سلطان بن دحيم
انت يا حاكم توصيني وانا ما ابغى وصيه = نظرتي دايم بعيد وخطوتي ما هي قصيره
واعرف اني لو بغيت اجازي السيه بسيه = والله اني لاسم الجمال واذكي بعيره
حاكم الغنامي
الوصايا والعطايا من هل الكف النديه =يبصر ابها يالعتيبي راعي العين الضريره
ماشمتنا في عبيد ولاشمتنا في خويه =قصدنا سيف الحرابه مايطلّع من جفيره
سلطان بن دحيم
العطا ما يقبلونه من يمدون العطيه = يا معلم علم اللي لد عينه في قصيره
ذمتي من نيتك يا صاحبي حاكم بريه = ودك ان النار تالع بين اهل شبه الجزيره
حاكم الغنامي
ياولد مروح خطام شعيل من يدك ليديه =وش تسوي لو نسوق اشعيل لدروبٍ عسيره
لآلبست الجوخه الحمراء وعنيت المطيه=لو سلم شيخ العرب مايسلم الفارس شويره
سلطان بن دحيم
يالعطاوي تدري انه لا عليك ولا عليه = روسنا تقدح سطر خل الجمل يكمل مسيره
ادري انك ما تهاب الموت يا زبن الونيه = البلا من دون باب الشيخ ياقف لك وزيره
حاكم الغنامي
يازهور السوق مدري يازهور المزهريه =النفل منهو يسابقني على شمة عبيره
لو تعاين في صروح المملكه والفيصليه =مابناها واحدٍ ماله حزام ولا ذخيره
سلطان بن دحيم
الزهر يذبل ليا اونس حر شمس(ن) صنقريه = يا عسى الفلاح يحم الزهر من شمس الظهيره
سود الله وجه رجل (ن) ما يعرف العنصريه = ما يعرف الواجب الغصاب وحقوق العشيره
حاكم الغنامي
تدري انه ماغدالي لا كثير ولا بليه =وادري انه ماغدالك لو كبر حبة شعيره
راح وقت الجاهلين وراح وقت الجاهليه=والحجازي في حجازه والزبيري في زبيره
سلطان بن دحيم
انت صادق مير لا تنسى الشجاعه والحميه = لو تقول لكل واحد يا ابيض الشارب مصيره
يا وجودي يا زمان(ن) فيه سيف وبندقيه = والله انا ما نشوف الحضرمي يتبع خشيره
حاكم الغنامي
الشجاعه والحميه ورث من جدي عطيه=الرجال اللي تضد القوم بسيوف شطيره
التسامح يالعتيبي ميزه النفس الغنيه=وانت نفسك عفّها ياصاحبي ماهي فقيره
« آخـــر الـــمـــشـــاركــــات »
28-May-2009, 11:53 PM
العرض العادي
