أجمل ماقيل في عتيبه

[عاشق يوسف]

القصيدة : للشاعر ( كديميس بن صالح العصيمي العتيبي) في مدح قبيلته عتيبه وهي قصيدة رائعةٌ جداً وفيها معاني بديعة ، قال فيها:


سـر يالقلم ننقض كلام المحامين ** لصـارت الدعوه حمايا حمانا
نقـض الحجج لابد له من براهين ** ومعنا شــهادة وفا لادعانا

ومن مدنا بالصـاع نجزاه صاعين ** واللي يعادينا عليـه اعـتدانا

كان الحميدي وازملاه متصـافين ** على الحكي فيما ما تقدم حكانا

تلحـقوا غـارات ناسٍ قديمـين ** واخطوا وحنا من خطاهم خطانا

ودام الشـريعه تاخذ العين بالعين ** حنا ما تقضــي الشريعه قضانا

حـنا بميزان المـعاني ثقيـلـين ** وعلى مماشــــينا بعيدٍ مدانا

هيهات لو حولت عكس الموازين ** قضا القضـا فيما مضـى وانتهانا

انتم رجال(ن) بالمعارك غثيـثين ** لكن ما تلحق اخطـاكم اخطانا

حنا عتـيبه ملحقـين المخليـن ** بعنا بســوق الطايلات وشرانا

قوم(ن) على صولات الايام ضارين ** لو عضنا ناب الدهر ما قــوانا

يهابنا الطـماع لو قلبـه اذهـين ** نبطـش محلات الطمـع لاغزانا

لنا ســلـوم(ن) غاليات المثامين ** سـلومنا محدن حملها ســـوانا

في سلم لوماء الوجه عام وشـهرين ** وابخيلنا مامــون داخل حـمانا

ثلاثـماية يوم تزداد ســــتين ** تنحا المنايا عنه هــيبة لـحانا

ومن حده الموت الحمَـر والديايـين ** تخير الحصـن الحصـين ونصانا

وبالحين نـملى فارغـات الموازيـن ** جيب الصحون ومكرمات الصيانا

للضــيف والجيران والمســتحقين ** إليا من وهـاب العطـايا عطانا

ابيوتنا للـضيف مثل البســــاتين يفرح به الملهوف ليلة ضـوانا

نجود بالماجود بالعســـــر واللين ** وضحك الحجاج وما حلا من نبانا

حنا على حفظ المواجيب حرصــين ** مانعطي الطـرقي قراطــيع مانا

والجار لـه واجـب وحنا وفـيين ** ندعيه للكرامــه ولو مـا دعانا

جيـرانا دايم حشـــام وعزيزيين ** وندرا شـرفهم عن كلام اسفهانا

حنا بوجه الجار دايـم جـديديـن يزيد مع زايد اسنـينه وفـانــا

وان جاء نهار المعمعه واللغا الشــين ** نبيع غلا الروح دون اقصــرانا

وان راح ما نشـدق قفاه بسـكاكين ** نحمي مـجاله عقب عنه انتحانا

وخوينا لو هــو من اللي معاديـن ** يأمن بنا في كل درب مشــانا

ولصرنا مع الخوي بدرب(ن) متخاوين ** نرعى الحقوق ولانخون خـويانا

وحنا منازلنا ورا حضــــن ويمين ** هاذيك ديرتنا فيها نشــــانا

وجينا نبا المرباع عند القحاطـــين ** يوم الزمان بحد ســـيفه حدانا

وقالوا لنا ما تاسـع الدار شــيخين ** ونجد العذيه تحت فيت عصــانا

وتشــاوروا طلقين الآريا الحكيمين ** احد(ن) ومر بالحرب واحد(ن) نهانا

واحـتار من يـختار بين الأمـرّين ** اما الدهر ولا ســــيوف اقبلانا

وتقرر المـحدار بالـخـط والقـين ** نمرن فأولـها يـرفرف لــوانا

وندري ما قـدامنا مــزرعة تـين ** لكن على روس الافاعي وطــانا

زحنا قبايل نجد عن نجد قســـمين ** وجينا بـمثـنات البلاد وبـنانا

عاداتنا نخلي ســـــروج المسنين ** وأول موردت الســهوم أومرانا

حمّاية الســـاقات فالـمقليــن ** باموالهـم يرفون فقر فـقـرانا

وليا جاء الامر بين القـــبيلة حليلين ** حلوا مشـاكلنا وحازوا رضانا

وعبدالـعزيز اللي رفع رايـة الـدين ** اللي ليا خم النشـــيط يتوانا

اللي تخاضــــع له رقاب الفراعين ** من هيبتــه كلٍ يـريد الأمانا

بالســـيف صارعناه وسط الميادين ** وانتم تخامرتوا ســوات السمانا

ماعمرنا نذعن لحكم الســــلاطين ** إلا بيوم(ن) ينتصـــر به حدانا

اخبارنا قد هزت الهند والصــــين ** ولا هـمنا الهيس العور لو هجانا

ولو كان فالاعلام ضـــمن المذيعين ** الباع قاصــر والطويل اللسانا

وقولٍ نقولـه ثابتٍ بالـدواويـــن ** وتاريخ نـجد المعتمد مانسـانا

ايام عرجا قد عطتنا نياشـــــين ** وفي ايام معتق يشـهدون اعتقانا

العفو عند الـمقدره للكريـميــن ** وحـنا ليا منا قـدرنا عفــينا

هذا كلام يفّحم المســـــتحقين ** وعاداتنا نقطع لســـان طّلبانا

[الهايم بالهيلا]

الله يجزاك كل خير ياعاشق يوسف على نقل هذه القصيدة الرائعة

[عبيد العتيبي]

صح لسانـــــــــــــــــه

[الحسن]

بسم الله الرحمن الرحيم


السلام عليكم ورحمة الله وبركاته
سبحان من قال في الشعراء ( يقولون مالا يفعلون )
يعطيك ربي العافيه يا (عاشق يوسف)...!
والله والنعم بكل القبايل والله يعزهم با الأسلام
وعبدالعزيز وانا أخوك صارعناه وصرعنا أخو نوره
والحمدلله على نعمة الأسلام والله يعز حكم آل سعود ويرحم من مات
وعسى ربي يطرح البركه والصلاح في الحي منهم ويجعلهم عزيزين بالدين وينفعبهم المسلمين


أخوك : الــــحــــــــسن العتيبي

[ابوبجاد الرويس]

مشكور اخوي على القصيدة

وصح لسان الشاعر العملاق / كديميس