قصيدة نمر بن عدوان - الهيـــــــــــــلا *** منتدى قبيلة عتيبة

((الدلبحي)) · 13-Feb-2005, 02:32 AM

البارحة يوم الخلايق نياما

بيحت من كثر البكا كل مكنون

قمت اتوجد وانثر الما على ما

من موق عين دمعها كان مخزون

ولى ونةٍ من سمعها ما يناما

كني صويبٍ بين الأضلاع مطعون

وإلا كما ونَّت كسير السلاما

خلّوه ربعة للمعادين مديون

في ساعةٍ قل الرجا والمحاما

في ما يطالع يومهم عنه يقفون

وإلا كما ونَّت راعبية حماما

غادٍ ذكرها والقوانيص يرمون

تسمع لها بين الجرايد حطاما

من نوحها تدعي المواليف يبكون

وإلا خلوجٍ سايبة للهياما

على حوارٍ ضايعٍ في ضحا الكون

وإلا حوارٍ نشّقوله شماما

وهي تطالع يوم جرّوه بعيون

يردون مثله والظوامي سياما

ترزموا معها وقامو يحنون

وإلا رضيعٍ جرعوه الفطاما

توفت امه قبل اربعينه يتمون

عليك يا شارب لكاس الحماما

صرفٍ بتقديرٍ من الله مأذون

جاه القضاء من بعد شهر الصياما

صافي الجبين بثاني العيد مدفون

كسوه من بيض الخرق ثوب خاما

وقاموا عليه من الترايب يهلون

راحوا بها حروة صلاة الاماما

عند الدفن قاموا لها الله يدعون

برضاه والجنه وحسن الختاما

ودموع عيني فوق خدي يهلون

حطّوه في قبرٍ غطاه الهداما

في مَهمةٍ من عد الاموات مسكون

يا حفرةٍ يسقي ثراك الغماما

مزنٍ من الرحمه عليها يصبون

جعل البخري والنفل والخزاما

ينبت على قبرٍ هو فيه مدفون

مرحوم ياللي ما مشي بالملاما

جيران بيته راح ما منه يشكون

يا وسع عذري وأن هجرت المناما

ورافقت من عقب العقل كل مجنون

أخذت أنا وياه سبعة اعواما

مع مثلهن في كيفٍ مالها لون

والله كنه يا عرب صرف عاما

يا عونة الله صرف الأيام وشلون

وأكبر اهمومي من بزورٍ يتاما

وإن شفتهم قدام وجهي يبكون

وأن قلت لا تبكون قالوا علاما

نبكي ويبكي مثلنا كل محزون

قلت السبب تبكون ؟ قالو يتاما

قلت اليتيم إياي وانتم تسجون

مع البزور وكل جرحٍ يلاما

إلاّ جروح بخاطري ما يطيبون

جرحي عميقٍ مثل جرح السلاما

إلى مكن عنه الاطبه يعجزون

قمت اتشكا عند ربعٍ عداما

وجوني على فرقا خليلي يعزون

قالوا تجوز وانس لامه بلاما

بعض العذارى عن بعضهم يسلون

قلت إنها لي وفقت بالولاما

ولو حمعتم نصفهن ما يسدون

ما ظنتي تلقون مثله حراما

ايضا ولا فيهن على السر مامون

وأخاف أنا من غاديات الذماما

اللي على ضيم الدهر ما يتاقون

أوخبلةٍ ما عقلها بالتّماما

تضحك وهي تلذغ على الكبد بالهون

توذي عيالي بالنهر والكلاما

وانا تجرعني من المر بصحون

والله لولا هالصغار اليتاما

واخشى من السّكه عليهم يضيعون

لقول كل البيض عقبة حراما

واصبر كما يصبر على الحبس مسجون

عليه مني كل يوم سلاما

عدة حجيج البيت واللي يطوفون

وصلوا على سيد جميع الاناما

على النبي ياللي حضرتوا تصلون

وسلامتكم