إن كان عندك علم ثاني يابراهيم الجذع؟

[ابراهيم الجـــــذع]

ما عليك زود

خابرك يا براك حرٍ ما كره روس الهضاب=لكن نجمك يا عميل الخير ما شفته لمع
ما هو ب أنا من يطرد اعلومٍ مثل ضوح السراب=مير أنتبه راع الطمع دايم يضيع ما جمع

التوقيع

الذم ما يهفي للأجواد ميزان=والمدح ما طول قصار الأيادي

[براك المهيدلي]

الله الله الله

انته تبا تزرع و تحصد كل ما لذ و طاب=لكن ما كل ٍ يبا يحصد ليا منه زرع
ترى البحر ماهوب يابراهيم صالح للشراب=كم واحدن طب البحور المظلمات ولارجع

[ابراهيم الجـــــذع]

أحيان تنطق بالخطا وأحيان تنطق بالصواب=لو كنت عبدٍ كل ما صلى قبل يسجد ركع
مدام تدري وش يعرضك البحر وأنته شباب=اللي سواتك ما عرفنا كم من بحرٍ قطع

[براك المهيدلي]

احيان عينك فالسما واحيان عينك فالتراب=ومرار تضحك من طرب ومرار تضحك من جزع
قال المثل كلن يفصله على قده ثياب=وانته مقاسك يابراهيم الجذع متر و ربع

[ابراهيم الجـــــذع]

الصيد اجيبه لو اشيل ام الرصاص بلا زهاب=محدٍ يسوي مثلها يا كود من شق ورقع
ثوبي على قدي مفصل لا يعيب ولا يعاب=وأنته كما اللي زاد طول الثوب وبثوبه خثع

[براك المهيدلي]

ابراهيم الجذع


صح لسانك و عز الله انك شاعر و سبع
تشرفت بلقائي معك


واعذرنا على القصور

ولاهانو المتابعين

تحياتي

[ابراهيم الجـــــذع]

صح بدنك يا الغالي

اشرف لي طال عمرك

شهاده اعتز فيها ووسام على صدري

بيض الله وجهك ما جا منك قصور

اشكرك على الدعوى