رديه بين الشاعر نواف نايف الحزيمي العتيبي والشاعر عبيد حمود العازمي العتيبي

[نواف نايف الحزيمي العتيبي]

ياعين حرن شهر من ماكرن عالي .... لاشاف جول الحباري غصب يصخرها
في ديرتن خاليه مع صحصحن خالي .... ماشوف غير الحباري يوم طيرها
والعشب من كل نوع الوان واشكالي .... وطلع الزبيدي اتشوفه في مناظرها
وفي كل ليله عليها خيل اخيالي .... هاذيك داري وانا يا عبيد خابرها
يا عبيد انا ابا اشتكي لك من هوى بالي .... ابو عيونن ماطب الكحل محجرها
يا عبيد قدام اعرفه دالهن سالي .... واليوم دارت على راسي دوايرها
غرون صغير وجميل وبارين حالي .... لعل الاقدام من شاني تسيرها
اخاف لا يستمع فالقيل والقالي .... ناسن على الشين بايعتن ضمايرها
يا أهل النمايم عساكم مالكم تالي .... في وسط نارن تزايد في سعايرها
صمن بكم عمي دجو مالكم والي .... تباعت العجز نقالت صرايرها
ماني بالاول ولاني بالهوى التالي .... كم عين هلت على الفرقا عبايرها
عزي لحاله وانا ياعبيد عزالي .... تسعين ليله وجفن العين مسهرها
اسمع عن الحب مدري عنه يالغالي .... لينن حدب الضلوع العوج كسرها
وصلاة ربي عدد ما هل همالي .... على شفيع الخلايق يوم محشرها

الشاعر : نواف نايف هلال الحزيمي العتيبي


ورد عليه الشاعر : عبيد حمود العازمي العتيبي

الليله امسيت قلبي فيه الاشكالي .... روابع القلب والهاجس مناصرها
قامت تحده وتضربه على الجالي .... وابدت خفايا ضميرن كنت ساترها
قرايح الشعر عيت لا تهيالي .... يجرها الشوق والواقع ينفرها
لا شك الي هاجسن في بدع الامثالي .... يجبر كسور القوافي مايكسرها
لو كان من دونها غابات الاهوالي .... ينزل عليها وياخذ من نوادرها
يامن شكالي وبالشكوى تعنالي .... سج الركايب ونطحني مناحرها
يشكي هوى جادلن منطوقها حالي .... تزهى عقود الجواهر في خناصرها
وانا اشهد ان الهوى همن وغربالي .... يدخل قلوب الاوادم مايشاورها
اسرع من العين في تحقيق الازوالي .... وورد من القوم واظفر من خناجرها
لرظاك ماكن لاجاهي ولا مالي .... نبذل لك الجهد والصعبه نيسرها
وان كان كبرت وصارت حرب وقتالي .... لو الجنايز تضايق في مقابرها
نجبر هل الظلم تقفي بعد الاقبالي .... والشلف والماس الاشقر في صوابرها
ويصبح بعين الحسود ظفور وخلالي .... والدمع والدم الاحمر في نواظرها
واهل الحكي مالها حيلات تحتالي .... اللي منول موسعتن حناجرها
والعز بالله وعزك مال ورجالي .... من لابتن تتعب الراقي شناصرها
تمت وصلو على من عزه الوالي .... قريحة الشعر كاملتن عناصرها

الشاعر : عبيد حمود العازمي العتيبي

آخر تعديل نواف نايف الحزيمي العتيبي يوم 23-Jun-2013 في 03:34 AM.

[ابورشيد]

نواف نايف هلال الحزيمي والله ونعم فيكم يالغالي وفي ربعك

عبيد حمود العازمي والله ونعم يابو حمود

[نواف نايف الحزيمي العتيبي]

نعم حالك يابو رشيد عني ونيابة عن اخي عبيد حمود العازمي