سلطان الجـذع
السلام وخير ماابدى بالسلام وبالتحيه = في طروقٍ للوفاء دعوة وللوافي دعايه
يالسعيدي ويش بعد السرج عن بنت العبيّه = عان ضلع النير يزحف كل يوم لضلع سايه
فواز السعيدي
مرحبابك عند ربعك مرحبا روحه وجيه = خير مانبدي بذكر الله ويازين البدايه !!
انت تنشدني وانا ماضاع لي سرج ومطيه = خل عينك في سماك اليامطرت تمطر سمايه !!
سلطان الجـذع
فيه كلمة من كتاب الله ومن سنة نبيّه = ذكرها ينهي الجدال ويشرح فصول الروايه
جبت لك حسنه وجاء من بعدها عشرين سيّه = مااعتبرك الا غبي لاصرت ماتتبع رضايه
فواز السعيدي
الله اكبر كل واحد قام يرسل لي خويه = والرموز مشربكة لو قلت حاجيكم حجايه !!
كان سلطان الجذع وده بفصل المشقبيه = لا يلمح لي واناعرف الكتابه والقرايه !!
سلطان الجـذع
انت ماتحمل هل الوقفة فزوع ولاحميه = مير ابا أخذ معك ساعه لو تنقص مستوايه
كيف تنكر ماذكرنا من عصور الجاهليه = ياكثر صبري عليك ومعك ياامطول عنايه
فواز السعيدي
انت تشتال الخصف ولا تشيل الجودريه ؟ = لا تقلي بندقي لا شلتها تنفض خبايه !!
مادرينا عنك ..بالله صدق؟ .. اجل هات الحذيه = يوم عصر الجاهليه عشت ماشفتك معايه !!
سلطان الجـذع
دوبي استحضرت قصة ( لا بلاك الله بعيّه ) = قمه الاعجاب عند أبليس وجهه فالمرايه
العمى ماشاف نور الشمس يوم الشمس حيه = ناقصٍ ليته يكمل بالبصيره والهدايه
فواز السعيدي
مستحيل انك تجي خارج نطاق الجاذبيه = مار لاتزعل تراني جيت جايبلك شوايه !!
انتبه ثم انتبه هذاك قيدوم السريه = قالها قدم البشر وانته تقول اقفى جدايه !!
سلطان الجـذع
ودها لهذيل ماهي ياطويل العمر ليّه = لانصيبٍ لي ولاهي يالسعيدي من رجايه !!
الكثير اللي تماري فيه فعيوني بليّه = في بداية وقتنا اللي راح والا فالنهايه
فواز السعيدي
انت لايدخلك شك ونيتك ترجع ردية = يالجذع هاذي وصايه لاتخاف امن الوصايه !!
والله انك لو لحست الكوع ماسويت زيه = مار دور غير كوعك يالجذع دور لهايه !!
لله دركما
28-Dec-2008, 05:45 PM
العرض العادي
