خزام المهري يتحداّ ويتوعد قنيفذ بن لبده على وضح النقا

[راعي الحميّا]

هذه الروايه انقلها حرفيّا من لسان شايب ٍ شاعر وراوي من شيبان
الدغالبه تجاوز عمره 80 عام عرف بالاستقامه وصدق البيان ولانزكي على الله احد
0000000000000000000000000000000000
يقول تقاصروا الدغالبه من عتيبه وآل سعد من قحطان على الحرمليه
فسيّر قنيفذ بن لبده امير آل سعد على خزام المهري امير الدغالبه
وهالاثنين شرٍّ شرير وكلن يعاين وش عند صاحبه من الطيب .
ولما وصل قنيفذ
الى محل خزام شاف المرادي فرس خزام في مربطها قدام البيت
فذهب لها واخذ يشبرها فناداه خزام
وقال تعال جاي تقهو خل الفرس.
ويوم جاه قال والله ياخزام يمدحونها الجماعه وماهيب على مدحهم
قال اولاه؟(لماذا)
قال ماهيب على مدحهم .
قال خزام والله لن كنت راع البواضا لذوقك مليحها حتى تعرفها وتذكر مدحها.
قال قنيفذ امحق وش قومك علي!!!
قال قومي عليك يوم تقول ذبحي من الرياجيل كثر ذبح هذال بن فهيد من الغنم

قال والله الحكي اجل الرياجيل غنم في ربق بس امسك واذكي ؟؟ هذا خرطي!!

مار جعلك ان كانك تمناها ياخزام ماتجيها وانا غايب( يقصد البل )
قال خزام والله لن جيتها وانت منت بحولها لجنب عنها لين تحضر .

قال الله يخذني من نجد والا ياخذك ياخزيّم
ولا ان قعدنا جنب بعض ماحنا بخير
واحد ٍ منا ماهوب راعي طويله .
قال خزام اجل الصبح ترى ماحنا بجيران .
فالدغالبه شدوا ووردوا على مغيرا , وآل سعد حولوا وراهم متوجهين جنوب.

وهناك نادى خزام الصانع
قال ياسعيد والله لن غابت الشمس وباقي فرس ٍ ماحذيتها لبتر حبال ظهرك.

حذوا خيلكم يالدغالبه نوى يلحقه .ويوم اخذوا يومين وهو يثوّر ويارد على الطويله ولاقيّل الا علاها .
ويرسل السبر اللي هم هندي الجلد ورجا الوسيويد ومعهم مشعان الهذلي من الصعران من مطير كان قصير للدغالبه.
قال لهم الله وعدكم بكره مذرة الشمس على فم حجالا (قليب معروف) روحوا دوّروه إلي.
يقول الراوي وخزام يقوم يحدا ويقول اسقوا خيلكم يارياجيل
اسقو خيلكم ياداغالبه رووا قربكم .

فالكم ياقومي يطيب
فالكم ذود ٍ عزيب
مال لصياحه مجيب...
عجلواعجلوا السبر بيجينا

قال والله ما اخذنا الا راع المطيه جاينا يشعب مطيته
قال يالامير العرب عانهم في ابو حميض
والربع قعدوا يقولون فيه ذود متلي متى ماقرب يمنا بناخذه..
قال خزام توحوني يالزماميل روحوا الله وعدكم قوارة حجاج
انحاشواوالله ماندري حنا نرجع لكم ولا لا.؟!
توجهو لهلكم .
السبر يوم شافوا الذود قرب منهم وهم يغيرون علاه
وكان فيه الداهيه ناصر بن منيرفارس معروف وهو يضرب الحصان تحت هندي الجلد لمبتر ٍ عضوده
(ملاحظه : من هذه الواقعه ادعوا قحطان انهم ذبحوا هندي الجلد وهو غير صحيح
هندي ذبح مع الاخوان في وقت متأخر رحمة الله عليهم جميعا)
نرجع للقصه .
يقول وهو يحط فيها ويمدها على الهذلي لراسه زبده والجلد يتناوش الفرس لهو طامر في ظهرها ... يقول ناصر والله اني ناوي ماخلي منهم شريده يقول يوم رفعت عيني ولاهن جاياتني صف مع خريق العشر
لا والله اني اعرف المرادي وخزام في ظهرها
يقول يوم شفت خيل الدغالبه .والله ماعاد فيني من الفتنه مطعوم
يقول وانا ازين الضلع والبل راحت .
يقول يوم زبنت الضلع واطالع فالعرب والى عمي يذاودها
يقصد قنيفذ عيت تخليه يعنها
والحريم يضربنها بالعمود يبا يفزع يوم جاه النذير يقول
يوم ولاها وهو يسوقها يبا يلحق الدغالبه هوو فزوع ال سعد
واول مالحق ابن شنان وهم يضربونه لا طاشين راسه
ولحقهم من ال ابو دهران والله مدري هوجوالو به يعني(كثر الكلام فيه ) وتالي قالوا انه بن ساره ماني ضابطه.
ومن بعدهم جندلوا بـ ابو شعره ..
المهم اقفوا على البل ويوم صكو بها مع شعيب ابو حماض وهو دحبوب له جرفٍ طويل وحصا املس الفرس لاوطت علاه ازلقت
مايسند فيه ولاينطرد.
لاوالله ان قنيفذ وفزوعه قد وصلوا
عندها اعجب اقنيفذ وقال خيّل الحدبا وانا اخو نفلا تال الخيل ياخزام تال الخيل.
يقول وهو يقوم ينتسعها بالعنان يبا يطمرها الجرف انت ياخزام يقول والله يوم غصبها وانطلق زرارها ان بولها طول رمية الرمح ولهي وراه .
قال خيل البويضا وان اخو نوره عيا على تال السرب عقيدها يقول والله يوم ااسندبها وساق علاهم مامنهم اللي معطيه وجهه
واولهم قنيفذ دروا انه يبا يثعي بهم وراحوا الدغالبه بالبل وكسب الرهان خزام....
___
وسلامتكم
و من لديه اضافات يتفضل والله لايهينه والحمدلله على نعمة الدين
والامن والامان سوالف ٍ مضت ذكرناها من باب الخبر
والله يحفظ حكومتنا . فاليوم اخوان
واكثر حنا وقحطان وكل قبايل مملكتنا .
ونطلب من الله يوحد صفنا في وجه اعداء المله
والعقيده
راعي الحميّا .

.