شقير الجذع يفتخر ببرقا وروق

[الصف الواحد]

الملحمة الشعريه في الكيان الشامخ

الهيلا

للشاعر الكبير: شقير الجذع

يقول الى بدع صاف المثايل = معانيها الصحيحة جايزتها
نبــيها تنتبه بعــض القــبايـل = كان أفعال أههـلنا جاهلــتها
يشيب القلب لو يعلم ويــدري = لو ان الارض تظهر ما تحتها
عرف بافعالنا شيخان نمرى = عتيبة في المعارك قــتلــتها
على سرد المهار بسيفن املح = يبت الجمجمة حد رقبتـها
علـــوم ما نبى فيــها معــلـم = حكى تاريخ نجد بســـالفـتها
توضح فعل روق وفعل برقا = عتيبه والاسامي قاســـمتها
وقبـيـلة وحدة والفعل واحد = هوازن والقبايل عارفـتــها
حربنا وارتكانا للحــرايـب =عتـيـبه ما سطة نجـد ملكتـها
نزلنا نجـد بشلفن تبارى = ونمرىٍ تدرق الشمـس عسـمتها
كما نوٍ يزلزل با لرواسـي = سحابة ٍ برقها من صاعقتها
رعدها الماس والبراق شلفى = الى صــابت لها جثة فرتــــها
نهار إنا على نجـد حــدرنـــا = تواريخ الليـالي ورختــــها
حدانا الوقت والدار محميه = قبائل عن قبائل حاميــتها
وطلبنا منهم المرباع فيـــها = ورفضها الشيخ والقوم رفضتها
وردينا عوانيـــهم علـــيهم = وردات البرى تعرف سنتها
ونشرنا بارق الحرب ومشينا = وفكينا الحمى عن ماسطتها
ونزلنا ماسطة نجد وبنـــيــنا = ورواعينا مراعيها رعتها
رعت عشب الربيع وقيضت به = ومواردها على الحول وردتها
ترد قطم التوادي في ذرانــــا = وتشرب كل عينن من شفتها
نردها لو مواردها مخـــيفــه = ليا ماصبحت قوم هجدتها
تحاربنا القبائل ونحربهــــــا = عتـيـبه كم قبيله حاربتها
وهذه من شهود أفعال أهلنا= وتضاف التاليات لسبقتها
ويوم مريحه والرضم حنا = ويا كم من مراضيع أيتمتها
عتـيـبه من عصورالجاهليه= ليا صالت على قومن خذتها
أقوله وانشد التاريخ عنا= من أول سالفتها الى اخرتها
وهذه من شهود أفعال أهلنا= وتضاف التاليات لسابقتها
وتعلم عن طلال وعن نهاره= تعلمك الليالي بحادثتها
جموع جاتنا حضر وبداوي =وحنا جمعة تعرف فيتها
وقفنا في نحور القوم وقفه = تبي تفنا ترثها ما نستها
وقفنا دونها بالسيف حنا = وهي بعقل تعجبك رطنتها
وكسرناهم وخذنا الخيل منهم =وطرحنا شيوخ للحيز وكلتها
ومنعنا الي يبا منع وزبنا = وماقال العطاوي بينتها
وهذي من شهود أفعال أهلنا =وتضاف التاليات لسابقتها
مثل عرجا والانصر والدفينه =ثلاث وكم ثلاثن ماثلتها
كلامن صدق ما نبغى الظلايم = ولاتعتز قوم بظلمتها
على عرجا قبائل مع قبائل = لكن حظوظها ماساعدتها
تريده ولله الخلاق راده = تبي هزمة عتيبة وهزمتها
على الميعاد جينا للملاقى= اليا بعض الجموع مخليتها
سروا واللي بقى معه التقينا = صباح وكل ساعه ببركتها
على قبن يعلجن الحدايد= وشلفن ماتداوى صايبتها
نضد بها العداء يوم الحرايب =اليا مدت لها كف قطعتها
وهذه من شهود أفعال أهلنا = وتضاف التاليات لسابقتها
وعلى الانصر غزو قوم علينا = وبقت بأسمى الجبال مسميتها
غزانا حاكم القطر الشمالي = يقود اسراب واسرابٍ قفتها
يبي ياخذ عدايلنا الولايف =وحدانا القوم عنها ما خذتها
وخذنا الخيل والجيش الاصايل= قلايع بالاشده وخرجتها
وراحت مرج خيل القوم منا = يكود الى أكل الماس فطحتها
عليها من أهل العنه شهاده =تغنى بالحروف مغنيتها
وهذي من شهود أفعال أهلنا =وتضاف التاليات لسابقتها
وبعطيكم خبر يوم الدفينه = واعلم بالعلوم من أولتها
غزانا قوم يبغون الطمايع = وغيرنا النوايا الى نوتها
وحداناهم على روس الحتايف = بعد طال النهار بمعركتها
بحد السيف ميلنا عليهم = وعلى الفرسان حامت حايمتها
وسمي صمد معتق بالدفينه = عتاق نفوس ونفوس قتلتها
فعايل روق عطبين الضرايب =عزاة ما تهاز مجاورتها
عوايدهم يضدون المعادي = حياض القوم كم مره كفتها
مثل هاك النهار ومثل غيره = نعد لكل وقعه شاهدتها
ليا منا نوينا الحرب حنا=نعشي الجايعات بمجحرتها
من الى يلبسون الجوخ والى=يقودون السرب بمقدمتها
يكود اليا عفى ربي عفينا= عتيبه دايم العفة صفتها
وهذه من شهود أفعال أهلنا = وتضاف التاليات لسابقتها
ويوم وضاخ والحفر وحراضه = دواوين الفعول مدونتها
عليها تشهد أبيات القصائد = وموارد شيوخ قوم فارقتها
شهود وضاخ حسيان وركايا = ما تنشد صادرتها واردتها
اخذناها بحد السيف وحد شلفى =وجبعا تاكل الرؤس فشقتها
مضاربها الجماجم من يدانا = ويا كم جمجمة راس نفضتها
مأخذناها بطلبات ومبادي =ولاسقنا الثمن لمعمرتها
على وضح النقى مهيب خدعه= ولاقط حددانا خادعتها
عليهم جرها زيزوم نمرى=سربنا نزل أهلها شددتها
وصارت من يداهم في يدانا= نستها القوم والا خابرتها
وهذي من شهود أفعال أهلنا= وتضاف التاليات لسابقتها
ويوم الحفر زبنه من شهوده = جموع حزت الهوش زبنتها
يبون الضلع يرفعهم علينا = وفوز المعركه لمسيطرتها
وتسيطرنا وعدينا عليهم =وقضينا الاعداء من عاليتها
بسرد زادها ماس السراعه = نخرط المشط ونطش سعفتها
صليب العظم يغدنه شظايا = قطرها مايخون معايرتها
وخذنا عد مقرعة التوادي = ليا جت والسمايم سايقتها
ترد مران والعد الهلالي = وتقود النصر واطراف هدجتها
ومن هاك الزمن لليوم حنا = نسقي القود ونغرس نخلتها
وهذي من شهود أفعال أهلنا = وتضاف التاليات لسابقتها
ويوم البرك والعصلا وغيره= جبال الدار تشهد وشجرتها
تعلمك المواقع بالا سامي = بساميها ومنه مسميتها
بأسامي ناس سمونا النوامي = كمن حضوضها ما نومستها
مداغيش يضدون القبائل = لكن لكل حاجه معجزتها
وهذه من شهود أفعال أهلنا = وتضاف التاليات لسابقتها
وعلى العصلا نهارن تسمعونه = كلام شهوده الى حاضرتها
عدد تسعين من رؤس قبلانا =نعتها بالعباير ناعيتها
اقوله والعلوم الها دلايل = مواقف والفعول مبررتها
وهذه من شهود أفعال أهلنا = وتضاف التاليات لسابقتها
وترى يوم الرحى تسعين فارس =تعشتها السباع وزعتها
خلاف اشرف بالسيف المصقل =عدايل شيوخ نجد اللي حمتها
غزانا من شمال الدار حاكم = بروكات تبذ معددتها
طنايا ما يعرفون التراجع = لكن اّلاد برقا رجعتها
بعد يوم تشيب ابه الرضاعه = تحوز من العزاه ليا اعتزتها
عزاة شيوخ ماضين الفعايل =ذرى جرد الرقاب متيهتها
عوايدهم يفكون التوالي = مثل هاك النهار بسالفتها
وهذي من شهود أفعال أهلنا = وتضاف التاليات لسابقتها
وترى يوم العويند كم فارس =عليه الرمل تذري ذاريتها
نوونا بالهزيمه يوم جونا =ومنا نية القوم احرمتها
وعود جدعهم في القاع منا =مثل جدع الخشب من عاصفتها
وهذي من شهود أفعال أهلنا = وتضاف التاليات لسابقتها
وعلى درب المباحيص التقينا = شيوخ القوم طفينا بختها
لعين الي تنادي بالاسامي = تثاري للنخاه الى نختها
أخذنا حلة القوم ودبشهم = جزاءً لفعولها الى فعلتها
نجازيهم بما مدت يداهم = نكيل الصاع والنا راجحتها
وهذي من شهود أفعال أهلنا = وتضاف التاليات لسابقتها
ويوم شيوخ بالسرده تسمى= ويوم المجمعة في مجمعتها
طرحنا الشيخ زيزوم السرايا= سنه وهوه يداوي صايبتها
وذبحنا الشيخ بن عمه شقيقه =عليه القوم ياكثر حسفتها
وكسرنا الباب عن قطم التوادي =وكسرنا ابواب قوم قفلتها
وهذي من شهود أفعال أهلنا = وتضاف التاليات لسابقتها
وشمال النير واللي في جنوبه =وترى يوم الهييشه ثالثتها
علينا في الهييشه ميل ساعه =ومنا نصف ساعه عوضتها
وذبحنا عشرة مع درب عشره =وخمسة بالحساب لمحصيتها
علينا ميلة فالعام مرة =وعليهم خمس ميلات بسنتها
وهذي من شهود أفعال أهلنا = وتضاف التاليات لسابقتها
غلبنا يوم كون الحرمليه = وغلبناهم بعشر ماثلتـــها
نرد شيوخ ضيفانٍ لأهلنا= ونشرب بالفناجيل قهوتها
عليها قال شاعرهم قصيدة =وقلنا مثلها اللي خلصتها
وهذي من شهود أفعال أهلنا = وتضاف التاليات لسابقتها
وشمال النير مع قوم التقينا =جموع قدرة الله جمعتها
يبون من الحمي الى العرايس =وعبلة شرثه الي من تحتها
ويبون من الثنادي الى الذنايب =وعبلة سفوه اللي كانفتها
ويبون من العريق اليا الينوفي=مرابي ادباشنا اللي رابيتها
وحلفنا حلف مايمشون فيها=وباقلنا بواقي ساكنتها
ونادى شيخنا وين النشامى=هل العادات حزة واجبتها
وتعزوانا وكررنا العزاوي=وثورنا اشهب الملح دخنتها
لكن من الفشق منا ومنهم=برد ندر يخيف مخيلتها
وعليهم من مباطحنا عدينا=واخذنا كل جبعا برقبتها
وهزمناهم وصار الاسم باقي=تسمي بالطراد مسميتها
وهذب من شهود أفعال أهلنا = وتضاف التاليات لسابقتها
وجنوب النير شيخ جر نمرى=عليها فوق عد واردتها
وتلاقوا مع فريق من عتيبة=وولعت فالفتيل مولعتها
مضاربها بروس شيوخ ولاّ=بسرد والأعنة قاضبتها
عليها سجل الشاعر شهادة=ذياب النير ينعتها نعتها
قصيدة شاعر قال الحقيقة=لمن يجهل خبرها فسرتها
وهذي من شهود أفعال أهلنا = وتضاف التاليات لسابقتها
وجنوبي ظلم شيخ جر نمرى=على أذواد من المضمأ أخذتها
عزيب وكل راعي هج رجلي=وراحوا كود بنت عانقتها
وقالوا عودي يابنت عنا=وقالت فزعة البل خابرتها
قدم وكان مالحقوا طلبها =بنزل حين أصير موازنتها
وبخنقها نشرته في عصاها= وصاحت للفزوع وفزعتها
صلاة الظهر وأختف المصلي=وعجلت الصلاة مصليتها
وقالت ياهل العادات قوموا=ترى البل جاتها قوم وشعتها
والياهم سبعة من دون ثامن=أهل سبع من الخيل لحقتها
عليها سجل الشاعر شهادة= لمن يجهل خبرها وضحتها
وهذي من شهود أفعال أهلنا = وتضاف التاليات لسابقتها
وعلى الصواي والبكري وساجر=ويوم سواج ظفره خامستها
نرد شيوخ ونجيب القلايع= تسولف بالفعول مسولفتها
على الصواي ستين منعانا=جنوب الشعب غرب مثلثتها
منعناهم واخذنا الجيش منهم=وبدلت الوسوم موسمتها
عليها قال شاعرهم قصيدة=تدونها الصحايف وكتبتها
وهذي من شهود أفعال أهلنا = وتضاف التاليات لسابقتها
ومنعنا يوم كون غثاة سبعة=من الشيخان غير مرافقتها
بعد ماعودوا وقالوا وقلنا= بسية وجه بتلا وحسنتها
ورضوا بالكلام الي نقوله=فرضناها على القوم ورضتها
منعنا نصفهم والنصف الآخر=عباريد المشوك شتتها
وهذي من شهود أفعال أهلنا = وتضاف التاليات لسابقتها
وغيره كم أعد وكم أخلي=تشيب ابها القوافي ماكملتها
تفرقها المواقع والاسامي=وتواريخ الليالي مورختها
نرد الصادرة فوق المغبة=ونشب النار ونزيد شعمتها
عوايدنا اليا دارات رحانا=على حبة معادينا طحنتها
وهذي من شهود أفعال أهلنا = وتضاف التاليات لسابقتها
ولا أقول اني احصيت المواقف=طويل شرحها لمعددتها
على الطالات أهلنا عودونا=على اكرام الضيوف اليا نصتها
وعلى لطم الحريب اليا حربنا=وعلى تقديرها لمجاورتها
وعلى فك الدخيل اليا زبنا=يدين عداه نقصر طايلتها
وهذي من شهود أفعال أهلنا = وتضاف التاليات لسابقتها
وحسب ماعرف ذكرت اللي قدرته=وتفسير القصص من معرفتها
وعن اللي ماعرفته سامحوني=من العريف نطلب معذرتها

[عبدالرحمن الهيلوم]

صح الانك والسانه
شكرا لك يالغالي

[نواف العصيمي]

صح لسان الشاعر والعلم الرائع شقير الجذع العتيبي

ولاهنت يالغالي على القصيده ,,

التوقيع

[وثاب]

وعن اللي ماعرفتـه سامحونـي

مـن العريـف نطلـب معذرتهـا


وش بقى يا شاعرنا الكبير شقير

ما نقول الا صح لسانك وعلا شانك وبيض الله وجهك ووجه الناقل

لا عدمناكم

[ابو فايح]

صح لسان الشاعر الكبير شقير الجذع وقبيله عتيبه غنيه عن التعريف

[السويبع]

توضح فعـل روق وفعـل برقـا
عتيبـه والاسـامـي قاسمتـهـا

صح لسان الشاعر الكبير شقير الجذع
وبيض الله وجهك يا صاحب الموضوع

[صقر النواصر]

توضح فعل روق وفعل برقا ... عتيبه والأسامي قاسمتها
قبيلة وحدة والفعــل واحــد ... هوازن والقبائل عارفــتها

صح لسان الشاعر القوي والكاسح الذي لايوقفه أحد على مايبدو .. .. شقير الجذع .... والبيت الثاني يرد أفضل رد على يحاول شق الصف إلى صفين .. وشطر القبيلة إلى نصفين ..

بيض الله وجهك يامن أتحفتنا بقصيدة شقير الجذع ... وبيض الله وجهك ياشقير الجذع دنيا وآخرة ...ويبدو أنك ينبوع شعري آخر لاينضب .. وصاحب نفس طويل في القصائد ....

[ناصر الهيلا]

نبيهـا تنتبـه بـعـض القبـايـل=كـان أفعـال أههلنـا جاهلتـهـا
توضح فعل روق وفعل برقا = عتيبه والأسامي قاسمتها
قبيلة وحدة والفعــل واحــد=هوازن والقبائل عارفــتها

رد ملجم لكل سفيه وحاقد

صح لسان الشاعر شقير الجذع

[السيف الصقيل]

كفو ونعم بعتيبة (روق وبرقا)


ونحمد الله الذي أعزنا بالإسلام

[الصف الواحد]

المشاركة الأصلية كتبت بواسطة عبدالرحمن الهيلوم

صح الانك والسانه
شكرا لك يالغالي

صح بدنك

ويامرحبا ومسهلا ياعبدالرحمن