بسم الله الرحمن الرحيم
السلام عليكم ورحمة الله وبركاته
يسرني ويطيب لي أن أطرح لذائقتكم بعض من القصائد
المشهوره والتي وصفتها بـــ ( سبائك من ذهب ) .
للشاعر الشامخ والفريد / ســــداح العتيبي .
مهما كثرت المقدمات والتواصيف عن هذا الشاعر فبكل تأكيد لن تفيه حقه
ولن تبلغ ما يكنّه القلب من إعجاب شامخ لشاعر تعلّى الشموخ ..
أترككم مع سداااح :
ســـــداح وقصيدة في نصرة الرسول صلى الله عليه وسلم ..
ياموزع الصحف وقف لا تعداني=لاهنت عطني من اللي معك مطويّة
بحساب مانقبل التوزيع مجاني=شكرك على المطبعه لاتنقله ليّه
عطني لوان الجريده حسب ماجاني=اوراقها ميته واخبارها حيّه
تقول فيها الخبر حصري على شاني=تثير في صدري انواع العصبيّه
لاقلت هاد الخفوق وقرّ ميزاني =جتني بخشم الفتيل وولعت فيّه
ترمش عيوني على شعله ودخاني=دخان في هذي وشعله في هذيّه
ياطول بالي على ماحس وجداني=والحس لولاه ماعرف الحساسيّة
ماغير احايل ضميري قدر الامكاني=ومواكب الهم خيّالة ورجليّه
ياللي تنادون باسم حقوق الانساني=وين احترام الديانات السماويّه
اللي يثير الضغينه بين الادياني =بكره يصوّت على الحرب الصليبيّه
حقود والحقد فيك اشكال والواني=نصراني الدين والملّه يهوديّه
نازي ومتعنصر وملحد وشيطاني=وكنايسك عمروها بالحزازيّه
تقرا على الغانيه وتحضر الجاني=وتصوّر القسّ بين الشمس والفيّه
نبينا اطهر بشر يالمفتي الجاني=منصور برعاية اللي يدمح السيّه
رسول ورسالته من وحي رحماني=زاح الظلام وبعث للخلق ماويّه
مايلحقه زيف ولا يقفاه بهتاني =سيد البشر كلها ماينخلق زيّه
صلي الله وسلم وبارك بالاحساني=عليه لا حلّ بين الناس طاريّه
شريعته واضحه سنّه وقرءآني=ماهي خيالات واطباق خرافيّه
الله يسلّط على البابات من داني=لابوه بابا على ابو منهو اوبيّه
لـيّـن جـنــاب الـــود يـــا لـيّــن الـعــود=وألـطــف وأسـالـيـب المـحـبّـه عـديــده
خـــل الـقـسـا لاهـــبّ تسـتـاقـه الـنــود=وأحـــذر بـعــد مـــا سـاقـتـه تستـعـيـده
بإسـم الوفـا والحـب والطـيـب والـجـود=الــصــح عــيــده والـخـطــا لا تـعــيــده
علـيـك حــلّ الـحـبـل والـحـبـل مـعـقـود=تـعــقّــدت روس الـحــبــال الــجــويــده
وراك ساكـت والسـمـا بــروق ورعــود=والـلـيـل مـوحــش والهـبـايـب شـديــده
مدري حداك الصمت وأصبحـت محـدود=وألاّ أنّ صـوتــك فـيــه نـبــره جــديــده
تنـقـل كــلام شـفــاك بعـيـونـك الـســود=وفـي كـل نظـره منـك .. جمـلـه مفـيـده
كـم قلـت لــك مـأمـون والـسـدّ مـسـدود=والــشــك زايــــل والـهـقــاوي بـعـيــده
خوفي من اهل الرقص والنقص والزود=وبثّـي يـا إذاعـه وأنشـري يــا جـريـده
قلـبـي لـهـد كـبــدي وعـبــرّت مـلـهـود=وأنـتـه حـجـر قلـبـك وكـبـدك حـديـده ؟
خليّـتـنـي فـالـشـعـر حـــاوي ومـــردود=وعلّقتـنـي فــي بــاب بـيــت القـصـيـده
وأزريـت أغنّـي فيـك يـا بـاشـة الـخـود=مـمـا بـدالـي .. مــا بـقـا لـــي شـريــده
جـوارحــي لــرضــاك مـقـتـادهـا قــــود=تــقــول حـاكـمـنـي بــشــرع وعـقـيــده
لاشــك حـكـم العـشـق ماعـنـه منـشـود=وحـكـومـة الـعـشّـاق مـاهــي رشــيــده
أنـت اعتبـر مـا صـار ماهـوب مقصـود=وأنـا أعتبـر مـا صــار فـرصـه سعـيـده
على الله وش نحبّ و ش ندانـي =نعـدّ أيامنـا والعمـر فـانـي
تعبنـا نتبـع الدنيـا وشبنـا=نشيل ظنون وأحـلام وأمانـي
يدور الليل والصبـح يتنفـس=تحت حكـم المعيـن المستعانـي
وأنا قلبي يـدق وكـل دقـه=أركّبها علـى منطـق لسانـي
أغنّي والغنـا وهبـه مـن الله=ماجتني من فلان ومـن فلانـي
ولا أدري موهبـه وإلاّ وراثـه=لكنّه قسم مـن ربـي وجانـي
بسيط ودايم افكـاري بسيطـه=في بدع البيت وتركيب المعانـي
أروح إبها على شـداد المطيـه=واعود إبها على سرج الحصانـي
رصاصي من حـزام البندقيّـه=رميته وأصبح حزام الامانـي !
لو أن المدح من كل النواحـي=غمرنـي وأحتويتـه وأحتوانـي
وسط في مستواي ولي مقاسـي=أقدّمها علـى مـا الله عطانـي
أطقّ البـاب وأدخـل ماعليّـه=لو أن البـاب للطاقـه حدانـي
اشيل الكحل لعيون القصيـده=ولي غايه في تكحيـل الغوانـي
ليا كحلّتها فـي ربـع ساعـه=نتفت رموشها فاربـع ثوانـي !
وكم غيري من عقولٍ بصيـره=تـرز أعـلام وتعمّـر مبانـي
لقيت الخير فـي كنـز القناعـه=وقنعت ولا جذبني كنـز ثانـي
أنا ويّـا العلاقـات الحميمـه=في حرب ٍ طاحنه سـر وعيانـي
أضوّي لـي مصيبـه للحبيبـه=وأقـول الله بلاهـا وابتلانـي
ألا يا روح روحي لو جروحـي=تسولف لك عرفتي وش طوانـي
أغيب ولا نقـص قـدر المحبّـه=ولا هنتي وحبـك مـا يهانـي
مزاجي وانطوائـي وانتهـازي=وقلبي قلـب مغـرور وأنانـي
هذا وصفي في عينك وانتي اللي=( خذاني الشوق لعيونك خذاني )
وطيفك كل ما يضـوي عليّـه=يجاذب روحي وينفـض كيانـي
يسيّر بـي علـى وده وشفّـه=تبعته من مكـان إليـا مكانـي
في عيني يا بعد كـل الصبايـا=اشوفك باشة الغيـد الحسانـي
لكـن الله يحللـك ويبيحـك=مع ودي وشكـري وإمتنانـي
سلمتي وإختصار آخر علومـي=تركت الحب كـان الله هدانـي
أتحصّـن ميـر ماعنـدي منـاعـه=يستر الله مـن دواي ومـن طبيبـي
خاطري مشحون من كثـر إلتياعـه=يجحد العلّه وأنـا جرحـي عطيبـي
منكسر ما بيـن حبسـه وإندفاعـه=و واقـف ٍ بيـن المنـادي والمجيبـي
وأنت يا اللي بيني وبينـك طماعـه=لا تسلّمنـي ظنونـي وأتغـدي بـي
فرّد جروحي ليـا جاتـك جماعـه=ولا تخليّهـا تجمّـع ليـن أطيبـي ؟
لا تجاملنـي وحبـك عـن قناعـه=ما غصبتـك بالمحبّـه تنتحـي بـي
فيك روعه للغرام .. ومنـك راعـه=وأصدق العشّاق مقطوع النصيبـي !
سمّ وأسلم وأبشر وسمـع ٍ وطاعـه=ضارب ٍ سمعي على صوتك صليبـي
راح قلبي مثل أخوك مـن الرضاعـه=ورحت عنـيّ لا بعيـد ولا قريبـي
ما لحقني شك غيـر مـن القطاعـه=يا الله أقطع ف الهوى شكيّ وريبـي
لا تقول الحبّ يبغـا لـه شجاعـه=وأنت يا طيبك .. وأنا يا طيب طيبي !
حافـظ ٍ تاريـخ ميـلادك وداعـه=والزمان يدور والعمـر يعـدي بـي
كل عام وكل يـوم وكـل ساعـه=وأنت طيـبّ ومتعافـي يـا حبيبـي
وألاّ أنا عمري يخلـف الله ضياعـه=كلّ ما عيّد شبابـي .. عـاد شيبـي
سيّـدي كـل ٍ بطبعـه وإنطباعـه=كان ما طريّت جيبك طـرّ جيبـي ؟
وأعتبرني شاعـر وراعـي بضاعـه=يابس ٍ عرقي على الغصـن الرطيبـي
وأن سمعت اللي يطيب إلك إستماعه=قول صح لسـان سـداح العتيبـي
حبيبي هاك قلبي .. وأبحث اللي مشغل ٍ بالـك=تصفّح سيرته .. وأكشف خفايـاه وتفاصيلـه
من الأرشيف شوف اللي ما شيف وحطّ معدالك=ولا تحكم علـى دمّـه قبـل تقـرا تحاليلـه
تنقّل بين صفحاته مـدام البحـث يحـلا لـك=وتابع قصّته مع كل عاشق قـام يومـي لـه
صحيح أنّه كبير وكـلّ درب ٍ يآصلـه سالـك=لكنّه دون بابه حـطّ لـه .. لفّـه وتحويلـه
علاقاته كثيره مير مـا جاتـه مـن أمثالـك=تجيه من الوهم وأطول علاقه عمرها ليلـه !
دخلها من طرف واحد وصار الوصل متهالـك=وطلع منها قبل تفشي دموعـه سـرّ منديلـه
وبعد شمسك بدت تكبر عليه ويكبـر ظلالـك=تعدّل حال طقسه من غرامك وأعتـدل ميلـه
بدت تلعب هبوبك وألتـوا عقـدك بسلسالـك=وصار اللي ما بين العقد والسلسال يا ويلـه !
دفع دقّات نبضه كلها وأمسـت علـى جالـك=وجلس مع عزف دقاته يغنـي لـك مواويلـه
رضخ لك لين صرت اللي تجوّل فيـه بلحالـك=لو أنّه من قديم الوقت مـا تشـرب فناجيلـه
ترفّق بـه ولا ترمـي عليـه اللـي يورّالـك=بعيد الشك عن بذرة غـلاه وعـن محاصيلـه
تحكّم به على كيفك بعـد مـا طـاب منزالـك=على عرشه ولا ترضى على الحاكـم بتبديلـه
يحبّك والشعور الحيّ .. يحيى له ويحيى لـك=يعيش الحبّ لو شان الزمـان وقلّـت الحيلـه
كذا والبحث جاري وأنت في حلّـك وترحالـك=تجرّه مع دروبك ليـن ترجـع فـي مداهيلـه
يقولون العرب .. يا حبّ فـال الله ولا فالـك=وأنا أقول الجفا بلوى .. ويا فرقا من أنتي له !
ألا يا شواعير الغزل زيـّنوا معناه = سموّ المحبّه ما دخل بيتها خلـّه
تنقوّا كلام ٍ ينعش الوجد من مبداه =علشان نلفت له نظرنا ونفطن لّه
لا يخدش حيا الحبّ العفيف ويقلّ إحلاه =ما نقبل به الخدش ولا نرضا له الزلـّه
تعلوّا به اللي كلّ ما شيّدوا مبناه= بدت شمسه وهاض المولّع تحت ظلـّه
وأشوفه يسوقونه .. وبلواي من بلواه = على الدرب الأعوج تلحق الشلّه الشلـّه
تغنيّ به الأفواه .. وكلّ ٍ على ليلاه = ويا من يعين طب لا كبرت العلـّه
على جرّته ياليت مـــن دوّره يلقاه = لعلـّه بقا له ما بقى .. ما غدا كلّه
عسى الله يصلح حاله وحال من غنّاه = الأقوال مسلوله .. والأحوال منسلــّه
يا حلوه ليا حرّك شعور الغلا حلواه =تزين المثايل والتغزّل على حلــّه
وأنا ماني بشاعر غزل مير أحوف حماه =وقلبي يبس وعروقي الخضر مبتلّـه
على العرف والمعروف يوم أكتبه وأقراه = طليق الجروح ونزعة الروح محتلـّه
حبيبي على الضلع القصيّر يعدّ خطاه = أهيم بغرامه وأطوي الشوق وأفلـّه
أحبّه وأودّه وأحشمه وأعشقه وأهواه =وأردّه وأصدّه وأقطع الوصل وأملـّه !
شعوري معه مجنون لا رحم أبو مجناه =بغيته على دليّ وأخذني على دلـّــه
لو أن الحبايب كلـّهم .. مثله وشرواه =تميّز لو أنـّه يخلف الدين والملــّه
مفاتيـح قلبـي بعـد سلـّمتها يمنـاه = تلقـّى الخلا وأعطى المفاتيح عبدالله !
سبحانه اللي يدوم وغير وجهـه مـادام=بأمره يمـد الشفـاء والغمّـه يزيلهـا
العالي المؤمن العـدل الكريـم السـلام=الوالي اللي جميع الخلـق والـي لهـا
أعوذ به من شرور الجن وبغض الأنام=ومن عقدة أهل العقود ومـن محابيلهـا
ما يحذفون الحـلال ألاّ عيـال الحـرام=ناس ٍ نغزها بليس وقـام يومـي لهـا
اللي في قلبه صدا واللي في خشمه عرام=وكبودها سود مدري ويش اسوي لهـا
الحمـدلله زان الحـال والحـظ قــام=ولدن لقـاح الليالـي وأحملـن حيلهـا
بانت وجيـهٍ تبادلنـي غـلا وإحتـرام=وغابـت وجيـه ٍ تجاملنـي بتمثيلهـا
والحيّه اللي تشيل السـمّ والسـمّ سـام=أقـرا علـى راسهـا وتـردّه لذيلهـا
مابيني وبينكم يا أهل الضغايـن كـلام=ألاّ الفلق .. وآية الكرسـي وترتيلهـا
ولا حلّقت فالظـلام ألاّ طيـور الظـلام=واليا انتفض ريشهـا شبّـت قناديلهـا
شكري على البندقيه والفشق والحـزام=وأم المفاتـيـل تنجيـهـا مفاتيلـهـا
واقف على حيلي وهجسي طواه الحيـام=عسى القصيده معي تآقف على حيلهـا
تقول بيني وبين الشعـر نقطـة نظـام=من يردع اهل المثايـل عـن تماثيلهـا
والنبره اللي في صوتي من ثلاثين عام=أطيـح واحطّهـا .. وأقـوم وأشيلهـا
ترادفت واستقامت والطريـق أستقـام=وأستقتهـا حسـب معناهـا وتأويلهـا
الضبط والربط لو ما جاء على مايـرام=الجابـه المايلـه مـا يعتـدل ميلـهـا
عز الله اني قنعت من الهوى والغـرام=وسرّتني اللي على ليلي .. سرا ليلهـا
حمامة ٍ من لحنها غيـر كـل الحمـام=أمسيت معها تغنيّ لي .. وأغنـيّ لهـا
يا شين حبٍ يجي بين اللحـم والعظـام=ما يجني من الضلـوع ألاّ محاصيلهـا
يا صاحبي لو نقول الطقّ فـك اللحـام=طقّ المواليـف مـا يقطـع مواصيلهـا
وشلون ما أهتمّ بك وأنته محط إهتمـام=ومحبّتك في ضميري مسـرج ٍ خيلهـا
أربط حزام الأمان .. الخوف ماله حزام=وأخفض جناح الموده لين أعـديّ لهـا
تعال يكرم جنابـك يـا عزيـز المقـام=بلاش مـن طـاري الدمعـه ومنديلهـا
أقول أحبك وأنا صـادق علـيّ الحـرام=لازال غيـث المشاعـر دارجٍ سيلهـا
أما أستملني غلا .. وألاّ عليك السـلام=لابـد فرقـاك تاصلـنـي مراسيلـهـا
اعذروني عن غيـاب ٍ زلتـه مدموحـه=واسمحو لي اراجـع سيرتـي واسجلـي
غبت كلي والدوافـع كلهـا مشروحـه=افتحو كشف الحظور وسجلونـي كلـي
هكذا طعـم المحبـه حلـوه ومملوحـه=وهكذا الفرقاء ممله والوصـال مسلـي
العلم مرفـوع يالـي ترفعـون اللوحـه=الشحيح يصـد عنـي والكريـم يهلـي
دام باقي في ضميـري نافـذه مفتوحـه=عبرها ينفذ شعوري ليـن يبـرد غلـي
قلبي المجروح مدري كبدي المجروحـه=جر عمرك يالنسم بين الضلـوع وقلـي
دمعتي تبحث خفاي وضحكتي مذبوحـه=هينه والصبر طبعـي والقناعـه دلـي
مابقى للشعر واهص والهجوس تشوحـه=بين منقود الرفيق وبين شرهـت خلـي
انقرض نسل القصيد وراح راحت روحه=واكثر الشعار ولـت والزمـان مولـي
انتكس حاله وحال الساحـه المسيوحـه=الحصن تضبط وتربط والكديـش تفلـي
يامعين الصايبه والمخطيـه مسموحـه=قام يمشي مع رصيف الشمس راكب اللي
جاك وقت الـذره المفتـره الدرموحـه=عقب بادل مارتين وبـادت العصملـي
يفزع الطحطوح والا تفزع الطحطوحـه=الدعـاوي حطهـا واشتلهـا بمجـلـي
كيف صدرت الفتاوي يابناخـي توحـه=وانت لاتعرف تصوم ولا تعرف تصلي
كل ماهب النسيـم استنزلـت منفوحـه=والعليـا يامشـاء الله حظهـا متعـلـي
القضيه بين شنطان اللحـاء مطروحـه=ينقطع حبـل النفـاق وعقدتـه تنحلـي
طاوله واربع كراسي وامسيه واصبوحه=والله الله ميـر حلـي ياحـلاوه حلـي
يا صبح نورك عليـه إثبـات=شمسك على الكـون شعّالـه
والليـل لـو يستـر الغـرات=يبدي مـن اسـراره لحالـه
البارحه والهجـوس أفـوات=مابيـن رجـلـي وخيـالـه
شالن في صدري ثلاث اصوات=ونوم العوافـي بـرن حالـه
عقلت قلبـي عـن السجـات=وعـوّدت أسريّـه بعقـالـه
وروابعه عقب راحـت جـات=تحـط حمـلـه وتشتـالـه
وأمسيت أجرّ النسم بسكـات=وكبرت على القالـه القالـه
يا طول صبري على الميـلات=وقت العنـا فـاض مكيالـه
حنا في وقت ٍ مـن الاوقـات=يضفي على الخلـق سلالـه
زادت دشـوش الفضائـيـات=وانا الفضـا مالـي ومالـه
جاء مع عرب سات نايل سات=يرسـل وزانــه ويبـرالـه
موجة تطور على الشاشـات=ريموتهـا يكـبـس الآلــه
والمجد مـن بدهـا بالـذات=يا جعل مـا يقطـع ارسالـه
ما تعرض ألا ّ عبـر وآيـات=وصلّوا علـى محمـد وآلـه
والسلّـه الباقيـه هيـهـات=ماهـيـب لله وإنّــا لــه
قمصان نوم وعلـوم وشـات=ـث ٍ فـال الله ولا فـالـه
ارسل سلامك وهاك وهـات=وكـلٍ محـضّـر بجـوالـه
عسل وصل والحنونـه جـات=دجـال يضـحـك لدجـالـه
ناس ٍ بلاهـا حياهـا مـات=شبـاب الاسـلام يرثـالـه
الفن مـع كاشـف العـورات=يصلـح لشـرواه وامثـالـه
يـا الله لاتقطـع الهـقـوات=وتبلّـغ الـعـود فـعيـالـه
يادافـع الشعـر لاتنسـاق مـن دونـي=مادمـت فـي ذمتـي سـج القـدم فيـه
خلـك علـى نيتـك وظنونـك ظنونـي=وانـا ماغيـر عليـك الظـن والنـيـه
البارحـه مــرت الاحــلام بعيـونـي=احلام سـوداء ماهـي باحـلام ورديـه
امسيت اصوت لها واصبحـت مغبونـي=تفسيرهـا بـيـن هـاذيـه و هـاذيـه
لو تستحي دمعتي مـن ضحكـه سنونـي=ماكـان حطـت بنـون العيـن مـاريـه
اللـي تناسيتوهـم والـلـي تناسـونـي=بالخيـر مذكـوره وبالخـيـر منسـيـه
والحب لاهـز صـدري حـرك شجونـي=حطبت حـدب الضلـوع ونارهـا حيـه
اكثر جروحـي سببهـا اللـي يحبونـي=جـرح الحبايـب عطيـب وكيتـه كيـه
تبكي على راسي وتضحك علـى متونـي=ونفضت خرجي وطـاح الـداب والحيـه
وين انت ياللي عليـك اكوسـر لحونـي=وهيجنت باسمك وشلت اغلـى هجينيـه
يوم انت حدسي و رسمي واصدق ضنوني=من لامنـي فـي غرامـك لعنبـو حيـه
ياسيـد الحـب معـك الحـب مامونـي=وانـا علـى جرتـك عينـي شقـاويـه
مجبور لاشفتنـي ماشـي علـى هونـي=حاولت وازريـت لاكسـر قيـد رجليـه
يا رهيف الحس يا عذب الخصال=المحبّـه لـد عينـك يمّـهـا
منت ناقـص ميـر لله الكمـال=فيك حاجه مـا قـدرت تتمّهـا
تنفعل وأنا مـا أحـب الإنفعـال=وتلبس الضيقه وتنفض كمّهـا
لا تقول المسك من دم الغـزال=وأغلب الغزلان ما أثقل دمّها ؟
معتقلني يا هوى البال إعتقـال=شب نـارك والمياسـم حمّهـا
رز خشمك وأزعل وروح وتعال=والهبوب اللـي تمـرّك شمّهـا
مير جاوبني على قـد السـوال=ليـه تنثـر حيرتـي وتلمّهـا
أن ذبحتك بالغلا ذبحـك حـلال=وان تركتك كل نفـس وهمّهـا
سقت لك كل الجوارح بالعـدال=وأنت ابوها عقب جاتك سمّهـا
وصورتك لا جابها وحي الخيال=عيني أخطتهـا وقلبـي خمّهـا
لا تخليني معك مضـرب مثـال=أدعس الحيـه تمـوت بسمّهـا
خذ نصيحه تنفعك في كل حـال=كان لك قلـب ٍ كبيـر يضمّهـا
أعتقد ما يجهلك فرق الرجـال=ولا يغرّك مدحهـا مـن ذمّهـا
أنتبه تعطي لخلـق الله مجـال=شرهتي مابين أبوهـا وأمّهـا
القلب في سوق الهوى لجلك يغيـض ويمتلـي=ماهوب راع مساومـه أمّـا أشتـره وإلاّ بعـه
يوم الشعور مداوله .. وش قلت لك وش قلت لي=راجع حديث العاطفـه وأقتـصّ دربـه وأتبعـه
وألاّ بلاش أنسى مافات ومات .. وأسمع ما يلي=لا تترك الملتاع واقف لك على راس أصبعـه !
لا تكسر شداد الجمل .. لين آكل لسـان الطلـي=وإليا نهض حظي وحظك شقّ صـدري وأجبعـه
من قال لك ( ما الحـبّ الآّ للحبيـب الأوّلـي )=يا خامس أحبابي معك نسيـت حـبّ الأربعـه !
أضحك معي .. وأضحك معك لكنّ لا تضحك علي=طبعـي علشانـك تعبـت أعوبلـه وأطوبـعـه
شتّتني وأنـا عليـك .. أميـح ميحـات الدلـي=ودخّلتني فالزوبعه وأنـا مـا أعـرف الزوبعـه
وغنيّت لك قافين والمعنى علـى وجـه ٍ جلـي=أختر حداها وأحفظه وأفتـح ضلوعـك وأطبعـه
أقولها .. وأن مـا تلقيّتـك .. تلقيّـت الخلـي=يا منبع الحـب الحقيقـي علّنـي مـن منبعـه
يا حـزة الضيـق فينـا مـا يكفيّنـا= روحي مع الضيق لا نخطيـه ونخمّـه
يجيبنـا الهـمّ .. والهمّـه توديّـنـا= نجاهد الهـمّ .. وإلاّ نجاهـد الهمّـه
ما نحصي أحلامنا من كثـر أمانينـا= والواقع المرّ مـا تبـرا بـه الذمّـه
والعولمـه يـوم لـدّت عينهـا فينـا= قمنا نعـدّ النجـوم وضاعـت اليمّـه
علـى هناديبهـا شابـت نواصيـنـا= والعذر وقت العناء ماهوب أخو شمّه !
لو نحفظ أسلامنـا مـا تبّـت يدينـا= وين أنت يا اللي تحفظ العلم وتصمّـه
نكتـب ونقـرا ولا نعـرب معانيـنـا= ونعلّق الحرف بين الرفـع والضمّـه
الشّعـر والعاطفـه والبحـر والمينـا= أفكـار متناثـره وحـروف ملتـمّـه
نضحك على ماش وأدنى مـا يبكيّنـا= شجعان .. والذل مدخلنا تحـت كمّـه
نمسـي ونصبـح وحامينـا حرامينـا= ونخاف لو نمدحه ما نقـدر نذمّـه !
كـل ٍ يمـدّ النظـر و الله لا يعمينـا= والحـق ّ لامرّنـا مـا نلتفـت يمّـه
وعلى القضايـا نعيّـن مستشارينـا= في مجلس الشوره وفي مجلس الأمّه
تشكيـل شكلـي لتشريـع القوانينـا= دايـم حكوماتنـا بالشكـل مهتـمّـه
وقاداتنـا تجتمـع بالعسـر واللينـا=ما حلّت المعضله لـو تعقـد القمّـه
والشرق لو نشتكي لـه مـا يدانينـا=والغرب ما يستحي معنا علـى دمّـه
لكـن سبحـان محييهـم ومحييـنـا=بأمره يزيح الظـلام ويجلـي الغمّـه
يا وسع صدري مير للضيـق مرهـون=وأن ما توسّـع كلّـه .. يضيـق كلّـه
يمشي تحت رهن الإشاره على الهـون=وترمـي عليـه مـن السلـوك وتتلّـه
وسلوكهـا مـا بيـن ناشـف ومدهـون=وصـدري ليـا قامـت تلامـس تعلّـه
أحيان أجامـل وأتـرك السـدّ مدفـون=وأضحك مـا بيـن الخطّـر المسفهلّـه
وأحيان أجي مشحون .. وأروح مشحون=وأقـول مـن يعقـد حجاجـي يفـلّـه
ثـلاث تحكمنـي ولا قلـت وش لـون=المعرفـه .. والعاطفـه .. والجبـلّـه
العقل صاحـي لكـن القلـب مجنـون=والكـل منهـم نظـرتـه مستقـلّـه !
يـا صاحبـي مـا للمحبيّـن قـانـون=والحـبّ لغـز .. ولا عرفنـا نحـلّـه
قلبـك مثـل قلبـي مكبّـل ومسجـون=أحــرار مـيـر قلوبـنـا مستحـلّـه
عسى الغـلا لازال بالحفـظ والصـون=والله يبيـحـه لا تـغـيّـر مـحـلّـه
أهديتنـي جمـره علـى راس غليـون=وأهديتـك مـن العمـر شيحـه وفلّـه
ورغم إختلاف المـدّ لا زلـت ممنـون=والشـوق يآخذنـي علـى كـل مـلّـه
فوّحت دمّي لين صـار أشقـر اللـون=وأخـذت مـن مجـراه فنجـال دلّــه
ما غير أغنّي فيـك لـو كنـت مغبـون=يا ملّ قلبي من غرامك يـا مـن لّـه !
دايم ضحايا العشـق لإجلـه يضحّـون=كم فاض مـن كثـر الضحايـا سجلّـه
وأنـا غديـت بحكـم فاتـن ومفـتـون=راضي بحكم الحـبّ .. والحكـم للّـه
وأن قـام يكبـر بيننـا شاسـع البـون=أرفـق علـيّ وشاسـع البـون قـلّـه
عـز الله أنّ الشـكّ ماهـوب مامـون=سيـف الجفـا البتـار يمكـن يسـلّـه
أقنع لو أنّ الحـال مـن دون فـي دون=وأخـذ الكـلام اللـي عليـه الأدلّــه
لا تشتكي لـي والعـرب وش يقولـون=شكـوا ً لغـيـر الله تـراهـا مـذلّـه
تغيـب ويدفعنـي علـى وصلـك الشـوق = يـا اللـي بعـد مـا غبـت جبـت الغنـايـم
برفوق تجرحنـي .. وأنـا أوّن برفـوق = علقّـتـنـي .. بــيــن الـتـهــم والـظـلايــم
يـا طيّـب السيـره .. ويـا راقـي الـذوق = صبـري علـى التجريـح ماهـوب دايــم
دوبك علـى قلـب ٍ مـن الضيـق مخنـوق = زادت عـلـيــه الـمـعـضـلات الـجـسـايـم
لـولا أنّ ربـي خالـقـه وســط صـنـدوق = يمـديـه عــن صــدري يـــذبّ الـخـرايـم
علاقـتـي بــك كنّـهـا حـالــة الـســوق = مجـلـوبـة ٍ مـــا بـيــن بـايــع وسـايــم
سهم المواصل تحت وسهم الجفا فـوق = ومــؤشــرات الــحــبّ عــيّــت تــلايـــم
بيني وبين الشمس .. شرهات وحقوق = هـاذي ثـلاث شـهـور .. والـجـوّ غـايـم
أشــــــاهـــــــد درب الـــتـــبّــــانــــه = بــالــمــجـــهـــر والــتــلّــســكــوبــي
لـوعــيــنــي مـــاهــــي شــفــقــانــه = ألاّ لـــمـــشـــاهـــد مـــحـــبـــوبــــي
مــــيـــــر الـــمـــديـــون وديّـــــانـــــه = مـــثــــل الــنــاهـــب والـمـنــهــوبــي
قـــــام الـفــضــا حــســـب إمـكــانــه = يـــرســــل لــعــيــونــي مــنـــدوبـــي
وســــلّـــــة مـــنـــدوبـــه مــلــيــانـــه = بــالــمــمــنـــوع وبــالــمــرغــوبـــي
روتــانــا مـــــن هـــــي روتــانـــه ؟ = مـــــــــدري لـــكّـــنـــه مـــذنـــوبـــي
مـــــن فــيــكــم يـــعـــرف عــنــوانــه = عــــبــــر الــبـــريـــد الــحــاســوبــي
عـــنـــدي لــــــه جــمــلــه عــجــلانــه = تـــركـــض كـاتـبــهــا بـأسـلــوبــي
خـــــــاف الله ربــــــــك ســبــحــانــه = شــرعــه فــــي عــرضــك مـسـلـوبـي
فــــــــــنّ وفـــــنّـــــان وفـــنّـــانــــه = والــعــايـــب يـــرقــــص لـلــعــوبــي
وهـــالـــه ســـرحـــان الـســرحــانــه = مـدخـلـهــا فـــــي كــــــمّ الــثــوبــي
عـــجــــوز ابــلـــيـــس الـفـســقــانــه = أســـتـــاذة حـــســــب الـمـطـلــوبــي
مــــــع بـــنـــت الــلــيــل الـعـريــانــه = والــمــشــهــد كــــلّــــه مــلــعــوبــي
نــكـــبـــه وأخـــــــــلاق ٍ تــلــفــانـــه = والــجــيـــل الــتــالـــي مــنــكــوبــي
عـــلــــى يـــادانــــه يـــــــا دانــــــــه = هـــــزّي وأهــتـــزّي يـــــا روبـــــي
عـــــرض ٍِ فــاســـد مــالـــه خـــانـــه = وبـــســــم الله عـــنّــــا مـحــجــوبــي
يـا مخـاوي الشعّـار عيّـنـت الأطـمـاع = شابـت رموشـك مـا كسـبـت الجمـالـه
بانـت مواهبهـم عـلـى طــقّ الأصـبـاع = وأنت أجودي عـن طـقّ الأصبـاع دالـه
هـل تعلـم أن الشّـعـر حـرفـه وصـنّـاع = مــجــال نـسـعـابـه لــحــل الـبـطـالــه
وهـل تعـلـم أن الـلـي يغنّـونـه أنــواع = وأن مــا صـلـح لــك نــوع دوّر بـدالــه
فيهم جمال كبار .. وسباع .. وضبـاع = وكديـش ..وخيـول .. وغــزال وغـزالـه
وزواحف ٍ تزخف علـى روس الأكـواع = وطـيـور وكـــلٍ يـكـفـخ بـمــا طـرالــه
مـيـدان والـلـي يـدخـلـه يـهـبـد الـقــاع = والـكــذب يـهــذب والمـجـامـل بـرالــه
تـزبّــروا مـابـيـن شــاشــه ومــذيــاع = ومــن يـشـرب الفنـجـال كــبّ البيـالـه
واللـي طويـل لـسـان وعيـونـه وســاع = يـآخـذ مــن الباقـيـن صـــك الـوكـالـه
وعقـب احتمـت والذائقـه زبدهـا مــاع = طـاح العشـاء بـيـن الـرشـا والمحـالـه
ساحة وباء غاضت وفاضت بالأوجاع = وكـم يدفـع الوجعـان مــن حــرّ مـالـه
الـيــوم كـــل ٍ يـبــدع وبـدعــه إبـــداع = والـبـدع بعـضـه بـدعــة ٍ مـــن ضـلالــه
لــو أن وجــه الشّـعـر مافـوقـه قـنـاع = مــا قــدمّ ابــن عــون قــاف إعـتـزالـه
دار دولاب الهواجيـس والفكــــر استــــدار= والقريحــــه ودّهــا تـــدرج .. ولا ودّها
قمـت ادرّجــها ودارت علــى نفـس المـدار= وبيّحت ســديّ عســى الله يبيّح سدّها
أحطب ضلوعـي واغنـي لهـا واشبّ نـــار= وأطلــق ظنـوني علــى نارها وارتدّها
وأفرك عيونـي ليا عــوّدت تقــــدح شرار= لين يبــرد نونــها .. والمدامــــع سدّها
دوب ما هبـّـت هبوبـي وطيـر البــــال طار= مالي الاّ أقرب من الروح واخطب ودّها
هكـذا الدنيـا .. دروس وتجـارب واعتبـــار= ولو نجـي في صفـّها وقــّـفتنا ضدّها
للشعـــر قدر ومهابـه .. وللشاعــر وقـــار= ومن بناهــا بالوفـا والفخــر ما هدّها
اسمحــوا لي وأقنعــوا يا طويلين العمـار= شـرّفـتني مـن طرفكـم وعندي ردّها
ما استعرت البدع والنظم واسمي ( مستعار )= غايتي قــديّ وانا حسـب ظنيّ قدّها
ولا كتبتـه طامعن صيـت وسمعه واشتهار= والمعــارف بعضها .. يخلف الله كدّههــا
صح يمكـن ما يصير أحتدي .. لكّن صار= دام لي مقصد في نظم البيوت وعدّها
ما احتـديت عـن المواقف ولا ضويّت عار= واللـــوازم واقـفن دونـها واســـدّها
الخطـا منـيّ .. ومنكـــم قبــول الإعتذار= سيـرّوها بالنقـا ليـن تاصــل حدّها
ما تضيــع اشـــواركم في محلّ الإعتبار= يا رجالـن تكـسب الطيبـــّه وتمدّها
ياســلام الله يضفي علـــى شمس النهار=ما ترفّ العين والنار تحرق خدّها
يـاكــثــر شــعـــاّر الـبــلــد كــثـــراه = فـــي كـــل شـــارع شـاعــر يـلالــي
لـــــو أنّـــهـــم يـــبـــدون بـــســـم الله = مـــاقـــام الأوّل يــلــعـــن الــتــالـــي
ماقلـت لـك يـا سيـد الجـرح مـجـروح = أيضـا ولانــي مــن فـراقـك جـزوعـي
أنتـه لـيـا حبـيـت مخـطـي ومسـمـوح = وانـــا لـيــا حـبـيـت حـبـيـت كـوعــي
مرثية قالها الشاعر / سداح .. في فقيد الشعر والشعراء ( فيصل الرياحي ) رحمه الله تعالى .
رزنامة الأيـام مـع مـرّ الأيـام=ترزم وتدفعهـا هبـوب الرياحـي
ترمي سهمها كل ما طيرهـا حـام=وطير السعد منها كسير الجناحـي
يا مرتجين الخير من مطلع العـام=الشر زاد وساد .. والخير ماحـي
لو بثّت الأخبار معها النباء الهـام=يا ليت ما بثّـت وفـاة الرياحـي
أوّ ليتها كانت من حساب الأوهـام=لاشكّ علم الموت ما بـه مزاحـي
دقّات قلبي عنـد تحطيـم الأرقـام=تسطي ويبطي خاطري ما أستراحي
لا والله إلاّ مات فـدّاح الأخصـام=اللي عليه الشعّـر جـرّ المناحـي
علم وفرقه بان عن كـلّ الأعـلام=رفرف .. وصابته المنايا وطاحـي
بيطار عدّ وردّ .. شامخ ومقـدام=جبل محصّن من جميـع النواحـي
حاكم شعر .. مدام للشّعـر حكـام=كم زاح حكمه حاكم ٍ مـا يزاحـي
له سيرة ٍ بيضاء وله سيف صرّام=وإليا جرح يصرف علاج الجراحي
مدات كفّـه بالوفـاء حظهـا قـام=ماهيب مدّات الكفـوف الشحاحـي
من عزوة ٍ تجمع عزيزن وكـرام=أهل المراجل مبعديـن الشباحـي
فـي حبّهـم والله مانيـب منـلام=والحبّ ما بيـن القبايـل مباحـي
أعزّي الأصحاب من قلب منضـام=يا كبر همّك يا القلوب الصحاحـي
وأعزي الشعّار من كـلّ الاقـوام=في فقد طير ٍ من طيور الفلاحـي
عساه بالفردوس في ظل الإسـلام=من رحمة الله لا بس ٍ له وشاحي
يآرد على حوض النبي خير الأنام=مثواه في الجنّه .. وشربه قراحي
عن رواية حفص .. لا رتّل سعود الشريم=كل ضيقه .. راودت خاطري / يا ويلها
قام يجلدها بصوته .. من الذكر الحكيـم =أسمع الآيـات .. و أخشع مع ترتيلهـا ..!
الهوى الغلاب .. والنفس / وإبليس الرجيم=تدفع ابن آدم لحـطّ الهمـوم وشيلهـا ..!
ياسـعـود لا تـكـثـر عـلــيّ الـطـواريـق = ملـيـان شـعــر .. ولا أتـحـمّـل زيـــاده
أخــاف بـيـن الـغـرغـره والتشـاهـيـق = تفيـض روحـي مـا نطقـت الشـهـاده !
آمل أن يحوز ماقدمته على رضاكم ..
تحيتي
...
« آخـــر الـــمـــشـــاركــــات »
13-Mar-2009, 12:05 AM
( ســداح ) ســبـــ من ذهب ـائك (ديوان)
العرض العادي
