يا بحر xxللشاعرxxسالم الرويس - الهيـــــــــــــلا *** منتدى قبيلة عتيبة

العنيد · 25-Aug-2005, 04:08 AM

الا يا بحروالله ان فرقا الولايف شيـن = ولا انته ببحريني ولا نيـب بحرينـي
غريبين دارك وين وانا دياري ويـن = عسى الله يكون بعون كل الغريبينـي
تلاطم مياهك ضايق الصدر يا مسكين = لعله يروفك من يـروف المساكينـي
يمرك خلي البال ما لـد فيـك بعيـن = وانا ساع شفتك عنك ما حولت عينـي
احس اني اعرفك منول مهوب الحيـن = ولو ان ما من معرفه بينـك وبينـي
اعرف الوجيه اللي نحتها العنا والبيـن = على قول راع السالفه خبـزة يدينـي
واعرف الدموع اللي على وحده وثنتين = تعلـق بعينـك كنـهـا تاتناديـنـي
اقدر ظروفك وانت دمعك يبل الطيـن = وانا كيف الومك وانت دينك على ديني
وانا قصتي يا بحر قصه تهز الصيـن = لها في وجيه أهل الكرامـه عناوينـي
لها جرح يبقى في خفوقي ليوم الديـن = أجل عاد وانها قطعه مـن شرايينـي
تبى تشتكي لي غيبة الأهل والغاليـن = انا مثلك اشكي غيبة أهلـي وغالينـي
تبي تشتكي لي حيٍ اقفى مع المقفيـن = انـا ماعرفـت الا وجيـه المقفينـي
تبي تشتكي لي طعنة السيف والسكيـن = تهايق بصدري وانت تلقى السكاكينـي
واذا كان تاتبكي وتنثر دمـوع العيـن = تراني علـى حـد البكـا لا تبكينـي
دخيلك كفايه لا تجيني بوجـهٍ شيـن = انا اللي لقيته مـن زمانـي مكفينـي
اقوله ويا درب الشقا متعب الماشيـن = على وين يـا درب الشقـا تاتودينـي
ولا يا بحر باكر يجينا بوجـه زيـن = عسى الله يفرجها علينـا قـل آمينـي

متيم عتيبه · 26-Aug-2005, 01:00 AM

العنيد لاهنت علي القصيدة الجميله وصح السان قائلها

صـويب الرمـــش* · 26-Aug-2005, 01:59 AM

وانا قصتي يا بحر قصه تهز الصين *** لها في وجيه أهل الكرامـه عناوينـي
لها جرح يبقى في خفوقي ليوم الديـن*** أجل عاد وانها قطعه مـن شرايينـي
اخوي العنيد ,,,,,,,,,, طول الله عمرك وتسلم يمينك وصح لسان شاعرنا الرويس

صحيح ابيات اقدر اسميها ( جرح )
تحياتي لك