواتب خياليه

اتكلم عن السعوديين اللي اكبر واحد راتبه 3500 ريال ومعه دبلوم حاسب وانجليزي ومعه ومعه

اتكلم عن ناس لها بالشركه خمس سنين وراتبها 2500 ريال لا زياده ولا خير .. اتكلم عن

لبناني قسسم بالله ماكمل شهر بالشركه جته زياده الف ريال .. بلاوي تصير وشي يقهر

وزملائي فكروا يشتكون بمكتب العمل وكل اللي رحوا زين مانكبهم مكتب العمل وفصلهم لان

لهم اذناب يعلمونهم اي شي ضد الشركه ...اي موظف سعودي يشتغل ويجتهد ويحسونه

بيمسك منصب هاذا خطر عليهم تشوف كيف التطفيش والتمشكل والضغط عليه بأمور كثيره

لين يتعب نفسياً ويتحطم ويترك لهم الشركه ... ايه صح نسيت اذكر ان كل واحد من شله

نجوى كرم صارفين له سياره اخر موديل يا يوكون او سكاليد او فكس ار او كروان فكتوريا ..

كل هاللي ذكرته اتحمله في رقبتي يوم الدين واشهد الله عليه اني ماذكرت حرف كذب ...

وحقي ياخذه رب العباد عز وجل منهم بالدنيا والاخرهـ ...


سبحانك اللهم وبحمدك .. استغفرك واتوب اليك .. اشهد ان لا اله غيرك



____________________________________


اقتباس
الرسالة الأصلية كتبت بواسطة Naif_2s »


كان عندنا سوداني بالشركه مدير تنفيذي
راتبه 90 الف ريال شهرياً مع السواق الخاص مع سياره مع تذاكر وابنائه يدرسون في مدارس خاصه على حساب الشركة وزوجته دكتورة في جامعة الملك سعود ..
اكمل ياناس ولا تكفى الغبنه الى هنا !؟
ماجينا للإنتدابات اللي ناهب ام الشركه يروح يجلس له شهر في جده واسبوعين في بريطانيا !!
الشركه من جاء انشأ اكثر من اربع ادارت جديده .. وجاب عيال عمه يسمكونه كلها
اقسم بالله واحد منهم كان كاشير في هايبر وجاي هنا مدير اداره براتب 10 الاف ريال

_____________________________________


الخبر من جوال سبق :
طالب أعضاء في مجلس الشورى أمس باستدعاء وزير الخدمة المدنية محمد الفايز للكشف عن 200 ألف وظيفة شاغرة في الأجهزة الحكومية،
بينها 65 ألف وظيفة يشغلها غير سعوديين، إضافة إلى مواجهة الوزير بالكثير من القضايا التي تتعلق بالتوظيف.

_____________________________________


اهداف حملة السعوديه......... للسعوديين فقط
الحملة ليست عنصرية


الحمله ذات اهداف ساميه تسعى الى ارجاع الحقوق لاصحابها
ورفع الظلم الواقع على المواطنين
ومنع هدر الطاقات الشابه السعوديه حيث يشكل الشباب 70% من عدد السكان
حيث يعاني اغلبهم من البطاله ومحاربتة فيه لقمة العيش
ويتعرض لحرب نفسيه وتطفيش من قبل اللوبي الاجنبي
ويتم استقدام اجانب بتخصصات غير نادره وعماله غير ماهره
للعمل بالسعوديه وفي وظائف يستطيع اغلب المواطنين القيام بها
ويتم منح هولاء الاجانب رواتب عاليه جدا مقارنة برواتب السعوديين
ممن يحمل نفس المؤهل!!
مع امتيازات متعدده تشمل السكن والسياره والتامين الصحي وبدل التعليم وتذاكر سفر ولكل عائلته
بينما يحرم المواطن السعودي من هذه الامتيازات
فالحمله تحارب الظلم وتدعو الى منح الشباب السعودي فرصته
في اعمار وطنه وتطبيق الانظمه واللوائح
والاوامر الملكيه برعاية المواطن السعودي وتوفير حياه كريمه
وسعودة الوظائف وتطبيق قانون العمل السعودي
حيث يقوم بعض المسؤلين غير الوطنيين ورجال الاعمال باستقدام
الاجانب من عرب /هنود/ امريكان/اوربيين
للعمل بالسعوديه
ممن يحملون تخصصات غيرنادره او عماله غير ماهره
وهذا يكلف على الدوله ورجل الاعمال اموال طائله
ويتم منحهم رواتب عاليه وامتيازات عديده من بيت وسياره...الخ
بينما يحرم المواطن السعودي من كل هذا
ويعاني من التمييز بالرواتب والمكافائات
حيث يوجد سلم رواتب للاجانب وسلم رواتب للمواطنين
حيث ينال الاجنبي الراتب العالي وامتيازات متعدده من بيت وسياره
والمواطن مطالب بالعيش براتب قليل في ظل غلاء المعيشه
مع العلم ان اغلب المواطنين يعيش في بيوت مستاجره


وتتضمن اهداف الحملة :


1- المطالبه بتنفيذ قانون العمل السعودي حسب الماده 3
والماده 26 من القانون
الماده 3:
الذي تنص ان العمل حق لاي مواطن وان لايتم استقدم اي عماله اجنبيه الا في التخصصات النادره
(والواقع الحالي يقول ان اغلب الاجانب العاملين بالسعودي لايحملون تخصصات نادره ومعظمهم عماله غير ماهره)
الماده 26:
يجب ان تقوم الشركات والقطاعات الاهليه بتدريب وتأهيل المواطنين
للعمل
فمالحاجه لاستقدام الاجانب وابناء الوطن موجودين ولدينا الالاف الخريجين بمختلف التخصصات

2- رفع الظلم الواقع على المواطنين من العاملين بقطاعات حكوميه
واهليه ممن يعمل بعقود تتضمن بنود مخالفه لنظام العمل والعمال
حيث يطالب الموظف بالقيام باكثر من وظيفه وبدون دفع راتب اضافي
او ان يعمل بدون عقد رسمي!!
او يطالب بتنازل عن حقوقه
او العمل بساعات عمل طويله بدون اي راتب اضافي؟؟!
وحرمانه من الاوفر تايم
3- المطالبه بوضع حد ادنى لاجور السعوديين على ان لايقل عن 1500
وحد اعلى مفتوح
فبعض الجهات استغلت عدم وجود
حد ادنى للاجور وارغمت بعض المواطنين للعمل براتب 500 ريال- 800
ولساعات عمل طويله تتضمن دوامين وهذا مايخالف ماتنص عليه منظمات حقوق الانسان وهو اقرب للاستعباد

4- مراقبة مكاتب العمل للشركات الاهليه التي تتلاعب بمسير الرواتب
والاوراق الخاصه بتامينات الاجتماعيه وتوظف اجانب مخالفين لانظمه الاقامه ولايحملون تراخيص للعمل او يعملون بمهن بخالف ماتم استقدامهم من اجله
ووجود جواسيس لبعض الشركات في مكاتب العمل
يتم ابلاغهم بمواعيد التفتيش
وهذا يستلزم تدخل هيئه الرقابه والتحقيق لوجود بعض المرتشين
ممن يعمل لحساب تلك الجهات ويساهم بالتغطيه على تجاوزتها القانونيه

5- ان تكون السعوده بجميع المهن وليس فقط بالمهن الدنيا
حيث تحصر بالسعوديين وتبقى المهن الاداريه والفنيه والطبيه
والمناصب بيد الاجانب
وان يتم منح السعوديين الامتيازات التي يحصل عليها الاجانب
من راتب عالي وسكن وسياره وتامين صحي
وعدم تجديد عقود الاجانب ممن يعمل بمهنه غير نادره
واحلال المواطن مكانه

6- ان تقوم جهه مستقله بعمل تعداد للعدد الفعلي للعاطلين في السعوديه
7- ان تضع وزارة العمل برنامج بتعاون مع الشركات الكبرى
ذات الميزانيه الهائله كنوع من ماهمة تلك الجهات بالعمل الاجتماعي
باقامة مراكز لتدريب الشباب السعودي وتاهيله لوظائف
تحتاجها تلك الجهات تمهيدا لاستبدالهم بالاجانب
وان لاتكون محصوره بالمهن الدنيا فقط
وان يتم تخصيص بعثات على حساب تلك الجهات لارسال
الشباب السعودي للخارج للتدرب ودراسة تخصصات يحتاجها سوق
العمل السعودي
8- ان تقوم جهه مستقله بمراقبة عمل الشركات التي تحارب السعوده
وتطرد السعوديين او يمارس المدراء حرب نفسيه لتطفيش السعوديين
ويتم اغلاق اي جهه تقل نسبة السعوده فيها عن 50%



وسوف تقوم الحمله بعمل قائمه سوداء لاي جهه تحارب السعوده
وتحارب المواطنين وتطردهم وتبقي على الاجانب تحت حجة الازمه الاليه الحاليه
وسوف تتضمن اسماء الشركات والاشخاص الذين يحاربون السعوده
وتوظيف السعوديين ومن يقوم بحرب نفسيه ضد المواطنين لطردهم واستبدلهم باقاربهم وابناء جلدتهم
وسنقوم بتوزيع هذه القائمه على المواطنين بكافة الوسائل
للتشهير بهم والدعوه لمقاطعتهم وعد التعامل معهم او الاستعانه بخدماتهم او شراء منتجاتهم فمن لايرغب بابناء السعوديه فهو غير مرحب به بيننا

[عبدالرحمن الهيلوم]

كثرلي منها

قال سعووووووووووووووووده

الله فوق

[من أخوان ميثاء]

يطخ من هالملايين ... ويبي عيالنا حلاقين وحنا بلد البترووووول

أقوووول وراه مايوظف بنيخيه وربعه بالسعوده

يالله دخيلك بس لو يعطــــوني مبلغ

فواتير جوالاتهم راتب لي .

الوكاااااااااااااااااااااااااد إنه مسنع نفسه .

[% المفرجي %]

الكلام ذا لو وصل للاسره الحاكمهـ كان بيكون فيها كلام اخر ولكن المشكلهـ بالبطانهـ هي اللي توصل للحكام انه الوضع طيب وان الشباب السعودي مايشكي من البطاله
واللـــهـ هالكلام انهـ خطير
اللــــهـ يكون عون جميع الشباب
مشكور اخوي على نقل هالخبر

[ابو مشـعل]

# كل ما ذكر بعاليه صحيح وما خفي اعظم بكثير .

# السعودي مهضومه حقوقه في فرص العمل في الداخل والخارج . فمثلا :
كثير من الدول الخليجيه فيها فرص عمل ويرحبون بالسعوديين ولكن يقولون هناك تعليمات من طرفكم ( يعني من السعوديه ) بعدم الموافقه على توظيف السعوديين بالامارات مثلا . وحتى في صحافتنا المبجله نجد الاعلانات مثلا الترحيب بالهجره والعمل ( بكندا ) لجميع خلق الله ما عدا السعوديين ( وجميع الاعلانات مكتوب فيها عنوان بالخط العريض ( لغير السعوديين ) .. لماذا ؟؟؟!!!!

# اما في الداخل فاعلانات ا لوظائف ( مركبه ) لمن لديهم اقامه قابله للتحويل .. ثم يضعون لذر الرماد بالعيون ( الافضليه للسعوديين ) والعكس هو الصحيح عند تلقي السيره الذاتيه يستبعد السعودي اولا ثم تبدأ المفاضله بين غيرهم . الاقرب فالاقرب .

# وحقوق الانسان الداخليه والخارجيه يتبجحون بأن عندنا عنصريه .. والعنصريه تمارس بابشع اشكالها تمارس ضد السعوديين في عقر دارهم . في التوظيف وفي كل المعاملات وحتى في البيع والشراء . وتوزيع البضائع التي يسيطر عليها الاجانب بمباركة كبار المسئولين وحمايتهم . ولا حول ولا قوة الا بالله .

[سامي المرشدي]

لاهنتو اخواني الاعزاء وطاب تواصلكم