ديوان الشاعر الكبير / عباس بن صالح الغبيوي العتيبي

[محمد العتيبي]

بسم الله الرحمن الرحيم



يسرني أن اقدم لكم ديوان أحد شعراء قبيلة عتيبة ..

شاعر قصائده يسهل على القارئ أو السامع حفظها لسلاستها وملامستها للقلب ..

هو شاعر يلاحظ المتلقي قوة ابياته وجزالتها ..

فليس غريب ذلك عليه ..

هو الشاعر / عباس بن صالح الغشيا الغبيوي العتيبي .






قصيده اجتماعيه ..



عشنا و شفنا بالتجارب مع الناس = دور الفلك للخلق تعليم ودروس

ياما نهجنا مع الشفاليت غطاس = وياما عكفنا بالمساجد كما القوس

كم صاحب يضحك ليا جاك سواس = حقد المرض بالصدر والقلب متروس

يلحق وذا الموذي من الطبع والساس = لو جامل المشوار ينكس على الدوس

رافقتهم بالصدق ودروب الاتعاس = ورافقت خطلان الايادي بناموس

ياحيف يا وقتٍ مضى كله ادماس = مرت على المثلوم مع كل هاجوس

مرت كما الغيمه بسوهاج وانعاس = والرزق في وجه الصعاصيع مكبوس

لو جمْع الدنيا بشيكات واكياس = مخه ضعيف وبيرق العز منكوس

خطو الكديش اللي تملس تملاس = ثوبه نظيف وباقي الجسم محيوس

لا ترقبه لو شد نفسه بالالباس = الحنضله يُعرف طعمها وجع روس

ووزن التنك مع قيمته مايجي ماس = وان جيت له محتاج يطبخ لك الفوس

يبا المرق من صافي الجب والباس = ويالله ياللي ترزق النمل والسوس

من غير قوه كيْف البطن والراس = يفرس وياكل ماطلب زاد منحوس

ترزق هل الشيمات في كل مرواس = تلقى الوناسه عندهم جد ومروس

اهل الكرم والجود ساس على ساس = دايم مع الفرجات غزاي وعسوس

وسوالف يطرب لها البال تراس = حبوس الرجال اللي تدوس الردي دوس








من هضاب الشعب ليا تل المسيلي = ارتوت بالسيل من ناشي سحابه

اتبع البراق في يومي وليلي = وانشد الطراش عن علمن لفا به

وربعت كل المفالي والدحيلي = من هماليل المطر سالت هضابه

ياطيور الريف غني بالمسيلي = في زهور الورد والخبرا شرابه

وامتلت كل الفياض مع الشتيلي = ما حلا والعشب شرق لك ثيابه

ديرتي والله ماحط الها بديلي = ديرتي في نجد مانبغى اللهابه

صابرٍ بالسيف ومطويٍ صميلي = ماهنيت العيش ولا نطلب شرابه

صابرٍ لظروف وظروفٍ تزيلي = والحياه ابها تمادي وانقلابه

يا محمد جهز اغراضك وشيلي = ودخل الموتر وصفوا لي خرابه

شغل الموتر وعجل بالرحيلي = وان نويت تروح قلل في زهابه

لا تحمل فوق جمسك بالثقيلي = وانهش الموتر كما نهش الذيابه

لا تنام ولا تهوجس بالمقيلي = راسك المطنوخ شده بالعصابه

وصل الموتر منجين الدخيلي = في سلام اللي تحامض في شرابه

من حرار في مواكرها الطويلي = من سلالة جدنا واللي قرابه

واشرب الفنجال في مجلس دليلي = زعفران وهيل ولا فيها سرابه

والعشا بعد العشا كبشٍ جليلي = في صيااني ربعتي تلقى المثابه

طبعهم معروف في كسب الجميلي = يكرمون الضيف وكلمة ياهلا به






عقلٍ بلا تفكير عساه للطمس = يسرح ويمسي في مكانه عماوي

وقلبي كما البلور ما يقبل اللمس = حساس مثل الشاش يلقط بلاوي

يصدي من اللوعات ويحرق من الحمس = وادارجه مع كل درب متساوي

يزعل من اللكزات وياجع من الرمس = واعالجه بالصبر طب المداوي

ومقعادنا بالرجم في حارق الشمس = اخير من قصرٍ سكنته فداوي

اتابع الصدات ودروبها عمس = واجري على منهاج قلبي شقاوي

واحاول المصماد وحبالنا مرس = من قدرة المولى شديد العراوي

واضلع من الرجلين والشوف بالكبس = لحق الكبر بالجسم ماعاد ياوي

كم مرة عديت رجمٍ مع الطعس = امشي على الرجلين بعزم ورهاوي

واليوم ياربعي عشري بقت خمس = تخالفت دعواي والليل ضاوي




قصيده يرد بها على الشاعر / سطام بن مغيرق العصيمي ..




سطام يشكي من دواليب الايام = جاني شريطه والسراير خفيه

لا باس يابو زيد يافتح الاقرام = ياللي مع الضيقات يلْحق خويه

ذيبٍ سعى بالمرجله واحفى الاقدام = ماذاق لذ النوم بصف الوليه

زيزوم عيراتٍ سريعات وولام = ليا عطى اللاهوب وارضٍ خليه

وفي ديرة العدوان جاء حزم لزام = ثم وايق السبْار وشاف الرعيه

واشر لهم في حزةٍ طيرها حام = كلن يبا النوماس ويحذ الحذيه

ثم زعزعوا بالصوت عاصم وعصام = ولا يرتخي بالهوش كود الهفيه

بمسلباتٍ صوتها يرزم ارزام = ومضرابها بالشيك ولا الاديه

وعيْوا على الخلفات مقعد وسطام = لو الطلب لحقوا بقومٍ لضيه

ربعي هل العادات في صد الاروام = ان شبت الهيجا ويبس الشفيه

يفرح بهم من حده القلْ منضام = وان صوتوا بالجد يااهل الحميه

ترمي بفرسانٍ مصاليت وحيام = يردون حوض الموت ورد الضميه

ان جاء نهارٍ فيه بايع وسوام = ياما حلا قطع النمش بالسريه

من لابتن يوم اللقاء حظها قام = خاضت حرايب نجد في كل هيْه

وانشد هل المعروف وتكفيك الاعلام = ربعن على ظهور الرمك صيرميه



قصيده غزليه ..

مطلبي من روق ياعبيد بدويه = من سلالة جدنا ماهي لفايق

ربعت هرمول وتشف في ضريه = فوق ( بكس ) ما نقل هرش وعلايق

ثابته يا عبيد بالميه بميه = ما طلبت شهود ولا نطلب وثايق

من بنات العود ماهيب حضريه = صافيه بالعقل والدين متناسق

تكرم الجيران وتضم الرعيه = من وهايب ربنا ماهي بوايق

تعرف المعروف وتكب الخطيه = صوره رب الملأ وسط الخلايق

ادعج العينين ورموشه ضفيه = تذبح العشاق في كل الطرايق

يا سخيف الخصر لا تشره عليه = شايب راسي وضيعت الحقايق

واهني اللي تهنأ بالعطيه = من ولي العرش رزاق الخلايق

قايمٍ حظه ولا يبغى دعيه = قارنه بهديب شيال العلايق

والعطا من ربنا يااهل العطيه = جنةٍ عرض السما فيها حدايق

وارجو العراف في كف الزريه = ذايقٍ لدغه ودبت بالعرايق

في حياتي ماتهنيت بمطيه = اركب الحرثون ولا ذقت الرقايق

مطلبي بااهل الركايب عدمليه = من بنات شعيل فازت بالسبايق

والسلام مع السلام لكم تحيه = ياربوعي والجماعه والرفايق

التوقيع

للتواصل عبر twitter تويتر al_bargawy@