مد يمناك ياراعي الشفر = واستلم ردنا وامش بنهار

[لطام العايلين]

رجاء وخاص من الاداره

اذا حذفت سفهاء حرب قصائد السب في ملتقى حرب وتوقفت عنه ان تحذف هذه القصيده

ننزلها مكرهين كدفاع عن النفس ونتمنى ان لانضطر لانزال غيرها

وهذا مرد الشاعر كديميس العصيمي على شعراء حرب عضيب والحثل للي ارسلوها على شفر..

مد يمناك ياراعي الشفر = واستلم ردنا وامش بنهار
انصرف دون تقدير وقدر= ومن هدر قدرنا ماله وقار
ونحر اللي يبا منا العذر = مهبل اللي يبا منا العذار
لا تحرا العذر يبا الدبر= من خصيمن على قومه يغار
وقل لربعك يشبون الفنر = واحتزم يالقصير من القصار
وكل من له بصيره اوبصر= خلهم للطلب في الانتظار
العصيمي دعيتوه وحضر=وفي المحاضر كلام الحر حار
والمعاني لها بطن وظهر=ولا تصير البطون بلا عشار
وخصمكم معه مفراص ذكر=ضربته بالبدن تحدث مضار
ضربته ماتموج عن الصدر=ولا يرده عن القلب الستار
يالحرابي تعديت الحكر=اثر غوجك قموزن للخبار
انت عندك كلام بلا حصر = مير قافيك توقيع القرار
من هل المعرفة وهل النظر= اثبت افعال جدك بالمنار
كان عند بصر قص الاثر=وتدري انك من اصحاب الاعسار
ولو تشبثت من مركز فقر= مايقوم الفقير مع التجار
انت مفلس وجدك ما تجر= عندكم نقذتن خيبة دبار
فرقنا عنك بايام العسر= مثل فرق الحصان عن الحمار
يوم الايام من مد لجزر=كم حريبن منا شكا العوار
وكم طويلن يطاولنا قصر= وكم حريبن يواعدنا ونار
ماوفى بالوعد لانه سبر=وشاف نمرا لها نور و شرار
لابتي في اللقاء عزم وصبر= بساعة يبلغ القلب الزرار
نكسب المجد باليوم الاغر=وقبلانا من روس الكبار
يوم نادر هل العارض شهر=عبلة الضال صارت له مطار
جمع الناس من بدو وحضر=واعلن الحرب واصدر له قرار
وجرها من حنيذ ومن هجر=وقال نضرب على الهيلا الحصار
وشب نار الفتيله واستعر=وكل يومن يزيد الاستعار
جمعهم مثل زيران البحر=كل ماراح زارن قام زار
ومشعل الحرب من يمه عبر=ومن قبلنا وضد النار نار
المشوك مثل وبل المطر=والرديني مثل حذف الجمار
واظلم الجو مايوجد سفر= وغابت الشمس مثناة النهار
وعقب تسعة عشر يومن هزر=وفر وجه الكحيلة واستدار
والزعامة تقفاها الجبر=ولا ومن لين حول في الغوار
عمرنا مانحنينا للامر=كود من عقب صولات اختبار
يوم وقعة طلال ام العبر=بعض الايام عبرة واعتبار
دايخ الراس من قو الدجر=زارنا بالطوابير الكثار
وقام معه الدويش ولا قدر= يخترق جمعنا لو كان اغار
مثل وصف الجراد اليا انتشر=جمعهم عند خط الانتشار
وجمعنا له قلوبن من حجر=بالملمات يهدون العمار
يوم قمنا بعدلات القطر=ماتغض العيون عن العيار
ادبر الجمع عنا وانحدر=وافترق عقب ماطاح الشعار
واصبح العسر من بعده يسر=واقفت الخيل غاشيها الحمار
وهيلعي الجبل جاه السبر = بالخبر من قطامي الحرار
يوم عروى نويناه بسفر =مار قام وسبقنا بالمغار
بعد جاه الخبر منا كشر = واصطفق من يمين ومن يسار
وجمع الناس من غرب وحدر = وجرها من جبل شمر وسار
وقال حث الركايب بالعجر = لايفوت السناعيس القطار
لاتجينا مقابيس القشر = وينفلت من يمانينا الخيار
جمعهم قال شيخ معتبر = حسبته تسعة الاف جبار
وصبحونا بعد وقت الفجر = حسب تقرير خط المستشار
وهزنا مار حصله صخر = كل ماطقه المخباط عار
وقبله هذا ترا عنده خبر = عن صلفنا ليا ثار الغبار
نقطع الراس ونفج النحر = بالمهند وصلفات المثار
وراجت الخيل و الجيش العطر = وكل جمعٍ يريد الانتصار
والسطامي من الغوج انشطر= نصف اقعى عليه ونصف طار
وعادة النمر ليا من زجر = مادركه مخلبه حطه دمار
شيخنا للي ليا نيدي ظهر = مايهاب العدو من حيث صار
وهيلعي الجبل قام وعثر = والتفت طير شلوي للفرار
مار جاه المدد جمع الحضر = وارجحت كفته عقب انهيار
وعقب هذا عقدنا المؤتمر = وصار في لامر خير واختيار
وقام وادى مجاهيم وصفر = وقبل ماكان يصخي بالبكار
وشيخنا ادى له القحص الشقر = مثل وصف الادام ليا استذار
ولا حدن شاف للثاني شكر = كلن اقام اقفى وعينه للادار
ولو هزمنا كما قال الغجر = ماعطانا ولا فرسن حوار
ولا طلب وفدنا في المختصر = وفاوضه في الكبار وفالصغار
وفي ربيع الرحا مد الجسر = من كراديس خيل ومن حرار
مد شره لكن احنا الاشر = ليا تغشى المراقيب الكرار
ودرات المعركه دورة كفر = منتون ياخذ الشرفا طيار
مار قدمه معدلة العجر = في المعارك على الرده جسار
يومنا قمنا وحذفنا الغتر = عند تالي المغاتير الخيار
دون الاذواد حسكات الوبر = والمهابه وكسر الاعتبار
اشتبكنا بسلات البتر = لين دم الجميع اروى العفار
وافترقنا على مثل الجمر = كل واحد يبي من ذاك ثار
والمعارك معه فوق الحصر= مار نذكر بعضهن باختصار
ولا فترنا وجنده مافتر = كل عام وتروج بنا المهار
ان فرصنا ماعمره جفر = وان فرصنا صبرنا باقتدار
وكل عام ٍ عليه ادهى وامر = لين حتى جنحها للانحدار
مانتصرنا عليه ولا انتصر = والحقيقه حصل ضربن قرار
ومات منهم ومن قومي بشر = رحمة لله على ذيك العمار
وعقب عود على حدب الظهر = الرحول الهديه للقشار
يوم شافت جمل شمر هدر = شاولت كن فيها عشار
لو يجيها قعودن مافسر = كوعة له على ثفنه وزار
الهطيقا كما جص التمر = لا بغاها فتح باب الجدار
كم غزانا وراكم يالممر = وفي طرف نجعكم شب الشعار
وارسل العبد يجبركم جبر = وقال سيرو معي ياعريبدار
وكل منكم تجمع ثم طمر = وقال انا معك ليات الديار
وجا يسوق الضحايا للنحر = والنتيجه نحر ولا انتحار
لاتبجح وصفحاتك سمر = لابغانا ننقب للاثار
انت جودك تلوبد بالشجر = وتسرق الجيش من تلعة قفار
وخفت من صوك قصاص الجرر = ولا حدن قال جاورنا مجار
انطوى الياس من زيد وعمر = وصرت مابين نار وبين غار
ان قبضكم قطعكم من العمر = وان هربتوا لكم عيره وعار
ولك جناحٍ ضعيفٍ وانشمر = ماحتمى لاجديع ولا ذعار
والتجى يمنا يوم انذعر = واحتميناه بالحدب القصار
من حدتة الحوادي وافتقر = العتيبي يجيله مستجار
ماتهزه مناديب النذر = لو لفت من يمين ومن يسار
الثلاثه مناديب الخطر = من ثلاثة عناتيتٍ كبار
ومن وراهم جموع من البشر = والادار بوامرهم تدار
ولا انحنينا لتهديدٍ بدر = من زحولٍ تزور ولا تزار
وجاهم العلم مختوم بمهر = واحدٍ زارنا واحد استخار
والعصيمي بساعات الكدر = يحتمي راع الدن الثبار
وقد حشركم على عرجا حشر = ماتعرف الصياح من الخوار
جمعكم طاح رمزه وانكسر = والكسيره بعدها الانكسار
ولا منعتوا عن الشيخ الاسر = يوم حطت يمينه بالوسار
عقب دارت دواليب المكر = من حليف سرا عقب استنار
وخيش الفرم عقبه كالنسر = ماكتب له حليفه بالمسار
ويوم شاف الكراديس انبهر = وشاف ضرب الحوافر بالقشار
انكفى الجمع عنا وانشمر = واستلمنا زمام الابتدار
وكان عيا لسانك ماستقر = الوثايق بعنقك كالسوار
مالكم لامطير ولا مفر = الممرات سدت والممار
الهطيقا تطلطح بالثفر = بين علوى وبين ابن شرار
حاولت تقتضى منه بغدر = والنتيجه هزيمه واندحار
وعودت مثل عباد الحجر = مستجيرن من الرمضا بنار
لاتحاول هذا حكم القدر = طويت الصحف وللي صار صار
ان رضيتوه ولا في صقر = كل طير خذا قسمه وطار
ولو نظرت المصادر والسير = شفت الاثار ماجاها اندثار
مار تغمض عيونك وتهذر = وانت ُتنظر بعين الاحتقار
العمى مانظر نور البدر = انت في ليل والناس بنهار
اعترف بالحقيقه لا تفر = مايفيد الكلام المستعار
ويش جابك تكلم في الحفر= وحد دارك تحت ظل الزبار
منتحتن من هل الرمز الخضر = ماورى شحذت البشك افتخار
ولا تذم النبي المنتظر = وانت كبرت له عند المزار
يوم مرتب الدعوى جهر = صرتوا انتو جنوده بالمثار
جابكم من ورى بان الحمر = تتبعونه مثل روس الجفار
وطاف بالبيت فتره واعتمر = ليه ماقمت دون الانفجار
ساقكم للنحر سوق البقر = كل مامات ثار جاب ثار
فتنة لفها طرف الدهر = عندنا راسها وانتم فقار
وكيف تفتح على ربعك نبر = مالك صلاحٍ بالمسار
وكيف تطري الجعر وانت تخبر = يوم تمضي الجواز لزنجبار
وتشتري منهم الزرق الزهر = وقربه مس اذاانيك الصغار
القضيه لها علم وخبر = وكشفت اسرارها عار وشنار
واقرب الناس لذناب الجعر = ربعك للي يمانيهم قصار
تركبون الشغر فوق الشغر = وتشملون الفحل ياهل الشغار
كم سلوقي تضبط له نفر = وقد تدرب على كشف الوزار
عقب ماذاق مسموم الابر = قام يرشح قراطيع الزقار
يلحقن العظم تحت الهبر = وعقبهن صار عضباك الدوار
وانت يالحثل بانن لك قصر = وشالك السيل مع وادي نمار
وانتي حصني ليا ردد جحر = لياشهر صقر جا فيك انصقار
الحرامي دخل بيتك ظهر = وبان لك في الدلال وفالوجار
صاهر الحثل والحثل انصهر = وانهصر له علشان الصهار
ماستترت ونسيبك ماستتر = ماحترمتوا قوانين الجوار
جنب الرجم واربض في الخمر= دام ادار المراقب ماستدار
دامة المسئله غمض تمر = وبدلة الصوف ينظفها البخار

[الرأي الآخر]

بيّض الله وجهك ....


وأبشرهم بيجيهم خير إن ماارتدعوا

والوعد قدام

[عكاش]

لله دركم يوم كان يدافع عنا كديميس ضد شعارهم واليوم جا وقت نرد له الجميل ونوري العالم ليه الحروب يوم طلعت بس صورته على التلفزيون قامت قيامتها

شعارهم لانسبهم ولاشي لان كديميس اعجزهم وخلاهم يتعادون على امارة القصيم وهمه يلعنون ويبكون وينزلون ردود شعارهم اللي ماتسوى بيت واحد من بيوت كديميس

[اسمحلي مجنون]

الله الله



بيض الله وجهك على نقل القصيدة الجزله والوافيه والمسكته ،،،،

[البريماني]

بيّض الله وجهك ....


وأبشرهم بيجيهم خير إن ماارتدعوا

والوعد قدام

[الرتوعي]

والله انها من افضل قصايد كديميس

مشكووووووور يا لطام العايلين

وتكفى اذا كان لديك الشريط او تعرف وين القاه دلني

ولا هنت

[ابو مصعب]

الله الله الله


لا تحـرا العـذر يبـا الـدبـر

من خصيمن على قومـه يغـار



كفيت ووفيت ياابوصالح قصايدك وافعالك واقوالك تشهد انك تغار على قبيلتك



واخرتها في اللقاء يقول ابو صالح انه مايهاجم الا اللي يحاولون الانتقاص من قبيلة عتيبه



او يغيرون الحقائق


مااقول الا عساك ذخر يا ابو صالح

[ابوتيجان]

اشهد بالله انك كفو يابوصالح

[أبوضاري]

وكـان عيـا لسانـك ماستـقـر=الوثايـق بعنـقـك كالـسـوار
مالـكـم لامطـيـر ولا مـفـر=الممـرات ســدت والمـمـار
الهطيـقـا تطلـطـح بالثـفـر=بين علـوى وبيـن ابـن شـرار

صح لسان المرعب كديميس