علي بن فلاح العضياني =
سلام الله سلامٍ بالوفا يغسل قلوب الناس=بعلم الطيب الابيض ما هو بليفه و صابونه
مشاعرنا تكنّ لك الغلا من صادق الإحساس=لكنّ سعود ابو طايل يحول الشك من دونه
سعود العصيمي =
هلا يامرحبا والناس مخلوقة شعب واجناس=ومن يعلم بما فقلوبها حتـى تغسلونـه!!
نبادلك المشاعر فالحقيقة والرجاء والياس=لياسويت علم الطيب فربوعك يسوونـه!!
علي بن فلاح العضياني =
ليـا صـار الفـواد بخيـر أكيـد إنّ البـلا فـالـراس=هنا ... مدري ... هنا ... يا صاحبي علّتك مضمونه !!!
بعد ركبّـت لـك جنحـان يـا عبـاس بـن فرنـاس=لعلّ سهيل طيب ,,, يوم جيت سهيـل وش لونـه ؟؟؟
سعود العصيمي =
تلبس لك لباس غير وتقيسه بغير اقيـاس=تحسب ان الاوادم والنشامـا مايعرفونـه؟
أنا ماني بطابخ فاس ياشارب مرقة الفاس=ومن يخطي عليّه والله اني لاكحل عيونه!!!
علي بن فلاح العضياني =
على وضح النقا و الثوب ثوب العزّ و النوماس=لكنّ المشكله فاللي ترك سلمه و قانونه !!!
مع الشارع يروح و لا يلفّ لمسجد العباس=يخلي فرض ربّه و أمّة محمد يصلّونه
سعود العصيمي =
منول عملتك صافي ذهب واليوم معه نحاس = وانا لي ديدنٍ مرفوع فوق الراس ومتونه.؟؟
هذا ماهوب منا كل ما منا عريق الساس=نصلي فرضنا واطهر محل انطوف بركونه!!
علي بن فلاح العضياني =
بنوك سويسرا فيها الذهب ما تعلن الافلاس=ألا يا ربعنا عيب الكلام اللي تقولونه !!!!
ليا صار العرب عند العرب بأشكالها تنقاس=أنا شفت لك صوره في ( مجلة وجد ) مزيونه !!!
سعود العصيمي =
قبل يومين وش قال الك راع البن والمحماس = مادام انك غني وراك ماجبت اله مضمونه؟
اظن الناس ماتنقاس بعلومٍ وزين الباس = وخلاق البشر يوهب جماله من يعبدونه!!
علي بن فلاح العضياني =
فريق الحزم يلعب كل ليل و لا يجيب الكاس=و دايم ريّسه مغبون و الجمهور مغبونه
ترى الحيّاله ( مسلسل ) بطولة مانع و دواس ,=يموت المفلس المحتال قبل يسدّد ديونه
سعود العصيمي =
اظنك واحدٍ منهم ولا لك دونهم مجلاس = وماتلقاه يلقونه ومافدته يفيدونه!!
مسلسلنا مسلسل من يشيلون العلم والطاس = ماهو ب مسلسل الحياله اللي في تلفزونه
« آخـــر الـــمـــشـــاركــــات »
19-Jan-2010, 03:57 PM
العرض العادي
