السلام عليكم
اعضاء هذا المنتدى الشامخ منتدى الهيلا اقدم لكم هذي المساجله بيني وبين الشاعر علي ابو ثنتين العطاوي اتمنى ان تنال اعجابكم,,,
نواف الشيباني
ياراكب اللي تو جاء تصديره=صنعة يهودٍ يشربون البيره
جيبٍ جديدٍ مامشاء عداده=مادارة اكفرته ولا تدويره
اليا وقف مثل البعير الواقف=ودك اتشوفه دايمٍ وتديره
وان دق سلفه قلت ياماشا الله=اليا اشتغل تعجبك دورة سيره
واليا نحرته كنه الاصيله=اللي على العدوان جات مغيره
واليا اقتفيته كنه الشيهانه=في خايعٍ مخضر يحلّق طيره
من الهميج الصبح يسرح بدري=اليا اهتنى الهلباج بالتصفيره
واليا استوى الخط انهمه ثم تله=ادراه ذنب وتلته تكفيره
خله مع المشوار ياخذ سجه=يطوي المسافه من صفاوة قيره
ثم نحره دار الوفاء والهيبه=ياديرةٍ ياحيها من ديره
هذي عفيف وحبها باعماقي=اللي غلاها ماانهدم تعميره
وعده على اللي فالمواقف ثابت=راع الوفاء طيب النباء والسيره
الشاعر اللي يعجبك بامثاله=يصخر القيفان من تصخيره
قرمٍ على وقت الشدايد وافي=لطيب والماجوب شب النيره
تلقاه في بيته ليا من جيته=يضحك حجاجه والسعد تبشيره
وان قيل من هو قلت راع الفزعه=علي العطاوي ياعرب ماغيره
من عزوةٍ وقت اللقاء لطامه=اتقنع اوجوه العداء بالعيره
آلاد روق مزبنين الجاني=اهل الشهامه محتمين الجيره
عطه الرساله واشرح اله الدعوى=العلم صعب وفي يده تفسيره
قله ترا نواف حاله قاضي=يشكي عليك الحال من تقصيره
حالي قضى عقب الهنوف الطرقا=بنت الدلع وام الدلع واميره
ان جيت اجيها ماقدرت اجيها=جرفٍ وراه مهايلٍ دحديره
اخشى من النمام واخشى نمه=اللي ورى العربان ينقر زيره
عيني بعدها ياعلي سهرانه=والراس شايب من كثر تفكيره
واليوم انا ناصيك وابغي شورك=نواف جاك ومن عليك اتشيره
علي ابو ثنتين:
ياراكب اللي ماتزعزع سيره=ماينشرى بجنيه ولا ليره
ملاكه من اهل الريال النايم=شرايت السلعه بلا تسعيره
لكزس مديل الفين عقب العشره=من وردّه تفنن بتطويره
اليا وقف تقول وقفة حاكم=واقف بعد ماوحى كلام يثيره
واليا نحرته قلت كنه جادل=يالله لاتجيب الها التكديره
واليا قفيته قلت شيخٍ خاشع=ودك معاه اتردد التكبيره
واليا نهمته واحترك ماطوره=فالارض فز وزود التغبيره
ماكنه الا كوكبٍ متحرك=كل من يشوفه يرغب بتصويره
واليا مسك له خط كنه طلقه=ايزود في نفس العذول الغيره
واليا اعترض كنه غزالٍ شارد=من عقب ثارت يمه التثويره
ممشاه من دوار وقت الجهمه=قبل طلوع الضوء والتنويره
امنّحره دارٍ غلاها زايد=دار آل مشيب طيبين السيره
اهل الكرم والطيب واهل النخوه=قبيلةٍ عبر الزمان اشهيره
وان جيتهم دور ولد عبدالله=الصاحب اللي مانقص تقديره
نواف واليا من لقيته قله=يهديك ابو ثنتين في تقريره
سلامٍ احلى من حليب الوظحا=مثل العسل لا من مزج بالشيره
ومن عقبها لن كان وقتك جاير=وارسلت تبغاء رايٍ الك اشيره
يامرحبا بخطٍ لفى مضمونه=يشكي علي من الوله والحيره
ان كان يانواف تبغاء شوري=انسه ترا البنسيان يمكن خيره
قبلك مشينا فالهواء ودروبه=ولافادنا الا زوّد التحسيره
اصبحت من فرقاه في غيبوبه=وعيني بعد ماغاب دوم اسهيره
زادت جروح الشوق عقب الفرقا=ولاكني الا بحالت التخديره
وجرح المشاعر لو تذوق اطعونه=معاد يقنعك الغلا وتبريره
وان طعتني جنب مدامك بادي=قدم الهواء تاقع بجمة بيره
مامن ورى طرد العذارى مكسب=هذا جوابي ومحتوى تعبيره