لايالحمام اللي على شجرة الراك = تزعج لحونك كل ماجاء عصيري
من الطرب ماتحسب حساب دنياك = مادام جنحانك ترف وتطيري
كف الغنا جعل المقادير تبلاك = تراي من دنياي ماني بخيري
اليا سمعت غناك يزعجني اغناك = وتشتب نيران الغضب في ضميري
وتجيني الاحداث منا ومناك = وتسري بي الذكرى وتبعد مسيري
واليا ذكرتك يازمانٍ بذكراك = حلو الكرى من نون عيني يطيري
وقامت تهل دموعها من سواياك = بسبة ثلاثٍ همهنه كبيري
ثلاث ساقني على دروب الادراك = حتى سطن بالقلب واصبح ضريري
الاوله يادار يادار وش جاك = يادارنا الواسع ذرانا الستيري
قامت ظروف الوقت تقسا وتحداك = سود الليالي شرها مستطيري
لو انها بالعمر والله لفداك = شيٍ يجي لرضاك ماهو كثيري
والثانيه يادار ياشين فرقاك = يالادمي لابدلك من مصيري
يامن تقفتك الليالي فقدناك = وتشفق على شوفك عيون الصغيري
عسى جنان الخلد دارك ومثواك = ويجيرك الله من لهيب السعيري
والثالثه ياعلم ماوالله ارداك = امحق علومٍ جبتها يابشيري
ياقلبي المحروم ماطاب مشهاك = حبل الرجاء ماتم واصبح قصيري
لاواه يادار الرضا اللي عشقناك = اليوم لاشفتك يشح تعبيري
ماغير امرك منصدم وتعداك = دنياٍ عليه فلكها مستديري
« آخـــر الـــمـــشـــاركــــات »
لا يالحمام اللي على شجرة الراك
العرض الشجري