انا في الشدايد ما اختلف عندي المنوال ،، لو الحاسد الحاقد علي بالكلام يعيل ،، - الهيـــــــــــــلا *** منتدى قبيلة عتيبة

مقبل المباركي · 20-Jan-2012, 02:25 AM

بسم الله الرحمن الرحيم

السلام عليكم ورحمة الله وبركاته

.. هذي القصيده رد منّي على ابيات ارسلها احد الأصدقاء ..

: فرديت له

هلا مرحبا بك ياولد طيبين الفال
تحيه كما نور القمر في ظلام الليل

هلا بك من اللي ماورد عد دون حبال
من الجم يشرب ماشرب من غثاة السيل

هلا بك من اللي يربط القول بالأفعال
ولا ينتظر لأفعاله المدح و التبجيل

هلابك هلا والعلم واضح مافيه جدال
تعرفه وانا اعرفه مايحتاج له تهويل

وترا الجاهل اللي داخلن ربوة الأدغال
مايدري يحط خطاه في الدرب لو هو غيل

و انا في الشدايد ما اختلف عندي المنوال
لو الحاسد الحاقد علي بالكلام يعيل

تتبقى اليمين يمين صعبن تصير شمال
لو ان العقول الناقصه تنوي التبديل

ومادام الحقيقه شمس ماتحجب بغربال
انا يا ابرهه بسألك عن حرب يوم الفيل

نهار اللوازم يوم جاء للوطا زلزال
وعنها اختفت عشاقة الهرج و التطبيل

ياصاحب حياة الأدمي شمس ولا ظلال
وهذي سنن دنياك جيلن بعده جيل

وابو زيد ما قالوا ابن زيد ولا آل
شهر سمعته بالسيف ماهوبقال وقيل

و ياصاحب حياة الرجل ماهي على الأطلآل
مدام التجارب عابره مثل مشي الريل

يكافح ولا همه لو ان الحمول ثقال
يقوي عزومه والظفر للثقال يشيل

ولا جاء الموت حق ولا فجع طيب الأعمال
يخافه ضعيف الدين ومحرف الأنجيل

وهذا اللي يخاف الموت لا قربت الأجال
ليا جات له ساعة ولا تقبل التأجيل

وعسى الخاتمه لك خير في الحل و الترحال
ويحسن عملك بيوم كلن يوفى الكيل

آخــوكــم ،،
مـقـبل بـن سسـلطــآن الـمبـآركــيّ العــآلــيُ الـعـتـيـبيُ

آخر تعديل مقبل المباركي يوم 20-Jan-2012 في 02:31 AM.