رأي الشاعر \ كديميس العصيمي حيال مايحصل في الساحه الشعريه

[نامي]

بسم الله الرحمن الرحيم

والصلاة والسلام على اشرف الأنبياء والمرسلين سيدنا محمد وعلى آله


وصحبه اجمعين :

وبعـــــد

اخواني مرتادي منتدى الهيلا اقدم لكم قصيده للشاعر \ كديميس العصيمي

ومناسبتها انه طلب منه اكثر من شخص إبداء رأيه حيال الساحه

الشعريه


فرد بهذه الأبيات .

نشدني رفيق ٍ لي عن الشعر والشعار = وسؤاله يبيني ساحة الشعر اصنفها
وانا مااعتبر نفسي حكم يصدر القرار = معي معرفه والناس معها معارفها
من المستحيل يصير توافق الأنظار = ليا جبت لي فكره طلع من يخالفها
لكني حسب ماشفت واسمع من الأخبار = كلام ٍ عن الساحه وعن من يوصفها
طلبنا منه بيان وإيضاح واستفسار = بيان ٍ عن الساحه وجملة سوالفها
وجوابه يقول الجوا عاصف وفيه اغبار = برامج وشعار ٍ تلاسب هواتفها
سفينه تسير ابدون كبتن ولا بحار = وذا راكبن فيها وذاك يتخطفها
وفقير ٍ بعض شعارها والبعض تجار = واحد يرمي الشاره واحد بس يحذفها
واحد يشتري ويبيع في الشعر بالأسعار= واليا ماقدر يشري القصيده تسلفها
وعطى صاحبه موعد وقال اكتم الأسرار = اليا جات جايزة الأمير انتناصفها
وبعضهم يقول الشعر بضايع استثمار = ويقول المواهب في الملاعب نوضفها
وهذا اللي جلب للشعر عناصر الدمار = تسلل على مكانة الشعر واضعفها
وبعضهم يقدر قيمة الفلس والدينار = ليا جاه عمله من عميله يصرفها
يحط اليمين يمين والا اليساريسار = يرشح على قد الوظيفه موظفها
وحد ٍ لارمى ماهوب يرمي بدون عيار = يصيب اوسط الأهداف ماهوب يشطفها
وبعضهم يعرف يدق في الجبهه المسمار = ليا هاجم الشعار ماهوب يحرفها
وحد ٍ يقضته بالليل وينام بالنهار = ولو يذن المذن صلاته يطوفها
واليا جاء العمى في القلب ماتنفع الأبصار = ولابد للعميان تقرا صحايفها
وعلامات بعض مروجين القصيد اصفار= وبعضهم مجانينن تبي من يكتفها
ولا اقصد بها عامر ولا اقصد بها عمار = عباة ٍ لمن ترهم عليه يتلحفها
سقى الله زمان ٍ فات يوم الكلام الحار= تلاطم به الشعار لياسيقت اعطفها
زمان التبيناوي وغانم هل المثار = زمان الرجال اللي ثقال ٍ مواقفها
دفاع وهجوم ٍ عن حماهم بدون اجار = ماسوو سواة اللي تبي من يعلفها
هذا موجز ٍ عن ساحة الشعر والأدوار = وعسانا على ماقد تقدم نوقفها

كديــمــيــس العـصيـمــي

[أبونواف]

وبعضهم يعرف يدق في الجبهه المسمار=ليا هاجـم الشعـار ماهـوب يحرفهـا
وعلامات بعض مروجين القصيد اصفـار=وبعضهم مجانينـن تبـي مـن يكتفهـا

صح لسان كديميس العصيمي قصيده تكلم عن مواضيع مهمه جداجدا
ولاهنت يانامي على النقل الموفق وشكرك وتقبل مروري .

[رايد الهديبي]

الف شكر يا نامي قصيده جزله من شاعر له مكانته في

السا حه الشعريه


وبنتظار جديد الشاعر كديميس العصيمي

[طارق النفيعي]

صح لسانه ملايين ..


ويعطيك العافيه على النقل يالغلا

التوقيع

أخوكم : طارق النفيعي

[شاكر الثبيتي]

مشكور على النقل الجميل اخوي وكديميس علم من اعلام الشعر

[البريماني]

وبعضهم يعرف يدق في الجبهه المسمارليا هاجـم الشعـار ماهـوب يحرفهـا
وعلامات بعض مروجين القصيد اصفاروبعضهم مجانينن تبـي مـن يكتفهـا




صح لسان كديميس العصيمي قصيده تكلم عن مواضيع مهمه جداجدا
ولاهنت يانامي على النقل الموفق وشكرك وتقبل مروري .

[ابو محمد الدعجاني]

ولا اقصد بها عامر ولا اقصد بها عمـار عبـاة ٍ لمـن ترهـم عليـه يتلحفهـا
سقى الله زمان ٍ فات يوم الكـلام الحـار تلاطم بـه الشعـار لياسيقـت اعطفهـا
زمان التبينـاوي وغانـم هـل المثـار زمان الرجـال اللـي ثقـال ٍ مواقفهـا
دفاع وهجوم ٍ عن حماهم بـدون اجـار ماسوو سواة اللـي تبـي مـن يعلفهـا
هذا موجز ٍ عن ساحة الشعـر والأدوار وعسانـا علـى ماقـد تقـدم نوقفهـا



انه والله صادق هذا الفرق شعار تدور من يعلفها وشعار تنتخي دون عطفها صح السانه وطول الله بعمره

لاهنت يانامي على الرائعه

[الرأي الآخر]

صح لسانه ،،

[أبوضاري]

سقى الله زمان ٍ فات يوم الكـلام الحـار=تلاطم بـه الشعـار لياسيقـت اعطفهـا
زمان التبينـاوي وغانـم هـل المثـار=زمان الرجـال اللـي ثقـال ٍ مواقفهـا
دفاع وهجوم ٍ عن حماهم بـدون اجـار=ماسوو سواة اللـي تبـي مـن يعلفهـا

صح لسانه ومشكور يانامي

[ابن مشيب]

من المستحيل يصيـر توافـق الأنظـار=ليا جبت لي فكـره طلـع مـن يخالفهـا

بالفعل مستحيل يكون هناك توافق في الانظار في جميع الامور , ولكن بخصوص الشعر والشعار:

سقى الله زمان ٍ فات يوم الكـلام الحـار=تلاطم بـه الشعـار لياسيقـت اعطفهـا
زمان التبينـاوي وغانـم هـل المثـار=زمان الرجـال اللـي ثقـال ٍ مواقفهـا

صح السان الشاعر الكبير/كديميس , والله لايهينك يانامي



تحياتي