الحب في زمان بني هلال ... وغريسه تحب زيد الى الابد (مميز***)

[ابن نجد]

تدور هذه القصه قبل ان ينزح بني هلال عن نجد الى شمال افريقيا ، والحكاية ان بنت تدعى غريسه احبت رجل يسمى زيد وهو يحبها وتقدم لها لكن ولد عمها ( حجرها او حيرها ) وقعدت البنت ثمان سنين وهي تقابل خويها زيد بالسر بالليل اذا ناموا الناس ، وقبل الفجر ترجع لااهلها وتنام كان ماصار شي واستمرت على هذا الحال ثمان سنين ، وجاء ذاك اليوم وقابلت زيد كالعاده بالليل ولكن الي صار ذلك اليوم انها نامت وزيد نام وطلع عليهم الفجر وهم على هذا الحال .

اخو غريسه استنكر الوضع يوم صحا ولا لقى اخته بمحلها وقام يقص جرتها لين لقاها نايمه وزيد نايم جنبها وذبح زيد وقطع رجل اخته وتركها، وباليوم الثاني رجع وقطع رجلها الثانيه وباليوم الثالث رجع لها ولقاها ميته ولقاها كاتبه من دمها على حجر كبير القصيده التاليه:


قالت غريسه زين القول والبنا
جاني زماني والمقدر دهانيه

تخاويت انا وزيد وطابت ليلنا
ثمان سنين في طرابه وامانيه

ياليت زيد طاعني يوم اقوله
اسر وكل الناس بالنوم هانيه

ولاطاعني والامر مافيه حيلة
غشا زيد حلو النوم وانا غشانيه

ولا دريت الا وزيد ضحية
نعيته ولو هو حي عندي نعانيه

يوم اقطعوا رجلي تراكيت بالعصا
على قبر زيد وقلت هذا مكانيه

ويوم اقطعوا الاخرى تدربيت بجثتي
على قبر زيد وقلت ماجاه جانيه

ياحافر للقبر وسع جوانبه
وعن قبر زيد لا تبعدانيه

حطوه فوقي دافنينه هو العلا
ابي لاجا الوبل قبر زيد سقانيه

وهنا تناشد اهل زيد بان ياخذوا ثار حبيبها وان يذبحوا ثمانيه من افراد اسرتها المقربين ثأرا لزيد وان لايقبلوا بالديه :

يامدور على زيد ترا زيد عندنا
ذبيح العمر باسباب كل غانيه

لاتاخذون قضاه من البل والغنم
خذوا قضاه من اهل بيتي ثمانيه

ابوي واخواني مع عيال عمي
ذبحة هلي في عشيري تهنانيه

ارجوا ان تحوز على اعجابكم قصص بني هلال ..والمزيد قادم بأذن الله تعالى
----------------------------------------------------------
زماننا غير زمانهم وحتى نتذكر الاولين
اخوكم ابن نجد

[حسين]

الاخ ابن نجد


مشكور على جهودك ومواضيعك ومشاركاتك المميزه دائما 0


وتقبل تحياتي وتقديري لك


ولاتحرمنا من جديديك