ديوان الشاعر / سلطان بن عمار القلاع ( رحمه الله)

[حميد السجايا]

بسم الله الرحمن الرحيم
والصلاة والسلام على من لا نبي بعده
اخواني اعضاء وإداريين ومنسوبي وزوار منتدى الهيلا
يسرني أن اقدم لكم بعض ماوجدت من هذا الشعر شعر (سلطان القلاع)- رحمه الله
والسـلام عليكم ورحمة الله وبركاته :-

أسمة ونسبة
:- هو الشاعرسلطان بن عمار بن بركات القلاع العالي الروقي العتيبي

الشاعر/ سلطان ضاعت نياقه ولم يبقى منها شئ فركب ذلوله (( جــروة))

وقال هذه القصيده :-

أناسابقي محرنها ماتبي المقيال=تزعوج تبا المسراح مغار أداريها
ليومى عليها البشت جاها زعل وجفال =تتل اللواحي تل من يد راعيها
ألا ياذلولي دون أهلنا بعيد اللال=ديارٍ بعيده مكربتنا مضاميها
هلي يم كشب ودونهم غرس الأقذال =وأنا يم بحره واتسكن باهليها
ادورذهيبن عندنا من خيار المال =واسوق المطيه لين بادت سماريها
مايصل عشيري غيرحمراً ردوم الحال =محيلٍ شحمها سايقاً مع مقاريها
ألا يالله أني طالبك يا عزيز الجال =طلبتك نهار النفس تاصل مناهيها
نهار يدرب فيه مايدرب الجمال =سوات المطيه بالرسن يوم تصيغها

اللواحي :-الرسن
الأقذال:-الجبال
مقاريها:-ضهرها







الشاعر/سلطان

ومناسبة القصيده انه عندما ذهب ابنه حذروف يدور الوظيفه اشتاق له وقال هذه القصيده :-

الا ياسعيد اليوم ابرسل معك بوصاه= ومن حشمتي عندك وصاتي توديها
امانتك امانه خل حرفي على مجراه= ترين الامانه حقها فوق راعيها
توصل كلامي ويلدي مانويت انساه= عضيدي على لين لليالي وقاسيها
وانا خابرٍلي خبر والصقر من مجناه=عيال الاصايل طلعها من مجانيها
وانا لن وصل حذروف هرجي عرف معناه=كمنه فطين وجابتي يستمع فيها
وانا لازم ٍنجرٍ هوايه صهيل اغناه=على جال صفراً في سنا النار حاضيها
مساييرها يلفون والبيت في مبناه=عسى الرزق عند مسير العبد يعطيها

\




الشاعر /سلطان

غنيت لي في تالي الليل بحروف= يامويس تكفي عن جميع الطعامي
غنابها قلب من الهم منحوف=يقلاه هم كثر ورد الضوامي
ماقلتها في عايز اللون بوصوف=ولاهيضني رادعات الوشامي
ويامرسلي وصل كلامي لحذروف =وقله من الشايب عليك السلامي
ويابني تراني ذاخر ٍفيك معروف=والزرع جاد ولابقى الى الصرامي
وقلبي كما غصن على راس شفشوف=تلعبه الهبان والوقت طامي

وقال ايضا

يا مويس قم دن الحطب والشعم النار=وعمر مشبٍ لدلال متواتي
اذن يلفينا مسايير خطار=وناخذ على جال الدلال كلماتي
افرح ليا جانا مسايير ثمار =هاذيك سره خاطري في حياتي
يا مويس بيتك لاتضده بمجدار=ترى منازيل الردي بيناتي
يامويس سهل مربعه من ورا الجار=ويرزقني الله زال انا في حياتي
ودن القلم واكتب كلام بن عمار=اكتب كلامي واوصله يا شفاتي
وداعة الله يامودين الاخبار=ياواصل ٍحذروف وده وصاتي
قله سلمت من التواني والاوجار=وطلعت بين الورد والصادراتي
ويا بني لاتجهل بك كثيرات الاشوار=ومبداك خله عالي النايفاتي
ويا بني تراك الكان شاطر وبيطار=اوصيك وانته لاتضيع وصاتي
درب الشكاله للمناعير منثار=سوات عد ٍٍللورود زرفاتي
وليا لفيتوني بلذات واسرار=سوات دارٍ مكتسيه النباتي
وانصابها من جاهز النو قطار=يصبح زهرها في العبل ساطعات

وقال ايضا:-

يابو جري روح عسى الله يعافيك=الليل ممسي والسفر منتوينه
جعل الونيت الي سرح بك يوديك=يوصلك حياً بالنحاء مشتهينه
الي ليا جيته مشى في شهاويك=ومصفوطهم يابو جري خابرينه
يابوجري والله ماني بناسيك=لاتحسبن الوقت طالة سنينه
انا تراني فاول الوقت غاذيك=والدين من طول المدى كاتبينه
الكان ماخلصتني وين اوديك=بار العميل الي ما خلص عميله

وفي الختام نعتذر عن وجود أي خطأ كان او أي شئ سقط سهواٌ ونعتذر للجميع

وهذا الديوان مأخوذ من رواية احفادة وابنائه ومعد هذا الديوان هو ( جهز بن حذروف بن سلطان بن عمار بن بركات القلاع)
وأي شخص يجد عن هذا الشاعر المشهور اي قصيده اخرى فليبلغنا مشكوراً





وتقبلوو تحيات اخوكم
( متعب بن صالح العالي)

[ابن صنهوت]

لاهنت بيض الله وجهك والله يرحم سلطان

مشكور على ما تقوم يه من جهد لاهنت

[حميد السجايا]

شكرا يابن صنهوووت على مرورك طال عمرك



وهذا قليل من كثير الله يعااافيك

[خالد القلاع]

لاهنت بيض الله وجهك يامتعب

[خالد القلاع]

مشكورررررررررررين على هذا المنتدى الرائع وعساكم على القوه

[محمد العتيبي]

رحمه الله رحمة واسعه

قصائده نتذوق بها الشعر الاصيل والجزل

بيض الله وجهك يامتعب ونطمع بالمزيد

وسيضاف الديوان لدواوين شعراء عتيبه المثبته باعلى القسم

تحيتي
..

التوقيع

للتواصل عبر twitter تويتر al_bargawy@

[خالد القلاع]

السلام عليكم ورحمة الله وبركاته
مرحبا بك أخي °ˆ~*¤®§(*§*)§®¤*~ˆ°واصلو تقدمكم ياشباب وعساكم على القوه°ˆ~*¤®§(*§*)§®¤*~ˆ°تقبلوا خالص تحياتي
أخوكم خالد القلاع بارك الله بك يـــــاـــمــتـــعـــب وبيض الله وجهك

[خالد القلاع]

[حميد السجايا]

محمد العتيبي بيض الله وجهك ولاهنت يالغالي على تميزك وخدمتك




خالد القلاع لاهنت على مرورك