الحويماني انتقل الى رحمة الله - الهيـــــــــــــلا *** منتدى قبيلة عتيبة

عبدالمجيد النفيعي · 14-Jan-2008, 01:39 AM

حسن بن سعد الحويماني العتيبي
قدر الله عليه واصابه مرض
وكتب والده الشاعر / سعد الحويماني
هذه القصيده

انا الذي صارت حياتي حزينه=من ماتشوف العين باكبر عيالي
طفلاٍ صغير العشرحسبة سنينه=اليا زهمته قال حاضر وجالي
واليا تكلم كلمته جتك زينه=والمستوى بالمدرسه دوم عااالى
اليا فقدته صحت ياناس وينه=ولا ارتاح انا في مجلس الا قبالي
واليا طلب له حاجةٍ لو ثمينه=ارخصت انا من شان خاطره غالي
من شان عين اكيد تكرم مدينه=فيها اخوي وجد جدي وخالي
اسمه حسن فيه الحلايا حسينه=نادر وصوف اخلاق طفلٍ مثالي
جاه المرض .واختل حتى يقينه=وانحاس فكري مع تعكر اف بالي
رحت القصيم ورحت يم المدينه=ابحث علاجه في جنوب وشمالي
ويم الكويت وكل شيخ ٍ لدينه=ماهمني طول السفر والريالي
امه تقول الناس هم حاسدينه=لا والله اللي راح واعزتالي
شفت العذاب وذقت معه الغبينه=شيئا تعدا طاقتي واحتمالي
هذا القدر مكتوب باعلى جبينه=من ربي اللي صارفيه وجرالي
كلن على بلواه ربي يعينه=محدن بها الدنيا من الهم خالي
كم واحدن يسهر يجاذب ونينه=وكم واحدن يضحك ولاهوب سالي
غصبٍ يعيش الوقت زينه وشينه=شيئا مقدر من عزيز الجلالي

ثم الله قدر عليه وتوفى حسن
وكتب شاعرنا المرثيه

ياقبر انـا لاجيـت يمـك تمنيـت
اني بداله تحـت الاحجـار مدفـون
ودي يكون الحي عمري وانا الميت
لو الثمـن كـل المخاليـق يفنـون
ياقبر فيك اللي على ابـوي سميـت
دايم وانا مع قرة العيـن مشطـون
ياقبرلو تدري بعـد ويـش كنيـت
لتقول ليت الموت ماكـان مسنـون
ياقبر والله عنـه مايـوم سجيـت
اسمع صدى صوته وانا منه محزون
كم مرةٍ باسمه على اخـوه ناديـت
والناس من حولي يقولون مجنـون
اذكره حتى يوم فالفـرض صليـت
والناس باسمه لا بغونـي ينـادون
ماتدري انه كان لي شمعـة البيـت
وانه يساوي الكون والكون والكون
واني اشوفه كل ما اصبحت وامسيت
قدام عينـي خطوتـه دوم بالهـون
ماانساه لو اني دلهـت و تناسيـت
ودنياي عقبه يا مـلا مالهـا لـون
وقت العزاء لوي تظاهرت واخفيـت
حزني عن اللي في فقيدي يعـزون
لكن تراني من كثر صبري ازريـت
وعقب العزاء بيحت انا كل مكنـون
الله مـن ليـلٍ بتالـيـه ونـيـت
ونة كريمٍ داخـل السجـن مديـون
والله مـن ضلـعٍ بعاليـه عديـت
ودموع عيني فوق خـدي يهلـون
انا اشهد اني عقـب فرقـاه وليـت
والحال عقبه صار من دون في دون
ياقبر انابانشدك بالحـزن حسيـت
في قلب والد صار بالهـم مطعـون
هذا شعـوري يـوم يمـك تعنيـت
والله يفرج هم قلـبٍ بـه شجـون
مرحوم ياللي طلته كنهـا( الليـت)
اعداد ناسن فالحرم جـو يصلـوون
ومرحوم ياللي فالمرض حيل عانيت
اعداد مايبغض هل القدس شـارون
وانا اطلب الله يوم للمقبـره جيـت
الصبروالسلـوان والثالـث العـون
ماغيره احدن في حياتـي ترجيـت
ورضيت بامر اللي له الكاف والنون

على فكره انا ماعرف الشاعر سعد ولا ابنه رحمه الله
لاكن هذا مافهمته من القصيده
وسعد الحويماني شاعر مبدع وانتم عندكم ذوق بـ القصايد وتعرفون
اخوكم/عبدالمجيد المسعودي

التوقيع

تذكر

قول الرسول صلى الله عليه وسلم :-"المسلم من سلم المسلمون من لسانه ويده"

أتشرف بزيارتكم لمتصفحي في شهر رمضان : مــهــاذيــب ، على هذا الرابط أضغط هنا