اقدم لكم ديوان الشاعر الكبير/ مرير بن عبدالمحسن الحبيل الحمادي العتيبي شاعرنا القدير له عدة اصدارات صوتية منها (وصف) و (طرايف القصيد) .
هذه قصيدة له عندما سمع فتاة تغازل الشباب عن طريق الكنود ( جهاز الإرسال ) ونصحها ولم تستمع له وسمع عندها صوت ولدها الصغير وعرف انها متزوجة ..
يابنت قلبـك يفعـل العيـب مـا حـس=وان ما هداه الله عسـى الله يخسـه
يكفـي غـزل للنـاس ياخايـنـه بــس=خـلـي حـلالـك قـفـر لأحــد يعـسـه
أبليس لك يابنت في الشر وسـوس=تــعـــوذي بالله لــعــلــه يــخــســه
الستـر لـه ثــوب مــن الـعـز يلـبـس=وجسم الشرف ما كل رجل يجسـه
عــار ونــار مـذهـب البـنـت يلـمـس=وعـرض المـره ادنـاة شـيء يهـسـه
يابنـت عـرضـك بالمجـالـس يـدنـس=حـدر النصايـب جعـل ربعـك تـدسـه
ولا جايـك الا مثـل مـا قيـل واخــس=واللـي شرفهـا غـالـي مــا نمـسـه
يـاورع ياللـي عندهـا بـان لـك حـس=قلبـك علـى امـك يـوم خانتـك نسـه
امـك تغـازل مـن ورى ابـوك بالـدس=والله مـــن رجـــل تــلــذذ بـحـســه
قله تراخـي الحبـل يحتـاج لـه مـس=وعـلـم لأبــوك الحـبـل لازم يمـسـه
ولا يـشـيــل الـعـارلاعــاد يـجـلــس=في وسط بيت عاش ما فيـه هسـه
قلـه يجـوز عـن النجـس لا يتنـجـس=ثــم يقلـعـه يالـيـن يـقـلـع مـرســه
ولا تلحقونه مـن حسايـف ليـا طـس=عـسى العمى في نون عينه يطسه
مساجله بينه وبين الشاعر العلم غازي بن عون ..
قصيدة مرير الحبيل
يالله يلي لك المخلوق يرفع كفوفـه=
عـفـوك وغفـرانـك لـذنـبٍ جنـيـتـه =
يــا عـالـم ٍ دقــات قـلـبـي بـجـوفـه =
ألطـف بيـوم ٍ فـي قـفـاي أحتريـتـه =
ويـن النديـب الـلـي بقلـبـه مـروفـه=
يوصـل مراسيلـي ليـا مــن نخيـتـه =
أركب على اللي دوب دارت بلوفه=
جيـبٍ جديـدٍ مـن البريمـي شريـتـه =
لـون السحـاب اللـي تـرادم أقنـوفـه =
لـو سلمـو فيـه الذهـب مـا عطيـتـه =
فيـه الفلـوس اللـي دفعـت مخلـوفـه=
أمشـيـكـه بـنـزيــن حــتــى مـلـيـتـه=
مـن يركبـه مركـاب غيـره يعـوفـه =
لابـرمـت سـلـفـه لليـمـيـن ولـويـتـه =
بـكـيـت يـتـيـم ٍ مونـسـلـه حـفـوفــه=
مـــن عـمــةٍ فـــي بيـتـهـا مبتلـيـتـه =
جيـبٍ مـن اللـي فالخليـج معـروفـه=
تمشي وتآصل والتعـب مـا شكيتـه =
جــود مفاتيـحـه وجـــود أزروفـــه =
ومـا جـاك عنـدي لا تعايـر لزيـتـه =
تـلــه ولا يـنـتــل تــلــت أعـنـوفــه=
ولا عقب العارض وراك وهويتـه =
خـل المواتـر مـن وراك محـذوفـه=
وزودلــه البنـزيـن ليـامـن زويـتــه =
وللـخـط حــده لا تـنـاوش أكـتـوفـه=
وترى الطريـق ليـا صلبتـه طويتـه =
وأمانتـك راعـي السفـاري يطـوفـه=
مسـمـوح لـونـك بـرجـلـك كـويـتـه=
عنه الهواء توحيه صوت معزوفه=
ثـم أحرفـه مـع خـط لبخـه حويـتـه =
ذب النفـود ونجـد قـدمـك أحتـوفـه =
ولا عقـب القرنـه وصلتـه وجيـتـه =
أقلـط علـى اللـي مـا تعـدد ضيوفـه =
غـازي سلايـل عـون قدمـك لفيتـه =
عطه الرساله عقب تآكـل خروفـه =
وأستأذن اللي يرفـع الـراس صيتـه =
وليتـه يفكـك عـقـب مـوفـا حلـوفـه=
والجيـب لـولا لازمــي مــا جنيـتـه =
القاف يطـرب يـوم غـازي يحوفـه =
لـيـتـه يجـاريـنـي لـيـامـن دعـيـتــه =
قيفـان شـعـرك يالعتيـبـي شخـوفـه=
يــا حـلـو قـافـك يالشـلـي لانـويـتـه =
والشعـر لـه بيـن النشامـا طـروفـه =
وأنـا بحثـت اللـي بصـدري كنيـتـه =
الـعــام أزيـــن للقـصـيـده بــروفــه =
واليـوم أسويهـا علـى الـلـي بغيـتـه =
وأليـا هويـت القـاف مامـن كلـوفـه =
كـــم راح قـــافٍ للنـشـامـا نحـيـتـه =
وبنات فكـري فالقصيـده أمصوفـه=
والقاف يشـرح خاطـري لا هويتـه =
وقـلـبـي مولـعـنـي وأدور شـفـوفـه =
ولا شفتلـي رجـم ٍ طـويـل ٍ رقيـتـه =
وعديـت فـي رجـم ٍ كبـار ٍ أدفوفـه=
عسـر ٍ علـى الراقيـن وأنــا قفيـتـه =
مــن كــل يـمـه نـابـيـاتٍ أردوفـــه =
هبـت عـلـي الـنـود حـيـن أعتليـتـه =
وقامـت عيونـي كـل شـي ٍ تشوفـه=
وشماغي اللي فـوق راسـي رميتـه =
وسقت النظر لين أحتدتني أحروفه =
ولين النظر من شوف جـوه مليتـه =
والـجــو أديـــره وأتـذكــر سـلـوفـه =
جـــو ٍ مسـيـربـه وجــــو ٍ ربـيـتــه =
أصبـح خــلاوي والهبـايـب تلـوفـه =
يـآقــل حيـيـنـه ويـــا كـثــر مـيـتــه =
أبــوك دنـيـا مــا علـيـهـا حـسـوفـه =
الـلـي سكنـهـا كـنـي أشــوف بيـتـه=
وذكرتلـي وقـتٍ تقـافـت أصفـوفـه=
وبيت الشعر في خاطري مانسيتـه=
بيـتٍ مـنـول مــا تحـجـب أرفـوفـه=
كـنــه يـرحـبــك لـيـامــن نـصـيـتـه=
واليـوم عانـه بيـن طوفـه وطـوفـه=
فــي كــل قـصـر ٍ فالمديـنـة لقيـتـه=
وبيت الشعـر يبحـث خفايـا وقوفـه=
أدنـاهـن الـلـي فــي محـلـي بنـيـتـه=
لا شـفـت زولــه فالمديـنـه تعـوفـه=
لا عـاد تسـدي البيـت يلـي سديـتـه=
وحول قدم رجلـي وعجـل ٍ نكوفـه=
ولا عــاد يــوم ٍ فالطويـلـه خذيـتـه=
وبغيـت أذاود دمـع عيـن ٍ ذروفــه=
لا شــك هـلـت دمعـهـا مــا قويـتـه=
والـرجــم دايـــم لـلـمـولـع كـلـوفــه=
يامـا عـذلـت القـلـب عـنـه ونهيـتـه=
وكبـدي عـن الـزاد المقلـط عيوفـه=
أقلـط وأقـوم وزادهـم مــا شتهيـتـه=
كــم واحــدٍ لــو مــا نـوانـي نويـتـه=
والنـاس كـل مـا أسمحتلـه ظروفـه=
وعـرفـك الـيـا سيرتـلـه مــا لقيـتـه=
يأبو دخيـل الله ويـش اللـي تشوفـه=
رايـك عـن اللـي فالقصيـده قريـتـه=
رد الشـاعر / غازي بن عون
مــا هــل مـــن نـــو الـثـريـا هـتـوفـه=
لا ذعـذع الشرقـي وطاحـت سحيـتـه =
فـي تالـي المربـاع لأنــوت عطـوفـه=
أنـــوا الـسـمـاك أمـطـارهـا مقتفـيـتـه =
يـا مرحبـا مـن هيـظ نـفـس ٍ شغـوفـه=
بمـرسـول شـهـم ٍ بـالـزلايـب فـديـتـه =
مـريــر سـتــر الـلــي يـنـقـظ زلـوفــه=
حـلـو الـنـبـأ قـبــل الـقــراء لا لفـيـتـه =
خـصـبٍ جنـابـه مــا يشـوبـه نشـوفـه=
قـبـل الـقـرى يـسـق الـدريـك ويقيـتـه =
بـيـتـه يــربــون الـنـشـامـا مـضـوفــه=
الـلـي سمعـتـه عـنـه جـيــت ورأيـتــه =
حفيـدٍ شـيـخ ٍ فــي الـمـلأ بــان نـوفـه=
ريـف الضيـوف مريـر الأول عنيتـه =
حـــر ٍ مشـاهـيـر الـنـشـامـا عـلـوفــه=
قـــول ٍ تـزكـيــه الــمــلأ لا حـكـيـتـه =
ومريـر بعـده مـع رجــا الله وخـوفـه=
أحـيـا فـعـول ٍ بـعــد الأجـــداد مـيـتـه =
وعن نظم بعض الشعر نفسه عزوفه=
من بين الأهوى ألها هـوى ٍ مهتريتـه =
لا طـب سوقـه ينتـقـي مــن حـزوفـه=
يا مرير منها أوفى المحـاوي حويتـه =
ليامـن غصـن الشعـر مالـت قطـوفـه=
الـنـاس مــا تجـنـي مـثـل مــا جنيـتـه=
وإن حاز صيد الفكـر تلقـف خشوفـه=
ولا زانـلـك مـرمـى جفـيـلـه رزيـتــه =
تجيـه فـي عـز الضحـى مــا تحـوفـه=
وغصن الشعر حنيك القوسك حنيتـه =
حنـيـت شـامـخ قامـتـه رغــم أنـوفــه=
وسلـمـك كــل ٍ قـوسـك الـلـي بريـتـه=
ويا مريـر خطـك قبـل لفتـح ظروفـه=
شــذ الخـزامـى مــن شــذاه أنتشـيـتـه =
أن شـدلـه فـكــري ولـقـحـت هـنـوفـه=
وطرالـي أحـذوا حـذوك اللـي حذيتـه =
ولقـيـت حسـيـان الـقــراح مـغـروفـه=
يـا دوب مـن ماهـا صميـلـي رويـتـه =
ويا مرير وقتٍ تشتكي مـن صروفـه=
شـنــوه قـدامــي وأنـــا كــــم شـنـيـتـه =
وقـتٍ علـى السـادات يشـهـر سيـوفـه=
والــلاش والمـسـيـود حـقــق أمنـيـتـه =
داست على الأشيـاء العريقـة خفوفـه=
ورفــع لــواء البـدعـة وعــز النبيـتـه =
وبيـت الشعـر مــا بـاقـي ألا طيـوفـه=
والـلا عنـه حبـل الرجـاء قـد طويتـه =
كــم واحــدٍ حـبـه لـجـا فـــي لـجـوفـه=
يـذكــر مـقـيـلـه فــــي ذراه ومـبـيـتـه =
لا شـيـد مــا بـيـن الـزبـايـر وسـوفــه=
فــــي صــاهــدٍ خـمـايـلـه مغتـشـيـتـه=
وبـجـانـبـه زودٍ تـقــرمــز شـعــوفــه=
يــــوم الـتـبــدوي والــبــداوه بـخـيـتـه =
واليوم مـن شاطـي الحمـر لا هفوفـه=
ما شـوف بـه بيـت الشعـر لا مشيتـه =
وبعـض العـرب يقـول جعلـه ذلـوفـه=
وهــذا يلـيـق بـــه الـهـجـا لا هجـيـتـه =
يطـيـح فــي قـصـر ٍ يطـالـع سقـوفـه=
ورويــتــبـــه بـمـكـيـفـاتــه ولــيـــتـــه =
والـغــاز والـهـاتـف يـســدد كـشـوفـه=
وباقـي حصيلـه فـي فساتـيـن صيـتـه =
مـنـيـف كـنــه خـــادم ٍ عـنــد نــوفــه =
فــي مــا تـريـده مـــا يـونــي ونـيـتـه =
ونـبـا الوليـمـه يــا مـريــر محـفـوفـه=
بـعـد الظـهـر والــراس عـنـا خـذيـتـه =
قد شاب راس القاف وأعطى أكتوفه=
وطبخـت منـه الـلـي لقـيـت وشويـتـه=
ورأي عـن الموضـوع مافيـه حـوفـه=
صفيـت صافـي صفوتـه وأصطفيتـه =
قـصـيدة الـحـب ..
نشدني صديق ٍ قال : حبك ورا ما بان = ورا في الغزل ما لك بيوت ٍ مسويها
ولا لك غزل يالقرم بسم الله الرحمن = ورا كن ما تذكر هنوف مهاويها
وأنا أقول قلب ٍ ما يحب الهوى غلطان = وأبشرك والله من هنوف مصافيها
وأبعلمك وأنتَه تعوذ من الشيطان = دام النشامى تستمعني بآذنيها
أنا أحب لي حب ٍ تولع به العربان = عيال النشامى اللي طوال يمانيها
أحب الرجولة والرجولة لها سيسان = ترا ساسها لا طاب يرسي ويرسيها
وأحب الكرم وأهل الكرم والكريم معان = كريم ٍ ونفسه للمواجيب مصخيها
وأحب اشتري لي عود ٍ أزرق من الدكان = وأطيب رجال ٍ سيرت لي وأقهويها
وأحب الدلال الصفر من صنعة الرسلان = إليا دارت المجلس وماجوبها فيها
وأحب الحرار اللي لها في العشا برهان = تقضض على جول الحباري وتدميها
وأحب الحصان اللي سبق والحصان حصان = وأحب الذلول اللي تقدم براعيها
حسينة حلا يا ما لها في الحلا الاثمان = خطاة الأصيل إليا أفرحت وجه قانيها
وأحب الجيوش إليا رزمت داخل الميدان = إليا قادها القايد وهرول يباريها
وأحب الصحاري خص لا شبعت الحيران = لا بكر الوسمي وزانت مراعيها
وأحب الحلال إليا انتشر داخل الصمان = قطاعين ذود والمواتر بتاليها
وأحب البيوت اللي تظلل بها البدوان = عيال الجزيرة ساكنين بأراضيها
وأحب الخيال المدلهم لا انهمر والدان = وأحب الفياض اللي تناسف علاويها
وأحب انمزع رجلي وأشرف على الجيان = وأمد النظر في اللي عسى المزن يسقيها
وأحب الجيوب اللي تمرهد مع الخليان = تعانق طيور الجو تمشي مماشيها
وأحب الرفيق اللي وقت الشدايد بان = رفيق الرفيق ورفقته ما يخليها
وأحب الخوي اللي تجي كلمته ميزان = وزن كلمته لأجل الرياجيل تغليها
وأحب القصيد اللي حكّم على القيفان = وأحب الصفوف إليا استوت قدم واليها
وأحب السوالف وأتسمع من الشيبان = إليا وردوها بيضت وجه راويها
وأحب المثايل لا ضربها مثل راكان = وأحب العلوم الطيبة وأفتخر فيها
وأحب القصير اللي يبين لك السفطان = مثل جيرة ٍ كل المخاليق تطريها
وهي قصرة محمد إليا عدّت الجيران = له قصرة ٍ ما جالها اللي يحاليها
حياة المهادي مع مفرج جبل زومان = زحول الرجال اللي بقى ذكر ماضيها
وأحب الهنوف اللي لها في الحشا مسكان = فتاة ٍ على السنة عزاز ٍ مواطيها
ستيرة ولا تحرص على فتحت البيبان = ولا تلتفت للي يبي يلتفت فيها
وخير المناوي كلها طاعة الرحمن = لا وهني اللي صلاته مصليها
قـصـيدة الـجـيـب
يا ولي الكون يا جزل العطيّه=طالبينك فزعتك في كل شدّه
انصر أهل الدين واصلح كل نيّه=ومن جهل فالدين للإسلام ردّه
واجعل الدنيا على المسلم رخيّه=وكل بابٍ ما يفيد الدّين لدّه
انته المنّان خلاّق البريّه=وانته اللّي من جهل دينك تردّه
وانته الراعي وحنّا لك رعيّه=وانته اللّي تقصر الأجل وتمدّه
ما تهيأ يا ولي الكون هيّه=يا عظيم كاشفٍ عبدك وسدّه
يا بنات الفكر دقن لي تحيّه=ان بغيتن غصب وان جيتن مودّه
مثلما تضرب تحيّه عسكريّه=حضّرن عندي علومٍ مستجدّه
وصفن المعنى مثل صف السريّه=وكل واحد خلن الثاني يشدّه
صفّن القيفان صفّه بالسويّه=ويتبين كل قافن من مشدّه
وعقب هذيه وهذيه وذيّه=جايبٍ لي حبلٍ لا شرّق نمدّه
رابط لي بداخله عشرين ليّه=كل ليّه من وقع فيها تشدّه
وكم قافن ما نرده عن نويّه=وكم قافن نلحقه حتى نصدّه
وراكب اللي ماورد فاللكون زيّه=جيبٍ أسود مصدره من يم جدّه
فاللزوم اطيب خويٍ مع خويّه=وللنظر في مدحت الفكس آر لدّه
التفت للوصف وآخذ لي شويّه=طاريٍ لي من وصوف الجيب ردّه
كن خشمه لا اعترض خشم المطيّه=وشمعته في مقدمه كبر المخدّه
وكن زوله راس ملحاً دوسريه=تلتفت يوم اوحت الراعي يودّه
والقزازه لونها ميهاف فيّه=وكن زيقه يقسم البيبان قدّه
كن خطّه في جنوبه سلب حيّه=تقل حرٍ يوم صقاره يهدّه
زين مشيه في الخلي الأصرميّه=من وراء عرق النفود المستمدّه
مع صلاة العصر والا في ضحويّه=ولا احتسى له راعي المشوار عدّه
كن جلده لا انطلق جلد برديّه=وعقبه الطاروق للمعنى نردّه
وختمها العنبر وعود الجاونيه=وريح هيل وريح مسك وريح ندّه
وكل رجلٍ مؤمن يذكر نبيّه=وكلكم صلّوا على المرسول عدّه
مجاراة لـقصيدة محمد بن فطيس ..
قصيدة بن فطيس
بعض العرب حبه يـوردك الجنـون=
ولا يوصف له غـلاة حكـاك لـه =
مايقنعه وسط الغلا لـو وش يكـون=
لو كل حرف بالحريـر يحـاك لـه =
الموت جاك وهـو تقلبـة الضنـون=
ولا لك الا الصبـر وش وداك لـه =
ان قلت ضايق قال هونهـا تهـون=
مايدري ان ضيقتك له وبكـاك لـه =
تقعد تحبه وانـت ساكـت ومغبـون=
يمكـن بيـوم يقـال مااوفـاك لـه =
وكانك مشكك هم يمون او ما يمـون=
تخيل ان عفت الصبر فرقـاك لـه =
غلا ومن فوق الغـلا ماهـوب دون =
حكاه سمعك يجبـرك بأرخـاك لـه =
ودك تحطه في العيون من العيـون=
وتبسط على رمضا الثرى يمناك لـه =
وتظله من الشمس في ظل الجفـون=
ولا يمـر اذنـه سـوى لبـاك لـه =
وتسج من غيره لو انهـم يذكـرون =
ومنين ماسجت القـدم ممشـاك لـه=
غرو يميله الترف ميـل الغصـون =
غصنً ميال ومكرمـه باسقـاك لـه =
جديله الى اقفى ستر منـه المتـون=
كني بريحه لاألتفـت لأدعـاك لـه =
كيك وعسل لكن ماهو في صحـون =
ودعاك من عين الحسود غطاك لـه=
الله لايعطـيـه نــاسً ينضـلـون =
ويستر علية مـن النحـل لا ياكلـه =
الوصف والتعبير في وصفه يهـون =
غير اطلب الله يستجيب دعـاك لـه =
وعذال قلبـك فـي محبتـه يهبـون =
سكينهم عـن قطـع حبلـه حاكلـه =
ناس عن اعراض العرب مايعرضون=
ودايم على نفس الشكـل والشاكلـه=
اللـي مـن لحـوم الاوادم ياكلـون =
وحلوقهـم دفـع البـلاء متواكـلـه =
في سلمهم اولى بالاكـل الاقربـون =
واطيبهم اللي صيدتـه شكـواك لـه =
عازمهم الشيطـان للذنـب ويجـون=
هـذا يقطـع لــه وذاك يواكـلـه =
ياجعلهم فدوة ثـر الغـض الفتـون =
اللي على الدرب الطويل خطاك لـه =
طيفه الى نام البشـر زارك بهـون =
وطيفك الى نام البشـر سـراك لـه =
حبه دفان ومقبرة خضـر الطعـون =
بين العظـام العـوج كنـك ناكلـه =
اللي كذا حبه لـو تمـوت مغبـون =
ولا لك الا الصبـر وش وداك لـه=
مجاراة مرير الحبيل ..
يالله يامنشـي مراويـح الـمـزون=
مزنٍ وبرقـه بالسمـا ضحـاك لـه =
يارب ياللـي تجعـل الكايـن يكـون=
يشكرك عبـدٍ ماجحـد عطـاك لـه =
ياشاعر المليون هيضـت الشجـون=
فابيات شعرٍ عجزهـا علـى آكلـه =
شلت العلم واهل الجزيـرة ينظـرون=
رمـزٍ وربـك فالـمـلا ولاك لــه =
لاهنت يامحمـد وشعـرك مايهـون=
والشعر ساسـك ماحـدٍ عـداك لـه =
تنحت بيوت ضمـن نـاس ينحتـون=
وفقـك ربٍ مخلـصٍ تقـواك لــه =
فيهـا طمانينـه وغاشيهـا سكـون=
والقاف يامحمد ياطيـب لقـاك لـه =
حبكتلك قافٍ على احسـن مايكـون=
وابوك قبلـك لااحتـزم حبـاك لـه =
ابوك يابن فطيـس للجزلـه زبـون=
وهذا الطريق اللي حمد وصـاك لـه=
طب البحر واسبح مع اللي يسبحون=
نقـه وبيّـن للعـرب نقـواك لــه =
ثم افتل المعنى مـع اللـي يفتلـون=
واخذ القلم واجلس على مركاك لـه =
واطلق سراحٍ للبنات مـن السجـون=
البـاب خلـك لاجلهـن فكـاك لـه =
وللشعـر نبيكـم يامحمـد تفزعـون=
ترفع عمود الشعر يوم انخـاك لـه =
والشعر يطعـن فالترايـب والمتـون=
السيف شلـه واحتـزم شلفـاك لـه =
واظرب بشلفا ذياب حتى يرضخـون=
بالله يامحـمـد عـلـى منتاكـلـه =
وجه شبـاب ٍ للمعانـي يجهلونـون=
اجـه لعلـه يستمـع نجـواك لـه =
واشـرح وعلـم عالـمٍ مايفهمـون=
واجهد ودرس في قطر من جاك لـه=
نـاسٍ تخرجهـم ونـاسٍ يدرسـون=
واعلن قرار اللي منحت عفـاك لـه=
وصوت بعال الصوت حتى يسمعـون=
فالمملكة حتـى توحّـى نـداك لـه =
وان طاولونا في عماهـم يعمهـون=
فالشعر قـدّم يالشلـي عـزاك لـه =
والشعر له في ذا الزمن عشرين لون=
مثـل الملاكـم والغشيـم يراكـلـه =
وان ماتعافى الشعر من كثر الطعون=
بالله يادكتـور ويــش دواك لــه =
وان كان مني يالعـوارف تسمعـون=
حلـوا مشاكـل عـالـمٍ متشاكـلـه =
وقولوا لراع الشعر شعره ويش يكون=
يامـوذي التاريـخ كـف اوذاك لـه =
والشاعر اللي له مع العالم شئـون=
اللي ليا شاف الخطـا صحـاك لـه =
ماينهض الشعر الردي جر اللحـون=
ولايستل البيت الضعيف حـداك لـه =
ولايستقيم القـاف والقـاف مهيـون=
حتى ايش لو قالوا يازين اغناك لـه =
يااهل المدايـح حسبكـم لاتمدحـون=
شعر الحداثة ماتحـوز رضـاك لـه =
كثـروا عساهـم فالبلـد مايكثـرون=
الا الذي جزل القصيـد اغـراك لـه =
واللي هدفهـم بالقصايـد يشحـذون=
هـذاك لاتفتـح قبـل مخبـاك لـه =
مايستحي من ضمن ناس يستحـون=
امـا نـزل والا القمـر رقـاك لـه=
قـصـيدة البارحة من لذت النوم قومت ..
البارحه من لذت النوم قومت = جاني عقب ممسيت مثل الخيالي
غطيت لي ساعه وفيها تحلمت = حلمت حلمن حافضن له توالي
حلمت في راس الطويله تقدمت = وروبع الطاروق في راس عالي
اقبل علي الصبح والنوم مانت = ولاذقت حلو النوم من ما طرالي
وصبحت مدري بالقلم ويش ليمت = وبلحق القيفان قافن يحالي
مابين حلم وعلم ياقاف قسمت = وبجمع القيفان فأول وتالي
وانا على بدع الطواريق عزمت = وسبايب الطاروق شين طرالي
ولاجاز لي نضم الطواريق درهمت = درهمت معهن وسهرني ليالي
وبرمت لي قافن اليا برمته ابرمت = وفتلت فتل مفتلات الحبالي
وانا ضميري فكثر القول حكمت = وحكمت قافن مادخل به هزالي
تسمعو في كلمتي لا تكلمت = واليا زهمتج يالقوافي تعالي
نويت اعلمكم وانا الذيب علمت = وانصح صغار السن وانصح عيالي
ضربت مثل يالي لياوحيتني لمت = ماهيب مدحه يالنشاما لحالي
لاجيتلي في مجلسن يرغب الشمت = ونمايمن مابين قيلن وقالي
لامد فنجالن شربته وكرمت = وقلت اسمحولي موعدن لي ارجالي
وانا اليا ماجازلي مجلسن قمت = اببدله لو مجلس الا لحالي
وانا على شوف النشاما ليا ابرمت = نصيت عودن فالسوالف هلالي
ومجالس العقال منها تعلمت = فيها فوايد والسوالف جزالي
واليا هرجت بهرجتن ما توهمت = ولاشفت قول الشعر جاله مجالي
شاركت معهم فالسوالف وساهمت = ورديت لي ردن بقدر السوالي
وعن السوالف لرتدا حيلها شمت = وكنيت داخل خاطري ما طرالي
افهم وأفهم وان تكلمت فهمت = وهذا الزمن مابين حالن وحالي
ودون الطلايب عن حلالي تشيمت = وافتك من العيات بوصاف مالي
ادفع ولو ماني غشيمن تغيشمت =ونعيت العيات باخر حلالي
ساموه قدامي وانا مثلهم سمت = وامشي مع الحيين مشين عدالي
ولاجات من خبلن ضعيفن تلزمت =فالصمت والمردود يلقا بدالي
والله يساعدني على مسكت الصمت = لاجات عوجا من رفيقن موالي
لاشك لا فات الزعل ماتندمت = وهذا الزمن مابين حالن وحالي
واليا بدت لي حاجتن ماترحمت = الا لولين فالشدايد يسالي
والطيب احزامك اليامن تحيزمت = ولا الردي جرفن قصيرن هيالي
ياعبد لا تندم ليا نويت واقمت = انته مدبر من عزيز الجلالي
ولاينفعك ياكود ماكان قدمت = ولا ترا دنيا العنا للزوالي
تقبلوا تحيات أخـوكـم وافي الخماش ..آخر تعديل وافي الخماش يوم 18-Jun-2008 في 12:22 AM.
« آخـــر الـــمـــشـــاركــــات »
18-Jun-2008, 12:15 AM
ديوان الشـاعـر الـكـبـير / مـريـر الـحـبـيـل
العرض العادي
