لاتامنون الخطر يا اهل الميه منا ... مرزوق الثبيتي

[عزارم]

قصيدة الشاعر مرزوق الثبيتي في منقية عايض بن دغيثر رحمه الله

مرحوم ياللي يحول اللِبن من دونه = اسمه وهو غايبٍ عنّا يمثلنا
عودٍ عتيبة لوقفاته يحبونه = وايضاً على طيب راسه واحدٍ منا
لعل قبرٍ يضم العود بركونه = تسقيه وسميةٍ رعادها حَنا
ميقافه اوصى عياله لايخلونه = دايم يردون مردود البرا عنا
فالطيب ميقاف عايض مايكبونه = ترفع مباني قصور العز وتبنا
مشوا على نهجه الطيب وقانونه = وثنوا ماقالوا عن الميقاف هونا
لاشاش راس العتيبي لا تلومونه = لا احدٍ يلوم الثبيتي عقب ماغنا
بشر عتيبه بفوزٍ يستحقونه = نصرن مؤزر وميقافٍ يجملنا
لو انها عادةٍ بالفوز مرهونه = اليا حضرنا تسلطنا و هيمنا
جوايز الفوز للعتبان مضمونه = كن المزاين اليا جينا مزاينا
ارتح وريح ركابك مالك مهونه = ياللي على المركز تراهنا
واغسل يدينك من الاول بصابونه = ابك انت تدري ياوجه الخير من حنا
قبيلةٍ بالوفاء و العز مقرونه = واعزتي للعنيد اللي يطاولنا
نحمي مقام الجدود الكفو ونصونه = واللي براسه سطر يحضر يقابلنا
خصيمنا قدمنا يمشي على هونه = ورفيقنا مجلسه دايم مع ايمنا
جينا المزاين ومركزنا تعرفونه = ماحطوا المركز الاول ياكود النا
نسوق صفراً تحوز من الذهب لونه = مكسب يدانا وميراثٍ من اولنا
رسالةٍ با أفخم الكمبود مدهونه = لا تامنون الخطر يا أهل الميه منا

[فهد بن جميل العتيبي]

صح لسااااااااااااااااااااااااانه

[أبوضاري]

صح لساااانك وسلم بنانك

[فهد العازمي العتيبي]

،،


صح لسانه

ويستاهلون أبناء ابن دغيثر المدح والثناء .

التوقيع

للتواصل على تويتر https://twitter.com/falotaibi5115 ،،

[عزارم]

اشكر الجميع على المرور وصحة ابدانكم بالنيابة

وهذه القصيدة مر عليها سنة

قيلة السنة الماضية لما أخذ ابن دغيثر المركز الاول في فئة الخمسين

ويتحدى المشاركين في مزاين ام رقيبه في فئة المئة لون الصفر

وحل موعد التحدي بعد مرور العام

وأخذت ابله مركز النخبة لعام 1435 هـ لون الصفر


ونبارك له بالفوز والى الامام

وصح لسان الشاعر