البواردي
سلام من بعد غيبة شهر مدري شهر وأسبوع=من سـرع الأيام ما عاد العرب تعرف عددها
إن لاح برق الحيا سويت لي عشرين مشروع=وان شح ما كل من دور على الحاجة وجـدها
الرشيدي
يامرحبا يالمسلم والحبل مثني ومربوع=وأيام غيبتك بحسابك ثلاث أيام زدها
طاح المطر وابشر إنك مانته بميت من الجوع=اشرب من المزنة اللي برقها يسبق رعدها
البواردي
دام البقا والعلم فوق الجبال الصم مرفوع= وفـّـر حسانيك واحسب للصواديف ونكدها
كانك لسود الليالي محتسي بسيوف ودروع=بالزند نوش الفتيله والبيوت ارفع عمدها
الرشيدي
الاتجاه المعاكس ينجرف مع كل موضوع=وش رايك بمن يطلع له جنازة من لحدها
ياماشي الخط عان الخط بالألغام مزروع=مير انتبه لاتقدم رجلها وتكف يدها
البواردي
مالي ومال الجنايز روح وانشـــد بكر زعزوع=وحده وصابت هدف واللي تبقــّى امر وادها
ياللي مرادك عليك اصعب من الحبة على الكوع=ام الكباير من الليلة نبا نذبح ولدها
الرشيدي
بكر بن زعزوع عود مخرف ولا عنده سنوع=الله يعينه على حل العقود اللي عقدها
قدام تذبح وتصلخ روح دور عون وفزوع=قال المثل ماتصفق كف لا صارت وحدها
البواردي
هذي هي الثانية واصل الخبر بالضم مرفوع=راجع دروسك على شان الشهادة نعتمدها
عطيتني وعد توفي سلعتك بالكم والنوع=وانا مااثق فالرجال اللي تخلى عن وعدها
الرشيدي
نقع شهادتك واشرب نقعها قرطوع قرطوع=ماتنفع ولا تضر ومن زرع حاجة حصدها
أعطيتك الحبل سالم لكن انت تقول مقطوع= اللي مغطي عيونك دمعها ولا رمدها
البواردي
يا غصن مال الهوى وانته مشيت مع الهوى طوع=هذي حقيقة وعدّاد الحقايق قد رصدها
اشره على القيض ماخلى بوسط الجحر جربوع=لا تتهم لك رجالً ما تضيّع معتقدها
« آخـــر الـــمـــشـــاركــــات »
21-Nov-2008, 01:15 AM
العرض العادي
