غازي الشلالحي
سلام الله سلامن يجمع العتبان والمطران=على عز ومعزه والعرب تعرف غزاويها
يقولون الرجال الضفر ناجي والكريم امعان=وانا اقول البريه كلها في حكم باريها
معجب العتيبي
هلا يامرحبا ترحيب بالمطران من عتبان=على وضح النقا مابين كاتبها وقاريها
يقولون الرجال الفعل بيّن واللسان حصان=ياطيب اللي دروب العز يعرفها ويمشيها
غازي الشلالحي
يدوم الك البقا يا شاعرن رحبت بالضيفان= نباك يسدنا عن صبت الدله وشاهيها
ترا ماكل من يبدا على راس البيان ايبان=ولا كل المشايخ فالبلد توخذ فتاويها
معجب العتيبي
سلومٍ للرجال اهل الكرم من ماضي الازمان=ولاصارت عوايد طيب مانخلف مباديها
يقولون اختلاف الوقت بيّن والحياه الوان=واقول الله يجنبنا الفتن ويبيح طاريها
غازي الشلالحي
عصى موسى معي ماباقي الا خاتم اسليمان=وانا لا شفت معجب قلت جينا في حراويها
منول يالعتيبي ماتغير شوكة الميزان=وتالى الوقت اشوف الحبل يلعب في علابيها
معجب العتيبي
يعز الخيل مركزها ليامن طبت الميدان=ياغازي قدّم المجهود وافرح في تواليها
امنول سنة الهادي ونور الحق فالقرأن=يدل الناس واليوم الفتن قامت تباريها
غازي الشلالحي
ليا جت للعزاوي في نهار الملح والدخان= نضويها نسرحها . نسرحها نضويها
مخطط والمخطط مثل خط محمد جيهمان= يصلي له صلاة يالعتيبي ما نصليها
معجب العتيبي
ليا جت للعزاوي يالمطيري فانشد العربان=من اللي في كبود القوم يوجعها ويكويها
صحيح ان الزمن يكتب فعول القوم فيما كان=لكن الخوف مٍن مًن فعلته لابد يخفيها